‘Ko Te Logo Lelei ʼAenī ʼo Te Puleʼaga ʼe Fakamafola Anai’

“E fakamafola anai e logo lelei aeni o te puleaga i te malamanei katoa, ke fakamooni ki te u puleaga fuli. Pea e hau anai te fakaosi.”—MATEO 24:14.

Koteā Ia Tona Fakaʼuhiga? ʼE fakahā ʼi te Evaselio ʼaē neʼe tohi e Luka ko Sesu “nee alu leva . . . ki te u kolo lalahi mo te u kolo liliki, o akonaki te folafola pea mo fakaha te logo lelei o te puleaga o te Atua.” (Luka 8:1) Neʼe ʼui fēnei e Sesu totonu: “E tonu foki ke au fakaha ki te u kolo ake ae te logo lelei o te puleaga o te Atua; koteuhi ko te tupuaga aia o toku fekaui mai ai.” (Luka 4:43) Neʼe ina fekauʼi ia ʼana tisipulo ke natou fakamafola ia te logo lelei ʼi te ʼu kolo lalahi pea mo te ʼu kolo liliki pea ki muli age neʼe ina fakatotonu fēnei age kiā nātou: “E koutou liliu anai ko aku tagata fakamooni . . . o kaku ki te u potu fuli o te malamanei.”—Gaue 1:8; Luka 10:1.

Neʼe Mulimuli Feafeaʼi Kiai Ia Te Kau ʼUluaki Kilisitiano? Neʼe mole toe fakaʼatalitali ia te kau tisipulo ʼa Sesu ʼi tanatou mulimuli ki te meʼa ʼaē neʼe ʼui age e Sesu kiā nātou: “I te aho fuli, nee mole toe tuku tanatou akonaki pea mo tanatou fakaha te logo lelei o Sesu-Kilisito, i te fale tapu, pea mo te u fale fuli.” (Gaue 5:42) Ko te gāue fai fakamafola ʼe mole gata ʼaki pē he kiʼi kūtuga makehe. Neʼe ʼui fēnei e te tagata fai hisitolia ko Neander: “Ko Celse, te ʼuluaki tagata faitohi ʼaē neʼe fakafeagai ki te kau Kilisitiano ʼo te ʼuluaki sēkulō, neʼe laukovi ʼo ʼuhiga mo te kau gāue fai filo, mo te kau faʼu sūlie, mo te kau gāue ki te ʼu kiliʼi manu, te hahaʼi ʼaē neʼe mole ako pea mo te hahaʼi ʼaē neʼe mole honatou tuʼulaga, neʼe ko te kau fai fakamafola faʼafai ʼo te evaselio.” ʼI tana tohi Les premiers siècles de l’Église (Te ʼu ʼUluaki Sēkulō ʼo Te ’Ēkelesia), neʼe tohi fēnei e Jean Bernardi: “Neʼe tonu ke natou hū ki tuʼa [te kau Kilisitiano] ke natou palalau ʼi te potu fuli pē pea ki te hahaʼi fuli pē. ʼI te ʼu ala lahi pea mo te ʼu kolo, ʼi te koga meʼa ʼe gafua ki te hahaʼi fuli pea mo te ʼu ʼapi. Peʼe tali lelei peʼe kailoa . . . ki te ʼu potu taupotu ʼo te kele.”

Ko Ai ʼAē ʼe Mulimuli Ki Te Manatu ʼAia Iā ʼAho Nei? Neʼe tohi fēnei e te pātele Anglican ko David Watson: “ ʼI te tō noa ʼo te fai fakamafola ʼa te ʼu ʼēkelesia pea mo te mole fakamālotoloto ʼo ʼana akonaki ʼe ko te fakamoʼoni ʼaia ʼo tana toe masiva ʼi te fakalaumālie iā ʼaho nei.” ʼI tana tohi (Why Are the Catholics Leaving?) neʼe tohi e José Luis Pérez Guadalupe ʼo ʼuhiga mo te ʼu gāue ʼa te kau fai fakamafola evaselio, mo te kau Adventistes pea mo ʼihi atu ʼu lotu, ʼe ina fakatokagaʼi “ ʼe mole natou fai fakamafola ʼi te ʼu ʼapi.” ʼO ʼuhiga mo te kau Fakamoʼoni ʼa Sehova, neʼe ina tohi fēnei: “ ʼE natou ʼolo tuʼumaʼu ʼo fai fakamafola ʼi te ʼu ʼapi.”

Neʼe fakatokagaʼi e Jonathan Turley ia he ʼaluʼaga ʼe maʼuhiga pea mo moʼoni ʼi te tohi (Cato Supreme Court Review), ʼo te taʼu 2001-2002: “Kapau ʼe tou talanoa ki te kau Fakamoʼoni ʼa Sehova, ʼe tou manatuʼi atu aipē ia te toe hahaʼi tokolahi ʼe natou ʼaʼahi ʼotatou ʼapi ʼi he hola pē. Ki te kau Fakamoʼoni ʼa Sehova, ko te fai fakamafola ʼi te ʼu ʼapi ʼe mole ko he meʼa moʼo fakamālohiʼi ʼo tanatou tui kae ʼe ʼaoga ki tanatou tui.”

[Talanoa ʼo te pāsina 7]

ʼE Ke Fakatokagaʼi Koa Ia Te Fakaʼiloga?

ʼO fakatafito ki te ʼu fakamoʼoni Fakatohi-tapu ʼaē neʼe tou vakaʼi ʼi te ʼu ʼalatike hoholo mai ʼaenī, ʼi tau manatu, ko ai iā ʼaho nei, ʼe natou maʼu ia te fakaʼiloga ʼo te kau Kilisitiano moʼoni? Logolā ko te toko lauʼi hogofulu afe kūtuga pea mo faʼahiga tauhi ʼe natou lau ko nātou ko te kau Kilisitiano, kae ke ke manatuʼi te ʼu palalau ʼaē neʼe fai e Sesu ki tana kau tisipulo: “Ko natou ae e natou ui mai kia au: Aliki, Aliki! e mole natou ulu fuli anai ki te puleaga o te atu lagi, kae e gata pe ki ae e ina fai te finegalo o taku Tamai ae e nofo i te atu lagi.” (Mateo 7:21) Ko tatatou ʼiloʼi ia nātou ʼaē ʼe natou fai ia te finegalo ʼo te Tamai, ʼe natou maʼu ia te fakaʼiloga ʼo te kau Kilisitiano moʼoni pea ʼe natou fakatahi mo nātou ʼaē ʼe feala ke natou taki ia nātou ki te ʼu tapuakina heʼegata ʼaki ia te Puleʼaga ʼo te ʼAtua. ʼE matou fakaafe atu koe ke ke fakaʼui ki te kau Fakamoʼoni ʼa Sehova, ʼaē neʼe natou foaki atu ia te nusipepa ʼaenī, ia he tahi age ʼu manatu ʼo ʼuhiga mo te Puleʼaga ʼo te ʼAtua pea mo te ʼu tapuakina ʼe maʼu mai ai.—Luka 4:43.