Kua taʼu lua leva ia te faʼafai ʼa Sesu ʼi te faifakamafola. Kua tonu koa ke ina fakasiʼisiʼi la tana gaue pea mo fakafifimalie? Kailoa ia, kaʼe neʼe fakalahi e Sesu ia tana gaue faifakamafola ʼaki tana alu “ki te ʼu kolo lalahi pea mo te ʼu kolo liliki fuli [ʼo Kalilea], ʼo faiakonaki ʼi ʼonatou sinakoka, mo fakamafola te logo lelei ʼo te Puleʼaga pea mo fakamalolo te ʼu mahaki pea mo te ʼu maʼimoa kehekehe.” (Mateo 9:35) Ko te meʼa ʼae neʼe sio ki ai neʼe tupu ai tana tui papau neʼe tonu ke lahi age te gaue faifakamafola. Kaʼe ʼe ina lava fakahoko feafeaʼi anai te faʼahi ʼaia?

ʼI te fealuʼaki ʼa Sesu, neʼe sio ʼe ʼaoga ki te hahaʼi he fakamalolo pea mo he fakalotofimalie ʼi te faʼahi fakalaumalie. Neʼe natou hage ko he ʼu ovi ʼe mole honatou tauhi ovi, neʼe ogosia pea mo mavetevete. Neʼe ʼofa mamahi kia natou pea neʼe ina ui fenei age ki ʼana tisipulo: “ ʼE moʼoni, ʼe lahi te taʼukai kaʼe ʼe tokosiʼi te kau gaue. Koia, kotou kole ki te Pule ʼo te taʼukai ke ina fekauʼi mai he kau gaue ki tana taʼukai.”—Mateo 9:37, 38.

Neʼe iloʼi e Sesu te puleʼaki ki ai. Neʼe ina pauʼi te kau apositolo ʼe toko 12 pea neʼe ina vaevae taki toko lua natou ke natou olo ʼo faifakamafola. Neʼe ina foaki age te ʼu fakatotonu ʼaeni: “ ʼAua naʼa kotou olo ki te kau matapule, pea ʼaua naʼa kotou hu ki he kolo Samalitana, kaʼe kotou haga olo ki te ʼu ovi ʼae kua hehe ʼo te puleʼaga ʼo Iselaele. Ka kotou olo, kotou fakamafola fenei: ‘Kua ovi mai ia te Puleʼaga ʼo selo.’ ”—Mateo 10:5-7.

Ko te Puleʼaga ʼae neʼe tonu ke natou fakamafola, neʼe ko te Puleʼaga ʼae neʼe talanoa ki ai Sesu ʼi te faikole ʼae ko te Tamai ʼae ʼe ʼi selo. Pea ko tanatou ui ʼae ki te hahaʼi “Kua ovi mai ia te Puleʼaga” ko tona fakaʼuhiga ko Sesu Kilisito, te Hau ʼae neʼe fakanofo e te ʼAtua, kua nofo mo natou. Kaʼe kotea ʼae ka ina fakamoʼoni anai ʼe fakafofoga e ʼana tisipulo te Puleʼaga  ʼaia? Neʼe foaki age e Sesu kia natou te malohi ke natou fakamalolo te kau mahahaki pea mo fakatuʼuake te kau mate, hala mo totogi. Pea ʼe maʼu feafeaʼi anai koa e te kau apositolo te ʼu meʼa ʼae ʼe ʼaoga kia natou, ohage ko tanatou meʼa kai ʼi te ʼaho fuli?

Neʼe ui e Sesu ki ʼana tisipulo ke ʼaua naʼa natou teuteuʼi ki tanatou foli ʼo faifakamafola, te ʼu meʼa ʼae ka ʼaoga kia natou ʼi te faʼahi fakasino. Neʼe mole tonu ke natou ʼai ki ʼanatou kato ni foʼi piesi aulo, peʼe siliva, peʼe kapa. Neʼe mole ʼaoga pe la hanatou kato fafaʼo meʼa kai ki tanatou faifagona ʼaia, peʼe ko ni mutuʼi meʼa peʼe ko ni taka. Kotea tona tupuʼaga? Neʼe ui fenei e Sesu kia natou: “ ʼE tau mo te tagata gaue ke ina maʼu tana meʼa kai.” (Mateo 10:10) Ko te hahaʼi ʼae ʼe natou tali leleiʼi anai tanatou logo, ʼe natou tokakaga anai ʼo foaki ki te ʼu tisipulo te ʼu meʼa ʼae ʼe ʼaoga kia natou. Neʼe ui fenei e Sesu: “ ʼI he ʼapi pe ʼe kotou hu ki ai, kotou nonofo ai ʼo kaku ki takotou mavae.”—Maleko 6:10.

Neʼe toe fakamahino foki e Sesu kia natou pe ʼe feafeaʼi hanatou fakaha te logo ʼo te Puleʼaga ʼi te ʼu ʼapi, ʼo ina ui fenei: “Ka kotou hu ki he loto fale, kotou fakamalo kia natou ʼo te loto fale. Kapau ʼe tali leleiʼi koutou e te loto fale ʼaia, pea ke hifo tokotou tokalelei kia natou. Kaʼe kapau ʼe mole natou tali leleiʼi koutou, pea ke toe liliu atu kia koutou tokotou tokalelei. Kapau ʼe mole tali leleiʼi koutou e he tahi peʼe mole fakalogo ki ʼakotou palalau, ʼi te temi ʼae ʼe kotou mavae ai mai te ʼapi peʼe ko te kolo ʼaia, kotou tu te efu ʼae ʼi ʼokotou vaʼe.”—Mateo 10:12-14.

Neʼe feala pe ke mole tali e he foʼi kolo katoa tanatou logo. Kotea ʼae ka hoko anai ki ai? Neʼe fakaha e Sesu ʼe mamafa anai tona tautea. Neʼe ina fakamahino fenei: “ ʼE au tala moʼoni atu kia koutou, ʼi te ʼAho ʼo Te Fakamau, ʼe ʼataʼata age anai ia te fakatuʼā ʼo te fenua ʼo Sotoma mo Komola ʼi te kolo ʼaia.”—Mateo 10:15.