NEʼE tuʼu ia Sesu ʼo mālōlō ʼi te vai keli ʼi Samalia. Kua ʼolo tana ʼu tisipulo ʼo totogi meʼa kai ʼi te kolo. Ko te fafine ʼaē ʼe lolotoga palalau ki ai ia Sesu neʼe haʼu ʼo ʼohu vai. Neʼe ina ʼui age ki ai: ‘Foaki mai he moʼi vai ke ʼau ʼinu.’

Neʼe punamaʼuli ʼaupito te fafine. ʼE koutou ʼiloʼi pe koteā tona tupuʼaga? Koteʼuhi ko Sesu ʼe ko te Sutea, pea ko ia ʼe ko te fafine Samalitana. Pea ko te tokolahi ʼo te kau Sutea ʼe mole nātou ʼoʼofa ki te kau Samalitana. ʼE mole nātou palalau mo nātou! Kae neʼe ʼofa ia Sesu ki te hahaʼi fuli pe. Koia neʼe ina ʼui ai: ‘Ka na neʼe ke ʼiloʼi la pe ko ai ia ia ʼaē ʼe ina kole atu he meʼa ʼinu, kanaʼauala ʼe ke kole age anai ki ai pea ʼe ina foaki atu anai kia koe te vai ʼaē ʼe ina foaki ia te maʼuli.’

Neʼe ʼui age e te fafine: ‘ ʼE loloto te vai keli, pea ʼe mole ʼi ai pe la hau pākete. Pea ʼe ke maʼu anai ʼifea te vai ʼaia ʼaē ʼe ina foaki ia te maʼuli?’

Neʼe fakamahino age e Sesu: ‘Kapau ʼe ke ʼinu ki te vai ʼo te vai keli ʼaenī ʼe ke toe fia ʼinu anai, kae ko te vai ʼaē ʼe ʼau foaki atu ʼe feala ke ina foaki ki he tahi te maʼuli heʼegata.’

Neʼe ʼui e te fafine: ‘Foaki mai kia ʼau te vai ʼaia! Ke ʼaua naʼa ʼau toe fia ʼinu. Pea ke mole ʼau toe liliu mai ki henī ʼo ʼohu vai.’

ʼI te manatu ʼa te fafine ʼe lolotoga palalau ia Sesu ki he vai moʼoni. Kae ʼe palalau ia ki te moʼoni ʼo ʼuhiga mo te ʼAtua pea mo tona puleʼaga. Ko te moʼoni ʼaia ʼe hage ko he vai ʼe ina foaki ia te maʼuli. ʼE feala ke ina foaki ki he tahi ia te maʼuli heʼegata.

Pea neʼe ʼui age e Sesu ki te fafine: ‘ ʼAlu ʼo kumi mai tou ʼohoana pea ke liliu mai.’

Pea ina ʼui age: ‘ ʼE mole hoku ʼohoana.’

Neʼe ʼui age e Sesu: ‘ ʼE tonu tau tali, he neʼe kua ke ʼohoana tuʼa nima, pea ko te tagata ʼaē ʼe ke nofo nei mo ia ʼe mole ko hou ʼohoana.’

Neʼe punamaʼuli te fafine, koteʼuhi ʼe moʼoni te ʼu meʼa fuli ʼaia. Neʼe ʼiloʼi feafeaʼi e Sesu te ʼu meʼa ʼaia? ʼIo, koteʼuhi ko Sesu neʼe ko Ia ʼaē neʼe Fakapapauʼi mai e te ʼAtua, pea neʼe fakahā e te ʼAtua kia ia te meʼa ʼaia. ʼI te temi ʼaia neʼe kua liliu mai te ʼu tisipulo ʼa Sesu, pea neʼe nātou punamaʼuli ʼi tana fai palalau mo te fafine Samalitana.

Koteā te meʼa ʼaē ʼe tou ako ʼaki te hisitolia ʼaenī? ʼE ina fakahā mai ko Sesu ʼe ko he tahi ʼe agalelei ki te hahaʼi kehekehe. Pea ʼe tonu ke tou feiā mo tatou. ʼE mole tonu ke tou manatu ʼe agakovi te tahi ʼu hahaʼi koteʼuhi ʼe nātou kau ki he tahi lanu. Neʼe loto ia Sesu ke ʼiloʼi e te hahaʼi fuli te moʼoni ʼaē ʼe ina taki ki te maʼuli heʼegata. Pea mo tatou foki, ʼe tonu ke tou tokoni ki te hahaʼi ke nātou ʼiloʼi ia te moʼoni.