KO TE taʼahine ʼaenī ʼe ko Malia. ʼE ko te Iselaelite, neʼe nofo ʼi te kolo ko Nasaleti. ʼE ʼiloʼi e te ʼAtua ʼe ko he taʼahine agalelei ʼaupito. Ko te tupuʼaga la ʼaia ʼo tana fekauʼi ki ai tana ʼaselo ko Kapeliele ke ʼalu ʼo palalau kia ia. ʼE koutou ʼiloʼi pe koteā te meʼa ʼaē neʼe ʼui age e Kapeliele kia Malia? Tou vakaʼi te faʼahi ʼaia.

Neʼe ʼui age e Kapeliele ki ai: ‘ ʼAlofa atu, kia koe ʼaē ʼe ʼofainaʼi ʼaupito, ʼe kau ia Sehova mo koe.’ Neʼe mole heʼeki sio ia Malia kia ia ʼaia ʼi muʼa atu. Neʼe tuʼania ia koteʼuhi neʼe mole ina ʼiloʼi te ʼuhiga ʼo tana palalau. Kae neʼe ʼui age e Kapeliele ke tuku tana mataku.

Neʼe ina ʼui age: ‘ ʼAua naʼa ke mataku Malia, ʼe leleiʼia koe e Sehova. ʼE ina fakahoko anai he meʼa taulekaleka maʼa koe. ʼE ke maʼu anai he kiʼi tamasiʼi, pea ʼe tonu anai ke ke fakahigoaʼi ia ia ko Sesu.’

Neʼe fakamahino age e Kapeliele: ‘Ko te tamasiʼi ʼaia ʼe lahi anai pea ʼe fakahigoa anai ko te ʼAlo ʼo te Māʼoluga. ʼE fakanofo anai ia ia e Sehova ke hau, ohage ko Tavite. Kae ʼe hau anai ia Sesu ʼo talu ai, pea ko tona puleʼaga ʼe mole ʼi ai anai hona gataʼaga!’

Neʼe fehuʼi age e Malia: ‘ ʼE hoko feafeaʼi anai te meʼa ʼaia heʼe mole heʼeki ʼau ʼohoana. ʼE mole ʼau nofo mo he tagata, pea ʼe lava feafeaʼi haku maʼu haku kiʼi tamasiʼi?’

Neʼe tali age e Kapeliele: ‘ ʼE hifo mai anai te mālohi ʼo te ʼAtua kia te koe, pea ko te tamasiʼi ʼaia ʼe fakahigoa anai ko te ʼAlo ʼo te ʼAtua.’ Pea neʼe ina ʼui age kia Malia: ‘Manatuʼi tou kāiga ko Elisapeta. Neʼe ʼui e te hahaʼi ʼe mole feala ke maʼu hana tamasiʼi heʼe kua finematuʼa fau. Kae ʼe mole kei tuai pea ʼe ina maʼu anai hana tamasiʼi. ʼIo, ʼe mole he meʼa ʼe faigataʼa ki te ʼAtua.’

Neʼe ʼui age e Malia: ‘Ko ʼau ko te kaugana ʼa Sehova! Ke hoko te meʼa ʼaia kia te ʼau ohage ko te meʼa ʼaē neʼe ke ʼui mai.’ Pea neʼe mavae ai te ʼaselo.

Neʼe ʼalu ai ia Malia ʼo ʼaʼahi ia Elisapeta. ʼI te logo ʼa Elisapeta ki te leʼo ʼo Malia, neʼe hopo fiafia ai te kiʼi tamasiʼi ʼaē neʼe ina fuafatuʼi. Neʼe fonu ia Elisapeta ʼi te laumālie ʼo te ʼAtua, pea neʼe ina ʼui age kia Malia: ‘ ʼE ke manuʼia koe ʼi te fafine fuape.’ Neʼe nofo ia Malia mo Elisapeta ia māhina e tolu, pea neʼe toe liliu ia ki tona ʼapi ʼi Nasaleti.

Neʼe kua ʼamanaki ʼohoana ia Malia pea mo te tagata neʼe higoa ko Sosefo. Kae ʼi te ʼiloʼi ʼaē e Sosefo kua faitama ia Malia, neʼe manatu ia ʼe mole tonu ke nā ʼohoana. Pea neʼe ʼui age e te ʼaselo ʼa te ʼAtua kia ia: ‘ ʼAua naʼa ke tuʼania ʼi te ʼohoanaʼi ʼo Malia. Heʼe ko te ʼAtua ʼaē neʼe ina foaki te tama kia ia.’ Pea neʼe ʼohoana ai ia Malia pea mo Sosefo, pea nā fakatalitali ai ki te tupu ʼo Sesu.