Ko “Te Fua ʼo Te Laumālie” ʼe Ina Fakakolōliaʼi Te ʼAtua

“Ko taku Tamai ʼe fakakolōliaʼi ʼi te faʼahi ʼaenī: ke kotou haga fua ke lahi.”—SOA. 15:8.

1, 2. (a) Koteā te ʼu faigamālie ʼe tou maʼu ʼe feala ai ke tou fakalotomālohiʼi niʼihi? (b) Koteā te meʼa ʼofa ʼaē ʼe foaki e Sehova moʼo hikihiki ai tatatou tauhi ʼaē kiā te ia?

 TOU vakaʼi age muʼa te ʼu ʼaluʼaga e lua ʼe feala ke hoko: Ko he tuagaʼane kua fotufotuʼa ʼe ina tokagaʼi ʼe ʼi ai te meʼa ʼe hoha kiai te tahi tuagaʼane kei finemui. ʼE ina fakatuʼutuʼu ke fai fakamafola mo ia. ʼI tanā lolotoga fai fakamafola, ʼe kamata palalau age te tuagaʼane finemui ki te meʼa ʼaē ʼe hoha kiai. Ki muli age ʼi te ʼaho pē ʼaia, ʼi te faikole ʼa te tuagaʼane kei finemui, ʼe fakafetaʼi kiā Sehova ʼo ʼuhiga mo te tokaga ʼofa ʼaē neʼe fai age kiā ia e te tuagaʼane kua fotufotuʼa, he neʼe tō tonu tana ʼu faitokoni mo te faʼahi ʼaē neʼe ʼaoga kiā ia. Ko te lua ʼaluʼaga, ʼe ko te taumātuʼa neʼe mole heʼeki faʼa fualoa tanā liliu mai tanā fai fakamafola ʼi te tahi fenua. ʼI tanā fakatahitahi mo te ʼu tehina mo tuagaʼane, ʼe nā fakamatalatala fakafiafia te ʼu meʼa ʼaē neʼe hoko kiā nāua, pea neʼe lolotoga fakalogo te tehina tūpulaga ki tanā ʼu fai fakamatala ʼaia. Hili kiai ni ʼu taʼu, ʼi tana teuteu ʼalu ki te telituale ʼaē neʼe hinoʼi ia ia ke ʼalu ʼo fai fakamafola ai, neʼe manatuʼi e te tehina te taumātuʼa ʼaia pea mo tanā ʼu fai fakamatala ʼaē neʼe tupu ai tana fia liliu ʼo misionea.

² Ko te ʼu fakamatala ʼaenī e lua ʼe lagi kotou manatuʼi ai he tahi neʼe ina fetogi tokotou maʼuli, peʼe ko te maʼuli ʼo he tahi neʼe ina uga koutou ke kotou fai he ʼu fetogi. ʼE mahino ia, ʼe mole fetogi anai te maʼuli ʼo he tahi ʼaki pē hana fai palalau tuʼa tahi mo he tahi, kae ʼi te ʼaho fuli, ʼe tou maʼu te ʼu faigamālie ke tou fakalotomālohiʼi ai niʼihi. Kotou fakakaukauʼi age muʼa mo kanapau lā ʼe ʼi ai he faʼahi ʼe ina lava hikihiki age tokotou poto pea mo tokotou ʼu fealagia, ʼo feala ai ke lahi age takotou tokoni ʼaē ki ʼokotou tehina pea mo lahi age mo tokotou fakaʼaogaʼi ʼaē e te ʼAtua ki tona tauhi. ʼE ko he ʼu faʼahi ʼe tou fiafia lahi ai anai! ʼI tona fakahagatonu, ʼe foaki e Sehova te meʼa ʼofa ʼaia, ʼaē ko tona laumālie māʼoniʼoni. (Luka 11:13) ʼAki te gāue ʼaē ʼa te laumālie ʼo te ʼAtua kiā tātou, ʼe tou maʼu ai te ʼu kalitātē matalelei moʼo hikihiki te ʼu faʼahi kehekehe ʼo tatatou tauhi ʼaē ki te ʼAtua. ʼE ko he meʼa ʼofa fakatalakitupua ʼaia!—Lau ia Kalate 5:22, 23.

 3. (a) ʼE fakakolōliaʼi feafeaʼi te ʼAtua mokā tou fakatuputupu iā tātou “te fua ʼo te laumālie”? (b) Ko te ʼu fehuʼi fea ʼaē kā tou vakaʼi anai?

³ Ko te ʼu kalitātē ʼaē ʼe fakatupu e te laumālie māʼoniʼoni ʼe ko te ʼu kalitātē ʼo Ia ʼaē ʼe ina foaki mai te laumālie ʼaia, ia Sehova ʼAtua. (Kol. 3:9, 10) Neʼe fakahā e Sesu te tupuʼaga tāfito ʼaē ʼe tonu ai ki te kau Kilisitiano ke natou faʼifaʼitakiʼi te ʼAtua, ʼi tana ʼui fēnei ki tana ʼu ʼapositolo: “Ko taku Tamai ʼe fakakolōliaʼi ʼi te faʼahi ʼaenī: ke kotou haga fua ke lahi.” a (Soa. 15:8) ʼE hā anai ʼi tatatou faʼahiga palalau pea mo tatatou aga tatatou fakatuputupu ʼaē iā tātou “te fua ʼo te laumālie,” pea ʼe vikiʼi ai anai totatou ʼAtua. (Mat. 5:16) Koteā ʼaē ʼe kehekehe ai te fua ʼo te laumālie pea mo te ʼu agaaga ʼo te mālama ʼo Satana? Koteā ʼaē ʼe tonu ke tou fai ke tuputupu iā tātou te fua ʼo te laumālie? He koʼē ʼe feala ke faigataʼa kiā tātou te fai ʼo te faʼahi ʼaia? ʼE tou vakaʼi anai te ʼu fehuʼi ʼaia ʼaki te ʼu ʼuluaki agaaga e tolu ʼo te fua ʼo te laumālie: te ʼofa, mo te fiafia pea mo te tokalelei.

ʼE Fakatafito Te ʼOfa Ki He Pelesepeto ʼe Māʼoluga ʼAupitō Age

 4. ʼE feafeaʼi te faʼahiga ʼofa ʼaē neʼe akoʼi e Sesu ki tana ʼu tisipulo ke natou fakahā ki te hahaʼi?

⁴ Ko te ʼofa ʼaē ʼe tupu mai te laumālie māʼoniʼoni, ʼe kehekehe ʼosi ia mo te ʼofa ʼaē ʼe maʼu ʼi te mālamanei. Koteā tona tupuʼaga? Heʼe ko te ʼofa  ʼaē ʼe fakatupu e te laumālie māʼoniʼoni ʼe fakatafito ia ki te pelesepeto ʼe māʼoluga ʼaupitō age. Neʼe fakahā lelei e Sesu te kehekehe ʼo te ʼu faʼahiga ʼofa ʼaia e lua ʼi tana Akonaki ʼaē neʼe ina fai ʼi te Moʼuga. (Lau ia Mateo 5:43-48.) Neʼe ina ʼui, māʼiapē lā mo te hahaʼi ʼaē ʼe natou fai he ʼu agahala, ʼe natou agalelei ki te hahaʼi ʼaē ʼe agalelei age kiā nātou. Ko te taʼi “ ʼofa” ʼaia ʼe mole fakamaʼua kiai ni ʼu sākilifisio, heʼe natou toe liufaki pē nātou ia te ʼofa ʼaē neʼe fai age kiā nātou. Kapau ʼe tou loto ke tou ‘liliu ko he ʼu foha ʼo tatatou Tamai ʼaē ʼe ʼi selō,’ ʼe tonu ke tou kehekehe mo te mālamanei. ʼE mole tou agalelei pē anai ki te hahaʼi ʼaē ʼe agalelei mai kiā tātou, kae ʼe tou faʼifaʼitakiʼi anai ia Sehova, ke tatau mo ia ia tatatou ʼu manatu mo tatatou aga ki te hahaʼi. Kae koteā ʼaē ʼe tonu ke tou fai ke feala ai hatatou ʼoʼofa ki totatou ʼu fili, ohagē ko tona fakatotonu mai e Sesu?

 5. ʼE tou lava fakahā feafeaʼi te ʼofa kiā nātou ʼaē ʼe natou fakatagaʼi tātou?

⁵ Tou vakaʼi age muʼa te faʼifaʼitaki ʼi te Tohi-Tapu. ʼI tanā fai fakamafola ʼaē ʼi Filipe, neʼe puke ia Paulo pea mo Silasi, pea neʼe haha mo pilisoniʼi ia nāua, ʼo fakamaʼu ai ʼonā vaʼe ki te ʼu ʼakau. Neʼe lagi toe gaohi koviʼi nāua e te tagata leʼo ʼo te fale pilisoni. ʼI tonā fakaʼāteaina fakapunamaʼuli ʼi te hoko ʼo te mafuike, neʼe feala pē ke nā fiafia ai he neʼe ko he faigamālie ʼaia kiā nāua ke nā liufaki age te agakovi ʼa te tagata leʼo pilisoni ʼaia. Kae neʼe mole hoko he meʼa fēia. ʼI tanā loto moʼoni ʼaē ke haofaki te tagata ʼaia, neʼe uga ai nāua e tonā ʼofa fakasākilifisio ke nā tokoni kiā ia, ʼo foaki ai ki te tagata leʼo pilisoni ʼaia pea mo tona fāmili kātoa te faigamālie ke natou liliu ko he ʼu Kilisitiano. (Gāue 16:19-34) Tokolahi ʼi totatou ʼu tehina iā ʼaho nei neʼe natou toe “tapuakiʼi ia nātou ʼaē ʼe natou fakatagaʼi” tātou.—Loma 12:14.

 6. ʼE tou lava fakahā feafeaʼi te ʼofa fakasākilifisio ki totatou ʼu tehina? (Vakaʼi te fakamatala ʼaē ʼe ʼātakai ʼi te pāsina 25.)

⁶ ʼE ʼi ai te tahi age faʼahi ʼe tonu ke tou fai mokā tou ʼoʼofa ki totatou ʼu tehina Kilisitiano. “Ko tātou ʼe maʼua ke tou foaki totatou maʼuli maʼa ʼotatou tehina.” (Lau ia 1 Soane 3:16-18.) Kae ʼi te agamāhani, ʼe feala ke tou fakahā totatou ʼofa ʼi he ʼu ʼaluʼaga ʼe veliveli age. Ohagē lā, kapau neʼe tou ʼui pe neʼe tou fai he meʼa neʼe mamahi ai he tehina, ʼe tou fakahā anai totatou ʼofa ʼaē kiā ia, ʼo tou kumi ke tou fakatokatoka mo ia. (Mat. 5:23, 24) ʼE feafeaʼi mokā ʼe tou nofo mamahi ki he tahi? ʼE tou “fakamolemole gafua” koa peʼe ʼi ʼihi temi ʼe kei tou taupau pē totatou ʼita ʼaē ki ai? (Pes. 86:5) Ko te mālohi ʼo te ʼofa ʼaē ʼe fakatupu iā tātou e te laumālie māʼoniʼoni, ʼe tokoni mai ke tou ʼuʼufi, māʼia mo te ʼu kiʼi hala ʼaē ʼe fai mai, ʼo tou loto fakamolemole ki ʼihi “ohagē pē ko te lotolelei ʼa Sehova ke ina fakamolemole” mai kiā tātou.—Kol. 3:13, 14; 1 Pet. 4:8.

7, 8. (a) He koʼē koa kā tou ʼoʼofa ki te ʼAtua pea ʼe tou toe ʼoʼofa ai ki te hahaʼi? (b) Koteā ʼaē ʼe feala ke tou fai ke lahi age totatou ʼofa ʼaē kiā Sehova? (Vakaʼi te pāki ʼi te pāsina 23.)

 ⁷ ʼE feafeaʼi hatatou lava fakatuputupu ia totatou ʼofa fakasākilifisio ʼaē ki ʼotatou tehina? ʼO tou fakaloloto totatou ʼofa ki te ʼAtua. (Efe. 5:1, 2; 1 Soa. 4:9-11, 20, 21) Ko te temi ʼaē ʼe tou felōgoi takitokotahi ai mo Sehova mokā tou lau te Tohi-Tapu, mo metitāsio, pea mo tou faikole, ʼe tou lotomālohi ai pea mo lahi age ia totatou ʼofa ki tatatou Tamai ʼaē ʼe ʼi selō. Kae ʼe ʼaoga ke tou toʼo he temi ke tou fakaovi ai ki te ʼAtua.

⁸ Tou toʼo he fakatā: kanapau lā ʼi te ʼaho fuli ʼe ʼi ai pē he hola ʼe feala ai ke kotou lau te Folafola ʼa te ʼAtua, mo metitāsioʼi, pea mo faikole kiā Sehova, ʼe mole kotou faiga anai koa ke kotou ʼāteaina ʼi te hola ʼaia, ke mole kotou fai he tahi age ʼu gāue ʼi te hola ʼaia neʼe kua kotou fakatuʼutuʼu ke kotou felōgoi ai mo Sehova? ʼE mahino ia, ʼe mole feala ki he tahi ke ina tāʼofi tātou ke tou faikole ki te ʼAtua, pea tokolahi iā tātou ʼe tou lava lau te Tohi-Tapu ʼi he temi pē ʼe tou loto ai. Kae ʼe lagi lelei ke tou fai he ʼu puleʼaki ke mole tou fakaʼaogaʼi te temi ʼaē ʼe tou felōgoi ai mo te ʼAtua moʼo fai te ʼu tuʼuga gāue ʼaē ʼe tonu ke tou fai ʼi te ʼaho fuli. ʼE kotou fakaʼaogaʼi fakalelei koa tokotou temi ʼaē ʼi te ʼaho fuli ke kotou fakaovi kiā Sehova?

“Te Fiafia ʼo Te Laumālie Māʼoniʼoni”

 9. Ko te ʼaluʼaga fea ʼaē ʼe feala ai ki te laumālie māʼoniʼoni ke tokoni mai ke tou taupau maʼu ia tatatou fiafia?

⁹ ʼE feala ʼi te ʼu temi faigataʼaʼia ke hā tuʼumaʼu aipē te fua ʼo te laumālie, ohagē lā ko te fiafia, te lua agaaga ʼaē kā tou vakaʼi. Ko te fiafia ʼe hagē ko he ʼakau mālohi ʼe lava maʼuli ʼi he koga meʼa ʼe mole lelei. ʼI te mālamanei, tokolahi te ʼu kaugana ʼa te ʼAtua neʼe natou “tali te folafola logolā te ʼu fakataga mālohi ʼaupitō, ʼaki te fiafia ʼo te laumālie māʼoniʼoni.” (1 Tes. 1:6) Ko ʼihi atu ʼe natou tau mo te ʼu faigataʼaʼia ʼi tonatou maʼuli. Kae ʼe foaki e Sehova te mālohi kiā nātou ʼaki tona laumālie, ke “kātoa tanatou ʼutaki pea ke natou faʼa kātaki aipē ʼaki he loto fiafia.” (Kol. 1:11) Koteā ʼaē ʼe tupu ai tanatou fiafia ʼaia?

10. Koteā ʼaē ʼe tupu ai tatatou fiafia?

¹⁰ ʼO mole hagē ko “te ʼu koloa fakalākilua” ʼo te mālama ʼa Satana, ko te ʼu koloa fakalaumālie ʼaē ʼe foaki mai e Sehova ʼe heʼegata ia. (1 Tim. 6:17; Mat. 6:19, 20) ʼE foaki mai e Sehova kiā tātou te ʼamanaki fakafiafia ʼaē ke tou māʼuʼuli ʼo heʼegata ʼi te kā haʼu. ʼE tou fiafia heʼe tou kau ki te fale tautēhina fakamālamanei. Pea ʼe tou fiafia tāfito ʼuhi ko tatatou ʼu felōgoi ʼaē mo te ʼAtua. ʼE tatau totatou loto mo te ʼu palalau ʼaē neʼe fai e Tavite, logolā neʼe tonu ʼi te tahi temi ke feholaʼaki, kae neʼe hiva fakavikiviki aipē kiā Sehova, ʼo ina ʼui fēnei: “Ko tou lotoʼofa ʼe lelei age ia ʼi te maʼuli, ʼe vikiʼi anai koe e toku ʼu laugutu. Koia ʼe au tapuakina anai koe lolotoga toku maʼuli kātoa.” (Pes. 63:3, 4) Tatau aipē peʼe tou tau mo he ʼu faigataʼaʼia, kae ʼe fonu pē anai totatou loto ʼaki he ʼu fakavikiviki fakafiafia ki te ʼAtua.

11. He koʼē ʼe maʼuhiga ke tou fiafia ʼi tatatou tauhi ʼaē kiā Sehova?

¹¹ Neʼe fakalotomālohiʼi fēnei e te ʼapositolo ko Paulo te kau Kilisitiano: “Kotou fakafiafia tuʼumaʼu ʼi te ʼAliki. ʼE au toe tala atu anai: kotou fakafiafia!” (Filp. 4:4) He koʼē ʼe maʼuhiga ki te kau Kilisitiano ke natou fiafia ʼi tanatou tauhi ʼaē kiā Sehova? ʼE maʼuhiga te faʼahi ʼaia ʼuhi ko te fakafihi ʼaē neʼe lagaʼi e Satana ʼo ʼuhiga mo te pule faʼitaliha ʼa Sehova. ʼE lau e Satana ʼe mole he tahi ʼe tauhi ki te ʼAtua ʼaki he loto ʼe lelei. (Sopo 1:9-11) Kapau ʼe tou tauhi kiā Sehova ohagē ko he fakamaʼua kae ʼe mole tou fiafia, ʼe mole kātoa anai tatatou ʼu sākilifisio fakavikiviki. Koia ʼe tou faiga ai anai ke tou manatuʼi ia te fakalotomālohi ʼaenī ʼa te tagata fai pesalemo: “Kotou tauhi kiā Sehova ʼaki te loto fiafia. Kotou hū ki ai ʼaki he kalaga fakafiafia.” (Pes. 100:2) Kapau ʼe tou tauhi ki te ʼAtua ʼaki he loto ʼe lelei pea mo tou fiafia, pea ʼe fakakolōliaʼi ai anai te ʼAtua.

12, 13. Koteā ʼaē ʼe feala ke tou fai moʼo tauʼi te lotovaivai?

¹² Kae māʼiapē lā mo te ʼu kaugana ʼa Sehova ʼe feala ʼi ʼihi temi ke natou lotovaivai, pea ʼe tonu ke natou faiga mālohi ke natou taupau he ʼu manatu ʼe fakalotomālohi. (Filp. 2:25-30) Koteā ʼaē ʼe feala ke tokoni mai kiā tātou ʼi te ʼu temi ʼaia? ʼE ʼui fēnei iā Efesi 5:18, 19: “Kotou haga fakafonu ia koutou ʼaki te laumālie, ʼo kotou fepalalauʼaki iā koutou ʼaki he ʼu pesalemo, mo he ʼu fakavikiviki ki te ʼAtua pea mo he ʼu hiva fakalaumālie, ʼo kotou hiva pea mo ʼave ʼaki he musika ʼi ʼokotou ʼu loto kiā Sehova.” Koteā ʼaē ʼe tou lava fai moʼo muliʼi te tokoni ʼaia?

 ¹³ ʼI ʼihi temi mokā tou lotovaivai, pea ʼe tou lava kolekole kiā Sehova ke tokoni mai pea mo tou metitāsioʼi he ʼu manatu ʼe tāu ke vikiʼi. (Lau ia Filipe 4:6-9.) ʼE tokagaʼi e ʼihi, mokā natou fakalogo ki te ʼu kātiko pea mo natou hiva, ʼe natou lotomālohi ai pea mo tokoni ai kiā nātou ke natou maʼu he ʼu manatu ʼe lelei. Neʼe ʼui fēnei e te tehina neʼe tau mo te fihifihia pea neʼe liliu ai ʼo ʼita pea mo lotovaivai: “Neʼe au faikole fakamālotoloto ʼi te temi fuli pē, pea neʼe au akoako te ʼu kātiko ke au maʼu loto. Neʼe tokalelei toku loto ʼi te temi ʼaē neʼe au hiva ai te ʼu fakavikiviki matalelei ʼaia kiā Sehova, peʼe au hiva leʼo lahi peʼe au hiva fakalogologo. Pea ʼi te temi ʼaia neʼe tā te tohi Approchez-vous de Jéhovah (Kotou Fakaovi Kiā Sehova), neʼe au lau tuʼa lua ʼi te taʼu pē ʼaia. Neʼe hagē pē ko he faitoʼo ki toku loto. ʼE au ʼiloʼi neʼe tapuakina e Sehova taku ʼu faiga.”

“Te Noʼo ʼo Te Tokalelei”

14. Koteā te faʼahi maʼuhiga o te tokalelei ʼaē ʼe tupu mai te laumālie māʼoniʼoni?

¹⁴ ʼI tatatou ʼu fakatahi fakamālamanei, ʼe fiafia te ʼu telekē mai te ʼu fenua kehekehe ʼi tanatou fakatahitahi mo ʼonatou tehina mo tuagaʼane. ʼI te ʼu lakaga ʼaia, ʼe hā lelei ai te logotahi ʼa te hahaʼi ʼa te ʼAtua ʼi te kele kātoa, ʼaē ʼe tupu mai tanatou tokalelei iā ʼaho nei. ʼI te agamāhani, ʼe punamaʼuli te hahaʼi ʼaē ʼe ʼomai ki tatatou ʼu fakatahi, ʼi tanatou sisio ki te hahaʼi neʼe fefehiʼaʼaki, kae kua natou “faiga fakamālotoloto ke [natou] taupau te logotahi ʼo te laumālie ʼi te noʼo ʼo te tokalelei.” (Efe. 4:3) ʼE fakaofoofo ʼaupitō te logotahi ʼaia mokā tou tokagaʼi te ʼu faʼahi ʼaē neʼe tonu ke tauʼi e te tokolahi.

15, 16. (a) Neʼe lahilahi ake ia Petelo mo te ʼu faʼahiga manatu feafeaʼi, pea he koʼē neʼe ko he faigataʼaʼia kiā ia? (b) Neʼe tokoni feafeaʼi ia Sehova kiā Petelo ke fetogi tana aga?

¹⁵ ʼE mole ko he meʼa faigafua he fakalogotahiʼi ʼo ni hahaʼi ʼo ni ʼu fenua kehekehe. Moʼo tokoni mai kiā tātou ke tou mahino ki te faʼahi ʼaē ʼe tonu ke tou tauʼi ke feala ai hatatou logotahi, tou vakaʼi age muʼa te faʼifaʼitaki ʼa te ʼapositolo ko Petelo ʼi te ʼuluaki sēkulō. ʼE tou lava ʼiloʼi tana manatu ʼo ʼuhiga mo te kau Senitile ʼaē neʼe mole silikosisio,  ʼi te ʼu palalau ʼaenī neʼe ina fai: “ ʼE kotou ʼiloʼi lelei pē ʼe tapu ki he tagata Sutea, ia tana fakatahi mo he tagata ʼo he tahi atu lanu peʼe ko hana fakaovi ki ai; kae neʼe fakahā mai e te ʼAtua ʼe mole tonu ke au ʼui ʼe ʼuli peʼe heʼemaʼa he tagata.” (Gāue 10:24-29; 11:1-3) Neʼe lagi lahilahi ake Petelo ʼaki te manatu ʼaē neʼe fakamaʼua age kiā ia ʼi te Lao, ke ʼofa pē ki te kau Sutea, he neʼe ko te manatu ʼaia ʼa te hahaʼi ʼo te temi ʼaia. Kiā ia, neʼe lagi ko he manatu lelei pē te fakaʼuhiga ia te kau Senitile ʼe ko he ʼu fili pea neʼe tonu ke fehiʼa kiā nātou. b

¹⁶ Kotou fakakaukauʼi age muʼa te ufiufi ʼaē neʼe lagi logoʼi e Petelo ʼi te temi ʼaē neʼe hū ai ki te ʼapi ʼo Kolonelio. Neʼe feala koa ki he tagata neʼe fehiʼa ki muʼa atu ki te kau Senitile ke liliu ʼi he ʼaho ʼo ‘faifaitahi’ mo nātou ʼi “te logotahi ʼo te laumālie ʼi te noʼo ʼo te tokalelei”? (Efe. 4:3, 16) Neʼe lava te faʼahi ʼaia, heʼe ko te ʼu ʼaho ki muʼa atu, neʼe ʼavahi e te laumālie ʼo te ʼAtua te loto ʼo Petelo, ʼo feala ai ke ina fetogi tana aga pea mo tana ʼu manatu fakapalatahi. ʼI te meʼa ʼaē neʼe hā kiā Petelo, neʼe fakamahino lelei e Sehova kiā ia, ʼe mole sivisivi e te ʼAtua te agaaga ʼa te hahaʼi ʼaki tonatou lanu peʼe ko tonatou fenua. (Gāue 10:10-15) Koia neʼe feala ai ke ʼui fēnei e Petelo kiā Kolonelio: “ ʼE moʼoni, kua au mahino ko te ʼAtua ʼe mole fakapalatahi, kae ʼi te puleʼaga fuli pē ko te tagata ʼaē ʼe manavasiʼi kiā te ia pea mo ina maʼuliʼi te faitotonu ʼe ina tali leleiʼi ia ia.” (Gāue 10:34, 35) Neʼe fetogi ia Petelo, pea neʼe logotahi moʼoni mo “te fāmili kātoa ʼo te ʼu tehina.”—1 Pet. 2:17.

17. He koʼē ʼe fakaofoofo te logotahi ʼa te hahaʼi ʼa te ʼAtua?

¹⁷ Ko te meʼa ʼaē neʼe hoko kiā Petelo ʼe tokoni mai ke tou loto fakafetaʼi ki te toe fetogi lahi ʼaē ʼe lolotoga hoko ʼi te hahaʼi ʼa te ʼAtua iā ʼaho nei. (Lau ia Isaia 2:3, 4.) Ko te ʼu lauʼi miliona hahaʼi “mai te ʼu fenua fuli, mo te ʼu telepī, mo te ʼu hahaʼi pea mo te ʼu lea fuli” neʼe natou fetogi tanatou manatu ke ʼalutahi mo ‘te finegalo ʼo te ʼAtua, ʼaē ʼe lelei, mo lave lelei, pea mo haohaoa.’ (Fakh. 7:9; Loma 12:2) Tokolahi iā nātou ʼaia ki muʼa atu neʼe natou maʼu te ʼu manatu ʼo te mālama ʼa Satana, ʼaē ko te loto fehiʼa pea mo te fakatupu maveuveu. Kae ʼi tanatou ako te Folafola ʼa te ʼAtua pea mo maʼu te tokoni ʼa te laumālie māʼoniʼoni, neʼe natou akoako ai te “kumi [ʼo] te ʼu meʼa ʼaē ʼe lagolago ki te tokalelei.” (Loma 14:19) Ko te logotahi ʼaē ʼe maʼu ʼaki te ʼu fetogi ʼaia, ʼe fakavikiviki ai ki te ʼAtua.

18, 19. (a) Koteā ʼaē ʼe feala ke tou fai takitokotahi moʼo lagolago ki te tokalelei pea mo te logotahi ʼo te kōkelekāsio? (b) Koteā ʼaē kā tou vakaʼi anai ʼi te ʼalatike kā hoa mai?

¹⁸ Koteā ʼaē ʼe feala ke tou fai takitokotahi moʼo lagolago ki te tokalelei pea mo te logotahi ʼo te hahaʼi ʼa te ʼAtua? ʼE lahi te ʼu kōkelekāsio ʼe tou maʼu ai ʼihi neʼe ʼomai mai he tahi fenua. ʼE maʼu e ʼihi he ʼu agaʼi fenua ʼe kehe age mo tātou peʼe mole natou palalau leleiʼi tatatou lea. ʼE tou faiga koa ke tou feʼiloʼiʼaki mo nātou? ʼE ko he faʼahi ʼe fakalotomālohiʼi mai tātou ʼi te Folafola ʼa te ʼAtua ke tou fai. ʼI tana faitohi ki te kōkelekāsio ʼo Loma, ʼaē neʼe kau ai te kau Kilisitiano Sutea pea mo Senitile, neʼe ʼui fēnei e Paulo: “Ke kotou fetaliʼaki, ohagē ko te tali ʼo tātou e Kilisito ʼuhi ko te kolōlia ʼo te ʼAtua.” (Loma 15:7) ʼE ʼi ai koa he tahi ʼi tokotou kōkelekāsio ʼe feala ke kotou feʼiloʼiʼaki lelei age mo ia?

¹⁹ Koteā he tahi age meʼa ʼe tou lava fai ke feala ai hatatou tuku te laumālie māʼoniʼoni ke gāue kiā tātou ʼi totatou maʼuli? ʼE tou vakaʼi anai te fehuʼi ʼaia ʼi te ʼalatike kā hoa mai, heʼe tou talanoa anai ki te ʼu agaaga ʼaē kei toe ʼo te fua ʼo te laumālie.

[ʼU nota]

ʼE Kotou Tali Feafeaʼi Anai?

• ʼE tou lava fakahā feafeaʼi tatatou ʼofa fakasākilifisio ki ʼotatou tehina?

• He koʼē ʼe maʼuhiga ke tou tauhi ki te ʼAtua ʼaki he loto fiafia?

• Koteā ʼaē ʼe feala ke tou fai moʼo lagolago ki te tokalelei pea mo te logotahi ʼo te kōkelekāsio?

[ʼU fehuʼi ʼo te ako]

[Talanoa ʼo te pasina 25]

“Ko Nātou ʼAenī ʼe Ko Te Kau Kilisitiano Moʼoni”

ʼI te tohi (Between Resistance and Martyrdom—Jehovah’s Witnesses in the Third Reich), ʼe tuʼu ai te ʼu palalau neʼe fai e te tūpulaga Sutea neʼe pilisoni, ʼe ina fakamatala tana ʼuluaki fetaulaki mo te kau Fakamoʼoni ʼa Sehova ʼi tana tau atu ki te lotoʼā fakamamahi ʼo Neuengamme. ʼE ina ʼui fēnei:

“Ko mātou kau Sutea mai te kolo ʼo Dachau, ʼi tamatou tau atu pē ki te lotoʼā fakamamahi [ʼo Neuengamme], neʼe kamata fufū e te tahi kau Sutea tanatou ʼu meʼa ke mole natou vaevae mo mātou. . . . ʼI muʼa atu ʼo tomatou pilisoniʼi ʼaē ʼi te lotoʼā fakamamahi, neʼe matou fetokoniʼaki. Kae ʼi henī, ʼi te kua tahi faiga pē ʼaē ke haofaki tona maʼuli, kua tahi fakamuʼamuʼa pē tona maʼuli, ʼo mole kei manatuʼi te ʼu meʼa ʼaē ʼe ʼaoga ki ʼihi. Kae ʼe kotou ʼiloʼi pe neʼe koteā ʼaē neʼe lolotoga fai e te Kau Ako ʼo Te Tohi-Tapu? ʼI te temi ʼaia, neʼe tonu ke natou gāue kinakina, he neʼe natou toe gaohi te ʼu tuiō vai. Neʼe ko te temi momoko pea neʼe tonu ke natou tutuʼu ʼi te ʼaho kātoa ʼi te vai momoko ʼaupitō. Neʼe mole lava mahino he tahi pe neʼe feafeaʼi hanatou lava kātakiʼi te ʼaluʼaga ʼaia. Neʼe natou ʼui neʼe ko Sehova ʼaē neʼe ina foaki age kiā nātou te mālohi. Neʼe natou toe fia kai pē foki tanatou ʼu moʼi pane, ohagē pē ko mātou, he neʼe natou hālofia. Kae koteā ʼaē neʼe natou fai? Neʼe natou tānaki fuli tanatou ʼu moʼi pane, ʼo natou vaelua, ʼo natou tuku te tahi koga maʼa nātou pea ko te tahi koga neʼe natou foaki ki tonatou ʼu tehina ʼaē neʼe hoki tau age mai Dachau. Pea neʼe natou fakatalitali leleiʼi ia nātou pea mo fekita kiā nātou. ʼI muʼa ʼo tanatou kakai, neʼe natou faikole. ʼOsi ʼaia, neʼe natou fiafia. Neʼe natou ʼui kua natou mākokona. ʼE ko te temi lā ʼaia ʼaē neʼe au manatu fēnei ai: Ko nātou ʼaenī ʼe ko te kau Kilisitiano moʼoni.”

[Paki ʼo te pasina 23]

ʼI te ʼaho fuli, ʼe kotou toʼo koa he temi ʼi takotou ʼu gāue ke kotou fakaovi ai kiā Sehova?