Neʼe foaki e Sesu ki ʼana apositolo he ʼu fakatotonu ʼe lelei ʼo ʼuhiga mo te fakahoko ʼo te gaue faifakamafola moka natou olo taki toko lua. Kaʼe neʼe ina toe fai age foki mo he fakatokaga ʼofa. Neʼe ina ui fenei ʼo ʼuhiga mo te kau fakafeagai: “ ʼE au fekauʼi koutou ohage ko he ʼu ovi ʼi te lotolotoiga ʼo he ʼu lupo . . . Kotou tokakaga ki te hahaʼi, koteʼuhi ʼe natou ʼave anai koutou ki te ʼu fakamauʼaga pea mo huipiʼi koutou ʼi ʼonatou sinakoka. Pea ʼe taki anai koutou kia muʼa ʼo te ʼu kovana mo te ʼu hau ʼuhi ko au.”—Mateo 10:16-18.

ʼEi, neʼe feala ke kovi te fakatagaʼi ʼo te ʼu tisipulo ʼa Sesu, kaʼe neʼe ina fakafimalieʼi natou ʼaki te fakapapau ʼaeni: “Ka ʼave koutou ki ai, ʼaua naʼa kotou tuʼania ki te ʼu palalau ʼae ka kotou fai, koteʼuhi ʼe foaki atu anai ʼi te temi ʼaia te ʼu palalau ʼae ʼe tonu ke kotou fai. He ʼe mole ko koutou pe ʼae ʼe palalau, kaʼe ʼe ko te laumalie ʼo takotou Tamai ʼae ʼe palalau maʼa koutou.” Neʼe hoko atu fenei e Sesu: “ ʼE ʼave anai e he tehina tona tehina ke matehi, mo te tamai tana fanau ke matehi, pea ʼe fakafeagai anai te ʼu fanau ki ʼanatou matuʼā pea mo natou ʼave anai ke matehi. Pea ʼe fehiʼaʼinaʼi anai koutou e te hahaʼi fuli ʼuhi ko toku huafa, kaʼe ko ʼae ʼe kataki ʼo kaku ki te fakaʼosi ʼe haofaki anai.”—Mateo 10:19-22.

Mai tona aluʼaga ʼae ʼe maʼuhiga ʼaupito ia te faifakamafola, koia neʼe fakaha lelei e Sesu ki ʼana tisipulo te ʼaoga ʼae ke natou aga fakapotopoto ke feala hanatou taupau tonatou ʼateaina ki te fakahoko te gaue ʼaia. Neʼe ina ui fenei: “Ka fakatagaʼi koutou ʼi he kolo, kotou feholaki ki he tahi age kolo. Koteʼuhi ʼe au tala moʼoni atu kia koutou, ʼe haʼu anai te Foha ʼo te tagata kaʼe heʼeki kotou foli katoa ia te ʼu kolo ʼo Iselaele.”—Mateo 10:23.

Neʼe makehe te ʼu fakatotonu, mo te ʼu fakatokaga pea mo te ʼu fakalotomalohi ʼae neʼe foaki e Sesu ki ʼana apositolo ʼe toko 12. Kaʼe ʼe mahino ia, ʼe toe fakaʼuhiga te ʼu palalau ʼaia kia natou ʼae ka kau anai ki te gaue faifakamafola hili te mate mo te fakatuʼuake ʼo Sesu. ʼE ha te faʼahi ʼaia ʼi tana ui ʼae ʼe fehiʼaʼinaʼi anai ʼana tisipulo “e te hahaʼi fuli.” Koia neʼe mole fakaʼuhiga pe ki te hahaʼi ʼae neʼe fekauʼi e Sesu ʼana apositolo ki ai. Tahi ʼae meʼa, ʼe mole tou lau neʼe taki te kau apositolo kia muʼa ʼo te ʼu kovana mo te ʼu hau ʼi tanatou foli faifakamafola ʼaia ʼi Kalilea pe neʼe ʼave natou e ʼonatou famili ke matehi.

ʼE mahino ia, neʼe manatu Sesu ki te ka haʼu ʼi tana fai te ʼu palalau ʼaia ki te kau apositolo. Ohage la ko tana ui ʼae “ ʼe haʼu anai te Foha ʼo te tagata,” kaʼe heʼeki katoa te gaue faifakamafola ʼo ʼana tisipulo. Neʼe fakaha ai e Sesu, ka haʼu te Hau ko Sesu Kilisito ʼae kua fakakololia ʼi tona ʼuhiga tuʼi fakamau ʼa te ʼAtua, ʼe heʼeki katoa anai te fakamafola e ʼana tisipulo ia te Puleʼaga ʼo te ʼAtua.

ʼI tanatou fakahoko te gaue faifakamafola, neʼe mole tonu ke punamaʼuli te kau apositolo moka fakafeagai te hahaʼi kia natou, he neʼe ui fenei e Sesu: “ ʼE mole maʼoluga age he tisipulo ʼi tana tagata faiako,  pea ʼe mole maʼoluga age he tagata kaugana ʼi tona pule.” Neʼe mahino gafua ki te kau apositolo te manatu ʼa Sesu. Neʼe gaohi koviʼi pea mo fakatagaʼi ia ia ʼuhi ko tana fakamafola ia te Puleʼaga ʼo te ʼAtua, pea ʼe toe feia anai mo natou. Kaʼe neʼe fai e Sesu te fakalotomalohi ʼaeni: “ ʼAua naʼa kotou matataku ia natou ʼae ʼe natou matehi te sino kaʼe ʼe mole feala ke natou pulihi te maʼuli. Kaʼe kotou manavasiʼi kia ia ʼae ʼe feala ke ina fakaʼauha te maʼuli pea mo te sino ʼi te Seʼeni.”—Mateo 10:24, 28.

Neʼe tuku e Sesu he faʼifaʼitaki ʼo ʼuhiga mo te faʼahi ʼaia. Neʼe lototoʼa ʼo ina tali ke mate he neʼe mole fia liliu ʼo heʼe agatonu kia Sehova, te ʼAtua Mafimafi. ʼE ko Ia ʼae ʼe feala ke ina pulihi “te maʼuli” ʼo he tahi (te ʼamanaki ʼae ke toe maʼuli ake) peʼe feala ke ina fakatuʼuake ia ia ki te maʼuli heʼe gata. ʼE mahino ia neʼe fakalotofimalie te ʼu palalau ʼaia ki te kau apositolo.

Neʼe fai e Sesu te lea fakatata ʼaeni moʼo fakaha te tokaga ʼofa ʼa te ʼAtua ki ʼana tisipulo: “ ʼE mole fakatau koa la he ʼu misi ʼe lua ki he foʼi piesi ʼe mole faʼa maʼuhiga? Kaʼe ʼe iloʼi e takotou Tamai moka to he misi ki te kele. . . . Koia, ʼaua naʼa kotou matataku, ʼe kotou maʼuhiga age ʼi he faga misi.”—Mateo 10:29, 31.

ʼE mavetevete anai te ʼu loto fale ʼuhi ko te logo ʼae ʼe fakamafola e te ʼu tisipulo ʼa Sesu, he ʼe tali leleiʼi anai e ʼihi kaʼe fakafisi ʼihi. Neʼe ui fenei e Sesu: “ ʼAua naʼa kotou manatu neʼe au haʼu ʼo ʼaumai te tokalelei ki te kele.” Koia, ʼe tonu ai ke lotomalohi he tahi ʼi he famili moka ʼe ina tali te moʼoni ʼo te Tohi-Tapu. Neʼe ui fenei e Sesu: “Ko ʼae ʼe lahi age tona ʼofa ki tana tamai peʼe ko tana faʼe ia te au, ʼe mole tuha ia mo au. Pea ko ʼae ʼe lahi age tona ʼofa ki tana tama peʼe ko tana taʼahine ia te au, ʼe mole tuha ia mo au.”—Mateo 10:34, 37.

Kaʼe ʼe tali leleiʼi anai e ʼihi ʼana tisipulo. Neʼe ina ui fenei: “Ko ʼae ʼe ina foaki ki he tahi ia natou liliki ʼaia he ipu vai momoko ʼuhi he ʼe ko te tisipulo, ʼe au tala moʼoni atu kia koutou, ʼe ina maʼu moʼoni anai tona fakapale.”—Mateo 10:42.

Neʼe teuteuʼi lelei e Sesu te kau apositolo ʼaki tana foaki age kia natou te ʼu fakatotonu, mo te ʼu fakatokaga pea mo te ʼu fakalotomalohi. Neʼe natou olo ai leva “ki te ʼu kolo liliki, ʼo tala te logo lelei pea mo fakamalolo te hahaʼi ʼi te ʼu potu fuli pe.”—Luka 9:6.