Neʼe lahi te ʼu gaue ʼae neʼe fai e Sesu ʼi te ʼaho ʼaia pea kua gaʼegaʼe. Koia ʼi te afiafi, neʼe ina ui fenei ki te ʼu tisipulo: “Tou fakalaka ki te tahi kauvai,” ʼae ʼe haga ki Kapenaume.—Maleko 4:35.

ʼI te potu esite ʼo te Tai ʼo Kalilea, neʼe tuʼu ai te koga fenua ʼo te kau Kelasena. Neʼe toe higoa te koga fenua ʼaia ko Tekapole. Neʼe maʼu e te hahaʼi ʼo te ʼu kolo ʼo Tekapole te faʼahiga maʼuli ʼo te kau Keleka, logo la neʼe tokolahi te kau Sutea neʼe maʼuʼuli ai.

Neʼe tokagaʼi e te hahaʼi te mavae ʼa Sesu mai Kapenaume. Neʼe ʼi ai te tahi ʼu vaka neʼe natou mavae fakatahi mo ia. (Maleko 4:36) ʼI tona fakahagatonu, neʼe mole loaloaga tanatou fakalaka ki te tahi kauvai. Ko te Tai ʼo Kalilea ʼe hage ko he foʼi vai, ʼe teitei kilometa 21 tona loa pea mo kilometa 12 tona laulahi. Kaʼe ʼe loloto.

Logo la ko Sesu neʼe ko he tagata haohaoa, kaʼe ʼe tou mahino neʼe gaʼegaʼe ʼuhi ko te ʼu gaue ʼae neʼe ina fai ʼi tona minisitelio. Koia ʼi tanatou mavae pe ʼaia, neʼe alu ia Sesu ʼo moe ʼi te taumuli ʼo te vaka, ʼo ina ʼulugaʼi te foʼi pila.

Tokolahi te kau apositolo neʼe natou popoto ʼi te foe ʼo te vaka, kaʼe neʼe mole fimalie tanatou faifolau ʼaia. Neʼe ʼa takatakai te Tai ʼo Kalilea e te ʼu moʼuga, pea ʼi te agamahani neʼe mafana te fuga tai. ʼI ʼihi temi, ko te ʼaele momoko ʼo te ʼu moʼuga neʼe hifo ʼo felaveʼi mo te mafana ʼo te fuga tai, ʼo tupu fakafokifa ai he ʼu afā malohi ʼi te tai. Ko te meʼa ʼaia neʼe hoko. Mole tuai pea neʼe pa mai te ʼu peau ki te vaka. “Neʼe fonu vai ai tonatou vaka ʼo meihiʼi pe ke mou.” (Luka 8:23) Kaʼe neʼe kei moe pe ia Sesu.

Neʼe kinakina te ʼu tagata tautai ʼaia ʼi tanatou foe ia te vaka, ohage pe ko tanatou fai ki muʼa atu moka neʼe hoko he ʼu afā. Kaʼe neʼe kehe leva ʼi te temi ʼaia. ʼI tanatou matataku naʼa natou mamate, neʼe natou fafagu ia Sesu pea natou ui fenei: “ ʼAliki, haofaki tatou naʼa tou mamate!” (Mateo 8:25) Neʼe matataku te ʼu tisipulo naʼa natou malelemo.

ʼI te ʼala ake ʼa Sesu, neʼe ina ui fenei ki te kau apositolo: “He koʼe ʼe kotou matataku, hahaʼi tui vaivai?” (Mateo 8:26) Pea neʼe fakatotonu fenei e Sesu ki te matagi pea mo te tai: “Tuku! Fakalogologo!” (Maleko 4:39) Neʼe gona ai te matagi pea neʼe tokalelei te tai. (Neʼe talanoa ia Maleko pea mo Luka ki te aluʼaga fakaofoofo ʼaia pea mo te milakulo ʼae neʼe fai e Sesu. Kaʼe neʼe nā ʼuluaki fakamaʼuhigaʼi te fakagona e Sesu te afā, pea neʼe nā talanoa leva ki te tui vaivai ʼa te ʼu tisipulo.)

Fakakaukauʼi age muʼa te malave ʼo te faʼahi ʼaia ki te ʼu tisipulo. Neʼe natou sisio ki te gona ʼo te afā lahi ʼae neʼe to ki te tai. Pea neʼe natou matataku pea mo punamaʼuli ai. Neʼe natou feuiʼaki fenei: “Ko ai koa ia ia, ke fakalogo ki ai te matagi pea mo te tai?” Pea neʼe natou tau haohaoa ai ki te tahi kauvai. (Maleko 4:41–5:1) Ko te ʼu vaka ʼae neʼe mavae fakatahi mo natou, neʼe lagi feala ke natou toe liliu ki te potu uesite ʼo te Tai ʼo Kalilea.

ʼE ko he meʼa fakalotofimalie te iloʼi ʼae ʼe maʼu e te ʼAlo ʼo te ʼAtua te malohi ke ina puleʼi te ʼu malohi ʼo te natula. ʼI te ʼafio ʼo tona Puleʼaga, pea tokaga katoa anai ki totatou kele, ʼe maʼuʼuli fimalie anai te hahaʼi fuli, he ʼe mole toe hoko anai te ʼu tuʼutamaki fakanatula fakamataku.