Kia Koe ʼAe ʼe Ke Fakamafola Ia Te Puleʼaga,

FAKAKAUKAUʼI muʼa ʼe ke kau ki te famili ʼo te Petele ʼo Amelika. ʼE ko te Feliaono uhu ʼaia, ʼaho 2 ʼo Oketopeli 1914 pea, ohage ko te agamahani, ʼe ke heka ʼo fakaʼatalitali ki te tehina ko Russell. Fokifa pe mo te avahi mai ʼo te matapa ʼo te fale kai e te tehina ko Russell. ʼE ʼai hana kiʼi tuʼu, ohage ko tana fai mahani, pea ina ui ki te famili katoa “Malo tokotou maʼuli.” Pea ʼe mole alu ʼo heka kaʼe ʼe pasipasi pea mo ina tala fakafiafia fenei: “Kua ʼosi te temi ʼo te kau Senitile, kua ʼosi te ʼaho ʼo te ʼu hau.” ʼE lahi tou fiafia he neʼe ke fakatalitali ki te faʼahi ʼaia talu mai fualoa. ʼE ke pasipasi malohi ai mo natou fuli ʼo te famili ʼi te tala ʼo te logo ʼaia.

Kua hili ki ai ni taʼu talu mai te tala e te tehina ko Russell ia te logo fakaofoofo ʼaia. Kotea ʼae neʼe fai e te Puleʼaga talu mai ai?  ʼE lahi ʼaupito te ʼu gaue neʼe ina fai. ʼAki te Puleʼaga, neʼe fakamaʼa e Sehova pea mo ina akoʼi mamalie tana hahaʼi, ʼae neʼe toko lau ʼi afe ʼi te taʼu 1914 ʼo natou liliu ia ʼaho nei ko te teitei toko valu miliona. Kotea te ʼu faʼahi ʼae neʼe fua lelei ai kia koe te taʼi ako ʼaia?

Ia ʼaho nei ʼe tou tau logo ki te ui fenei e ʼotatou tehina: “ ʼE haʼele ki muʼa te saliote ʼa Sehova” pea ʼe moʼoni te faʼahi ʼaia. Kaʼe ʼe fakaha fakalelei ʼi te tohi ʼaeni, talu mai te taʼu 1914 mo te haʼele vave ʼo te saliote ʼa Sehova, ʼae ʼe ina fakata ia te koga ʼo te kautahi ʼa Sehova ʼi selo. Ke feala hanatou fakamafola ia te logo lelei ki te kele katoa, neʼe fakaʼaogaʼi e te kau faifakamafola ʼo te Puleʼaga te ʼu faʼahiga fai foʼou, ohage la ko te ʼu sulunale, mo te faifakamafola mo te ʼu pano, mo te ʼu ʼata, mo te ʼu kate faifakamafola, mo te ʼu fakatagi feʼaveʼaki, mo te latio pea ʼi te temi nei te Neti.

ʼE tapuakina e Sehova ia te gaue, koia ʼae kua feala ai ʼi te temi nei ke tou ta pea mo tufa ʼatatou tohi Fakatohi-tapu ia lea ʼe 670 tupu kaʼe mole tou fakatotogi. Ko te kau gaue lotolelei ʼe natou tokoni ki te laga ʼo te ʼu Fale Fono, mo te ʼu Fale ʼo Te ʼu Fakatahi pea mo te ʼu petele, ʼi te ʼu fenua koloaʼia pea mo ʼae ʼe masisiva. Pea moka hoko he tuʼutamaki fakanatula ʼi he fenua pe, ʼe foimo olo ki ai ʼotatou tehina mo tuagaʼane moʼo foaki tanatou tokoni, ʼo fakamoʼoni ai tonatou ʼofa moka hoko “te malaia.”—Taag. 17:17.

ʼI ʼihi temi, ko te kau takitaki lotu pea mo ni hahaʼi fakafeagai neʼe natou faigaʼi ke natou “tuku ni fakatotonu kovi” pea mo “tohi ni lao halahala.” Kaʼe ʼe malohi tatatou tui ʼi tatatou sio ʼae ko ʼanatou faiga ʼaia neʼe iku ia “ki te fakalakalaka ki mua o te Evaselio.”—Esa. 10:1; Filp. 1:12.

ʼE ko he pilivilesio tamatou fakatahi mo koutou, ʼae ʼe kotou kau ki te “hahai” ʼo totatou pule ko Kilisito. Ke kotou iloʼi ʼe matou ʼoʼofa ia koutou fuli. ʼE matou faikole ke tokoni atu ia te tohi ʼaeni ke kotou fakamaʼuhigaʼi ia tokotou tofiʼa fakalaumalie.—Mat. 24:45.

ʼE matou ʼoʼofa atu

ʼOu tehina,

Kolesi Pule ’a Te Kau Fakamo’oni ’a Sehova