Ko Nātou ʼAē ʼe Natou Lau ʼe Natou “Kilisitiano” ʼe Ko He Kau Kilisitiano Moʼoni Koa?

ʼE TOKOFIA ia te kau Kilisitiano? Ohagē ko tona ʼui ʼi te foʼi tohi (Atlas of Global Christianity), ʼi te taʼu 2010, neʼe teitei pē ki te toko 2 miliale tupu ʼi te mālamanei kātoa. Kae, ʼe toe fakahā ʼi te tohi ʼaia ʼo ʼuhiga mo te kau Kilisitiano ʼaia ʼe natou fakahoko ia faʼahiga tauhi e 41 000, ʼo natou takitahi mo ʼanatou akonaki pea mo ʼanatou lēkula ʼo ʼuhiga mo te aga. ʼI te lahi ʼo te ʼu lotu ʼaē ʼe natou lau ʼe natou “Kilisitiano,” ʼe tou mahino ai tokolahi ʼe natou kau ai ʼe natou lotolotolua peʼe natou lotomamahi ai. ʼE feala ke natou feʼuiʼaki peʼe ko nātou ʼaē ʼe natou lau ʼe natou Kilisitiano ʼe ko he kau Kilisitiano moʼoni koa?

Tou vakaʼi age muʼa ia te faʼahi ʼaenī ʼi he tahi age ʼu ʼaluʼaga. ʼI te agamāhani, ʼe fakamaʼua ki he tagata fai folau ke ina fakahā peʼe haʼu mai te puleʼaga fea ki te kau salatamu. ʼE toe ʼaoga ke ina fakamoʼoni ʼaki tona pasipo. ʼE toe fēia aipē ki he Kilisitiano moʼoni, ʼe tonu ke palalau tuʼumaʼu ʼo ʼuhiga mo tana tui ʼaē kiā Kilisito. ʼE ʼaoga ke ʼi ai he tahi age ʼu fakamoʼoni. Koteā te ʼu fua lelei ʼe tou maʼu mai ai?

Neʼe kamata fakaʼaogaʼi ia te kupu “Kilisitiano” ʼi te taʼu 45 ʼo totatou temi. ʼE fakahā fēnei e te tagata fai hisitolia ʼo te Tohi-Tapu ko Luka: “Nee ko Atiokia ae nee uluaki fakahigoa ai te kau tisipulo ko te kau kilisitiano.” (Gaue 11:26) Ko nātou ʼaē neʼe fakahigoaʼi ko te kau Kilisitiano neʼe ko te ʼu tisipulo ʼa Kilisito. Koteā ʼaē ʼe fai e he tahi ke liliu ai ko he tisipulo ʼa Sesu Kilisito? ʼE fakamahino fēnei ʼi te tikisionalio (The New International Dictionary of New Testament Theology): “Ko te mulimuli iā Sesu ohagē ko he tisipulo ʼe fakaʼuhiga ki he sākilifisio ʼo te maʼuli kātoa ʼaki he lotolelei . . . totatou maʼuli kātoa.” Koia, ko he Kilisitiano moʼoni, ʼe ko he tahi ʼe mulimuli kātoa ʼaki he lotolelei ki te ʼu akonaki pea mo te ʼu fakatotonu ʼa Sesu, ia ia ʼaē neʼe ina fakatuʼu ia te kōkelekāsio Fakakilisitiano.

ʼE feala koa ke tou maʼu ʼi te hahaʼi ʼaia ia he tokolahi ʼe natou lau ʼe natou Kilisitiano iā ʼaho nei? Koteā ʼaē neʼe ʼui e Sesu totonu ke feala ai hatatou ʼiloʼi ʼana tisipulo moʼoni? ʼE fakaafe atu koutou ke kotou vakaʼi ia te ʼu tali Fakatohi-tapu ki te ʼu fehuʼi ʼaia. ʼI te ʼu ʼalatike kā hoa mai, ʼe tou vakaʼi anai ia manatu e nima ʼa Sesu ʼe ina fakahā pea mo tokoni mai ke tou ʼiloʼi ʼana tisipulo moʼoni. ʼE tou vakaʼi anai pe neʼe fakahā feafeaʼi e te kau Kilisitiano ʼo te ʼuluaki sēkulō ia te faʼahi ʼaia. Pea ʼe ina fakalotomālohi anai tātou ke tou vakaʼi peʼe ko ai ʼi te hahaʼi tokolahi ʼaia ʼe natou lau ʼe natou Kilisitiano ʼe ʼalutahi mo te ʼu manatu ʼaenī.