Ohage ko tona fakamatala ʼi te tohi ʼo Senesi, neʼe fakatotonu e Falaone ke ʼaumai kia ia ia Sosefo, te Hepeleo ʼae neʼe pilisoniʼi, ke ina fakamahino age ʼana moemisi. ʼI te temi ʼaia, neʼe kua fualoa te pilisoniʼi ʼo Sosefo. Logo la neʼe kua fakavilivili ia Falaone kaʼe neʼe fia telekava muʼa ia Sosefo. (Senesi 39:20-23; 41:1, 14) Koia, logo la ko te fakamatala ʼaia neʼe talanoa ki ai ia ia ʼae neʼe ina tohi te tohi ʼo Senesi ʼe mole maʼuhiga ki ʼihi, kaʼe neʼe ha ai neʼe ina iloʼi lelei te agaʼi fenua ʼo te kau Esipito.

Ko te kaukava ʼo he tahi neʼe mole kovi ia ʼi te ʼu puleʼaga ʼafeā, ʼo kau ai mo te kau Hepeleo. Kaʼe, ʼe ui fenei e McClintock mo Strong’s ʼi te Cyclopedia of Biblical, Theological, and Ecclesiastical Literature: “ ʼI te temi muʼa, neʼe ko te puleʼaga pe ʼo te kau Esipito ʼae neʼe mole natou tuku ke kaukava he tahi.”

Neʼe gata pe koa ki tanatou tele ʼonatou kava? ʼE ui ʼi te nusipepa Biblical Archaeology Review, ko ʼihi agaʼi fenua ʼi Esipito ʼe fakamaʼua ai ki he tahi ke teuteu lelei ʼi muʼa ʼo tana alu kia Falaone. ʼE hage pe ko he tahi ʼe hu ki te fale lotu. Pea ko te aluʼaga ʼaia neʼe hoko kia Sosefo. Koia, neʼe tonu ai kia Sosefo ke ina tele tona ʼulu pea mo tona sino katoa.

Kailoa ia. ʼI tana tohi, neʼe tau fakakehekeheʼi e Paulo ia te kau Sutea mo te kau Keleka. Neʼe hage pe neʼe ina fia ui neʼe fakata e te kau Keleka ia te hahaʼi ʼae ʼe mole ko he kau Sutea. (Loma 1:16; 10:12) Neʼe ina fai te fakakehekehe ʼaia koteʼuhi neʼe kua mafola te lea Fakakeleka pea mo tona agaʼi fenua ʼi te ʼu koga meʼa ʼae neʼe faifakamafola ai ia Paulo.

Ko ai ʼae neʼe ui ko he Keleka? ʼI te fa sekulo ʼi muʼa ʼo te temi ʼo Sesu, ko te tagata ko Isocrate mai Atena neʼe palalau fiameʼameʼa. Koteʼuhi neʼe kua mafola te agaʼi fenua ʼo te kau Keleka ʼi te malamanei. Neʼe ina fakatokagaʼi fenei: “Ko natou ʼae neʼe fakahigoaʼi ko te kau Keleka neʼe akoʼi age kia natou te agaʼi fenua. Pea neʼe natou iloʼi lelei age ia natou ʼae neʼe lalahi ake ʼi Keleka.” Koia, neʼe fakahigoaʼi e Paulo te tamai ʼa Timoteo pea mo ʼihi atu ʼae neʼe mole ko he kau Sutea, ko te kau Keleka. Kaʼe, ʼe mole heʼeki tou iloʼi papau pe neʼe fakahigoaʼi natou ko he kau Keleka ʼuhi ko te agaʼi fenua peʼe neʼe natou tutupu ake ʼi Keleka.—Gaue 16:1.