ʼE Gāue Te Laumālie Māʼoniʼoni ʼi Te Fakatupu!

“ ʼAki te lea ʼa Sehova ko te lagi totonu neʼe fakatuʼu, pea ʼaki te mālohi ʼo tona gutu tonatou kautau fuli.”—PES. 33:6.

1, 2. (a) ʼAki te temi, neʼe tuputupu feafeaʼi te mahino ʼaē ʼa te tagata ʼo ʼuhiga mo te lagi pea mo te kele? (b) Koteā te fehuʼi ʼaē ʼe tonu ke tou tali kiai?

 KUA hili nei kiai taʼu e 100 tupu, neʼe tui te ʼu tagata popoto e tokolahi neʼe maʼu ʼi te ʼatulaulau te fakapupuʼaga fetuʼu pē e tahi ʼe higoa ko te Voie lactée. ʼI ʼanatou toe faihala leva ki te lahi ʼaupitō ʼo te ʼatulaulau! Kua tou ʼiloʼi ʼi te temi nei, ʼe maʼu ʼi te ʼatulaulau ia te ʼu fakapupuʼaga fetuʼu e lauʼi 100 miliale tupu, pea ko fetuʼu e lauʼi miliale ʼe maʼu ʼi ʼihi ʼu fakapupuʼaga fetuʼu. Logolā kua fakaʼaogaʼi te ʼu meʼa fakaʼaʼata mālohi, ʼe kei tuputupu ai mo te ʼu fakapupuʼaga fetuʼu ʼaē kua ʼiloʼi ʼi te temi nei.

² Ohagē pē ko te tuʼakoi ʼo te poto fakatagata ʼo ʼuhiga mo te lagi ʼi te taʼu 1905, neʼe toe fēia ʼo ʼuhiga mo te kele. ʼE moʼoni, ko te hahaʼi ʼaē neʼe māʼuʼuli ʼi te sēkulō ʼaenī kua hili, neʼe natou ʼiloʼi lelei age te ʼu faʼahi ʼaia ʼi tanatou ʼu kui. Kae iā ʼaho nei, kua lelei age te mahino ʼaē ki te taulekaleka ʼo te maʼuli pea mo te ʼu faʼahiga gāue ʼo te kele moʼo taupau ia te maʼuli. Pea ʼe mahino papau ia ʼe lahi age anai ia tatatou ako ʼaē ʼo ʼuhiga mo te kele pea mo te lagi ʼi te ʼu taʼu ʼaē kā haʼu. Kae ʼe lelei tāfito ke tou fai te fehuʼi ʼaenī: ‘Neʼe kamata feafeaʼi te ʼu meʼa fuli ʼaia?’ ʼE feala ke tou ʼiloʼi te tali ki te fehuʼi ʼaia ʼuhi pē he neʼe fakahā e te Tupuʼaga te tali ʼi te Tohi-Tapu.

Te Milakulo ʼo Te Fakatupu

3, 4. Neʼe fakatupu feafeaʼi e te ʼAtua te ʼatulaulau, pea ʼe fakakolōliaʼi feafeaʼi ia ia e tana ʼu gāue?

³ ʼE fakamahino ʼi te ʼu ʼuluaki palalau ʼaenī ʼi te Tohi-Tapu pe neʼe tupu feafeaʼi te ʼatulaulau: “ ʼI te kamataʼaga neʼe fakatupu e te ʼAtua ia te lagi pea mo te kele.” (Sen. 1:1) Neʼe mole heʼeki ʼi ai he meʼa ʼi muʼa ʼo te fakaʼaogaʼi e Sehova ia tona laumālie māʼoniʼoni, ia tona mālohi gāue, moʼo fakatupu te lagi, mo te kele, pea mo te tahi atu ʼu meʼa ʼi te ʼatulaulau. Ko he tagata tufuga ʼe ina fakaʼaogaʼi ia tona ʼu nima pea mo tana ʼu meʼa gāue moʼo faʼu ʼo he ʼu meʼa, kae ko te ʼAtua ʼe ina fekauʼi ia tona laumālie māʼoniʼoni moʼo fakahoko ia tana ʼu gāue lalahi.

⁴ ʼI hona ʼaluʼaga fakatā, ʼe ʼui ʼi te Tohi-Tapu ko te laumālie māʼoniʼoni ʼe ko te “kauʼi tuhi” ʼo te ʼAtua. (Luka 11:20; Mat. 12:28) Pea ko “te gāue ʼo tona ʼu nima,” te ʼu meʼa ʼaē neʼe fakatupu e Sehova ʼaki tona laumālie māʼoniʼoni, ʼe natou fakakolōlia lahi kiā te ia. Neʼe hiva fēnei te tagata fai pesalemo ko Tavite: “ ʼE kalagaʼi e te lagi te kolōlia ʼo te ʼAtua; pea ko te laulahi ʼo te lagi ʼe ina fakahā te gāue ʼo tona ʼu nima.” (Pes. 19:1) Koia, ʼe fakamoʼoni e te fakatupu ki te mālohi fakaofoofo ʼo te laumālie māʼoniʼoni ʼo te ʼAtua. (Loma 1:20) ʼO feafeaʼi?

ʼE Mole He Gataʼaga ʼo Te Mālohi ʼo Te ʼAtua

 5. Kotou tuku mai he faʼifaʼitaki ʼo ʼuhiga mo te mālohi fai fakatupu ʼo te laumālie māʼoniʼoni ʼo Sehova.

⁵ Ko te lahi ʼaupitō ʼo totatou ʼatulaulau ʼe ko he fakamoʼoni ʼaia ki te mole he gataʼaga ʼo te mālohi ʼo Sehova. (Lau ia Isaia 40:26.) Tou fakakaukauʼi age muʼa te laʼā. Ko totatou laʼā, ʼaē ʼe ko he fetuʼu ʼe vaha mo te kele iā kilometa e 150 miliona tupu, ʼe vela ʼaupitō. Kae logolā te lahi ʼaupitō ʼaē ʼo te vela ʼo te laʼā, ʼe vaha lelei ia mo te kele ʼo feala ai ke hoko atu te maʼuli ʼo te ʼu meʼa maʼuli fuli ʼi te kele. ʼE mahino ia neʼe ʼaoga ke ʼi ai he mālohi fakaofoofo moʼo fakatupu te laʼā pea mo te tahi age ʼu lauʼi miliale fetuʼu fuli. Ko Sehova ʼe ina maʼu te mālohi  ʼaia ʼaē neʼe ʼaoga moʼo fai te faʼahi ʼaia—pea ʼe kei toe age lā tona lahi.

6, 7. (a) He koʼē ʼe tou lava ʼui ai neʼe fakaʼaogaʼi e te ʼAtua ia tona laumālie māʼoniʼoni ʼi hona ʼaluʼaga fakatokatoka? (b) Koteā ʼaē ʼe ina fakahā mai neʼe mole tupu fakafokifā pē te ʼatulaulau?

⁶ ʼE tou sio ʼi ʼotatou tafa te ʼu fakamoʼoni ki te fakaʼaogaʼi e te ʼAtua ia tona laumālie māʼoniʼoni ʼi hona ʼaluʼaga fakatokatoka. Tou toʼo he faʼifaʼitaki: Ko te ʼu foʼi palō lanu kehekehe ʼe tuku ʼi takotou kiʼi puha. ʼE kotou luluʼi te kiʼi puha ʼaia ʼo fefioʼaki lelei ai te ʼu foʼi palō. Pea ʼe kotou huaʼi fuli leva te ʼu foʼi palō ki tuʼa. ʼE kotou ʼamanaki anai koa ʼe fakatahi te ʼu foʼi palō ʼo mulimuli ki tonatou lanu, ohagē lā ke fakatahi te ʼu foʼi palō ʼuʼui, ʼo fēia mo te ʼu foʼi palō legalega, pea mo te tahi ʼu foʼi palō ʼaē? Kailoa ia! Kapau ʼe mole he tahi moʼo fakaʼaluʼalu lelei te ʼu meʼa pea ʼe iku tuʼumaʼu pē ia ki te maveuveu. ʼE tali te faʼahi ʼaia e te hahaʼi ohagē ko he moʼoni.

⁷ Kae kā tou hiki ake totatou ʼu mata, pea mo fakahaga te ʼu meʼa fakaʼaʼata ki te lagi, koteā ʼaē ʼe tou sisio kiai? ʼE tou sisio ki te ʼu fakapupuʼaga fetuʼu lalahi mo māʼoluga pea mo fakatokatoka lelei, mo te ʼu fetuʼu, ʼe natou feʼoloʼaki fuli ʼo tahi mulimuli pē ki tona tuʼulaga totonu. Ko te fakatokatoka lelei ʼaia neʼe mole feala ke tupu fakafokifā pē ia peʼe ko he fua ʼo he ʼu gāue neʼe mole fakatuʼutuʼu pe neʼe mole takitaki. Koia ʼe tonu ai ke tou fai te fehuʼi ʼaenī: ‘Ko te mālohi fea ʼaē neʼe fakaʼaogaʼi ʼi te kamataʼaga moʼo fakatupu ia totatou ʼatulaulau ʼaē ʼe fakatokatoka lelei?’ ʼE mole feala ke tou ʼiloʼi te mālohi ʼaia ʼaki pē te poto ʼa te tagata pea mo te ʼu masini gāue ʼaē neʼe faʼu e te tagata. Kae, neʼe fakahā ʼi te Tohi-Tapu ko te mālohi ʼaia ʼe ko te laumālie māʼoniʼoni ʼo te ʼAtua, te mālohi ʼaē ʼe lahi tokotahi ʼi te ʼatulaulau. Neʼe hiva fēnei te tagata fai pesalemo: “ ʼAki te lea ʼa Sehova ko te lagi totonu neʼe fakatuʼu, pea ʼaki te mālohi ʼo tona gutu tona kautau fuli.” (Pes. 33:6) Pea ʼaki totatou ʼu mata, ʼe feala ke tou sisio ki he kiʼi koga veliveli pē ʼo te “kautau” ʼaia ʼo te ʼu fetuʼu mokā tou mamata ki te lagi fetuʼuʼia!

ʼE Gāue Te Laumālie Māʼoniʼoni ʼi Te Kele

 8. Koteā te ʼu gāue ʼaē ʼa Sehova ʼe kotou ʼiloʼi moʼoni?

⁸ Ko tatatou mahino ʼi te temi nei ʼo ʼuhiga mo te nātulā ʼe veliveli ʼaupitō mokā fakatatau ki te ʼu meʼa fuli ʼaē ʼe tonu ke tou ako. ʼO ʼuhiga mo tatatou mālama siʼi ʼo ʼuhiga mo te ʼu gāue ʼo te fakatupu ʼa te ʼAtua, neʼe ʼui fēnei e te tagata agatonu ko Sopo: “Koʼenī, te ʼu tafatafa pē ia ʼo tona ʼu ala, pea koteā te muhumuhu neʼe tou logo ʼo ʼuhiga mo ia!” (Sopo 26:14) ʼI te ʼu sēkulō ki muli age, ko te Hau ko Salomone, ko he tagata neʼe poto ʼi te fakasiosio ʼo te fakatupu ʼa Sehova, neʼe ina tala fēnei: “Ko meʼa fuli, neʼe fai [e te ʼAtua] ke matalelei ʼi tona temi. Māʼia mo te ʼu temi ʼe mole ʼiloʼi hona gataʼaga, neʼe ina ʼai ki tonatou loto, ke ʼaua naʼa ʼiloʼi e te tagata te gāue neʼe fai e te ʼAtua moʼoni mai tona kamataʼaga ʼo aʼu ki tona fakaʼosi.”—Tnk. 3:11; 8:17.

9, 10. Ko te mālohi fea ʼaē neʼe fakaʼaogaʼi e te ʼAtua ʼi te temi ʼaē neʼe ina fakatupu ai te kele, pea koteā ʼihi ʼu meʼa neʼe fakatupu lolotoga te ʼu ʼuluaki ʼaho ʼaē e tolu ʼo te fakatupu?

⁹ Kae neʼe fakahā e Sehova te ʼu koga tāfito ʼo ʼuhiga mo tana ʼu gāue. Ohagē lā, ʼe tala mai ʼi te Tohi-Tapu ko te laumālie ʼo te ʼAtua neʼe gaūgaūe ʼi te fuga kele talu mai he temi ʼe mole feala hona malau. (Lau ia Senesi 1:2.) ʼI te temi ʼaia neʼe mole ʼi ai he kele moamoa, mo he mālama, pea lagi neʼe mole ʼi ai te ʼaele ʼaē ʼe feala ke tou mānava kiai ʼi te fuga kele.

¹⁰ ʼE fakamatalatala ʼi te Tohi-Tapu te ʼu gāue ʼaē neʼe fai e te ʼAtua lolotoga te fakahoahoa ʼo te ʼu ʼaho ʼo te fakatupu. Ko te ʼu ʼaho ʼaia ʼe mole ko he  ʼu ʼaho ʼe hola 24 kae ko te ʼu temi ʼe loaloaga. ʼI te ʼuluaki ʼaho ʼo te fakatupu, neʼe fai e Sehova ke kamata ʼasi te mālama ʼi te fuga kele. Ko te faʼahi ʼaia neʼe lagi kātoa ki muli age ʼi te temi ʼaē neʼe hā lelei ai mai te kele te laʼā mo te māhina. (Sen. 1:3, 14) ʼI te lua ʼaho, neʼe kamata faʼu ai te ʼaele. (Sen. 1:6) Kua maʼu leva ʼi te kele te vai, te mālama pea mo te ʼaele kae neʼe mole heʼeki ʼasi te kele moamoa. ʼI te kamata ʼo te tolu ʼaho, neʼe fakaʼaogaʼi e Sehova ia tona laumālie māʼoniʼoni ke ina fai ke ʼasi te kele moamoa ʼi te fuga tai kātoa, lagi fakaʼasi ake te kele ʼaki te ʼu mālohi ʼaē ʼi te loto kele. (Sen. 1:9) Neʼe ʼi ai te tahi ʼu meʼa fakaofoofo neʼe fakatupu ʼi te tolu ʼaho pea mo lolotoga ʼi te ʼu temi loaloaga ʼo te fakatupu ʼaē neʼe hoa kiai.

ʼE Gāue Te Laumālie Māʼoniʼoni ʼi Te ʼu Meʼa Maʼuli

11. Koteā ʼaē ʼe fakahā ʼaki te faigataʼa ʼo tatatou mahino ki te fakatupu ʼo te ʼu meʼa maʼuli, mo tonatou fakaʼaluʼalu ʼo fēia pea mo tonatou matalelei?

¹¹ Neʼe toe fakatupu e te laumālie ʼo te ʼAtua te ʼu meʼa maʼuli ʼe fakatokatoka lelei. ʼAki tona laumālie māʼoniʼoni, neʼe fakatupu e te ʼAtua te ʼu faʼahiga fuʼu ʼakau fakaofoofo kehekehe pea mo te ʼu manu kehekehe lolotoga te tolu ʼaho ʼo aʼu ki te ono ʼaho ʼo te fakatupu. (Sen. 1:11, 20-25) Koia ʼe tou maʼu ʼi te ʼu meʼa maʼuli, te ʼu tuʼuga faʼifaʼitaki ʼe hā ai te maʼuli ʼe faigataʼa tatatou mahino kiai, mo tonatou fakaʼaluʼalu ʼo fēia pea mo tonatou matalelei. ʼE fakahā ai he toe faʼu ʼe māʼoluga ʼaupitō.

12. (a) Koteā te ʼu gāue ʼaē ʼe fai e te ADN? (b) Koteā ʼaē ʼe tonu ke tou ako mai te hoholo lelei atu ʼo te gāue ʼa te ADN?

¹² Tou vakaʼi age muʼa te ADN (acide désoxyribonucléique), ko te tahi ʼo te ʼu gāue chimiques faigataʼa ʼe feala ai ke tuku holo te ʼu agaaga kehekehe ʼo he meʼa maʼuli, mai he taʼiake ki he tahi taʼiake. Ko te ʼu meʼa maʼuli fuli ʼi te kele, ʼo kau ai te ʼu mikolope, te luna, te ʼu ʼalefani, te ʼu tuʼapuhi, pea mo te tagata neʼe fakatupu mo te ADN. Logolā te kehekehe ʼaupitō ʼo te ʼu meʼa maʼuli ʼi te kele, kae ko te ADN ʼaia ʼaē ʼe mulimuli kiai tonatou ʼu agaaga ʼaē neʼe tuku holo age, ʼe mālohi pea ʼe ʼaoga moʼo taupau te kehekehe ʼo te ʼu faʼahiga meʼa maʼuli tāfito lolotoga te temi. ʼO mulimuli ki te fakatuʼutuʼu ʼa Sehova ʼAtua, ko te ʼu meʼa maʼuli kehekehe ʼi te kele ʼe natou hoko atu ai te fai ʼo tanatou gāue ʼi te faʼahi ʼaē ʼe natou māʼuʼuli ai ʼaē ʼe faigataʼa tatatou mahino ki te maʼuli ʼe tou maʼu ai. (Pes. 139:16) Ko te fakatuʼutuʼu ʼaoga ʼaia pea mo fakatokatoka lelei, ʼe ko te tahi fakamoʼoni ʼaia ko te fakatupu ʼe ko te gāue ʼa “te kauʼi tuhi,” peʼe ʼa te laumālie māʼoniʼoni ʼo te ʼAtua.

Te Fakatupu ʼAē ʼe Maʼuhiga Age ʼi Te Kele

13. Neʼe fakatupu feafeaʼi e te ʼAtua ia te tagata?

¹³ Hili kiai ni ʼu taʼu ʼe loaloaga pea mo te kua fakatupu e te ʼAtua te ʼu meʼa maʼuli pea mo te ʼu meʼa mate ʼe lahi ʼaupitō, ko te kele neʼe mole kei “fuafua noa pea mo lāvaki.” Kae, neʼe heʼeki ʼosi te fakaʼaogaʼi e te ʼAtua ia tona laumālie ki te fakatupu. Neʼe ʼamanaki ia ke ina fakatupu ia tana fakatupu ʼaē ʼe maʼuhiga age ʼi te kele. ʼI te teitei fakaʼosi ʼo te ono ʼaho ʼo te fakatupu, neʼe fakatupu e te ʼAtua ia te tagata. Neʼe fai feafeaʼi e Sehova te faʼahi ʼaia? Neʼe ina fakaʼaogaʼi ia tona laumālie māʼoniʼoni pea mo te ʼu meʼa ʼo te kele.—Sen. 2:7.

14. Koteā te ʼaluʼaga ʼaē ʼe kehekehe tāfito ai te tagata mai te ʼu manu?

¹⁴ ʼE ʼui fēnei iā Senesi 1:27: “Neʼe fakatupu e te ʼAtua te tagata ʼo mulimuli ki tona pāki, neʼe ina fakatupu ia ia ʼo mulimuli ki te pāki ʼo te ʼAtua; neʼe ina fakatupu ia nāua ko te tagata mo te fafine.” Ko te fakatupu ʼo tātou ʼo mulimuli ki te pāki ʼo te ʼAtua, ko tona fakaʼuhiga ʼaē ko Sehova neʼe ina fakatupu tātou ʼaki te fealagia ʼaē ke tou fakahā te ʼofa, ke tou maʼu te loto faʼitaliha, pea ke tou maʼu he ʼu felōgoi lelei mo totatou Tupuʼaga. Koia, ʼe kehekehe lahi ai totatou ʼuto mo te ʼuto ʼo te ʼu manu. Neʼe fakatupu tāfito e Sehova te ʼuto ʼo te tagata ke ina maʼu te fiafia ʼi tana ako ʼaē ʼo ʼuhiga mo ia pea mo tana ʼu gāue ke talu ai.

15. Koteā te ʼamanaki ʼaē neʼe tuku iā muʼa ʼo Atama pea mo Eva?

¹⁵ ʼI te kamataʼaga ʼo te hisitolia ʼo te tagata, neʼe foaki e te ʼAtua kiā Atama pea mo tona ʼohoana, ia Eva, te kele pea mo ʼona ʼu meʼa fakatalakitupua fuli ke nā mamata pea mo ako te ʼu meʼa ʼaia pea mo nā fiafia ai. (Sen. 1:28) Neʼe foaki e Sehova maʼa nāua te tuʼuga meʼa kai pea mo te palatiso ke nā māʼuʼuli ai. Neʼe feala ke nā māʼuʼuli ʼo talu ai pea ke nā liliu ko te ʼu mātuʼa ʼofainaʼi ʼa te toko miliale hōloga haohaoa. Kae neʼe mole hoko te faʼahi ʼaia.

 Tou Fakamoʼoni Ki Te Gāue ʼa Te Laumālie Māʼoniʼoni

16. Koteā te ʼamanaki ʼaē ʼe tou maʼu logolā te agatuʼu ʼa te ʼuluaki taumātuʼa?

¹⁶ Ko Atama mo Eva neʼe mole nā fakalogo ʼaki he loto fakafetaʼi ki tonā Tupuʼaga, kae ʼi tanā manatu pē ʼaē kiā nāua totonu, neʼe nā agatuʼu kiā te ia. Ko te hahaʼi heʼe haohaoa fuli ʼe natou hihifo mai iā nāua pea ʼe natou maʼuli mamahi fuli ai. Kae ʼe fakamahino ʼi te Tohi-Tapu peʼe molehi feafeaʼi anai e te ʼAtua te mamahi ʼaē neʼe tupu mai te agahala ʼo tatatou ʼu ʼuluaki mātuʼa. ʼE toe fakahā mai ʼi te Tohi-Tapu ko Sehova ʼe ina fakahoko anai ia tana fakatuʼutuʼu ʼaē ʼi te kamataʼaga. ʼE liliu anai te kele ko he palatiso ʼe fonu ai anai te hahaʼi fiafia pea ʼe mole natou māhahaki, ʼe tapuakinaʼi anai ia nātou ʼaki te maʼuli heʼegata. (Sen. 3:15) Moʼo taupau ia tatatou tui ki te ʼamanaki fakalotofīmālie ʼaia, ʼe ʼaoga kiā tātou te tokoni ʼa te laumālie māʼoniʼoni ʼo te ʼAtua.

17. Koteā te ʼu faʼahiga manatu ʼaē ʼe tonu ke tou tekeʼi?

¹⁷ ʼE tonu ke tou faikole kiā Sehova ke ina foaki mai tona laumālie māʼoniʼoni. (Luka 11:13) ʼI tatatou fai te faʼahi ʼaia, ʼe tokoni mai anai kiā tātou ke mālohi ia tatatou tui papau ʼaē ko te fakatupu ʼe ko te gāue ʼo te nima ʼo te ʼAtua. Iā ʼaho nei, kua lahi ai te hahaʼi ʼaē ʼe mole tui ki te ʼAtua pea mo te mafola ʼo te evolisio ʼaē ʼe mulimuli ki he ʼu manatu hala pea ʼe mole hona tafitoʼaga. ʼAua naʼa fakahalaʼi peʼe fakamatakuʼi tātou e te ʼu manatu hala ʼaia. ʼE tonu ki te kau Kilisitiano fuli ke natou teuteu ia nātou moʼo tekeʼi te taʼi ʼohofi pea mo te fakaneke ʼaia ʼa ʼihi.—Lau ia Kolose 2:8.

18. Mokā tou fakakaukauʼi te kamataʼaga ʼo te ʼatulaulau pea mo te mālamanei, he koʼē ʼe mole ko he manatu fakapotopoto te ʼui ʼaē ʼe mole ʼi ai he Tupuʼaga ʼe poto?

¹⁸ ʼE mahino ia ʼe fakamālohi anai tatatou tui ʼaē ki te Tohi-Tapu pea mo te ʼAtua totonu mokā tou sivisivi fakalelei te ʼu fakamoʼoni ʼaē ʼe lagolago ki te fakatupu. ʼI tanatou fakakaukauʼi te kamataʼaga ʼo te ʼatulaulau pea mo te mālamanei, tokolahi ʼe natou ʼui ʼe mole fakapotopoto te tui ʼaē ʼe ʼi ai te tahi age mālohi ʼi tuʼa atu ʼo te mālohi ʼo te ʼatulaulau. Kae kapau ʼe tou fai palalau ʼaki te faʼahiga manatu ʼaia, pea ʼe mole tou vakaʼi anai te ʼu  fakamoʼoni fuli ʼaki he manatu fakapalatahi. Tahi ʼaē, ʼe mole tou tokagaʼi anai te tahi age ʼu meʼa ʼo te fakatupu ʼaē ʼe ‘mole malau,’ ʼe fakatokatoka lelei pea ʼe ʼi ai tonatou fakatuʼutuʼu. (Sopo 9:10; Pes. 104:25) ʼI totatou ʼuhiga Kilisitiano, ʼe tou tui papau ko te mālohi gāue ʼaē neʼe ʼaoga ki te fakatupu neʼe ko te laumālie māʼoniʼoni ʼaē neʼe fakaʼaogaʼi e Sehova ʼaki tona poto.

ʼE Gāue Te Laumālie Māʼoniʼoni ʼi Tatatou Tui ʼAē Ki Te ʼAtua

19. Koteā ʼaē ʼe fakamoʼoni ai kiā tātou ʼe maʼuli moʼoni te ʼAtua pea mo te gāue ʼo tona laumālie māʼoniʼoni?

¹⁹ ʼE mole ʼaoga hatatou ʼiloʼi ia meʼa fuli ʼo ʼuhiga mo te fakatupu ke feala ai hatatou tui ki te ʼAtua, pea mo ʼofa mo fakaʼapaʼapa loloto kiā te ia. Ohagē ko he fakakaumeʼa mo he tahi, ko te tui ʼaē kiā Sehova ʼe mole fakatafito pē ia ki he ʼu fakamoʼoni. Ohagē pē ko he felōgoi ʼa he ʼu kaumeʼa ʼe tuputupu ʼi tanā feʼiloʼiʼaki lelei age, ʼe toe tuputupu mo tatatou tui ʼaē ki te ʼAtua ʼi te lahi ʼaē ʼo te ʼu meʼa ʼe tou ako ʼo ʼuhiga mo ia. Koia, ʼe tou mahino ai ki te maʼuli moʼoni ʼa te ʼAtua mokā ʼe ina tali ki tatatou ʼu faikole pea ʼe tou fakatokagaʼi te ʼu fua lelei ʼo tatatou maʼuliʼi ia tana ʼu pelesepeto ʼi totatou maʼuli. ʼE tou fakaovi lahi kiā Sehova ʼi tatatou sisio ki te ʼu fakamoʼoni ʼaē ʼe takitaki tātou e te ʼAtua, ʼe ina puipui tātou, ʼe ina tapuakiʼi tatatou ʼu faiga ʼi tatatou tauhi kiā te ia, pea ʼe ina foaki mai te ʼu meʼa ʼaē ʼe ʼaoga kiā tātou. Ko te ʼu meʼa fuli ʼaia ʼe ko he fakamoʼoni mālohi ʼo ʼuhiga mo te maʼuli moʼoni ʼa te ʼAtua pea mo te gāue ʼo tona laumālie māʼoniʼoni.

20. (a) He koʼē neʼe fakatupu e te ʼAtua te ʼatulaulau pea mo te tagata? (b) Koteā anai te ʼu fua mo kapau ʼe tou haga mulimuli ki te takitaki ʼa te laumālie māʼoniʼoni ʼo te ʼAtua?

²⁰ Ko te Tohi-Tapu ʼe ko he faʼifaʼitaki fakaofoofo ʼo te fakaʼaogaʼi ʼaē e Sehova ia tona mālohi gāue, heʼe ko tana ʼu tagata faitohi neʼe natou “palalau . . . ʼaki te fakatotonu ʼa te ʼAtua, he neʼe taki nātou e te laumālie māʼoniʼoni.” (2 Pet. 1:21) Ko te ako fakalelei ʼo te Tohi-Tapu ʼe feala ke tuputupu ai ia tatatou tui ʼaē ko te ʼAtua ʼe ko ia ʼaē neʼe ina fakatupu ia meʼa fuli. (Fakh. 4:11) Ko Sehova neʼe liliu ko te Tupuʼaga moʼo fakahā ia tona kalitātē maʼuhiga ʼaē ko te ʼofa. (1 Soa. 4:8) Koia, tou faiga lahi ʼo tokoni ki ʼihi ke natou ako ke natou ʼiloʼi tatatou Tamai ʼofa ʼaē ʼe ʼi selō pea ko totatou Kaumeʼa. Kiā tātou, kapau ʼe tou haga ʼo tuku ke takitaki tātou e te laumālie māʼoniʼoni ʼo te ʼAtua, ʼe tou maʼu ai anai te pilivilēsio ʼaē ke tou ako ʼo ʼuhiga mo ia ʼo talu ai. (Kal. 5:16, 25) ʼOfa pē ke tou tahi haga ako ʼo ʼuhiga mo Sehova pea mo tana ʼu gāue lalahi pea ke tou fakahā ʼi totatou maʼuli te ʼofa lahi ʼaē neʼe ina fakahā ʼi te temi ʼaē neʼe ina fakaʼaogaʼi ai ia tona laumālie māʼoniʼoni moʼo fakatupu te lagi, mo te kele pea mo te mālamanei.

ʼE Feala Koa Hakotou Fakamahino?

• Koteā ʼaē ʼe tou ako mai te lagi pea mo te kele ʼo ʼuhiga mo te fakaʼaogaʼi e te ʼAtua ia te laumālie māʼoniʼoni?

• Koteā te ʼu fealagia ʼaē ʼe tou maʼu mai totatou fakatupu ʼaē ʼo mulimuli ki te pāki ʼo te ʼAtua?

• He koʼē ʼe ʼaoga ke tou sivisivi te ʼu fakamoʼoni ʼo te fakatupu?

• Ko te ʼu ʼaluʼaga fea ʼaē ʼe feala ke tuputupu ai tatatou ʼu felōgoi mo Sehova?

[ʼU fehuʼi ʼo te ako]

[Paki ʼo te pasina 13]

Koteā te ako ʼe tou maʼu mai te fakatokatoka ʼaē ʼe tou sisio kiai ʼi te ʼatulaulau?

[Haʼuʼaga ʼo te paki]

Stars: Anglo-Australian Observatory/David Malin Images

[Paki ʼo te pasina 15]

He koʼē ʼe maʼu te ADN ʼi te ʼu meʼa fuli ʼaenī?

[Paki ʼo te pasina 16]

Kua kotou teuteu koa ke feala hakotou lagolago ki takotou tui?