ʼI te temi ʼae neʼe fakatupu ai e Sehova ia te famili, neʼe ina foaki ki te ʼu matuʼā ia te maʼua ʼae ko te tokaga ki ʼanatou tamaliki. (Kolose 3:20) ʼI tokolua ʼuhiga matuʼā, ʼe tonu ke kolua akoʼi ki takolua tamasiʼi ke ʼofa kia Sehova pea mo liliu ki ʼamuli ko he tahi ʼe fakapotopoto. (2 Timoteo 1:5; 3:15) ʼE tonu ke kolua iloʼi pe kotea ʼae ʼe ʼi te loto ʼo takolua tama peʼe ko takolua taʼahine. Koia, ʼe maʼuhiga te faʼifaʼitaki ʼae ʼe kolua foaki. ʼE faigafua anai hakolua akoʼi te Folafola ʼa Sehova ki takolua tamasiʼi mo kapau ʼe ʼuluaki nofo ʼi ʼokolua loto.—Pesalemo 40:9.

KOTEA TE MANATU ʼI TE TOHI-TAPU? “Ke fakalogologo vave te u tagata fuli, ke aua naa palalau vave.” (Sakopo 1:19) ʼE kolua loto anai ke palalau faifaitaliha atu takolua tamasiʼi. ʼE tonu ke ina logoʼi ʼe kolua fakalogo anai ʼi he temi ʼe fia palalau atu ai. Kolua taupau he ʼu felogoʼi ʼe lelei pea mo ia ke faigafua ki ai hana palalau faifaitaliha atu. (Sakopo 3:18) Kapau ʼe ina logoʼi ʼe kolua hoko iita, ʼe mole fia palalau anai. Kolua faʼa kataki pea mo fakaha age ki ai ʼe kolua ʼoʼofa ai. —Mateo 3:17; 1 Kolinito 8:1.

KOTEA ʼAE ʼE FEALA KE KOLUA FAI?

• Kolua fakalogo ki takolua tamasiʼi moka ʼe fia palalau atu

• Kolua faipalalau tuʼumaʼu mo ia, kaʼe mole gata ʼaki pe moka hoko he ʼu fihifihia

KOTEA TE MANATU ʼI TE TOHI-TAPU? “Ko ia ʼae ʼe fakasiosio poto ʼi he meʼa, ʼe ina maʼu anai te lelei.” (Taʼaga Lea 16:20, MN) ʼI ʼihi temi, ʼe ʼaoga ke kolua maʼu ia te fakasiosio poto ke feala hakolua iloʼi ia te ʼu meʼa ʼae ʼe logoʼi e takolua tamasiʼi. ʼI te agamahani, ʼe fai e te kau tupulaga ia he ʼu palalau ʼe mole natou fakakaukauʼi. “Ko ia ae e tali palalau kae nee mole fakalogo mua e ina fakaha tona vale.” (Taaga Lea 18:13) ʼAua naʼa kolua hoko iita.—Taaga Lea 19:11.

KOTEA ʼAE ʼE FEALA KE KOLUA FAI?

• ʼAua naʼa kolua tuʼusi peʼe kolua meʼa noaʼi te ʼu palalau ʼae ʼe fai atu e takolua tamasiʼi

• Kolua manatuʼi te temi ʼae neʼe kei kolua liliki ai pea mo te ʼu meʼa ʼae neʼe maʼuhiga kia koulua

KOTEA TE MANATU ʼI TE TOHI-TAPU? “Fakalogo, e toku foha, ki te akonaki ʼo tau tamai, pea ʼaua naʼa ke liaki te lao ʼo tau faʼe.” (Taʼaga Lea 1:8, MN) Neʼe foaki e Sehova ia te maʼua ki te tamai pea mo te faʼe ʼae ko te pule ki tanā tamasiʼi. ʼE tonu ke kolua akoʼi ki takolua tamasiʼi ke fakaʼapaʼapa pea mo fakalogo atu kia koulua. (Efeso 6:1-3) ʼE logoʼi e te tamasiʼi mo kapau ʼe mole kolua “pipiki tahi i he loto e tahi.” (1 Kolinito 1:10) Kapau ʼe mole kolua manatu tahi, ʼaua naʼa kolua fakaha ia te faʼahi ʼaia ki takolua tamasiʼi heʼe feala ke mole fakaʼapaʼapa ai kia koulua.

KOTEA ʼAE ʼE FEALA KE KOLUA FAI?

• Kolua manatu tahi ki te faʼahiga fakatonutonuʼi ʼo takolua tamasiʼi

• Kapau ʼe mole kolua manatu tahi ki te faʼahiga akoʼi ʼo takolua tamasiʼi, kolua faiga ke kolua femahinoʼaki

KOTEA TE MANATU ʼI TE TOHI-TAPU? “Ako te fanau o mulimuli ki te ala ae e tonu ke mulimuli ai.” (Taaga Lea 22:6) Ko te ako ʼae ʼe feala ke fua lelei, ʼe mole hoko feia pe. Kolua fai hakolua fakatuʼutuʼu moʼo akoʼi ʼo takolua tamasiʼi, ʼo kau ki ai te fakatonutonu. (Pesalemo 127:4; Taaga Lea 29:17) Ko te fakatonutonu, ʼe mole fakaʼuhiga pe ki he fakatuʼā, kaʼe ʼe ko he faʼahiga fakaha ʼaia ki takolua tamasiʼi pe ko ʼe ʼe fai te ʼu lekula. (Taaga Lea 28:7) Kolua akoʼi ke ina leleiʼia ia te Folafola ʼa te ʼAtua pea mo mahino ki te ʼu pelesepeto. (Pesalemo 1:2) ʼE feala anai ke tokoni ki ai ke ina maʼu he leʼo ʼo loto ʼe totonu.—Hepeleo 5:14.

KOTEA ʼAE ʼE FEALA KE KOLUA FAI?

• Kolua tokoni ki takolua tamasiʼi ke ina fakaʼuhiga ia te ʼAtua ko he Tahi ʼe maʼuli moʼoni ʼe feala ke falala ki ai

• Kolua akoʼi ki takolua tamasiʼi ke ina iloʼi pea mo hola mai te ʼu aga ʼae ʼe fakatupu tuʼutamaki, ʼae ʼe feala ke maʼu ʼi te Neti pea mo te ʼu fakatahiʼaga faipalalau ʼi ai. Kolua tokoni ki ai ke hola mai ia natou ʼae ʼe natou fia faka’aliki’i te ’u tamaliki