ʼE fakaha fenei mai ʼi te Tohi-Tapu ʼe ʼi ai anai te maumau ʼi te fakaʼosi: “I te u aho aia, e hoko anai he mamahi lahi, ae e mole hona tatau talu mai te kamataaga o te malamanei o kaku mai ki te aho nei. . . . Pea kapau nee mole fakasiisii te u aho aena, e mole haofaki anai he tahi.” (Mateo 24:21, 22) Kaʼe ʼe fakapapauʼi fenei mai e te ʼAtua ʼe hao anai ia he hahaʼi tokolahi: “E puli te malamanei, . . . ; kae e nofo o heegata ae e ina fai te finegalo o te Atua.”—1 Soane 2:17.

Kapau ʼe kotou fia hao ʼi te fakalaka ʼo te malama ʼaeni pea mo ‘maʼuli ʼo heʼe  gata,’ kotea ʼae ʼe tonu ke kotou fai? ʼE tonu koa ke kotou kamata tanaki he ʼu koloa peʼe ko he teuteuʼi ʼo he tahi atu ʼu meʼa? Kailoa. ʼE uga malohi tatou ʼi te Tohi-Tapu ke mole tou fakamuʼamuʼa te ʼu faʼahi ʼaia. ʼE tou lau fenei: “Mai tona ʼuhiga ʼae ʼe tonu ki te ʼu meʼa fuli ʼaia ke mavetevete, ko te ʼu faʼahiga tagata feafeaʼi anai ia koutou ʼi te aga fakamaʼoniʼoni pea mo te ʼu gaue ʼae ʼe fakaʼiloga ʼaki takotou pipiki ki te ʼAtua, ʼo talitali pea mo kotou taupau lelei ʼi tokotou ʼatamai te hoko mai ʼo te ʼaho ʼo Sehova.” (2 Petelo 3:10-12, MN) ’E fakaha ʼi te kapite ʼaia, ko te ʼu ‘meʼa fuli ʼae ʼe maumauʼi, ʼe ko te kau takitaki ʼo te malama aga fakapikopiko ʼaeni pea mo natou ʼae ʼe lagolago ki ai kaʼe mole ki te pule ʼo te ʼAtua. ʼE ha lelei mai, ʼe mole tou hao anai mai te maumau ʼaia mo kapau ʼe tou tanaki he ʼu koloa.

Kapau ʼe tou pipiki kia Sehova ʼAtua pea mo tou ako ia te ʼu aga mo te ʼu gaue ʼae ʼe ina leleiʼia, ʼe mahino papau ia, ʼe tou hao ai anai. (Sofoni 2:3) Koia ʼaua tatatou mulimuli ki te manatu ʼa te tokolahi ia ʼaho nei pea mo meʼa noaʼi ia te ʼu fakaʼiloga ʼae ʼe ha ai kua tou maʼuʼuli ʼi he ʼu temi maʼuhiga. Kaʼe ʼe tonu ke tou “taupau lelei ʼi [totatou] ʼatamai te hoko mai ʼo te ʼaho ʼo Sehova.” ʼE feala ki te kau Fakamoʼoni ʼa Sehova ke natou fakaha atu ʼaki te Tohi-Tapu pe ʼe kotou lava hao feafeaʼi ʼi te ʼaho ʼaia ʼae ka hoko mai.