“HE KOʼE ʼe hoko kia au? He koʼe ʼe fakagafua e te ʼAtua ke hoko ki au te ʼu aluʼaga ʼaia?” Ko te ʼu fehuʼi ʼaia neʼe ina fakamamahiʼi ia Sidnei, ko te tama Pelesile. ʼUhi ko te tuʼutamaki neʼe hoko kia ia ʼi tona taʼu 24. Neʼe fakaheheke ʼo fakato ki te maʼanuʼaga, koia kua nofo nei ʼi te saliote toho.

ʼE ʼi ai te ʼu mamahi ʼe hoko ʼuhi ko te ʼu tuʼutamaki, peʼe ko te mahaki, peʼe ko te mate ʼa he tahi neʼe tou ʼoʼofa mamahi ai, peʼe ko te ʼu tuʼutamaki fakanatula, peʼe ko te tau. Ko te ʼu aluʼaga fuli ʼaia, ʼe feala ke meo ai te hahaʼi ki te ʼAtua. Kaʼe ʼe mole ko he meʼa foʼou. Ohage la, ʼi temi muʼa, neʼe hoko ki te pateliaka ko Sopo te ʼu aluʼaga fakamamahi. Pea neʼe ina tukugakoviʼi ai ia te ʼAtua, ʼo ina ui fenei: “E au tagi kia koe, kae e mole ke tali mai kia au; e au tuu ki oluga i ou mua, kae e mole ke tokaga mai kia au. Kua ke liliu o itaita kia au; pea kua ke taai au aki te malohi katoa o tou nima.”—Sopo 30:20, 21.

Neʼe mole mahino ia Sopo pe kotea te tupuʼaga ʼo ʼona mamahi. Kaʼe meʼa lelei, he ʼe fakamahino mai ʼi te Tohi-Tapu ia te tupuʼaga ʼo te hoko ʼo te ʼu aluʼaga ʼaia, pea mo feafeaʼi hatatou lava katakiʼi.

ʼE ui fenei mai ʼi te Tohi-Tapu ʼo ʼuhiga mo te ʼAtua: “E lelei tukupau ana gaue, koteuhi e agatonu ona ala fuli, ko he Atua agatonu mo faitotonu, e fonu ia ia i te agatonu mo te maonioni.” (Tetelonome 32:4) Kapau ko te ʼAtua ʼe “faitotonu pea mo agatonu,” ʼe ina loto anai koa ke maʼuli mamahi te hahaʼi? ʼE ina fakatuʼā anai koa ia natou ʼaki ni mamahi?

ʼE ui fenei mai ʼi te Tohi-Tapu: “Ke aua naa ui e he tahi moka e fakahalai ia ia: Ko te Atua ae e ina fakahalai au. Koteuhi e mole feala ke fakahalai te Atua e te kovi, pea e mole ina fakahalai he tahi.” (Sakopo 1:13) ʼE fakamahino mai ʼi te Tohi-Tapu ko te ʼAtua neʼe ina foaki ki te tagata ia he kamataʼaga lelei. Neʼe ina foaki ki te ʼuluaki taumatuʼa, ia Atama mo Eva, tonā nofoʼaga taulekaleka. Neʼe nā maʼu ai ia te ʼu meʼa fuli neʼe ʼaoga ki tonā maʼuli. Neʼe ina foaki age kia naua he gaue lelei. Neʼe ui fenei age e te ʼAtua: “Kolua fanaunau, kolua liuliuga, kolua fakahahai te kele, pea kolua pulei ia ia.” Koia, neʼe mole ʼi ai he tupuʼaga ke meo ai ia Atama mo Eva ki te ʼAtua.—Senesi 1:28.

Kaʼe ʼi te temi nei, ko te aluʼaga ʼo te maʼuli ʼe mole kei tatau, kua kovi ʼosi. Talu mai te temi muʼa mo te maʼuli mamahi ʼa te tagata. ʼE fakaha fakaleleiʼi mai ʼi te Tohi-Tapu: “O kaku mai ki te aho nei, e lauga mo mamahi te malamanei katoa.” (Loma 8:22) Kotea ʼae neʼe hoko?

Moʼo tali ki te fehuʼi ʼaia, tou toe liliu muʼa ki te kamataʼaga ʼo te hisitolia. Neʼe tapuʼi age e te ʼAtua kia Atama mo Eva tanā kai “ki te akau o te iloilo o te lelei mo te kovi.” Ko te fuʼu ʼakau ʼaia ʼe ina fakatata ia te pule ʼae ʼa te ʼAtua ʼo ʼuhiga mo te meʼa ʼae ʼe lelei pea mo te meʼa ʼae ʼe kovi. Ko te ʼaselo fiatuʼu, ki muli age neʼe higoa ko Satana te Tiapolo, neʼe ina ʼekenaki ia Atama mo Eva ke nā talagataʼa ki te ʼAtua. Neʼe ui age e te Tiapolo kia Eva kapau ʼe nā kai te foʼi ʼakau, ʼe mole nā mamate anai. ʼI tana palalau ʼaia, neʼe ina tukugakoviʼi ai ko te ʼAtua ʼe gutuloi. Neʼe toe tukugakoviʼi e Satana ia te ʼAtua, neʼe mole ina tuku age ki te tagata ia te fealagia ʼae ke ina filifili ia te meʼa ʼae ʼe lelei pea mo te meʼa ʼae ʼe kovi. (Senesi 2:17; 3:1-6) Neʼe ui e Satana ʼe feala ke maʼuli lelei age ia te tagata mo kapau ʼe mole takitaki ia ia e te ʼAtua. Ko te ʼu aluʼaga fuli ʼaia ʼe lagaʼi ai he fehuʼi maʼuhiga: ʼE tuha koa te takitaki mo te ʼAtua?

Neʼe toe lagaʼi e te Tiapolo he tahi fihifihia. Neʼe ina toe tukugakoviʼi te tagata, ʼo ui ʼe tauhi pe ki te ʼAtua ʼuhi ko te ʼu lelei ʼae ʼe ina maʼu. Neʼe ui fenei e te Tiapolo ki te ʼAtua, ʼo ʼuhiga mo Sopo: “Pe e mole tupu ko tau puipui ia ia, mo tona famili, pea mo ana mea fuli? . . . Kae ke faoi tou nima, o taai ana mea fuli, pea e au iloi papau, e laukovi anai ia ia kia koe.” (Sopo 1:10, 11) ʼAki te ʼu palalau ʼae neʼe ina fai ʼo ʼuhiga mo Sopo, neʼe tukugakoviʼi ai e Satana ko te tagata ʼe tauhi pe ki te ʼAtua ʼuhi ko te ʼu lelei ʼae ʼe ina maʼu.

ʼE feafeaʼi anai he fakatokatoka ʼo te ʼu fihifihia ʼaia ʼo talu ai? ʼE maʼu e te ʼAtua ia te fakapotopoto maʼoluga,  moʼo fakatokatoka ʼo te ʼu fihifihia. Pea ʼe mole tou lotomamahi ai anai. (Loma 11:33) Neʼe tuku e te ʼAtua he temi feʼauga ki te tagata ke ina takitaki ia ia totonu, ke fakamoʼoni ai pe kofea te takitaki ʼae ʼe lelei.

Ko te ’u aluʼaga ʼo te malamanei kua fakalialia ʼaupito. ʼE fakaha ʼaki ai ʼe mole feala ki te tagata ke ina takitaki ia ia totonu. Ko te ʼu puleʼaga fakatagata neʼe mole natou lavaʼi ia te fakahoko ʼo te tokalelei, mo te puipui pea mo te fimalie ki te tagata. Kaʼe neʼe natou maumauʼi ia te kele. Neʼe fakamoʼoni fenei ki ai te Tohi-Tapu: “E mole ko te tagata ae e ina taki ona lakaaga moka haele.” (Selemia 10:23) ʼE gata pe ki te takitaki ʼa te ʼAtua ʼe feala ke ina ʼaumai ia te tokalelei heʼe gata, mo te fimalie, pea mo te mahu ki te malamanei katoa. Koteʼuhi ʼe ko te finegalo ʼaia ʼo te ʼAtua.—Esaia 45:18.

ʼE feafeaʼi anai te fakahoko e te ʼAtua ʼana fakatuʼutuʼu ʼo ʼuhiga mo te malamanei? Kotou manatuʼi te faikole ʼae neʼe akoʼi age e Sesu ki ʼana tisipulo: “Ke aumai tau pule; ke fai tou finegalo i te kele o hage ko selo.” (Mateo 6:10) ʼIo, ʼi tona temi totonu ʼe ʼaumai anai e te ʼAtua tona Puleʼaga, pea ʼe ina pulihi anai ia te ʼu mamahi fuli. (Taniela 2:44) ʼE mole toe maʼu anai ia te masiva, mo te mahaki pea mo te mate. ʼE ui fenei ʼi te Tohi-Tapu ʼo ʼuhiga mo te kau masiva: “E ina haofaki anai te masiva ae e tagi.” (Pesalemo 72:12-14) ʼE fakapapauʼi mai ʼi te Tohi-Tapu ʼo ʼuhiga mo te mahaki: “E mole ui e he tahi: E au mahaki!” (Esaia 33:24) Neʼe ui fenei e Sesu ʼo ʼuhiga mo te kau mate, ʼe mole galoʼi natou e te ʼAtua: “E hau te hola ae e logo ai anai natou fuli e nonofo i te u tanuma ki tona leo, pea e natou feulufi anai ki tua.” (Soane 5:28, 29) ʼI ʼu fakapapau taulekaleka leva!

Hili ki ai taʼu ʼe 17 ki tana tuʼutamaki, neʼe ui fenei e Sidnei ʼae neʼe tou talanoa ki ai ʼi te kamata: “Neʼe mole au tukugakoviʼi ia Sehova ʼAtua ʼo ʼuhiga mo toku tuʼutamaki. Kaʼe ʼe moʼoni, ʼi te kamata neʼe au meo ʼo ʼuhiga mo ia. ʼE ʼi ai te ʼu ʼaho ʼe au lotovaivai ai pea ʼe au tagi ʼo ʼuhiga mo te ʼu aluʼaga ʼaia. Kaʼe neʼe au mahino ʼaki te Tohi-Tapu, ko toku tuʼutamaki neʼe mole ko he fakatuʼā mai te ʼAtua. Ohage ko tona ui ʼi te Tohi-Tapu: ‘E fakalogo te u mea fuli ki te temi pea mo tona u maliuliu.’ ʼE au faikole kia Sehova ʼi taku lolotoga lau ia te ʼu vaega Tohi-Tapu ʼaia, ke tokoni mai ke au malohi ʼi te faʼahi fakalaumalie pea mo taupau maʼu he ʼatamai lelei.”—Ekelesiasi 9:11; Pesalemo 145:18; 2 Kolinito 4:8, 9, 16.

ʼAua naʼa galo kia koutou pe ʼe kotea te ʼu tupuʼaga ʼo te fakagafua e te ʼAtua ia te ʼu mamahi, pea ʼe ina pulihi feafeaʼi anai te ʼu mamahi fuli ʼaia. Kapau ʼe tou manatuʼi ia te ʼu faʼahi ʼaia, pea ʼe feala ai ke tou tauʼi totatou lotomamahi. ʼE tou tui papau ko te ʼAtua “e ina fakapale natou ae e natou kumi ia ia.” Ko natou fuli ʼae ʼe tui kia te ia mo tona Alo, ʼe mole natou lotomamahi anai.—Hepeleo 11:6; Loma 10:11.