Te ʼu Tokoni Poto Ki Te Maʼuli Fakaselipatea Pea Mo Te Nofo ʼOhoana

“ ʼE au ʼui atu te meʼa ʼaia . . . ke taki koutou ki te meʼa ʼaē ʼe lelei pea mo te meʼa ʼaē ko tona fakaʼuhiga ko he tauhi tuʼumaʼu ki te ʼAliki, ʼo mole fakalelu.”—1 KO. 7:35.

1, 2. He koʼē ʼe lelei ke kumi e he tahi te ʼu tokoni Fakatohi-tapu ʼo ʼuhiga mo te maʼuli fakaselipatea pea mo te nofo ʼohoana?

 KO TE fiafia, mo te ʼita pea mo te loto hoha ʼe ko he ʼu faʼahi ʼe tou tau logoʼi ʼi tatatou ʼu felōgoi mo totatou ʼohoana. ʼI tatatou logoʼi ia te ʼu faʼahi kehekehe ʼaia, ʼe ʼaoga ke tou kole ki te ʼAtua ke ina takitaki tātou. Ko he Kilisitiano ʼe fiafia ʼi tona maʼuli fakaselipatea, ʼe lagi ina logoʼi te fakaneke ʼo ia e tona fāmili peʼe ko hona ʼu kaumeʼa ke ʼohoana. Ko he tahi Kilisitiano ia ʼe lagi fia ʼohoana, kae ʼe mole heʼeki ina maʼu hona hoa ʼe tāu mo ia totonu. Ko ʼihi ia ʼe ʼaoga kiā nātou he ʼu tokoni ʼo ʼuhiga mo te ʼu maʼua ʼaē ʼe tonu ke fakahoko e he tagata ʼohoana peʼe ko he fafine ʼohoana. Pea ko te kau Kilisitiano selipatea pea mo nātou ʼaē kua ʼohoana, ʼe ʼaoga ke natou puipui ia nātou mai te ʼu aga heʼeʼaoga.

² Ko te ʼu faʼahi ʼaia ʼe feala ke ʼi ai hona fua ki tatatou fiafia, kae tāfito ki tatatou ʼu felōgoi lelei ʼaē mo Sehova ʼAtua. ʼI te kāpite 7 ʼo tana ʼuluaki tohi ʼaē neʼe ina fai ki te kau Kolonito, neʼe foaki e Paulo he ʼu tokoni ʼo ʼuhiga mo te maʼuli fakaselipatea pea mo te nofo ʼohoana. Neʼe ina fia uga tana kau lautohi “ki te meʼa ʼaē ʼe lelei pea mo te meʼa ʼaē ko tona fakaʼuhiga ko he tauhi tuʼumaʼu ki te ʼAliki, ʼo mole fakalelu.” (1 Ko. 7:35) ʼI takotou vakavakaʼi ia tana ʼu tokoni ʼi te ʼu faʼahi maʼuhiga ʼaia, kotou faiga ke lahi age takotou tauhi kiā Sehova, peʼe kotou selipatea peʼe kua kotou ʼohoana.

Ko He Tonu Maʼuhiga ʼe Tou Fai Takitokotahi

3, 4. (a) Koteā ʼaē ʼe feala ke hoko mo kapau ʼe fakaneke he tahi e tona ʼu kaumeʼa peʼe ko tona fāmili ke ʼohoana? (b) ʼE tokoni feafeaʼi te ʼu palalau ʼa Paulo ki he tahi, ke ina maʼu he manatu fakapotopoto ʼo ʼuhiga mo te ʼohoana?

³ Ohagē ko te hahaʼi Sutea ʼi te ʼuluaki sēkulō, tokolahi iā ʼaho nei ʼe maʼuhiga age kiā nātou ke ʼohoana he tahi. Kapau ko he talavou peʼe ko he finemui kua tonu ia ke ʼohoana kae kei selipatea, pea ko tona ʼu kaumeʼa mo tona fāmili ʼaē ʼe ʼoʼofa kiā ia, ʼe lagi natou fia fai tokoni ki ai. ʼI tanatou fai palalau, ʼe lagi natou ʼui age kiā ia ʼaē ʼe selipatea ke lahi age tana ʼu faiga ʼi tana kumi hona hoa. ʼE lagi natou palalau age ʼo ʼuhiga mo he tahi ʼe feʼauga mo ia. ʼE lagi natou toe fai he fakatuʼutuʼu ke felāveʼi ia nāua tokolua ʼaia. ʼI ʼihi temi, ko te ʼu faʼahiga fai ʼaia ʼe fakatupu ufiufi, mo fakagata ʼo he fakakaumeʼa, pea mo fakalotomamahi.

⁴ Neʼe mole he temi neʼe uga ai e Paulo te kau Kilisitiano ke natou ʼohoana peʼe ke natou nonofo selipatea. (1 Ko. 7:7) Neʼe fiafia ʼi tana tauhi kiā Sehova logolā neʼe mole hona ʼohoana, kae neʼe fakaʼapaʼapa ia kiā nātou ʼaē neʼe ʼohoana. Iā ʼaho nei, ʼe toe feala ki te kau Kilisitiano takitokotahi ke natou filifili peʼe natou ʼohoana peʼe natou nonofo selipatea. ʼE mole tonu ke fakaneke nātou e ʼihi ke natou ʼohoana peʼe kailoa.

Ke Māui Mālie Te Nofo Selipatea

5, 6. He koʼē neʼe fakalotomālohiʼi e Paulo ia te maʼuli fakaselipatea?

⁵ Ko te faʼahi maʼuhiga ʼi te ʼu palalau ʼaē neʼe fai e Paulo ki te kau Kolonito, ʼe ko tana palalau lelei ʼo ʼuhiga mo te maʼuli fakaselipatea. (Lau ia 1 Kolonito 7:8.) Logolā neʼe mole ʼohoana ia Paulo, kae neʼe mole ina ʼui ʼe maʼuhiga age ia iā nātou ʼaē kua ʼohoana, ohagē ko tona fai e te kau takitaki lotu selipatea ʼo te Keletiate. Kailoa ia, kae neʼe fakamaʼuhigaʼi e te ʼapositolo te faigamālie ʼaē ʼe maʼu e te tokolahi ʼi te kau minisi ʼo te logo lelei ʼaē ʼe mole heʼeki ʼohoana. Koteā te faigamālie ʼaia?

 ⁶ ʼI te agamāhani, ʼe faigafua age ki he Kilisitiano selipatea tana tali he ʼu gāue ʼi te tauhi ʼaē kiā Sehova, ʼi he tahi kua ʼohoana. Neʼe foaki kiā Paulo te pilivilēsio makehe ʼaē ke liliu ko “te ʼapositolo . . . ʼo te ʼu puleʼaga.” (Loma 11:13) Kotou lau te tohi ʼo Gāue, mai te kāpite 13 ki te 20, pea kotou vakaʼi ai tana ʼavahi mo tona ʼu tehina misionea te ʼu telituale foʼou pea mo fakatuʼu ai he ʼu kōkelekāsio. ʼI tana minisitelio, neʼe kātakiʼi e Paulo te ʼu faigataʼaʼia ʼaē iā ʼaho nei ʼe tokosiʼi ʼe natou tau mo ia. (2 Ko. 11:23-27, 32, 33) Kae neʼe fiafia ia ʼi tana tali te ʼu faigataʼaʼia ʼaia moʼo tokoni ki te tokolahi ke natou liliu ko he ʼu tisipulo. (1 Tes. 1:2-7, 9; 2:19) Neʼe feala koa ke ina fai te ʼu gāue fuli ʼaia mo kanapau lā neʼe ʼohoana peʼe maʼu fānau? Neʼe mole lagi feala ia.

 7. Kotou tuku mai he faʼifaʼitaki ʼo he ʼu Fakamoʼoni selipatea neʼe nā fakaʼaogaʼi tonā ʼaluʼaga ʼaia moʼo fakahoko te ʼu gāue ʼo te Puleʼaga.

⁷ Tokolahi te kau Kilisitiano selipatea, ʼe natou fakaʼaogaʼi tonatou ʼaluʼaga ʼaia ke lahi age tanatou gāue ki te Puleʼaga. Ko Sara pea mo Limbania, te ʼu pioniē selipatea ʼi Polivia, neʼe nā ʼolo ki he kolo neʼe kua fualoa te mole heʼeki ʼasi age ʼa he Fakamoʼoni. Neʼe ko he faigataʼaʼia koa te mole ʼi ai ʼo he hila? Neʼe nā fakamatala fēnei: “Neʼe mole he lātio peʼe ko he televisio, koia neʼe mole fakaleluʼi ai te hahaʼi mai te faʼahi ʼaē neʼe natou fiafia ai, ʼaē ko te lautohi.” Ko ʼihi hahaʼi ʼo te kolo neʼe natou fakahā age ki te ʼu pioniē, te ʼu tohi kua fualoa te mole kei tā e te kau Fakamoʼoni ʼa Sehova kae neʼe kei natou lolotoga lau pē. Neʼe faigataʼa ki te ʼu tuagaʼane tanā ʼaʼahi ia te ʼu ʼapi fuli ʼo te telituale, he neʼe teitei pē ke ʼi ai he tahi neʼe fia logo ʼi te ʼu ʼapi ʼaē neʼe nā fai. Neʼe ʼui age fēnei kiā nāua e te finematuʼa: “Kua lagi ovi mai te fakaʼosi heʼe kua kaku mai ki henī te kau Fakamoʼoni ʼa Sehova.” Mole tuai, pea ko ʼihi ʼo te kolo ʼaia neʼe natou kau ki te ʼu fono.

8, 9. (a) He koʼē neʼe ʼui e Paulo neʼe lelei te maʼuli selipatea moʼo tauhi ki te ʼAtua? (b) Koteā te ʼu faigamālie ʼe maʼu e te kau Kilisitiano selipatea?

⁸ ʼE mahino ia, ʼe toe maʼu foki e te kau Kilisitiano ʼaē kua ʼohoana he ʼu fua lelei mokā natou fakamafola te logo lelei ʼi te ʼu telituale faigataʼa. Kae ko ʼihi gāue ʼaē ʼe feala ke tali e te kau pioniē selipatea, ʼe lagi mata faigataʼa anai kiā nātou ʼaē kua ʼohoana peʼe maʼu fānau. ʼI te faitohi ʼa Paulo ki te ʼu kōkelekāsio, neʼe ina ʼiloʼi neʼe kei lahi te ʼu gāue ʼaē neʼe feala ke fai moʼo fakamafola te logo lelei. Neʼe loto ia ke fiafia te hahaʼi fuli, ohagē pē ko ia. Koia neʼe ʼui ai e Paulo neʼe lelei te maʼuli selipatea moʼo tauhi kiā Sehova.

⁹ Ko he tuagaʼane pioniē selipatea ʼi Amelika, neʼe ina tohi fēnei: “ ʼE tui e ʼihi hahaʼi ʼe mole feala ki he selipatea ke fiafia. Kae neʼe au tokagaʼi, ko  te fiafia moʼoni ʼe fakalogo ki te fakakaumeʼa ʼaē ʼa he tahi mo Sehova. Ko te nofo selipatea, logolā ko he sākilifisio, kae ʼe ko he meʼa ʼofa fakatupu fiafia mo kapau ʼe tou fakaʼaogaʼi lelei.” ʼO ʼuhiga mo te maʼu ʼo te fiafia, neʼe ina tohi fēnei: “ ʼE feala ki he selipatea ke fiafia moʼoni. ʼE au ʼiloʼi ʼe mole tuku keheʼi e Sehova he tahi, peʼe selipatea peʼe ʼohoana, mai tona ʼofa mamahi.” ʼI te temi nei, ʼe tauhi fakafiafia ia te tuagaʼane ʼaia ʼi he fenua ʼe lahi ai te ʼaoga ʼo he kau fai fakamafola ʼo te Puleʼaga. Kapau ʼe kotou selipatea, ʼe feala koa ke kotou fakaʼaogaʼi takotou ʼāteaina ke lahi age takotou akoʼi te moʼoni ki te hahaʼi? Kapau koia ʼaia, pea ko tokotou maʼuli selipatea ʼe liliu anai ko he meʼa ʼofa maʼuhiga mai iā Sehova.

Te Kau Selipatea ʼAē ʼe Fia ʼOhoana

10, 11. ʼE tokoni feafeaʼi ia Sehova kiā nātou ʼaē ʼe fakaʼamu ke natou ʼohoana, kae ʼe mole heʼeki natou maʼu honatou hoa ʼe tāu mo nātou?

¹⁰ Hili ni ʼu taʼu ʼaē neʼe natou māʼuʼuli selipatea ai, tokolahi te ʼu kaugana agatonu ʼa Sehova ʼe natou fai te tonu ʼaē ke natou kumi lā honatou hoa. ʼI tanatou ʼiloʼi ʼaē te ʼaoga kiā nātou he takitaki, koia ʼe natou kole ai kiā Sehova ke tokoni age ke natou maʼu honatou hoa ʼe tāu mo nātou.—Lau ia 1 Kolonito 7:36.

¹¹ Kapau ʼe kotou fakaʼamu ke kotou ʼohoana mo he tahi ʼe toe loto mo ia ke tauhi kiā Sehova ʼaki tona nefesi kātoa, kotou haga faikoleʼi ia te faʼahi ʼaia kiā Sehova. (Filp. 4:6, 7) Tatau aipē peʼe hagē kua fualoa takotou fakatalitali, kae ʼaua naʼa kotou lotovaivai. ʼE ʼiloʼi e Sehova te meʼa ʼaē ʼe ʼaoga kiā koutou, pea kapau ʼe kotou falala kiā te ia, pea ʼe tokoni atu anai ke kotou kātakiʼi tokotou ʼaluʼaga.—Hep. 13:6.

12. He koʼē ʼe tonu ke vakavakaʼi lelei e he Kilisitiano mo kapau ʼe fakaʼui ʼohoana age he tahi?

¹² Ko he Kilisitiano selipatea ʼe fia ʼohoana, ʼe feala ke fakaʼui ʼohoana age he tahi ʼe mole faʼa mālohi ʼi te faʼahi fakalaumālie, peʼe ko he tahi ʼe mole tauhi kiā Sehova. Kapau ʼe hoko te faʼahi ʼaia kiā koutou, kotou manatuʼi ʼe lahi age te mamahi ʼaē ʼe tupu ʼuhi ko te mole lelei ʼo takotou filifili hokotou hoa, ʼi te lotomamahi ʼaē ʼe kotou logoʼi ʼi takotou nonofo selipatea. Pea kā kua kotou ʼohoana, kua nonoʼo koutou ki tokotou ʼohoana ʼi tokotou maʼuli kātoa, ki te lelei pea mo te kovi. (1 Ko. 7:27) ʼE mole tonu ke kotou ʼohoanaʼi he tahi ʼuhi pē heʼe kotou manatu ʼe ko te faigamālie pē ʼaia e tahi ke kotou ʼohoana, heʼe feala ke kotou fakahemala ki te tonu ʼaia ki muli age.—Lau ia 1 Kolonito 7:39.

Teuteu Ki Te Nofo ʼOhoana

13-15. Koteā te ʼu fihifihia ʼaē ʼe feala ke hoko ʼi te maʼuli fakataumātuʼa, ʼe lelei ke fai palalau kiai e he toko lua lolotoga tanā fakatahi?

¹³ Logolā neʼe fakalotomālohiʼi e Paulo te maʼuli fakaselipatea ki te tauhi kiā Sehova, kae neʼe mole ina meʼa noaʼi ia nātou ʼaē neʼe natou fai te tonu ʼaē ke natou ʼohoana. Kailoa ia, kae ko te ʼu tokoni ʼaē neʼe ina fai ʼaki te takitaki ʼa te ʼAtua, ʼe tokoni ia kiā nātou ʼaē ʼe fakatahi, ke natou tauʼi te ʼu meʼa ʼaē ʼe hoko moʼoni ʼi te maʼuli fakataumātuʼa, pea ke natou nonofo ʼohoana ʼi tonatou maʼuli kātoa.

¹⁴ ʼE ʼaoga ki he toko lua ʼe nā fakatahi, ke nā fetogi tanā ʼu manatu ʼo ʼuhiga mo te maʼuli fakataumātuʼa. ʼI tanā fakatahi ʼaia, ʼe lagi hagē kiā nāua ko tanā femanakoʼaki ʼe makehe ia, mo fakatalakitupua, pea ʼe ko he fakamoʼoni ʼaia ʼo he ʼohoana fiafia. ʼE nā kamata tonā maʼuli fakataumātuʼa ʼaki te ʼu manatu ʼaia, pea mo nā tui ʼe mole he meʼa ʼe ina lava pulihi anai tonā fiafia. ʼE mole ko te faʼahi ʼaia ʼaē ʼe hoko moʼoni. ʼE fakafiafia te femanakoʼaki ʼa he taumātuʼa, kae ʼe mole feʼauga ia te faʼahi ʼaia moʼo tauʼi te ʼu mamahi ʼaē ʼe tau mo te ʼu taumātuʼa fuli.—Lau ia 1 Kolonito 7:28. a

¹⁵ ʼE tokolahi te ʼu taumātuʼa foʼou ʼe natou punamaʼuli, pea mo natou lotomamahi, mokā ʼi tonatou maʼuli fakataumātuʼa ʼe mole natou manatu tahi ʼo ʼuhiga mo he ʼu faʼahi maʼuhiga. ʼE lagi tokagaʼi e he taumātuʼa ʼe nā kehekehe ʼaupitō ʼo ʼuhiga mo te fakaʼaogaʼi ʼo te falā pea mo te ʼu fakafiafia, te faʼahi ʼaē ʼe nā māʼuʼuli ai, pea mo te temi ʼaē ʼe nā ʼolo ʼo vakaʼi tonā ʼu fāmili. Pea ʼe nā tahi maʼu tonā ʼu vaivaiʼaga ʼe feala ke fakatupu ʼita. ʼI tanā fakatahi, ʼe faigafua hanā mole tokagaʼi ia te ʼu faʼahi maʼuhiga ʼaia, kae ʼe feala ke liliu ko he ʼu fihifihia lahi ki ʼamuli. ʼE lelei age kiā nāua  hanā fakatokatoka te ʼu faʼahi maʼuhiga ʼaia ʼi muʼa ʼo hanā ʼohoana.

16. He koʼē ʼe lelei ki he toko lua ʼe nā fakatahi, ke nā manatu tahi ʼo ʼuhiga mo te tauʼi ʼo te ʼu faigataʼaʼia ʼo te nofo ʼohoana?

¹⁶ Ke māui mālie pea mo fiafia tonā ʼohoana, ko he toko lua ʼe nā fakatahi ʼe tonu ke nā tauʼi fakatahi tonā ʼu faigataʼaʼia. ʼE lelei ke nā manatu tahi ʼo ʼuhiga mo te akonakiʼi ʼaē ʼo tanā fānau pea mo te taupau ʼo tonā ʼu mātuʼa ʼaē kua mātutuʼa. ʼE mole tonu ke nā fetokakoviʼaki ʼuhi ko te lahi fau ʼo te ʼu fihifihia fakafāmili. ʼI tanā maʼuliʼi ia te ʼu tokoni Fakatohi-tapu, ʼe lahi anai te ʼu faigataʼaʼia ʼe nā fakatokatoka anai, mo nā kātakiʼi anai te ʼu fihifihia ʼaē ʼe kei toe, pea mo nā fiafia fakatahi tuʼumaʼu ai.—1 Ko. 7:10, 11.

17. He koʼē ko te hahaʼi ʼaē kua ʼohoana ʼe natou “hoha . . . ki te ʼu meʼa ʼo te mālama”?

¹⁷ Iā 1 Kolonito 7:32-34 (Lau.), ʼe talanoa Paulo ki te tahi faʼahi ʼe hoko moʼoni ʼi te nofo ʼohoana. ʼE ko te maʼua ia ʼo te hahaʼi ʼaē kua ʼohoana ke natou “hoha . . . ki te ʼu meʼa ʼo te mālama,” ohagē lā ko te meʼa kai, te ʼu mutuʼi meʼa, te ʼapi, pea mo te tahi atu ʼu faʼahi ʼe mole pipiki ki te ʼu faʼahi fakalaumālie. Koteā tona tupuʼaga? ʼI tana kei selipatea, ko he tehina neʼe lagi tokaga tāfito ia ki te minisitelio. Kae ʼi tana kua ʼohoana, ʼe ina tokagaʼi ʼe tonu ke ina fakaʼaogaʼi hona temi pea mo hona mālohi moʼo tokaga ki tona ʼohoana pea mo maʼu tona ʼofa. ʼE toe fēia mo te fafine ʼohoana ki tona ʼohoana. Ko Sehova, ʼaē ʼe poto, ʼe mahino kiā te ia te ʼaoga ʼo te fai ʼo te faʼahi ʼaia. ʼE ina ʼiloʼi, ʼi te agamāhani ke fua manūʼia he nofo ʼohoana, ʼe tonu ki te tagata mo te fafine ʼohoana ke nā fakaʼaogaʼi kiai he koga ʼo te temi pea te mālohi ʼaē neʼe nā fakaʼaogaʼi ʼi tanā tauhi kiā te ia ʼi te temi ʼaē neʼe nā selipatea ai.

18. Koteā te ʼu fetogi ʼo ʼuhiga mo te ʼu fakafiafia ʼe lagi tonu anai ke fai e ʼihi hili tanatou ʼohoana?

¹⁸ Kae ʼe ʼi ai te tahi ako ʼe feala ke tou tāʼofi mai te tokoni ʼaia. Kapau ʼe maʼua ki he taumātuʼa ke nā toʼo he temi pea mo he mālohi mai tanā tauhi kiā Sehova moʼo fakamālohi tonā noʼo fakataumātuʼa, pea ʼe mole tonu koa lā ke nā toe fai fēia ʼo ʼuhiga mo te temi pea mo te mālohi ʼaē neʼe nā fakaʼaogaʼi ki te ʼu fakafiafia ʼi tanā kei selipatea?  ʼE feafeaʼi anai te fafine ʼohoana, mo kapau ʼe kei faigaoʼi tuʼumaʼu pē tona ʼohoana mo tona ʼu kaumeʼa? Peʼe feafeaʼi anai te tagata ʼohoana, mo kapau ʼe kei lahi pē te temi ʼaē ʼe fakafiafia ai tona ʼohoana mo tona ʼu kaumeʼa? Mole tuai, pea ko te tagata peʼe ko te fafine ʼohoana ʼaē ʼe mole kei tokagaʼi, ʼe lagi ina logoʼi anai tana nofo tokotahi, tana mole kei fiafia, pea mo tana mole kei ʼofainaʼi. Ke mole hoko te faʼahi ʼaia, ʼe tonu kiā nātou ʼaē kua ʼohoana ke natou faiga lahi ʼo fakamālohi tanatou ʼu felōgoi fakataumātuʼa.—Efe. 5:31.

ʼE Fakamaʼua Mai e Sehova Ke Tou Aga Maʼa

19, 20. (a) He koʼē ʼe mole hao te hahaʼi ʼohoana mai te fakahala ʼaē ke natou fai he aga heʼeʼaoga? (b) Koteā te tuʼutāmaki ʼe feala ke hoko ki he taumātuʼa, mokā ʼe mole nā fakatahi lolotoga he temi fualoa?

¹⁹ ʼE fakatotonu e te ʼu kaugana ʼa Sehova ke natou nonofo maʼa ʼi te aga ʼaē ʼe tonu ke fai. Ko ʼihi ʼe natou fai te tonu ʼaē ke natou ʼohoana ke mole natou fai he aga heʼeʼaoga. Kae ko te nofo ʼohoana ʼe mole ina puipui he tahi mai te ʼu felāveʼi fakasino heʼeʼaoga. ʼI te temi muʼa, neʼe puipui e he kolo mālohi te hahaʼi pē ʼaē neʼe nonofo ʼi tona ʼu loto kaupā. Kapau neʼe fakalaka he tahi ʼi te matapā ʼi te temi ʼaē neʼe feʼoloʼaki ai te ʼu hahaʼi agakovi pea mo kaihaʼa, pea neʼe feala ia ke kaihaʼa peʼe matehi ia ia. ʼO toe fēia pē, ʼe puipui te hahaʼi ʼohoana mai he aga heʼeʼaoga, mo kapau ia ʼe natou mulimuli lelei pē ki te ʼu lao pea mo te ʼu tuʼakoi ʼaē neʼe fakatuʼutuʼu e Sehova ʼo ʼuhiga mo te nofo ʼohoana.

²⁰ Neʼe fakamahino e Paulo te ʼu tuʼakoi ʼaia iā 1 Kolonito 7:2-5. ʼE gata pē ke felāveʼi fakasino he fafine ʼohoana mo tona ʼohoana; ʼo toe fēia mo te tagata ʼohoana, ʼe ko ia tokotahi pē ʼaē ʼe feala ke felāveʼi fakasino mo tona ʼohoana. ʼE nā tahi fakaʼamu ke nā fefoakiʼaki tonā “maʼua” fakataumātuʼa, peʼe ko te ʼu felāveʼi fakasino ʼaē ʼe feala pē ke fai e he taumātuʼa. Kae ko ʼihi tagata pea mo fafine ʼohoana ʼe fualoa te temi ʼaē ʼe mole nā fakatahi ai: ʼe mole nā ʼolo tokolua ʼo mālōlō peʼe mole nā fakatahi ʼuhi ko te gāue, ʼo mole nā fefoakiʼaki ai tonā “maʼua.” Kotou fakakaukauʼi age muʼa te tuʼutāmaki ʼaē ʼe feala ke hoko mo kapau, ʼuhi ko te “mole loto lolomi,” ʼe tō ai he tahi ki te fakaneke ʼa Satana pea mo tono. ʼE tapuakina e Sehova te ʼu pule fāmili ʼaē ʼe natou taupau tonatou fāmili kae ʼe mole natou fai he meʼa ke tuʼutāmaki ai tanatou nofo ʼohoana.—Pes. 37:25.

Te ʼu Fua Lelei ʼo Te Fakalogo Ki Te ʼu Tokoni Fakatohi-tapu

21. (a) He koʼē ʼe faigataʼa te fai ʼo he ʼu tonu ʼo ʼuhiga mo te maʼuli selipatea pea mo te nofo ʼohoana? (b) He koʼē ʼe ʼaoga kiā tātou ia te ʼu tokoni ʼaē ʼe tuʼu iā 1 Kolonito kāpite 7?

²¹ Ko te ʼu tonu ʼo ʼuhiga mo te maʼuli fakaselipatea pea mo te nofo ʼohoana, ʼe kau ki te ʼu tonu faigataʼa ʼaupitō ʼaē ʼe maʼua anai ke fai e he tahi. Ko te hahaʼi fuli ʼe natou heʼe haohaoa, pea ʼe tupu ai te ʼu faigataʼaʼia ʼi tanatou ʼu felōgoi. Koia māʼiapē lā mo nātou ʼaē ʼe ʼofainaʼi pea mo tapuakinaʼi e Sehova, ʼe feala ke natou lotovaivai, peʼe natou selipatea peʼe natou ʼohoana. Kapau ʼe kotou maʼuliʼi ia te ʼu tokoni ʼaē ʼe tou maʼu iā 1 Kolonito kāpite 7, ʼe feala anai hakotou fakasiʼisiʼi ia te ʼu faigataʼaʼia ʼaia. Kiā mata ʼo Sehova, peʼe kotou selipatea peʼe kotou ʼohoana, kae “ ʼe ko he meʼa lelei” anai ia. (Lau ia 1 Kolonito 7:37, 38.) Ko te fakatuʼutuʼu maʼuhiga ʼaē ʼe feala ke kotou faiga kiai ʼe ko takotou maʼu ia te ʼofa ʼo te ʼAtua. ʼE feala ke tou maʼu tona ʼofa ʼi te temi nei pea mo te kā haʼu, mokā tou māʼuʼuli anai ʼi te mālama foʼou ʼaē ʼe fakapapauʼi mai e te ʼAtua. ʼI te temi ʼaia, ko te hahaʼi tagata pea mo te hahaʼi fafine ʼe mole natou tau anai mo te ʼu fakaneke pea mo te ʼu faigataʼaʼia ʼaē ʼo te temi ʼaenī.

[Nota]

ʼE Feala Koa Hakotou Tali?

• He koʼē ʼe mole tonu ke tou fakaneke he tahi ke ʼohoana?

• ʼE kotou lava fakaʼaogaʼi lelei feafeaʼi tokotou temi, mo kapau ʼe kotou kaugana selipatea kiā Sehova?

• ʼE lava teuteu feafeaʼi e he toko lua ʼe nā fakatahi ki te ʼu faigataʼaʼia ʼo te nofo ʼohoana?

• He koʼē ko te nofo ʼohoana ʼe mole ina puipui he tahi mai te ʼu felāveʼi fakasino heʼeʼaoga?

[ʼU fehuʼi ʼo te ako]

[Paki ʼo te pāsina 16]

ʼE fiafia te kau Kilisitiano selipatea ʼaē ʼe natou fakaʼaogaʼi tonatou temi moʼo fakatuputupu tanatou minisitelio

[Paki ʼo te pāsina 18]

Koteā te ʼu fetogi ʼe tonu ke fai e ʼihi hili tanatou ʼohoana?