Te ʼu Tuʼutamaki Fakanatula—ʼE Ko He Fakamoʼoni Koa ʼe Agakovi Te ʼAtua?

KOTEA TE MANATU ʼA TE HAHAʼI: “ ʼE takitaki e te ʼAtua ia te malamanei, pea ʼe ina fakahoko ia te ʼu tuʼutamaki fakanatula, koia ʼe lagi agakovi.”

KOTEA TE MANATU ʼA TE TOHI-TAPU?: “E malolo te malamanei katoa i te malohi o te [agakovi].” (1 Soane 5:19) Ko ai te agakovi? ʼE ui ʼi te Tohi-Tapu, ʼe fakaʼuhiga kia Satana. (Mateo 13:19; Maleko 4:15) ʼE mata faikehe koa kia koutou? Kotou fakakaukauʼi age ia te faʼahi ʼaeni: Kapau ʼe takitaki e Satana ia te malamanei, ʼe ina uga ia te hahaʼi ke natou manatu pe kia natou totonu, mo manumanu pea mo heʼe fakapotopoto ohage ko ia. ʼAki te faʼahi ʼaia, ʼe tokoni mai ke tou mahino pe ʼe ko ʼe ʼe mole feala ki te tagata ke ina taupau ia te kele. Tokolahi te kau popoto, ʼe natou fakatokagaʼi ko te mole taupau lelei ʼo te kele ʼe tupu mai ai te ʼu tuʼutamaki fakanatula, ʼo fakatupu kovi ki te tagata.

He ko ʼe ʼe fakagafua e te ʼAtua kia Satana ke ina fakaneke ia te tagata? Moʼo tali ki te fehuʼi ʼaia, ʼe tonu ke tou vakaʼi ia te kamataʼaga ʼo te hisitolia ʼo te tagata, ʼi te temi ʼae neʼe talagataʼa ai ʼatatou ʼuluaki matuʼa ki te ʼAtua ʼi tona ʼuhiga Pule. Talu mai ai, tokolahi te hahaʼi neʼe natou mulimuli ki te fakaneke ʼaia. ʼI tanatou filifili ʼae ke natou fakafisi ki te takitaki ʼa te ʼAtua, neʼe fakalogo leva ia te malamanei ki te fili ʼo te ʼAtua, ia Satana. Neʼe fakahigoaʼi e Sesu ia Satana ko “te pule o te malamanei.” (Soane 14:30) ʼE pule anai koa ia Satana ʼo talu ai? Kailoa!

ʼE logoʼi e Sehova * ia te mamahi ʼae ʼe fakatupu e Satana ki te malamanei. ʼI tona fakahagatonu, ʼe malave ʼaupito ki te ʼAtua ia te mamahi ʼo te malamanei. Ohage la, ʼi te temi ʼae neʼe tau ai ia te puleʼaga ʼo Iselaele pea mo te ʼu fihifihia, ʼe ui ʼi te Tohi-Tapu ʼo ʼuhiga mo te ʼAtua: “I onatou mamahi fuli, nee mole natou hala tokoni.” (Esaia 63:9) Kaʼe meʼa lelei, neʼe fai e te ʼAtua ia te ʼu fakatuʼutuʼu moʼo fakagata ia te pule ʼa Satana. Neʼe ina fakanofo ia tona Alo, ia Sesu Kilisito ke liliu ko he Hau ʼe faitotonu ʼo talu ai.

HE KO ʼE ʼE MAʼUHIGA KIA TATOU IA TE TALI ʼAIA?: ʼO kehekehe mo te pule ʼa Sesu, neʼe mole feala ki te pule ʼa Satana ke ina puipui ia te hahaʼi mai te ʼu tuʼutamaki fakanatula. ʼI te tahi aluʼaga, neʼe puipui e Sesu ia tana kau tisipulo ʼi te temi ʼae neʼe to ai ia te toe afā. ʼE fakamatala fenei ʼi te Tohi-Tapu: “Nee ina pupulai leva te matagi, pea nee lea leva ia ia ki te tai: Fakalologo! Manava osi! Pea nee mate leva te matagi, pea nee to leva he totofu lahi ki te tai.” Neʼe feʼuiʼaki fenei ʼana tisipulo: “Ko ai foki ia ia aeni, ae e fakalogo foki ki ai te matagi mo te tai?” (Maleko 4:37-41) ʼE fakalotomalohiʼi tatou ʼi te fakamatala ʼaeni, ʼe puipui anai e Sesu ia te malamanei ʼae ʼe fakalogo ʼi te temi ʼae ka ʼafio Hau ai anai.—Taniela 7:13, 14.

[Nota]

[Paki ʼo te pasina 4]

Neʼe foaki e te ʼAtua ki tona ʼAlo ia te malohi moʼo fakagata ia te ʼu tuʼutamaki fakanatula