Te Fakatuʼu Ake ʼo Sesu ʼe Fakaʼuhiga Ki Te Maʼuli
Te Fakatuʼu Ake ʼo Sesu ʼe Fakaʼuhiga Ki Te Maʼuli
KO TE fakatuʼu ake ʼo Sesu ʼe mole ko he aluʼaga pe neʼe hoko ʼi te temi muʼa, ʼe mole faʼa maʼuhiga kia tatou ia ʼaho nei. Neʼe fakamaʼuhigaʼi e te apositolo ko Paulo ia tona fakaʼuhiga ʼi te temi ʼae neʼe ina tohi fenei ai: “Kua toe tuuake mooni ia Kilisito mai te kau mate, pea kua hoko ia ko te uluaki fua o natou kua mamate. Koteuhi nee hau te mate mai he tagata e tahi, pea nee hau foki te toe tuuake mai he tagata e tahi. Pea nee mamate te u tagata fuli ia Atama, e tatau foki, e mauli anai te u tagata fuli ia Kilisito.”—1 Kolinito 15:20-22.
Neʼe fakatuʼu ake ia Sesu ʼi te ʼaho 16 ʼo Nisani ʼi te taʼu 33, neʼe ko te ʼaho ʼaia ʼo te taʼu neʼe foaki ai e te kau Sutea ia te ʼu ʼuluaki fua ʼo te ʼu gaueʼaga kia Sehova ʼi te fale lotu ʼi Selusalemi. ʼI tana fakatatau ia Sesu ki te ʼu ʼuluaki fua, neʼe fia ui e Paulo ʼe ʼi ai anai mo ʼihi atu ka fakatuʼu ake anai mai te mate.
ʼI te ʼu palalau ʼa Paulo ʼae ʼe hoa mai ki ai, ʼe ina fakamahino ai peʼe kotea ʼae ʼe fakafealagia e te fakatuʼu ake ʼo Sesu. Neʼe ui fenei e Paulo: “Koteuhi nee hau te mate mai he tagata e tahi, pea nee hau foki te toe tuuake mai he tagata e tahi.” ʼE tou mamate fuli heʼe tou maʼu mai ia Atama te agahala pea mo te heʼe haohaoa. Kaʼe ʼaki tana foaki ia tona maʼuli haohaoa ko he totogi, neʼe fakaʼateaina tatou e Sesu mai te agahala pea mo te mate ʼaki tona fakatuʼu ake. Neʼe tohi e Paulo ia te faʼahi ʼaia ia Loma 6:23: “Ko te totogi o te agahala, ko te mate; kae ko te foaki noa o te Atua, ko te mauli heegata ia Sesu-Kilisito totatou Aliki.”
Neʼe fakamahino e Sesu totonu peʼe kotea ia te ʼu lelei ʼe feala ke tou maʼu mai tona mate pea mo tona fakatuʼu ake. Neʼe ina ui fenei ʼo ʼuhiga mo ia totonu: “[Ko] te Foha o te tagata e tonu ke fakatuu ake ia ki oluga, o tupu ko he tahi pe e tui kia ia, ke ina mau te mauli heegata. He nee ofa lahi osi te Atua ki te malamanei nee ina foaki ai tona Alo ulutokotahi, o tupu ko he tahi pe e tui kia ia ke aua naa mate ia, kae ke ina mau te mauli heegata.”—Soane 3:14-16.
Kotou fakakaukauʼi age ia te maʼuli ʼo heʼe gata kaʼe mole maʼu ai he mamahi peʼe ko te lotomamahi! (Apokalipisi 21:3, 4) ʼI ka haʼu fakafiafia leva! Neʼe ui fenei e te tagata poto ʼo ʼuhiga mo te faʼahi ʼaia: “Moka tou sisio ki te ʼu faitoka, ʼe tou tokagaʼi ai ia te nounou ʼo te maʼuli, kaʼe ʼaki te fakatuʼu ake ʼe tou tui ai ki te nounou ʼo te temi mate ʼo he tahi.” Ei, ko te fakatuʼu ake ʼo Sesu ko tona fakaʼuhiga ko te maʼuli.
[Paki ʼo te pasina 7]