Kapau ʼe koutou fia kaumeʼa mo te ʼAtua, pea ʼe tonu ke koutou ʼiloʼi pe ko ai ia ia. ʼE ʼiloʼi koa e tokotou ʼu kaumeʼa tokotou higoa pea ʼe nātou fakaʼaogaʼi koa? Ei. ʼE toe feiā mo te ʼAtua, ʼe ina loto ke koutou ʼiloʼi tona huafa pea mo koutou fakaʼaogaʼi. Ko te huafa ʼo te ʼAtua ʼe ko Sehova. (Pesalemo 83:18; Mateo 6:9) Tahi ʼaē meʼa, ʼe tonu ke koutou ʼiloʼi pe koteā te ʼu meʼa ʼaē ʼe ina leleiʼia pea mo te ʼu meʼa ʼaē ʼe fehiʼa kiai. ʼE tonu ke koutou ʼiloʼi pe ko ai tona ʼu kaumeʼa pea mo tona ʼu fili. ʼE ʼaoga he temi loaloaga ke kita feʼiloʼiʼaki mo he tahi. ʼE ʼui e te Tohi-Tapu, ʼe ko he aga fakapotopoto ke kita fakaʼaogaʼi hokita temi moʼo ako pe ko ai ia Sehova.—Efeso 5:15, 16.

Ko te ʼu kaumeʼa ʼo te ʼAtua ʼe nātou fai te ʼu meʼa ʼaē ʼe ina leleiʼia. Kapau ʼe koutou gaohi koviʼi hokotou ʼu kaumeʼa pea mo koutou fai te ʼu meʼa ʼaē ʼe mole nātou leleiʼia, ʼi takotou manatu ʼe nātou haga kaumeʼa anai koa mo koutou? Kailoa! ʼO toe feiā pe, mo kapau ʼe koutou fia kaumeʼa mo te ʼAtua, pea ʼe tonu ke koutou fai te ʼu meʼa ʼaē ʼe ina leleiʼia.—Soane 4:24.

ʼE mole ko te ʼu lotu fuli ʼaē ʼe nātou kaumeʼa mo te ʼAtua. Ko Sesu, ʼaē ʼe kaumeʼa lelei ʼaupito mo te ʼAtua, neʼe talanoa ki te ʼu ala e lua. ʼE ʼi ai te ala ʼe laulahi pea mo kaugamālie ai te hahaʼi, pea ko te ala ʼaia ʼe ina taki ki te fakaʼauha. Ko te tahi ala ʼe lauveliveli pea ʼe tokosiʼi te hahaʼi ʼaē ʼe nātou ʼolo ai, pea ko te ala ʼaia ʼe ina taki ki te maʼuli heʼegata. Ko tona faka ʼuhiga, mo kapau ʼe koutou fia kaumeʼa mo te ʼAtua, pea ʼe tonu ke koutou ako pe koteā te faʼahiga tauhi ʼaē ʼe ina leleiʼia.—Mateo 7:13, 14.