Kua Kotou Iloʼi Koa?

Neʼe teuteuʼi feafeaʼi e te kau Sutea ʼi te temi ʼo te kau apositolo ia tanatou mate ki te ʼavaifo?

Neʼe mole atalitali fualoa te kau Sutea moʼo tanu tanatou mate, pea ʼi te agamahani neʼe tanu ʼi te ʼaho pe ʼae neʼe mate ai. Ko ʼona tupuʼaga ʼe lua: ʼUluaki, neʼe pala vave te sino ʼuhi ko te vevela ʼo te fenua ʼo Iselaele ʼo te temi muʼa. Pea lua, neʼe manatu te hahaʼi ʼi te temi ʼaia, ka tuku lolotoga ni ʼaho te sino ʼo te mate kaʼe mole tanu, neʼe ko he meʼa fakaufiufi ki te mate pea mo tona famili.

ʼI te ʼu Evaselio pea mo te tohi ʼo Gaue, ʼe fakamatala ai te ʼu ʼavaifo ʼe fa neʼe fai ʼi te ʼaho pe ʼae neʼe natou mamate ai. (Mateo 27:57-60; Gaue 5:5-10; 7:60–8:2) ʼI ni lau ʼi taʼu ki muʼa atu, neʼe mate ia Lasele, te ʼohoana ʼofaina ʼo Sakopo lolotoga tanā fai fagona mo tonā famili. Neʼe mole toe ʼaumai e Sakopo te sino ʼo tona ʼohoana ke tanu ʼi te fale maka fakafamili, kaʼe neʼe ina tanu ia “i te ala o . . . Petelehemi.”—Senesi 35:19, 20, 27-29.

Ko te ʼu fakamatala ʼi te Tohi-Tapu ʼo ʼuhiga mo te ʼu fai ʼavaifo, ʼe ha ai neʼe tokaga lelei ia te kau Sutea ʼo teuteuʼi te sino ki tona tanu. Ko te famili mo te ʼu kaumeʼa ʼae neʼe natou fakamaʼa te sino ʼo te mate, mo vali ki ai te ʼu meʼa fakamagoni pea mo te lolo, pea hoki natou kofukofu leva. (Soane 19:39, 40; Gaue 9:36-41) Ko te ʼu vahaʼa fale mo ʼihi atu ʼae neʼe ʼomai ʼo kauga mamahi pea mo fakalotomalohi te famili.—Maleko 5:38, 39.

Neʼe tatau koa te ʼavaifo ʼo Sesu mo te ʼu ʼavaifo Fakasutea?

Tokolahi te ʼu famili Sutea neʼe natou tuku ʼanatou mate ki te ʼu ʼana pea mo te ʼu fale maka neʼe toli ʼi te faʼahiga maka neʼe maʼu ʼi te ʼu koga meʼa kehekehe ʼo Iselaele. ʼI tanatou fai ʼaia, neʼe natou faʼifaʼitakiʼi te kau pateliaka. Ko Apalahamo, mo Sala, mo Isaake, mo Sakopo pea mo ʼihi atu neʼe tanu ʼi te ʼana ʼo Makepela, ʼae ʼe tuʼu ovi ki Hepelone.—Senesi 23:19; 25:8, 9; 49:29-31; 50:13.

Neʼe tuku te sino ʼo Sesu ki he fale maka neʼe toli ʼi te maka. (Maleko 15:46) Ko te ʼu taʼi fale maka ʼaia neʼe faveliveli tona huʼaga. ʼI loto, neʼe toe toli ai mo he ʼu hiliʼaga ʼo te ʼu mate ʼo te famili. ʼI te kua ʼosi pala ʼo te sino, ʼo mole kei ʼi ai he kakano, neʼe tanaki leva te ʼu hui pea mo ʼai ki he kiʼi puha, neʼe higoa ko te ossuaire, ʼo mulimuli pe ki te aga ʼi fenua ʼi te temi ʼo Sesu. Neʼe feala ai ke hao ʼi te fale maka ia te tahi ʼu mate ʼo te famili.

ʼI te malolō Fakasapato ʼae neʼe fakamaʼua e te Lao ʼa Moisese, neʼe mole feala ki te kau Sutea ke natou fai te ʼu teuteu ʼavaifo. Ko Sesu neʼe mate ia teitei hola ʼe tolu ʼi muʼa ʼo te kamata ʼo te Sapato. Koia la ʼae neʼe tanu ai ia ia e Sosefo ʼo Alimatea pea mo ʼihi atu kaʼe neʼe mole ʼosi lelei te teuteu ʼo tona sino ki tona ʼavaifo. (Luka 23:50-56) Ko te tupuʼaga la ʼaia ʼo te ʼomai ʼo ʼihi kaumeʼa ʼo Sesu ki tona fale maka ʼi te hili ʼo te Sapato, he neʼe natou fakaʼamu ke natou fakaʼosi tona teuteuʼi.—Maleko 16:1; Luka 24:1.