Hili ʼaho ʼe 40 ʼo tana nofo ʼi te toafa pea ʼi muʼa ʼo tana toe liliu ki Kalilea, neʼe toe alu ia Sesu kia Soane, ʼae neʼe ina papitemaʼi. ʼI te fakaovi age ʼa Sesu, neʼe ui fenei e Soane ʼo ʼuhiga mo Sesu kia natou ʼae neʼe fakatahi mo ia: “Koʼeni te Akeno ʼa te ʼAtua, ʼae ʼe ina toʼo te agahala ʼo te malamanei! ʼE ko ia ʼae neʼe au talanoa ki ai, ʼo ui fenei: ‘ ʼE muli mai ia au he tagata kua muʼamuʼa ia ia au, koteʼuhi neʼe kua maʼuli ia kaʼe neʼe heʼeki au tupu.’ ” (Soane 1:29, 30) Logo la neʼe ai pe te kiʼi muʼa ʼa Soane ia Sesu, kaʼe neʼe iloʼi e Soane neʼe kua maʼuli ia Sesu talu mai fualoa, ohage ko he laumalie ʼi selo.

ʼI he ʼu vahaʼa ki muʼa atu, ʼi te haʼu ʼa Sesu ke papitemaʼi ia ia, neʼe lagi heʼeki iloʼi papau e Soane ko Sesu neʼe ko te Mesia. Neʼe ui fenei e Soane: “Maʼiape la mo au neʼe mole au iloʼi ia ia, kaʼe neʼe au faipapitema ʼaki te vai ke feala ke fakaha ia ia ki Iselaele.”—Soane 1:31.

Neʼe hoko atu e Soane tana fakamatala kia natou ʼae neʼe fia logo ki te ʼu meʼa ʼae neʼe hoko ʼi te temi ʼae neʼe ina papitemaʼi ai ia Sesu. Neʼe ina ui fenei: “Neʼe au sio ki te laumalie ʼe hifo ifo mai te lagi ohage ko he lupe pea neʼe nofo ia te ia. Maʼiape la mo au neʼe mole au iloʼi ia ia, kaʼe ko Ia ʼae neʼe ina fekauʼi mai au ke au faipapitema ʼaki te vai, neʼe ina ui fenei mai: ‘Ko ia ʼae ka ke sio ʼe hifo ifo anai ki ai te laumalie maʼoniʼoni pea mo nofo ai, ʼe ko ia ʼae ʼe faipapitema ʼaki te laumalie.’ Pea neʼe au sio ki ai, mo au fakamoʼoni ʼe ko ia ʼaeni ko te ʼAlo ʼo te ʼAtua.”—Soane 1:32-34.

ʼI te ʼaho ake, ʼi te toe alu age ʼa Sesu kia ia, neʼe nonofo Soane mo ʼana tisipulo ʼe toko lua. Neʼe ui fenei e Soane: “Koʼeni te Akeno ʼa te ʼAtua!” (Soane 1:36) Neʼe mulimuli atu aipe te ʼu tisipulo ʼaia ʼa Soane Patita ia Sesu. Neʼe higoa te tahi ko Atelea. Pea ko te tahi neʼe lagi ko ia ʼae neʼe ina tohi te ʼu meʼa ʼaeni neʼe hoko, pea neʼe toe higoa foki ko Soane. Neʼe lagi ko te tehina mataʼi tama ʼaia ʼo Sesu, he neʼe ko te tama ʼa Salome. Ko Salome neʼe lagi ko te tehina ʼo Malia, pea ko tona ʼohoana ʼe ko Sepeteo.

ʼI te maliu ʼa Sesu ʼo sio kia Atelea mo Soane neʼe nā mulimuli ia te ia, neʼe ina fakalavelave fenei: “Kotea ʼae ʼe kolua kumi?”

Neʼe nā fehuʼi fenei age ki ai: “Lapi . . . kofea ʼae ʼe ke nofo ai?”

Neʼe tali fenei e Sesu: “Kolua ʼomai pea ʼe kolua sisio anai.”—Soane 1:37-39.

Neʼe ko te vaʼevaʼe hola fa afiafi, pea ko Atelea mo Soane neʼe nā nonofo leva mo Sesu. Neʼe fiafia ʼaupito ia Atelea ʼo alu ai ʼo fakafelaveʼi ki tona tehina ko Simone, ʼae ʼe toe higoa ko Petelo, pea neʼe ina ui fenei age: “Kua ma maʼu ia te Mesia.” (Soane 1:41) Neʼe ʼave e Atelea ia Petelo kia Sesu. ʼE ha ʼi te ʼu meʼa ʼae neʼe hoko ki muli age, neʼe toe fakafelaveʼi ia Soane mo tona tehina ko Sakopo, pea neʼe ina ʼaumai ia ia kia Sesu. Kaʼe neʼe mole fakamatala e Soane te faʼahi ʼaia ʼi tana tohi.

ʼI te ʼaho ake, neʼe maʼu e Sesu ia Filipo, te tagata mai te kolo ko Petesaita. Neʼe tuʼu te kolo ʼaia ʼi te potu noleto ʼo te Tai ʼo Kalilea, pea neʼe tutupu ai ia Atelea mo Petelo. Neʼe fakaafe fenei e Sesu ia Filipo: “Muli mai ia te au.”—Soane 1:43.

 Neʼe felaveʼi leva ia Filipo mo Natanaele, ʼae ʼe toe higoa ko Paletolomeo, pea neʼe ina ui fenei age: “Kua matou maʼu ia ia ʼae neʼe tohi ʼo ʼuhiga mo ia e Moisese ʼi te Lao, pea mo te kau Polofeta: ko Sesu, te foha ʼo Sosefo, mai Nasaleti.” Neʼe lotolotolua ia Natanaele ʼo ina ui fenei kia Filipo: “ ʼE feala koa ke haʼu mai Nasaleti he meʼa ʼe lelei?”

Neʼe fakalotomalohiʼi fenei ia ia e Filipo: “Haʼu ʼo sio.” Neʼe tokagaʼi e Sesu te alu age ʼo Natanaele kia te ia, pea neʼe ina ui fenei: “Koʼeni te tagata Iselaele totonu, ʼe mole maʼu ia ia he kaka.”

Neʼe fehuʼi fenei age e Natanaele: “He koʼe ʼe ke iloʼi au?”

Neʼe tali fenei e Sesu: “ ʼI muʼa ʼo tou pauʼi e Filipo, ʼi tau heka ʼi te lalo fuʼu fiku, neʼe kua au sio kia koe.”

Neʼe punamaʼuli ia Natanaele, ʼo ina ui fenei: “Lapi, ko koe ko te ʼAlo ʼo te ʼAtua, ko koe te Hau ʼo Iselaele.”

Neʼe ui fenei e Sesu: “ ʼE ke tui koa he neʼe au ui atu neʼe au sio kia koe ʼi te lalo fuʼu fiku? ʼE ke sio anai ki he ʼu meʼa ʼe lalahi age ʼi te ʼu meʼa ʼaeni.” Pea neʼe fakapapau fenei e Sesu: “ ʼE au tala moʼoni atu kia koutou, ʼe kotou sisio anai ki te ava ʼo te lagi pea mo te hake mo te hifo ʼa te kau ʼaselo ʼa te ʼAtua ki te Foha ʼo te tagata.”—Soane 1:45-51.

ʼI te ʼosi pe ʼaia, neʼe mavae mai te Liuʼa ʼo Solotane ia Sesu mo ʼana tisipulo foʼou ʼaia ʼo olo ki Kalilea.