Tou Manako Ki Te Faitotonu ʼAki Totatou Loto Kātoa
Tou Manako Ki Te Faitotonu ʼAki Totatou Loto Kātoa
“Neʼe ke manako ki te faitotonu.”—PES. 45:7.
1. Koteā ʼaē kā tokoni mai kiā tātou ke tou haʼele ʼi “te ʼu ala foufou ʼo te faitotonu”?
ʼAKI tana Folafola pea mo tona laumālie māʼoniʼoni, ʼe taki e Sehova tana hahaʼi ʼi “te ʼu ala foufou ʼo te faitotonu.” (Pes. 23:3) Kae ʼi totatou ʼuhiga heʼe haohaoa, ʼe tou tautau fakamamaʼo mai te ala ʼaia. Ko takita toe liliu mai ʼaē ʼo fai te meʼa ʼe totonu, ʼe ko he faʼahi ʼe mole faigafua tona fai. Koteā ʼaē kā tokoni mai kiā tātou ke tou lava fai te faʼahi ʼaia? Ohagē ko Sesu, ʼe tonu ke tou manako ki te fai ʼo te meʼa ʼaē ʼe totonu.—Lau ia Pesalemo 45:7.
2. Koteā ʼaē ʼe fakaʼuhiga kiai “te ʼu ala foufou ʼo te faitotonu”?
2 ʼE fakaʼuhiga kiteā ia “te ʼu ala foufou ʼo te faitotonu”? Ko he ala foufou ʼe ko he ala ʼe fāveliveli peʼe ko he ala ʼe fakapikopiko. Ko “te ʼu ala foufou” ʼaia ʼe fakaʼuhiga ki te ʼu lēkula faitotonu ʼa Sehova. ʼI te ʼu lea Fakahepeleo pea mo Fakakeleka, ko te “faitotonu” ʼe fakaʼuhiga ki hakita mulimuli kātoa ki te ʼu pelesepeto ʼo ʼuhiga mo te aga ʼaē ʼe tonu ke fai. Mai tona ʼaluʼaga ʼaē ko Sehova ʼe ko “te nofoʼaga ʼo te faitotonu,” koia ʼe fiafia ai ia tana kau ʼatolasio ʼi te haga kiā te ia moʼo ʼiloʼi te ala faitotonu ʼo ʼuhiga mo te aga ʼaē ʼe tonu ke fai, ʼaē ʼe tonu ke natou mulimuli kiai.—Sel. 50:7.
3. Koteā ʼaē ʼe tonu ke tou fai ke lahi age te ʼu meʼa ʼaē ʼe tou ako ʼo ʼuhiga mo te faitotonu ʼa te ʼAtua?
3 ʼE hoki leleiʼia kātoa tātou e te ʼAtua mo kapau ʼe tou faiga ʼaki totatou loto kātoa ke tou mulimuli ki tana ʼu lēkula faitotonu. (Teu. 32:4) ʼE kamata te faʼahi ʼaia ʼaki tatatou ako ia meʼa fuli pē ʼaē ʼe tou lavaʼi ʼo ʼuhiga mo Sehova ʼAtua mai te Tohi-Tapu, ia tana Folafola. ʼI te lahi ʼaē ʼo te ʼu meʼa kā tou ako ʼo ʼuhiga mo ia, ʼe toe lahi age mo tatatou fakaovi ʼaē kiā te ia ʼi te ʼaho fuli, pea ʼe toe lahi age anai mo tatatou manako ʼaē ki tana faitotonu. (Sake 4:8) ʼE tonu foki ke tou toe tali mo te takitaki ʼa te Folafola ʼa te ʼAtua ʼaē neʼe tohi ʼaki tana takitaki, mokā tou fai he ʼu tonu maʼuhiga ʼi totatou maʼuli.
Kotou Kumi Te Faitotonu ʼa Te ʼAtua
4. Koteā ʼaē ʼe fakamaʼua mai ki te kumi ʼo te faitotonu ʼa te ʼAtua?
4 Lau ia Mateo 6:33. Ko te kumi ʼo te faitotonu ʼa te ʼAtua ʼe mole gata pē ʼi hatatou fakaʼaogaʼi totatou temi ki te fakamafola ʼo te logo lelei ʼo te Puleʼaga. Ke tali lelei e Sehova tatatou tauhi taputapu, ʼe tonu ki tatatou aga ʼi te ʼaho fuli ke ʼalutahi mo tana ʼu lēkula māʼoluga. Koteā ʼaē ʼe tonu ke fai e nātou fuli ʼaē ʼe natou kumi te faitotonu ʼa Sehova? ʼE tonu ke natou “kofuʼi te ʼulugaaga foʼou ʼaē neʼe fakatupu ʼo mulimuli ki te finegalo ʼo te ʼAtua ʼi he faitotonu pea mo he agatonu moʼoni.”—Efe. 4:24.
5. Koteā ʼaē kā tokoni mai kiā tātou ke tou tauʼi ia hotatou lotovaivai?
5 ʼI tatatou faiga ʼaē ke tou maʼuliʼi te ʼu lēkula faitotonu ʼa te ʼAtua, ʼe lagi ʼi ʼihi temi ʼe tou lotovaivai ai ʼuhi ko totatou ʼu vaivaiʼaga. Koteā ʼaē kā tokoni mai kiā tātou ke tou tauʼi ia totatou lotovaivai ʼaia pea mo tou ako ke tou manako pea mo maʼuliʼi te faitotonu? (Taag. 24:10) ʼE tonu ke tou fakaovi tuʼumaʼu kiā Sehova ʼi te faikole “mo he loto ʼe moʼoni, ʼaki he tui ʼe mālohi.” (Hep. 10:19-22) Peʼe ko kita ko he Kilisitiano fakanofo peʼe kita maʼu te ʼamanaki ʼaē ke kita maʼuli ʼi te kele, kae ʼe tou tui fuli ki te sākilifisio faitotogi ʼa Sesu Kilisito pea mo te ʼu gāue ʼaē ʼe ina fai maʼa tātou ʼi tona ʼuhiga Pelepitelō Lahi. (Loma 5:8; Hep. 4:14-16) Neʼe tohi fēnei e te ʼapositolo ko Soane: “Ko te taʼataʼa ʼo Sesu . . . ʼe ina fakamaʼa ia tātou mai te agahala fuli pē.” (1 Soa. 1:6, 7) Ohagē ko tona ʼui ʼi te Tohi-Tapu, tatau aipē peʼe kua ‘liliu ʼatatou agahala ʼo kula ʼahoʼaho, kae ʼe natou toe liliu anai ʼo lanu hina ohagē ko te nive.’ ʼI fakatuʼutuʼu fakaofoofo leva neʼe fai e Sehova maʼa tātou ʼaki te sākilifisio faitotogi ʼo tona ʼAlo ʼofaina!—Isa. 1:18.
Kotou Vakavakaʼi Tokotou Teu Tau Fakalaumālie
6. He koʼē ʼe maʼuhiga ke tou vakavakaʼi totatou teu tau fakalaumālie?
6 ʼI te temi fuli pē, ʼe ʼaoga ai ke tou kofuʼi “te kofu ukamea ʼo te faitotonu,” heʼe ko te koga maʼuhiga ʼaia ʼo te teu tau fakalaumālie ʼa te ʼAtua. (Efe. 6:11, 14) Tatau aipē peʼe mole heʼeki faʼa fualoa tatatou foaki ia totatou maʼuli ʼaē kiā Sehova, peʼe kua lauʼi taʼu tatatou kau ʼaē ki te tauhi taputapu, kae ʼe maʼuhiga aipē ke tou tōkakaga ʼi te ʼaho fuli pē ki totatou teu tau fakalaumālie. Koteā tona tupuʼaga? Koteʼuhi kua kapu ifo ki te kele te Tēvolo pea mo tana kau temonio. (Fakh. 12:7-12) ʼE ʼita Satana pea ʼe ina ʼiloʼi ʼe kua nounou tona temi. Koia, ʼe ina tauʼi mālohi ai te hahaʼi ʼa te ʼAtua. ʼE tou mahino ai koa ki te maʼuhiga ʼaē ʼo te kofuʼi ʼo “te kofu ukamea ʼo te faitotonu”?
7. ʼE feafeaʼi anai tatatou aga mo kapau ʼe mahino kiā tātou te maʼua ʼaē ke tou kofuʼi ia “te kofu ukamea ʼo te faitotonu”?
7 Ohagē pē ko te puipui e te kofu ukamea ia totatou mafu, ko te faitotonu ʼe ina puipui ia totatou loto. ʼI totatou ʼuhiga agahala, ko totatou loto ʼe kākā pea mo kovi ʼaupitō. (Sel. 17:9) ʼE maʼuhiga ke tou akoako totatou loto ki te meʼa ʼaē ʼe lelei pea mo fakatonutonuʼi mai te ʼu meʼa ʼaē ʼe mole lelei, koteʼuhi ʼe falele ia totatou loto ki te meʼa ʼaē ʼe kovi. (Sen. 8:21) Kapau ʼe mahino kiā tātou te maʼua ʼaē ke tou kofuʼi ia “te kofu ukamea ʼo te faitotonu,” pea ʼe mole tou huʼi fakatemi anai totatou kofu ukamea ʼaia, ʼaki tatatou filifili ʼaē ke tou fakafiafia ʼi he ʼu meʼa ʼe fehiʼa kiai te ʼAtua, pea mole tou fakaʼamuʼamu anai ke tou fai he aga ʼe kovi. ʼE mole tou fakaʼaogaʼi anai he toe temi lahi, ʼaē ʼe maʼuhiga, ki te sioʼi ʼo te televisio. Kae ʼe tou faiga aipē anai ke tou fai te meʼa ʼaē ʼe fakafiafia kiai te loto ʼo Sehova. Tatau aipē peʼe tou higa fakatemi ki he ʼu manatu fakatagata ʼe heʼeʼaoga, kae ʼaki te tokoni ʼa Sehova ʼe tou toe tutuʼu ake pē anai.—Lau ia Tāʼaga Lea 24:16.
8. He koʼē ʼe ʼaoga ke tou maʼu “te meʼa tali tau lahi ʼo te tui”?
8 ʼE kau ʼi te ʼu koga ʼo totatou teu tau fakalaumālie ia “te meʼa tali tau lahi ʼo te tui.” ʼE feala ai ke tou “matehi te ʼu mahafu kakaha fuli ʼa te agakovi.” (Efe. 6:16) Pea ko te tui pea mo te ʼofa kiā Sehova ʼaki he loto kātoa, ʼe tokoni mai kiā tātou ke tou maʼuliʼi ia te faitotonu pea mo tou nonofo ʼi te ala ʼaē ʼe ina taki tātou ki te maʼuli heʼegata. Kapau ʼe lahi ia tatatou ako ʼaē ke tou ʼoʼofa kiā Sehova, pea ʼe toe maʼuhiga age anai kiā tātou ia tana faitotonu. Kae ʼe feafeaʼi ʼo ʼuhiga mo totatou leʼo ʼo loto? ʼE lava tokoni feafeaʼi mai kiā tātou ʼi tatatou ʼu faiga ʼaē ke tou manako ki te faitotonu?
Kotou Taupau He Leʼo ʼo Loto ʼe Lelei
9. Koteā te ʼu lelei e tou maʼu ʼi tatatou taupau he leʼo ʼo loto ʼe lelei?
9 ʼI te temi ʼaē neʼe tou papitema ai, neʼe tou kole kiā Sehova ke tou maʼu ia “he leʼo ʼo loto ʼe lelei.” (1 Pet. 3:21) Mai tona ʼaluʼaga ʼaē ʼe tou tui ki te totogi, koia ʼe haga ai te taʼataʼa ʼo Sesu ʼo ʼuʼufi ia tatatou ʼu agahala pea ʼe tou liliu ai ʼo maʼa iā muʼa ʼo te ʼAtua. Kae ke feala hatatou taupau maʼu ia tatatou nofo maʼa ʼaia, ʼe ʼaoga ke tou taupau he leʼo ʼo loto ʼe lelei. Kapau ʼi ʼihi temi ʼe tukugākoviʼi tātou e totatou leʼo ʼo loto peʼe ina fakatokagaʼi mai ʼo ʼuhiga mo he aga ʼe tou fai, pea ʼe tonu ke tou fakafetaʼi ki tana tokoni mai ʼaia kiā tātou. Ko te ʼu fakaʼiloga ʼaia ʼe fakahā ʼaki ai, ʼe mole heʼeki fakafeagai tokita leʼo ʼo loto ki takita fakaʼapaʼapa ʼaē ki te ʼu ala faitotonu ʼa Sehova. (1 Tim. 4:2) Kae ko te leʼo ʼo loto ʼe ina fai te tahi gāue maʼuhiga maʼa nātou ʼaē ʼe natou fia fai ki te faitotonu.
10, 11. (a) Kotou fakamatala he meʼa neʼe hoko ʼe fakahā ai pe koʼē ʼe tonu ke tou akoʼi totatou leʼo ʼo loto ʼaki te Tohi-Tapu? (b) He koʼē ko takita manako ʼaē ki te faitotonu ʼe ina fakatupu iā tātou he toe fiafia lahi?
10 Kā tou fai he aga ʼe kovi, pea ʼe feala ki totatou leʼo ʼo loto ke ina tukugākoviʼi tātou peʼe ke vevele kiā tātou te aga ʼaē neʼe tou fai. Ko te tūpulaga neʼe fakamamaʼo mai “te ʼu ala foufou ʼo te faitotonu.” Neʼe ina sioʼi tuʼumaʼu pē te ʼu pāki ʼe ʼasi ai te ʼu felāveʼi fakasino heʼeʼaoga, pea neʼe ina kamata fakaʼaogaʼi te toloke ʼaē ko te marijuana. Neʼe vevele ia tona loto ʼi tana kau ʼaē ki te ʼu fono pea neʼe hagē kiā ia neʼe aga fakamālualoi ʼi te temi ʼaē neʼe fai fakamafola ai, koia neʼe ina tuku ai leva tana ʼu gāue Fakakilisitiano ʼaia. Neʼe ina ʼui fēnei: “Neʼe mole au mahino neʼe ko toku leʼo ʼo loto neʼe ina tukugākoviʼi au ki te ʼu meʼa ʼaē neʼe au lolotoga fai.” Neʼe ina toe ʼui fēnei: “Lolotoga taʼu e fā, neʼe au fai te ʼu aga heʼeʼaoga.” Pea neʼe ina fakakaukauʼi leva ke toe liliu mai ki te moʼoni. Logolā tana manatu ʼaē ʼe mole fakalogo mai anai ia Sehova ki tana faikole, kae neʼe faikole ki te ʼAtua ke fakamolemole mai ki tana ʼu aga. Hili pē ʼaia minuta e hogofulu ki tana ʼosi faikole, pea neʼe ʼalu age tana faʼē ʼo fakalotomālohiʼi ia ia ke toe kau ki te ʼu fono. Neʼe ʼalu te tūpulaga ʼaia ki te Fale ʼo Te Puleʼaga pea neʼe ina kole ki te tagata ʼāfea ke ina fai tana ako. ʼAki te temi, neʼe papitema pea ʼe fakafetaʼi kiā Sehova ʼi tana haga ʼo puipui ia tona maʼuli.
11 Neʼe kua tou logoʼi koa he toe fiafia lahi ʼi tatatou lava fai te meʼa ʼaē ʼe totonu? ʼI tatatou ako ʼaē ke tou manako ki te faitotonu pea mo lahi age ia tatatou maʼuliʼi te faitotonu, ʼe tou maʼu ai anai he toe fiafia lahi ʼi te fai ʼo te meʼa ʼaē ʼe fakafiafia kiai te loto ʼo tatatou Tamai ʼaē ʼe ʼi selō. Pea kotou fakakaukauʼi age muʼa te ʼaho ʼaē kā fiafia ai te hahaʼi fuli heʼe mole hoha he meʼa ki ʼonatou leʼo ʼo loto, pea mo natou hagē pē anai ko te ʼulugaaga ʼo te ʼAtua. Koia, ke aka loloto ʼi te temi nei iā tātou te manako ʼaē ki te faitotonu pea ke fiafia ai te loto ʼo Sehova.—Taag. 23:15, 16.
12, 13. ʼE tou lava akoʼi feafeaʼi totatou leʼo ʼo loto?
12 Koteā ʼaē ʼe feala ke tou fai ke tou akoʼi ai ia totatou leʼo ʼo loto? Kā tou ako te Tohi-Tapu pea mo te ʼu tohi Fakatohi-tapu, ʼe maʼuhiga ke tou manatuʼi “ko te loto ʼo ia ʼaē ʼe faitotonu ʼe metitāsio ia ʼi muʼa ʼo [hana] tali” ki he meʼa. (Taag. 15:28) Tou vakaʼi age muʼa te fua lelei ʼo te faʼahi ʼaia mokā tou tau mo he ʼu fihifihia ʼo ʼuhiga mo he gāue. Kapau ko he gāue ʼe ʼiloga mai pē ia tana fakafeagai ʼaē ki te ʼu pelesepeto ʼaē ʼe tuʼu ʼi te Tohi-Tapu, pea ʼe tokolahi anai iā tātou ʼe tou foimo mulimuli aipē ki te takitaki ʼaē ʼe foaki mai e te kalasi ʼo te tagata kaugana agatonu mo poto. Kae kā mole tali fakahagatonu mai e te tagata kaugana agatonu mo poto ʼo ʼuhiga mo he gāue, pea ʼe tonu anai ke tou kumi te ʼu pelesepeto ʼo te Tohi-Tapu ʼaē ʼe pipiki ki te faʼahi ʼaia pea mo tou fakakaukau kiai ʼi te faikole. * Ko te taʼi fakaʼaogaʼi ʼaia ʼo te ʼu pelesepeto, ʼe toe lelei foki ki te ʼu tonu ʼaē ʼe tou fai ʼaē ʼe feala ke fakatupu tūkia ki te leʼo ʼo loto ʼo niʼihi. (1 Ko. 10:31-33) Kae ʼe tonu tāfito ke tou tokaga ki te ʼu pelesepeto ʼaē ʼe pipiki ki tatatou ʼu felōgoi mo te ʼAtua. Kapau kiā tātou ʼe maʼuli moʼoni ia Sehova, pea ʼe tou ʼuluaki fai anai te fehuʼi ʼaenī kiā tātou totonu: “Kapau ʼe au fai te gāue ʼaenī, ʼe lotomamahi ai anai koa te loto ʼo Sehova?”—Pes. 78:40, 41.
13 Kā tou teuteuʼi tatatou Tule Leʼo peʼe ko te Ako Tohi-Tapu ʼo te Kōkelekāsio, ʼe tonu ke tou manatuʼi totatou maʼua ʼaē ke tou metitāsioʼi te ʼu puani ʼaē ʼe tou vakaʼi. ʼE tou foimo fakaʼiloga fakavilivili tuʼumaʼu pē koa te tali ki te fehuʼi ʼo te ako pea mo tou hiki atu ki he tahi palakalafe? Ko te taʼi ako fēia ʼe mahino ia ʼe mole loloto ai anai ia tatatou manako ʼaē ki te faitotonu peʼe mole tou maʼu ai he leʼo ʼo loto ʼe lelei. Kapau ʼe tou loto ke tou manako ki te faitotonu, pea ʼe ʼaoga ke tou ako fakalelei te ʼu manatu ʼaē ʼe tou lau ʼi te Folafola ʼa te ʼAtua pea mo metitāsioʼi. Koia, ʼe tonu ai ke tou faiga mālohi ʼo akoako iā tātou ke tou manako ki te faitotonu ʼaki totatou loto kātoa.
Kotou Fia Kakai Pea Mo Fia ʼIʼinu Ki Te Faitotonu
14. Koteā ʼaē ʼe loto e Sehova ʼAtua pea mo Sesu Kilisito ke tou maʼu ʼi tatatou tauhi taputapu?
14 Ko Sehova ʼAtua pea mo Sesu Kilisito ʼe nā loto ke tou fiafia ʼi te temi ʼaē ʼe tou fai ai ia tatatou tauhi taputapu. Koteā te meʼa ʼaē kā ina fakatuputupu ai ia tatatou fiafia? Ko takita manako ki te faitotonu! ʼI te Akonaki ʼi te Moʼuga, neʼe ʼui fēnei e Sesu: “Fiafia ia nātou ʼaē ʼe fia kakai pea mo fia ʼiʼinu ki te faitotonu, heʼe natou mākokona anai.” (Mat. 5:6) Koteā te fakaʼuhiga ʼo te ʼu palalau ʼaia kiā nātou ʼaē ʼe natou loto ke natou manako ki te faitotonu?
15, 16. ʼE lava fakafīmālieʼi feafeaʼi te fia kakai pea mo te fia ʼiʼinu ʼa te hahaʼi ʼi te faʼahi fakalaumālie?
15 Ko te mālama ʼaenī ʼe tou māʼuʼuli ai ʼe puleʼi e te agakovi. (1 Soa. 5:19) ʼI he fenua pē, kapau ʼe tou toʼo he sulunale, ʼe tou lau ai pē he ʼu fakamatala ʼo ʼuhiga mo he ʼu agakovi pea mo he ʼu agamālohi neʼe heʼeki hoko fēia ki muʼa atu. Kā sio he tahi ʼe faitotonu ki te agakovi ʼaē ʼa te tagata ki te tagata pē, pea ʼe lotomamahi ʼaupitō ai ia. (Tnk. 8:9) Mai tona ʼaluʼaga ʼaē ʼe tou ʼoʼofa kiā Sehova, ʼe tou ʼiloʼi ʼe ko ia tokotahi pē ʼaē ʼe ina lava fakafīmālieʼi te fia kakai pea mo te fia ʼiʼinu ʼa te hahaʼi ʼaē ʼe natou fia ako te faitotonu. Kua vave pulihi pē te hahaʼi ʼaē ʼe mole pipiki ki te ʼAtua, pea ko nātou ʼaē ʼe manako ki te faitotonu ʼe mole natou toe mamahi anai ʼuhi ko te hahaʼi ʼaē ʼe natou meʼa noaʼi te lao pea mo tanatou ʼu aga ʼaē ʼe kovi. (2 Pet. 2:7, 8) ʼI toe fīmālie lahi anai kā hoko!
16 ʼI totatou ʼuhiga kaugana ʼa Sehova pea mo tisipulo ʼa Sesu Kilisito, ʼe mahino kiā tātou ko nātou fuli ʼaē ʼe natou fia kakai pea mo fia ʼiʼinu ki te faitotonu, ʼe “natou mākokona anai.” ʼE fakafīmālieʼi kātoa anai nātou ʼaki te fakatuʼutuʼu ʼa te ʼAtua ʼo ʼuhiga mo he ʼu lagi foʼou pea mo he kele foʼou “ ʼe tonu ke nofo ai te faitotonu.” (2 Pet. 3:13) Koia, ʼaua naʼa tou lotovaivai peʼe tou punamaʼuli ʼi te haga ʼaē ʼa te agakovi pea mo te agamālohi ʼo toʼo te faitotonu ʼi te mālama ʼaenī ʼa Satana. (Tnk. 5:8) Ko Sehova, te Māfimāfi, ʼe ina ʼiloʼi te meʼa ʼaē kā hoko mai pea kua ovi mai pē te temi ʼaē kā ina fakaʼāteaina ai anai ia nātou ʼaē ʼe manako ki te faitotonu.
Te ʼu Tapuakina ʼe Tou Maʼu ʼi Tatatou Manako Ki Te Faitotonu
17. Koteā ʼihi ʼu tapuakina ʼe kita maʼu ʼi takita manako ʼaē ki te faitotonu?
17 ʼE fakahā lelei iā Pesalemo 146:8, te tapuakina lahi ʼaē ʼe tou maʼu ʼi tatatou mulimuli ki te ala ʼo te faitotonu. Neʼe hiva fēnei e te tagata fai pesalemo: “ ʼE ʼofa Sehova ki te kau faitotonu.” Kotou fakakaukauʼi age muʼa! Ko te Tuʼi ʼAliki ʼo te ʼatulaulau ʼe ʼofa kiā tātou heʼe tou manako ki te faitotonu! Koia ʼaki te ʼofa ʼaia ʼo Sehova kiā tātou, ʼe tou falala ai ʼe ina foaki mai anai kiā tātou te ʼu meʼa ʼaē ʼe ʼaoga kiā tātou mokā tou fakamuʼamuʼa ʼi totatou maʼuli ia te ʼu gāue ʼo te Puleʼaga. (Lau ia Pesalemo 37:25; Tāʼaga Lea 10:3.) ʼI te temi kā haʼu, ʼe maʼu anai te kele kātoa e te hahaʼi ʼaē ʼe natou manako ki te faitotonu. (Taag. 13:22) Maʼa te tokolahi ʼi te hahaʼi ʼa te ʼAtua, ko te fakapale ʼaē kā natou maʼu ʼi tanatou maʼuliʼi ia te faitotonu, ʼe ko he toe fiafia lahi ʼaupitō pea mo te maʼuli heʼegata ʼi te palatiso matalelei ʼi te kele. Māʼiapē lā mo te temi nei, ko nātou ʼaē ʼe manako ki te faitotonu ʼa te ʼAtua ʼe fakapale ʼaki he loto ʼe tokalelei, pea ʼe lagolago te faʼahi ʼaia ki tanatou felōgoi tahi mo tonatou fāmili pea mo tonatou kōkelekāsio.—Filp. 4:6, 7.
18. ʼI tatatou fakatalitali ki te ʼaho ʼo Sehova, koteā ʼaē ʼe tonu ke tou haga fai tuʼumaʼu?
18 ʼI tatatou fakatalitali ki te hoko mai ʼo te ʼaho lahi ʼo Sehova, ʼe tonu ke tou haga kumi te faitotonu ʼa te ʼAtua. (Sofo. 2:2, 3) Koia, tou haga fakahā ia te lahi ʼaē ʼo tatatou manako ki te ʼu ala faitotonu ʼo Sehova ʼAtua. ʼE kau kiai tatatou kofuʼi tuʼumaʼu pē “te kofu ukamea ʼo te faitotonu” ke puipui ai totatou loto. ʼE toe ʼaoga foki ke tou taupau maʼu he leʼo ʼo loto ʼe lelei, ʼaē ʼe tou maʼu ai anai te fiafia pea mo fakafiafia ai te loto ʼo totatou ʼAtua.—Taag. 27:11.
19. Koteā ʼaē ʼe tou fakatotonu ke tou fai, pea koteā ʼaē kā tou vakaʼi ʼi te ʼalatike ʼaē kā hoa mai?
19 “Ko [te] ʼu mata [ʼo Sehova] ʼe taka ʼi te kele kātoa, ke ina fakahā tona mālohi kiā nātou ʼaē ʼe kātoa tonatou loto kiā te ia.” (2 Fkma. 16:9) ʼI fakalotofīmālie leva kiā tātou te ʼu palalau ʼaia, ʼi tatatou fai te meʼa ʼaē ʼe faitotonu logolā te ʼāʼāsili age ʼaē ʼo te maveuveu, mo te agamālohi, pea mo te agakovi ʼi te mālama tokakovi ʼaenī! ʼE moʼoni, ʼe lagi feala ki te hahaʼi tokolahi ʼo te mālama ʼaenī ʼe mamaʼo mai te ʼAtua, ke natou punamaʼuli ki tatatou haga haʼele ʼaē ʼi te faitotonu. Kae ʼe lahi tona ʼu fua lelei kiā tātou totonu pē ʼi tatatou maʼuliʼi ʼaē te faitotonu ʼa Sehova. (Isa. 48:17; 1 Pet. 4:4) Koia, tou fakatotonu ke tou manako tuʼumaʼu pē ki te faitotonu ʼaki totatou loto kātoa pea mo tou maʼuliʼi te faitotonu, ʼaē kā tou maʼu mai ai anai te fiafia. Kae ʼe toe fakamaʼua e te faʼahi ʼaia ke tou fēhihiʼa ki te ʼu aga ʼaē ʼe natou maumauʼi te lao. ʼI te ʼalatike ʼaē kā hoa mai, ʼe talanoa ai anai pe koteā te fakaʼuhiga ʼo te faʼahi ʼaia.
[Nota]
^ Kapau ʼe kotou fia maʼu he ʼu pelesepeto ʼo te Tohi-Tapu ʼo ʼuhiga mo te ʼu fihifihia ʼo ʼuhiga mo he gāue, kotou vakaʼi ia Te Tule Leʼo ʼo te ʼaho 15 ʼo ʼApelili 1999, ʼi te ʼu pāsina 28-30.
ʼE Kotou Tali Feafeaʼi Anai?
• Ke feala hatatou manako ki te faitotonu, he koʼē ʼe maʼua ke mahino kiā tātou te maʼuhiga ʼo te totogi?
• He koʼē ʼe maʼuhiga ʼaupitō ke tou kofuʼi “te kofu ukamea ʼo te faitotonu”?
• ʼE tou lava akoʼi feafeaʼi totatou leʼo ʼo loto?
[ʼU fehuʼi ʼo te ako]
[Paki ʼo te pasina 26]
Ko he leʼo ʼo loto neʼe akoʼi ʼe tokoni mai kiā tātou ke tou maʼu he ʼu tali ki te ʼu fihifihia ʼo ʼuhiga mo he gāue