ʼE LAHI te ʼu kolo ʼo Kanaane ʼe teuteu nei ke nātou fakalaga tau ki Iselaele. ʼI tanatou manatu ʼe feala hanatou mālo ai. Kae ko te hahaʼi ʼo te kolo ko Kapaone ʼaē ʼe ōvi mai neʼe mole nātou manatu feiā. Neʼe nātou ʼiloʼi papau ʼe lagolago anai te ʼAtua ki te kau Iselaelite, pea neʼe mole nātou fia fakalaga tau ki te ʼAtua. Koia ʼe koutou ʼiloʼi koa pe koteā te meʼa ʼaē neʼe fai e te kau Kapaonite?

Neʼe nātou fakatuʼutuʼu ke nātou teuteu ohage ko he ʼu hahaʼi ʼe ʼōmai mai mamaʼo. Koia ko ʼihi ia nātou neʼe nātou ʼai te ʼu kofu mahaehae pea mo tonatou ʼu sūlie kua maumau. Neʼe nātou ʼai ki tanatou ʼu asino te ʼu taga kua ʼāfea, pea mo te ʼu pane ʼāfea kua fefeka. Pea neʼe nātou ʼolo kia Sosue ʼo nātou ʼui fēnei: ‘ ʼE mātou ʼōmai mai mamaʼo, koteʼuhi neʼe mātou logo ki te ʼu meʼa ʼaē ʼo ʼuhiga mo tokotou ʼAtua lahi, ko Sehova. Neʼe mātou logo ki te ʼu meʼa fuli ʼaē neʼe ina fai maʼa koutou ʼi Esipito. Koia neʼe fekauʼi mai mātou e tomatou ʼu pule ke mātou ʼōmai kia koutou pea ke mātou ʼui atu: “Ko mātou ko takotou ʼu kaugana. Koutou fakapapau mai ʼe mole koutou tauʼi anai ia mātou.” Koutou sio mai ki ʼomātou ʼu mutuʼi meʼa kua maumau ʼuhi ko te loaloaga ʼo tamatou fagona pea ko tamatou pane kua ʼāfea pea mo fefeka.’

Neʼe tui ia Sosue pea mo te tahi ʼu tagata takitaki ki te meʼa ʼaē neʼe ʼui age e te kau Kapaonite. Koia neʼe nātou fakapapau age ʼe mole nātou tauʼi anai ia nātou. Kae hili kiai ʼaho e tolu pea nātou ʼiloʼi moʼoni ai ko te kau Kapaonite ʼe nonofo ōvi mai pe.

Neʼe fehuʼi age e Sosue kia nātou: ‘He koʼe neʼe koutou ʼui mai ʼe koutou ʼōmai mai mamaʼo?’

Neʼe tali age e te kau Kapaonite: ‘Neʼe mātou fai te faʼahi ʼaia koteʼuhi neʼe ʼui mai kia mātou neʼe fakapapau atu e tokotou ʼAtua ko Sehova, ʼe ina foaki atu anai te fenua fuli ʼo Kanaane maʼa koutou. Koia neʼe mātou matataku ai naʼa koutou fakaʼauha ia mātou.’ Kae neʼe manatuʼi e te kau Iselaelite tanatou fakapapau, pea neʼe mole nātou matehi te kau Kapaonite. Kae neʼe nātou fakaliliu te kau Kapaonite ko tanatou ʼu hahaʼi kaugana.

Neʼe ʼita ʼaupito te hau ʼo Selusalemi koteʼuhi neʼe kua fakatokatoka te kau Kapaonite mo Iselaele. Koia neʼe ina ʼui ai ki te tahi ʼu hau e toko fā: ‘ ’Ōmai ʼo tokoni mai kia ʼau ke tou tauʼi ia Kapaone.’ Pea neʼe fai e te ʼu hau ʼaia e toko nima te faʼahi ʼaia. Neʼe agapoto koa te kau Kapaonite ʼi tanatou fakatokatoka ʼaē mo Iselaele, koteʼuhi heʼe ʼōmai te ʼu hau ʼaia e toko nima ʼo tauʼi ia nātou? ʼE tou vakaʼi anai te faʼahi ʼaia.