ʼE Taupau Tātou e Sehova Ki Te Fakamaʼuli
ʼE Taupau Tātou e Sehova Ki Te Fakamaʼuli
“[Ko] koutou ae kua taupau i te malohi o te Atua aki te tui ki te fakamauli ae kua teuteu ke fakaha i te u temi fakamuli!”—1 PET. 1:5.
ʼE KOTOU TALI FEAFEAʼI ANAI?
․․․․․
ʼE taki feafeaʼi mai tātou e Sehova ki te tauhi moʼoni?
․․․․․
ʼE tou lava tuku feafeaʼi ia Sehova ke ina takitaki tātou ʼaki ʼana tokoni?
․․․․․
ʼE fakalotomālohiʼi feafeaʼi tātou e Sehova?
1, 2. (a) He koʼē ʼe feala ke tou tui papau ʼe tokoni mai anai te ʼAtua ke tou nonofo agatonu? (b) ʼE ʼiloʼi lelei feafeaʼi tātou takitokotahi e Sehova?
“KO AE e kataki fualoa anai o kaku ki te fakaosi, e haofaki anai.” (Mat. 24:13) ʼE fakahā lelei mai e Sesu ʼi ʼana palalau ʼe haofaki anai tātou ʼi te temi ʼaē kā fakamāuʼi e te ʼAtua te mālama ʼa Satana, mo kapau ʼe tou taupau tatatou agatonu ʼo kaku ki te fakaʼosi. Kae ʼe mole fakaʼuhiga leva ʼe tuku e Sehova ke tou kātaki pē ʼaki totatou poto peʼe ko totatou mālohi. ʼE fakapapau fēnei mai ʼi te Tohi-Tapu: “E mole he fakahala e tahi kua kaku atu kia koutou nee fakalaka i te malohi o te tagata, pea ko te Atua e agatonu, e mole ina fakagafua anai ke fakahalai koutou o fakalaka i tokotou malohi; kae e ina tuku atu anai fakatahi mo te fakahala te faigamalie ke kotou hao ai pea mo te malohi ke kotou matatali ia.” (1 Ko. 10:13) Koteā tona fakaʼuhiga?
2 ʼE tokaga tāfito Sehova ke mole fakahalaʼi tātou ʼo fakalaka ʼi totatou mālohi. ʼE lava fai e Sehova te faʼahi ʼaia, koteʼuhi ʼe ina ʼiloʼi ia meʼa fuli ʼo ʼuhiga mo tātou, ʼo kau kiai te ʼu faigataʼaʼia ʼaē ʼe tou tau mo ia, mo totatou ʼuluagaaga, pea mo te ʼu faʼahi ʼaē ʼe tou lava kātakiʼi. ʼE ʼiloʼi lelei ʼosi koa tātou ia e te ʼAtua? ʼEī. ʼE fakahā ʼi te Tohi-Tapu ʼe ina ʼiloʼi lelei ia tātou takitokotahi. ʼE ina ʼiloʼi ʼatatou agamāhani, māʼiapē lā mo ʼatatou manatu pea mo te ʼu faʼahi ʼaē ʼe falele kiai totatou loto.—Lau ia Pesalemo 139:1-6.
3, 4. (a) ʼE fakahā feafeaʼi e te meʼa ʼaē neʼe hoko kiā Tavite ko Sehova ʼe tokaga ki te hahaʼi takitokotahi? (b) Koteā te gāue fakaofoofo ʼe lolotoga fai e Sehova iā ʼaho nei?
3 ʼE faigataʼa koa hatatou tui ʼe tokaga fēia te ʼAtua ki te tagata? Neʼe fai e te tagata fai pesalemo ko Tavite ia te fehuʼi ʼaia, ʼo ina ʼui fēnei kiā Sehova: “Ka au sio ki te atu lagi, te gaueaga o ou nima, mo te mahina, mo te u fetuu ae nee ke fakatupu: Kotea te tagata ke ke manatu ai kia ia?” (Pes. 8:4, 5 [Pes. 8:3, 4, MN]) Neʼe lagi fai e Tavite te fehuʼi ʼaia ʼuhi ko te meʼa ʼaē neʼe hoko kiā ia. Kiā mata ʼo Sehova, ko Tavite, ʼaē neʼe ko te foha muli ʼo Sese, neʼe ko “he tagata o mulimuli ki tona loto” pea neʼe ina toʼo ia ia “mai te lotoa manu i muli o te faga ovi, o tupu ke . . . liliu ko te pule” ki Iselaele. (1 Sam. 13:14; 2 Sam. 7:8) Kotou fakakaukauʼi age muʼa pe neʼe feafeaʼi Tavite ʼi tana mahino ʼaē neʼe tokagaʼi e te Tupuʼaga ʼo te ʼatulaulau ʼana metitāsio ʼi te temi ʼaē neʼe kei tauhi manu ai!
4 ʼE toe fakaofoofo foki tatatou mahino ʼaē ʼe tokaga Sehova kiā tātou iā ʼaho nei. ʼE ina fakatahitahi ki te tauhi moʼoni “te u koloa o te atu puleaga fuli” pea mo tokoni ki ʼana kaugana ke natou taupau tanatou agatonu. (Ake. 2:7) Ke tou mahino lelei age peʼe tokoni mai feafeaʼi Sehova ke tou nonofo agatonu, tou vakaʼi muʼa peʼe feafeaʼi tana taki mai te hahaʼi ki te tauhi moʼoni.
ʼE TAKI MAI TĀTOU E TE ʼATUA
5. ʼE taki feafeaʼi e Sehova te hahaʼi ki tona ʼAlo? Kotou tuku mai he faʼifaʼitaki.
5 Neʼe ʼui fēnei e Sesu: “E mole feala ke hau he tahi kia au, mo kapau e mole taki mai ia kia au e taku Tamai ae nee ina fekaui mai au.” (Soa. 6:44) ʼE fakahā ʼi te ʼu palalau ʼaia ʼe tonu ke tokoni mai te ʼAtua ke tou liliu ko he ʼu tisipulo ʼa Kilisito. ʼE taki feafeaʼi e Sehova te hahaʼi ʼaē ʼe hagē ko ni ovi ki tona ʼAlo? ʼE ina fai te faʼahi ʼaia ʼaki te fakamafola ʼo te logo lelei pea mo te gāue ʼo te laumālie māʼoniʼoni. Ohagē lā, ʼi te temi ʼaē neʼe nofo ai Paulo pea mo ʼana kaugā gāue misionea ʼi Filipe, neʼe natou felāveʼi mo te fafine neʼe higoa ko Litia pea neʼe natou fakamafola te logo lelei kiā ia. ʼE ʼui fēnei ʼi te fakamatala neʼe tohi ʼaki te laumālie māʼoniʼoni: “Nee avahi leva e te Aliki tona loto, ke tokaga ia ki te mea nee palalau ki ai Paulo.” ʼE mahino ia neʼe foaki e te ʼAtua tona laumālie moʼo tokoni kiā Litia ke mahino ki te logo, pea neʼe papitema ai ia ia pea mo tona loto fale.—Gaue 16:13-15.
6. Neʼe taki feafeaʼi mai tātou e te ʼAtua ki te tauhi moʼoni?
6 Neʼe hoko pē koa te faʼahi ʼaia kiā Litia? Kailoa ia. Kapau kua foaki tokotou maʼuli kiā Sehova, pea ko tona fakaʼuhiga neʼe toe taki mai e Sehova mo koutou ki te tauhi moʼoni. Neʼe tokagaʼi e tatatou Tamai ʼi selō te meʼa ʼaē ʼe lelei ʼi tokotou loto, ohagē pē ko tana tokagaʼi te meʼa ʼaē neʼe lelei ʼi te loto ʼo Litia. ʼI te temi ʼaē neʼe kotou logo ai ki te logo lelei, neʼe tokoni atu Sehova ke kotou mahino kiai ʼaki tona laumālie māʼoniʼoni. (1 Ko. 2:11, 12) ʼI takotou faiga ʼaē ke kotou maʼuliʼi te ʼu meʼa ʼaē neʼe kotou ako, neʼe ina tapuakina ʼakotou faiga ke kotou fai tona finegalo. ʼI takotou foaki tokotou maʼuli kiā te ia, neʼe fiafia ai tona loto. ʼE moʼoni, talu mai te temi ʼaē neʼe kotou kamata haʼele ai ʼi te ala ʼo te maʼuli, neʼe nofo Sehova mo koutou ʼo tokoni atu ke kotou tuputupu.
7. ʼE tou ʼiloʼi feafeaʼi ʼe tokoni mai anai te ʼAtua ke tou nonofo agatonu?
7 Neʼe tokoni mai Sehova ke tou kamata haʼele mo ia, pea ʼe mole ina liʼaki anai tātou ʼi te temi nei ke tou faiga tokotahi ke tou nonofo agatonu. ʼE ina ʼiloʼi ʼe mole tou lava nonofo anai ʼi te moʼoni ʼaki pē ʼatatou faiga, he neʼe mole tou ʼomai ki te moʼoni ʼaki pē ʼatatou faiga. Neʼe faitohi te ʼapositolo ko Paulo ki te kau Kilisitiano fakanofo, pea neʼe ina ʼui fēnei: “[Ko] koutou ae kua taupau i te malohi o te Atua aki te tui ki te fakamauli ae kua teuteu ke fakaha i te u temi fakamuli!” (1 Pet. 1:5) ʼE toe fakaʼuhiga te ʼu palalau ʼaia ki te kau Kilisitiano fuli pē, pea ʼe lelei ke tou tokagaʼi e tātou takitokotahi iā ʼaho nei te ʼu palalau ʼaia. Koteā tona tupuʼaga? Koteʼuhi ʼe ʼaoga kiā tātou fuli ke tokoni mai te ʼAtua ke tou nonofo agatonu kiā te ia.
ʼE TĀʼOFI TĀTOU KE MOLE TOU FAI HE AGA ʼE KOVI
8. He koʼē ʼe ʼaoga ke tou tokaga naʼa tou fai he aga ʼe kovi?
8 ʼUhi ko te ʼu faigataʼaʼia ʼo te maʼuli pea mo ʼatatou vaivaiʼaga, ʼe feala ai ke mole kei tou tōkakaga ki te ʼu meʼa fakalaumālie ʼo tou fai he aga ʼe kovi kae neʼe mole tou mahino kiai. (Lau ia Kalate 6:1.) ʼE hā lelei te faʼahi ʼaia ʼi te meʼa ʼaē neʼe hoko kiā Tavite.
9, 10. Neʼe tāʼofi feafeaʼi e Sehova ia Tavite ke mole ina fai he aga ʼe kovi? Koteā ʼaē ʼe ina fai maʼa tātou iā ʼaho nei?
9 Neʼe tuli e te Hau ko Saulo ia Tavite. ʼI te temi ʼaia neʼe fakahā e Tavite tana loto lolomi ʼi tana mole liufaki age te agakovi ʼa te hau maheka ʼaia. (1 Sam. 24:2-7) Kae ki muli age, neʼe puli leva te loto lolomi ʼa Tavite. ʼI te temi ʼaē neʼe tonu ai ke ina kumi he meʼa kai maʼa tana hahaʼi, neʼe ina kole ʼaki he fakaʼapaʼapa te tokoni ʼa te tagata Iselaele ko Napale. ʼI tona laukoviʼi e Napale, neʼe ʼita Tavite pea ina fakatuʼutuʼu ke ina fakaʼauha te loto fale kātoa ʼo Napale. Kae neʼe mole mahino Tavite, kapau ʼe ina matehi te ʼu hahaʼi ʼi te loto fale ʼo Napale ʼaē neʼe mole natou fai he meʼa ʼe kovi, ʼe ko he fakapō ia kiā mata ʼo te ʼAtua. Neʼe ko Apikaela, te ʼohoana ʼo Napale, ʼaē neʼe ina tāʼofi ia Tavite ke ʼaua naʼa ina fai te hala mamafa ʼaia. ʼI tana ʼiloʼi ʼaē neʼe ko Sehova ʼaē neʼe tokoni age kiā ia, neʼe ʼui fēnei e Tavite kiā Apikaela: “Ke fakafetai ki te Eteleno, te Atua o Iselaele, ae nee ina fekaui mai koe kia au i te temi aeni! Ke fakafetai ki tou fakapotopoto, pea ke fakamalo kia koe, ae nee ina taofi au i te aho nei ke liligi te toto, pea nee ina taofi toku nima!”—1 Sam. 25:9-13, 21, 22, 32, 33.
10 Koteā te ako ʼe tou maʼu mai te fakamatala ʼaia? Neʼe fakaʼaogaʼi e Sehova ia Apikaela moʼo tāʼofi ia Tavite ke ʼaua naʼa ina fai he aga ʼe kovi. ʼE toe fēia mo tātou iā ʼaho nei. ʼE mahino ia ʼe mole fekauʼi mai anai e te ʼAtua he tahi ʼi te temi fuli pē ke ina tāʼofi tātou ke ʼaua naʼa tou fai he meʼa ʼe kovi. Pea ʼe mole tou ʼiloʼi papau foki te meʼa ʼaē kā fai anai e Sehova ʼi he ʼaluʼaga pē ʼe feala ke hoko peʼe koteā anai kā ina fakagafua moʼo fakahoko tana fakatuʼutuʼu. (Ekl. 11:5) Kae ʼe tou falala ʼe ʼiloʼi pē e Sehova te ʼu meʼa ʼaē ʼe hoko kiā tātou pea mo tokoni mai anai ke tou nonofo agatonu kiā te ia. ʼE ina fakapapau fēnei mai: “E au ako anai kia koe pea e au fakaha anai kia koe te ala ae e tonu ke ke muli ai. E au tokoni anai kia koe, pea e au tuku tuumau anai oku mata kia koe.” (Pes. 32:8) ʼE foaki feafeaʼi mai e Sehova ʼana tokoni? ʼE lava fua lelei feafeaʼi kiā tātou? Pea he koʼē ʼe tou lava tui papau ko Sehova ʼe ina takitaki tana hahaʼi iā ʼaho nei? Tou vakaʼi peʼe tali feafeaʼi te tohi ʼo Apokalipisi ki te ʼu fehuʼi ʼaia.
TE ʼU TOKONI MOʼO TAUPAU ʼO TĀTOU
11. Koteā te ʼu faʼahi ʼaē ʼe ʼiloʼi e Sehova ʼi te ʼu kōkelekāsio ʼo tana hahaʼi?
11 Iā Apokalipisi kāpite 2 pea mo 3, ʼe fakahā ai ko te Hau ko Sesu Kilisito ʼe ina vakavakaʼi te ʼu kōkelekāsio e fitu ʼi Asia Veliveli. ʼE mole sio pē Kilisito ki te ʼaluʼaga ʼo te ʼu kōkelekāsio, kae ʼe ina ʼiloʼi te ʼu meʼa fuli ʼaē ʼe hoko ai ʼo fēia mo te hahaʼi ʼi te ʼu kōkelekāsio ʼaia. Neʼe ina vikiʼi pea mo fai he ʼu tokoni ki te ʼu kōkelekāsio takitahi ʼo mulimuli ki te ʼu meʼa ʼaē neʼe hoko ai. Koteā tona fakaʼuhiga kiā tātou? ʼE fakatā ia te ʼu kōkelekāsio e fitu ki te kau Kilisitiano fakanofo hili te taʼu 1914, pea ko te ʼu tokoni ʼaē ʼe foaki ki te ʼu kōkelekāsio ʼaia e fitu ʼe toe ʼaoga ki te ʼu kōkelekāsio fuli ʼa te hahaʼi ʼa te ʼAtua iā ʼaho nei ʼi te kele kātoa. Koia ʼe feala ai ke tou ʼui ko Sehova, ʼaki tona ʼAlo, ʼe ina takitaki tana hahaʼi. ʼE tou lava maʼu feafeaʼi te ʼu lelei ʼo tana takitaki ʼaia?
12. ʼE feafeaʼi hatatou lava tuku ia Sehova ke ina taki tatatou haʼele?
12 ʼE feala ke tou maʼu te ʼu lelei ʼo te takitaki ʼofa ʼa Sehova ʼaki tatatou ako takitokotahi. ʼI te ʼu tohi ʼo te kalasi ʼo te tagata faifekau agatonu mo poto, ʼe foaki mai ai e Sehova he ʼu tokoni lelei ʼe fakatafito ki te Tohi-Tapu. (Mat. 24:45) Kae ke feala hatatou maʼu te ʼu lelei ʼaē mai ai ʼe tonu ke tou toʼo he temi ke tou ako pea mo maʼuliʼi te ʼu meʼa ʼaē ʼe tou ako. ʼAki tatatou ako takitokotahi ʼe feala ai kiā Sehova “ke ina taupau [tātou] mai te u higaaga fuli.” (Suta 24) Neʼe mole heʼeki kotou ako koa he manatu ʼi ʼatatou tohi pea mo hagē kiā koutou neʼe tohi te manatu ʼaia kiā koutou? Kotou tali te ʼu tokoni ohagē ko he ʼu tokoni mai iā Sehova. Ohagē pē ko hokotou kaumeʼa ʼe ina tātā tokotou fugauma ke kotou tokaga ki he faʼahi, pea ʼe toe fēia mo Sehova ʼe ina fakaʼaogaʼi tona laumālie moʼo fakatokaga atu he aga ʼe kotou fai peʼe ko he faʼahi ʼo tokotou ʼuluagaaga ʼe tonu ke fetogi. ʼE mahino ia ʼe ina toe fai te faʼahi ki ʼihi atu. Kapau ʼe tou tali ke takitaki tātou e te laumālie, pea ʼe tou tuku ai ia Sehova ke ina taki tatatou haʼele. (Lau ia Pesalemo 139:23, 24.) ʼE lelei ke tou vakavakaʼi peʼe feafeaʼi tatatou fai tatatou ako takitokotahi.
13. He koʼē ʼe lelei ke tou vakavakaʼi peʼe feafeaʼi tatatou ako takitokotahi?
13 Kapau ʼe lahi fau te temi ʼaē ʼe tou fakaʼaogaʼi ki te ʼu fakafiafia, pea ʼe mole kei tou maʼu leva he temi ki tatatou ako takitokotahi. ʼE ʼui fēnei e te tehina: “ ʼE faigafua hatatou tōtō ʼi tatatou ako takitokotahi. ʼI te temi nei kua meʼa noa hatatou maʼu he ʼu fakafiafia, heʼe kua totogi siasiaʼa age ʼi te temi muʼa. ʼE tou lava maʼu te ʼu fakafiafia ʼi te televisio, ʼi te olotinatea pea mo te telefoni. ʼI te ʼu potu fuli pē ʼe feala ke tou maʼu ai he ʼu fakafiafia.” Kapau ʼe mole tou nofo tokaga, pea ʼe feala māmālie pē ke mole kei tou fai tatatou ako takitokotahi. (Efe. 5:15-17) ʼE lelei ke tou fai e tātou takitokotahi te ʼu fehuʼi ʼaenī: ʼE tuʼa fia taku ako fakamālotoloto te Folafola ʼa te ʼAtua? ʼE ko te temi pē koa ʼaē ʼe tonu ai ke au teuteu he kiʼi faifai palalau peʼe ko he akonaki ʼi te fono? Kapau koia, pea ʼe lagi lelei age ke tou fakaʼaogaʼi tatatou afiafi ki te tauhi fakafāmili peʼe ki te ako takitokotahi moʼo fakaloloto tatatou kumi te poto ʼo te ʼAtua ʼaē ʼe ina foaki mai moʼo taupau tātou ki te fakamaʼuli.—Taag. 2:1-5.
KO TE ʼU FAKALOTOMĀLOHI ʼE TOKONI MAI KE TOU ʼUTAKI
14. ʼE fakahā feafeaʼi ʼi te Tohi-Tapu ko Sehova ʼe ina ʼiloʼi totatou loto?
14 Neʼe fetaulaki Tavite mo te ʼu ʼaluʼaga fakalotomamahi ʼi tona maʼuli. (1 Sam. 30:3-6) Ko te ʼu palalau ʼaē neʼe ina fai ʼaki te takitaki ʼo te laumālie, ʼe hā ai neʼe ʼiloʼi e Sehova tona loto. (Lau ia Pesalemo 34:19; 56:9 [Pes. 34:18; 56:8, MN].) ʼE toe ʼiloʼi e te ʼAtua totatou loto. ʼE fakaovi mai kiā tātou mokā tou “loto fasifasi” peʼe “loto mamahi.” ʼE tou maʼu ai he fakalotofīmālie, ohagē pē ko Tavite ʼaē neʼe hiva fēnei: “E au fiafia anai mo nekenekea i tou kalasia: Koteuhi e ke sio ki toku mamahi, e ke iloi te u mataku o toku loto.” (Pes. 31:8 [Pes. 31:7, MN]) ʼE mole sio pē Sehova ki totatou lotomamahi, kae ʼe toe lagolago kiā tātou ʼaki tana foaki mai he fakalotofīmālie pea mo he fakalotomālohi. ʼE ina fai te faʼahi ʼaia ʼaki te ʼu fono.
15. Koteā te ako ʼe tou lava maʼu mai te meʼa neʼe hoko kiā Asafe?
15 Ko te meʼa ʼaē neʼe hoko ki te tagata fai pesalemo ko Asafe ʼe hā ai te lelei ʼaē ke tou kau ki te ʼu fono. ʼI te manatuʼi tuʼumaʼu e Asafe te ʼu ʼaluʼaga heʼe faitotonu, neʼe mole kei ina ʼiloʼi peʼe maʼuhiga tana tauhi ki te ʼAtua. Neʼe ʼāʼāsili ai te lotovaivai ʼa Asafe. Neʼe ina fakahā te ʼu meʼa ʼi tona loto, ʼo ina ʼui fēnei: “Nee mamahi ai toku loto, pea nee au logoi ai e hukii oku tootooga ia au.” Neʼe meihiʼi pē ke ina tuku tana tauhi kiā Sehova. Koteā ʼaē neʼe tokoni kiā Asafe ke toe manatu fakapotopoto? Neʼe ina ʼui fēnei: “Nee au ulu ai ki te sagatualio o te Atua.” ʼI tana fakatahitahi mo nātou ʼaē neʼe tauhi kiā Sehova, neʼe ina toe maʼu ai te manatu ʼaē ʼe lelei. Neʼe mahino ai neʼe fakatemi pē ia te maʼuli fiafia ʼa te kau agakovi, heʼe fakatonutonuʼi anai e Sehova te ʼaluʼaga ʼaia. (Pes. 73:2, 13-22) ʼE toe feala pē mo tātou ke tou lotovaivai ʼuhi ko tatatou mamahi ʼi te ʼu aga heʼe faitotonu ʼo te mālama ʼa Satana. Ko tatatou fakatahitahi mo ʼotatou tehina ʼe ina fakafīmālie tātou pea mo tokoni mai ke tou fiafia ʼi tatatou tauhi kiā Sehova.
16. ʼE lava ʼaoga feafeaʼi kiā tātou te faʼifaʼitaki ʼo Ana?
16 Kae ʼe feafeaʼi mo kapau ʼe faigataʼa hakotou kau ki te ʼu fono ʼuhi ko he ʼaluʼaga neʼe hoko ʼi te kōkelekāsio? Neʼe lagi kotou tuku hakotou pilivilēsio pea kotou ufiufi ai, peʼe lagi neʼe mole kotou manatu tahi mo he tehina peʼe ko he tuagaʼane. Kapau koia, ʼe lagi tokoni atu anai te faʼifaʼitaki ʼo Ana. (Lau ia 1 Samuele 1:4-8.) Neʼe lotomamahi Ana ʼuhi ko Penina, tona fili. Neʼe fakaʼalu ʼo kovi age te ʼaluʼaga ʼaia ʼi te taʼu fuli mokā hake te fāmili ki Silo ʼo momoli te ʼu sākilifisio kiā Sehova. ʼI te lotomamahi ʼaupitō ʼa Ana “nee tagi leva ia ia pea nee mole toe kai.” Logolā te ʼaluʼaga ʼaia, kae neʼe tatuʼu pē ia ki Silo ʼo tauhi kiā Sehova. Neʼe tokagaʼi e Sehova tana agatonu pea ina tapuakina ia ia.—1 Sam. 1:11, 20.
17, 18. (a) ʼE fakalotomālohiʼi feafeaʼi tātou ʼi te ʼu fono? (b) Koteā takotou manatu ʼo ʼuhiga mo te ʼofa ʼo Sehova ʼo taupau tātou ki te fakamaʼuli?
17 Iā ʼaho nei ʼe lelei ke tou mulimuli ki te faʼifaʼitaki ʼo Ana. ʼE ʼaoga ke tou kau tuʼumaʼu ki te ʼu fono. Neʼe tou logoʼi fuli te fakalotomālohi lahi ʼaē ʼe tou maʼu mokā tou kau ki te ʼu fono. (Hep. 10:24, 25) ʼE fakalotofīmālieʼi tātou ʼaki te ʼofa ʼaē ʼe fakahā e ʼotatou tehina mo tuagaʼane. ʼE feala ke toe malave ki totatou loto he akonaki peʼe ko he tali. Kā tou fai palalau ʼi muʼa peʼe ʼi te hili ʼo he fono, ʼe lagi lotolelei he tehina peʼe ko he tuagaʼane ke fagono mai peʼe ina fakalotofīmālieʼi tātou ʼaki ʼana palalau. (Taag. 15:23; 17:17) ʼE tou maʼu te fiafia mokā tou hiva ia te ʼu kātiko kiā Sehova. ʼE ʼaoga kiā tātou te ʼu fakalotomālohi ʼaē ʼe tou maʼu ʼi te ʼu fono, tāfito lā mokā lahi ʼaupitō ʼotatou “tuania.” ʼE tokoni mai Sehova kiā tātou ʼi te ʼu fono ʼaki tana haga ʼo “fakapelepele” tātou pea mo lagolago ki tatatou fakatotonu ʼaē ke tou nonofo agatonu.—Pes. 94:18, 19.
18 ʼI te puipui ʼo tātou e te ʼAtua, ʼe tou hagē ai ko te tagata fai pesalemo ko Asafe, ʼaē neʼe hiva fēnei kiā Sehova: “Nee ke too toku nima matau; e ke taki anai au i tou poto.” (Pes. 73:23, 24) ʼE tou fakafetaʼi lahi kiā Sehova ʼi tana taupau tātou ki te fakamaʼuli.
[ʼU fehuʼi ʼo te ako]
[Paki ʼo te pāsina 29]
Neʼe toe taki mai mo koutou e Sehova
[Paki ʼo te pāsina 30]
ʼE puipui tātou mo kapau ʼe tou maʼuliʼi te ʼu tokoni ʼa te ʼAtua
[Paki ʼo te pāsina 31]
Ko te ʼu fakalotomālohi ʼe tokoni mai ke tou ʼutaki
