Ko He Maʼuli ʼe ʼi Ai Hona ʼUhiga ʼi Te Temi Nei Pea ʼo Talu Ai

MĀʼIAPĒ lā ʼi te temi nei ʼe feala hakotou maʼu ai he maʼuli ʼe ʼi ai hona ʼuhiga moʼoni. ʼO feafeaʼi? ʼAki takotou muliʼi ia te ʼu pelesepeto fakapotopoto ʼaē ʼe maʼu ʼi te Folafola ʼa te ʼAtua, ia te Tohi-Tapu. Tou vakaʼi age muʼa ʼihi ʼo te ʼu pelesepeto ʼaia.

TE PELESEPETO FAKATOHI-TAPU: Neʼe tohi fēnei e te Hau ko Salomone: “ ʼE mole he meʼa ʼe lelei age ki te tagata . . . ke kai pea ke ʼinu pea mo ina fakasio ki tona nefesi te meʼa ʼaē ʼe lelei ʼuhi ko tana gāue kinakina.”—TAGATA TĀNAKI 2:24.

Neʼe fakatupu tātou ke tou fiafia ʼi te fai ʼo he gāue ʼe lelei. Māʼiapē lā ʼi te ʼu ʼaluʼaga faigataʼa, ʼe feala pē ke tou maʼuli fiafia ʼi te temi nei mokā tou faʼa gāue pea mo fai fakahagatonu tatatou gāue.

TE PELESEPETO FAKATOHI-TAPU: “ ʼE lahi age te fiafia ʼi takita foaki, ʼi takita tali.”—GĀUE 20:35.

Neʼe tokagaʼi e te hahaʼi tokolahi kā natou fai he ʼu meʼa maʼa ʼihi, ohagē lā ko te fakaʼaogaʼi ʼo tonatou temi pea mo tonatou mālohi moʼo tokoni ki ʼihi ʼi te ʼu temi faigataʼa, pea ʼe natou fiafia ʼaupitō ai pea mo natou maʼu ai he ʼuhiga moʼoni ʼo tonatou maʼuli. Neʼe tohi fēnei e Salomone: “ ʼAua naʼa ke fakafisi te meʼa ʼaē ʼe lelei kiā nātou ʼaē ʼe tonu ke fai ki ai, mo kapau ʼe feala ki tou nima ke ina fai te faʼahi ʼaia.”—Tāʼaga Lea 3:27.

Tou vakaʼi age muʼa ia te faʼifaʼitaki ʼo te tagata ko Ralph. ʼI tana kua letelete, neʼe gāue fakatahi leva mo tona ʼohoana ki te fai fakamafola temi kātoa. ʼE lahi tonā ʼu hola gāue ʼaē ʼe nā fai ʼi te māhina fuli ʼi te fai fakamafola, moʼo akoʼi ki te hahaʼi te Tohi-Tapu. ʼE ʼui fēnei e Ralph: “Kā mā tau ki fale ʼi te pōʼuli, ʼe mā gaʼegagaʼe mole ʼuhi pē heʼe kua mā mātutuʼa, kae ʼuhi ko tamā fakaʼaogaʼi tomā mālohi kātoa ʼi tamā tauhi ki tamā Tamai ʼaē ʼi selō. ʼE mā gaʼegaʼe kae ʼe mā maʼu ai he fiafia lahi.” Ko ia pea mo tona ʼohoana ʼe nā fiafia heʼe nā tōkakaga ʼi tonā maʼuli ke nā loto foaki.

TE PELESEPETO FAKATOHI-TAPU: “Ko he kaumeʼa moʼoni ʼe ʼofa ia ʼi te temi fuli pē, pea ʼe ko he tehina neʼe tupu ki te ʼu ʼaho mamahi.”—TĀʼAGA LEA 17:17.

Kā kita palalau mo he tahi ʼo ʼuhiga mo takita ʼu faigataʼa, pea ʼe faigafua age anai hakita ʼamo. Neʼe tohi e te tagata faitohi Pilitānia ko Francis Bacon ʼo ʼuhiga mo nātou ʼaē ʼe mole honatou ʼu  kaumeʼa moʼoni, kiā nātou “ ʼe hagē te mālamanei ko he toafa.” Kā tou maʼu he ʼu kaumeʼa moʼoni, pea kapau ko kita ʼe ko he kaumeʼa lelei, pea ʼe feala ke tou leleiʼia ia te maʼuli; ʼe feala ke liliu te maʼuli ʼo taulekaleka pea mo fakafiafia.

TE PELESEPETO FAKATOHI-TAPU: “Fiafia ia nātou ʼaē ʼe natou ʼiloʼi tonatou masiva fakalaumālie.”—MATEO 5:3.

Neʼe fakahā e Sesu ia te faʼahi maʼuhiga ʼaē ʼe tonu ke kotou fai mo kapau ʼe kotou fia sisio ki te fakahoko ʼo te ʼu fakapapau ʼa te ʼAtua: ke kotou ʼiloʼi pea mo kotou fakafīmālieʼi takotou ʼaluʼaga “fakalaumālie.” ʼO mole hagē ko te ʼu manu, ʼe tou maʼu iā tātou te fia mahino ʼaē ki te ʼuhiga pea mo te fakatuʼutuʼu ʼo te maʼuli. Ko Sehova ʼAtua tokotahi pē ʼaē ʼe feala ke ina foaki te tali ki te ʼu faʼahi ʼaia, pea ʼe ina fai ʼaki tana Folafola, ia te Tohi-Tapu. Ohagē ko tatatou vakaʼi ʼi te ʼalatike ki muʼa atu, ʼe fakahā mai ʼi te Tohi-Tapu ia te fakatuʼutuʼu ʼa te ʼAtua maʼa te kele. ʼE ina fakahā mai te tupuʼaga ʼo totatou ʼi te kele, he koʼē ʼe lahi ʼaupitō fēia te ʼu mamahi, pea koteā ʼaē ʼe loto e te ʼAtua ke tou fai. ʼE maʼuhiga ke tou mahino ki te ʼu moʼoni Fakatohi-tapu ʼaia ke ʼi ai he ʼuhiga ʼo totatou maʼuli pea mo tou fiafia ai. ʼE fiafia ia nātou ʼaē ʼe natou toʼo he temi moʼo ako te Tohi-Tapu pea mo maʼuliʼi te ʼu meʼa ʼaē ʼe natou ako. Koteā tona tupuʼaga? Koteʼuhi ʼi tanatou fai fēia, ʼe natou fakatuputupu ai he ʼu felōgoi ʼe tuha mo te falala mo totatou Tupuʼaga, ia “te ʼAtua fiafia” ʼaē ko Sehova.—1 Timoteo 1:11.

TE PELESEPETO FAKATOHI-TAPU: “Naʼa galo iā koe ia tou Tupuʼaga. Ke ke manatuʼi ia ia, iā muʼa ʼo te hoko mai ʼo te ʼu ʼaho faigataʼa, pea mo temi ʼaē kā ke ʼui ai anai: ‘Neʼe mole au maʼu he fiafia ʼi toku maʼuli.’ ”—TAGATA TĀNAKI 12:1, Bible en français courant.

ʼE toe ʼaoga kiā tātou fuli te fakatokaga ʼaē ʼe fai e te Hau ko Salomone ki te hahaʼi tūpulaga, ʼaē ʼe feala ʼi ʼihi temi ke mole natou ʼiloʼi ia te ʼu tuʼutāmaki ʼaē ʼe feala ke hoko ʼi te maʼuli. ʼI tokotou maʼuli, kotou manatuʼi tāfito ia tokotou Tupuʼaga. ʼE kotou maʼu ai anai ia he ʼuhiga moʼoni ʼo tokotou maʼuli. Kotou fakafisi ki te faʼahiga aga ʼaenī: “Tou kakai pea mo tou ʼiʼinu, heʼe tou mamate anai ʼapogipogi.” (1 Kolonito 15:32) Kapau ʼe kotou fakamuʼamuʼa ia te ʼAtua ʼi tokotou maʼuli, pea ʼe ʼui iā Tagata Tānaki 8:12 ko meʼa fuli “ ʼe fua lelei [pē] anai” kiā koutou.

Neʼe moʼoni te faʼahi ʼaia kiā Wendi. ʼI tana kei finemui, ko ia pea mo tona kiʼi tehina veliveli neʼe nā ako te lea Fakasepania ke feala hanā ʼolo ki te fenua ʼo République Dominicaine, ʼaē neʼe ʼaoga lahi ai he kau fai fakamafola ʼo te logo lelei ʼo te  Tohi-Tapu. “Neʼe lahi te ʼu sākilifisio neʼe mā fai ke mā gāue ʼi te potu ʼaē neʼe ʼaoga ai he tokoni, kae neʼe ko he temi fakafiafia ʼaupitō. ʼE mole mā fetogi anai te ʼu meʼa ʼaē neʼe mā fai ʼi te ʼu māhina ʼaia e ono. Neʼe laka age te ʼu tapuakina ʼaē neʼe mā maʼu ʼi te ʼu sākilifisio ʼaē neʼe mā fai.”

ʼE Tou Maʼu He ʼUhiga ʼo Totatou Maʼuli Mokā Tou Agatonu Ki Te ʼAtua

Kā tou fakatuputupu he ʼu felōgoi lelei mo Sehova, pea ʼe tou maʼu ai he ʼuhiga ʼo totatou maʼuli ʼi hona ʼaluʼaga makehe. Koteā tona fakaʼuhiga? Neʼe mole gata pē te taki ʼaē e Satana ia Atama mo Eva ke nā talagataʼa ki te pule ʼa te ʼAtua, kae neʼe ina toe lau foki ʼe mole he tahi ʼe nofo agatonu anai ki te ʼAtua ʼi te ʼu ʼahiʼahi. (Sopo 1:9-11; 2:4) ʼE feala ke kotou fakamoʼoni ko Satana ʼe gutu loi! ʼO feafeaʼi? ʼAki takotou nonofo agatonu ki te ʼAtua, mo kotou mulimuli ki tana ʼu pelesepeto, pea mo kotou fakahā ko Sehova tokotahi pē ʼaē ʼe tonu ke ina fakahā mai te meʼa ʼaē ʼe lelei pea mo ʼaē ʼe kovi.—Fakahā 4:11.

ʼE lagi tou tau mo he ʼu faigataʼaʼia mokā tou fakatotonu ke tou haga fai te aga ʼaē ʼe faitotonu. ʼE mole kei ʼi ai anai koa he ʼuhiga ʼo totatou maʼuli ʼuhi heʼe tou tau mo te ʼu faigataʼaʼia ʼaia? Tou toʼo he faʼifaʼitaki: ohagē ko he fili agakovi ʼe ina laukoviʼi hotatou kaumeʼa peʼe ko he tahi ʼi totatou fāmili ʼe tou ʼoʼofa ai. Kapau ʼi tatatou lagolago ʼaē kiā ia ʼaē ʼe tou ʼoʼofa ai ʼe tupu ai he gaohi koviʼi ʼo tātou e totatou fili ʼaia, ʼe mole kei ʼi ai anai koa he ʼuhiga ʼo totatou maʼuli? Kailoa ia! ʼE tou kātakiʼi pē anai te ʼu faigataʼaʼia ʼaia ʼaki he loto fiafia, maʼa te higoa ʼo ia ʼaē ʼe tou ʼoʼofa ai. ʼE toe fēia pē ʼo ʼuhiga mo tatatou agatonu ki te ʼAtua. Kapau ʼe tou nonofo agatonu ʼi ni ʼu ʼaluʼaga faigataʼa, pea ʼe fiafia ai ia te loto ʼo te ʼAtua.—Tāʼaga Lea 27:11.

Ko He Maʼuli ʼe ʼi Ai Hona ʼUhiga ʼo Talu Ai

Koia, kotou faiga ʼaupitō ke kotou ako ia meʼa fuli ʼe kotou lavaʼi ʼo ʼuhiga mo te ʼAtua pea mo tana fakatuʼutuʼu. Neʼe ʼui fēnei e Sesu Kilisito: “Ko te fakaʼuhiga ʼaenī ʼo te maʼuli heʼegata, ke natou ako ke natou ʼiloʼi ia koe, te ʼAtua moʼoni e tahi, pea mo ia ʼaē neʼe ke fekauʼi mai, ia Sesu Kilisito.” (Soane 17:3) ʼI te temi ʼaē kā fakahoko ai e te ʼAtua tana fakatuʼutuʼu ʼi te kamata ʼo ʼuhiga mo te kele, ʼe maʼu ai anai e te hahaʼi agatonu te faʼahi ʼaē neʼe fia foaki age e Sehova ʼi te kamataʼaga: “te maʼuli heʼegata” ʼi te palatiso ʼi te kele. ʼI te temi ʼaia, ʼe ʼi ai moʼoni anai he ʼuhiga ʼo te maʼuli fakafiafia.—Pesalemo 145:16.

ʼE feala koa ke kotou maʼu ʼifea ia te ʼatamai mālama ʼaē neʼe talanoa kiai ia Sesu? ʼI te Folafola ʼaē ʼe haʼu mai te ʼAtua, ia te Tohi-Tapu. Kapau ʼe kotou loto ki he tokoni ʼi te faʼahi ʼaia, kotou faitohi ki te hahaʼi ʼaē neʼe natou tā ia te nusipepa ʼaenī. ʼE natou fiafia anai ke tokoni atu he tahi ke kotou ʼiloʼi pe koteā ʼaē ʼe akoʼi moʼoni mai ʼi te Tohi-Tapu.