ʼI he sinakoka ʼi Kapenaume, neʼe faiakonaki ai ia Sesu ʼo ina ui ʼe ko ia te pane moʼoni mai te lagi. Neʼe ko tana hoko atu ʼaia ʼo te ʼu palalau ʼae neʼe ina fai ki te hahaʼi ʼae neʼe ʼomai mai te potu esite ʼo te Tai ʼo Kalilea, ʼae neʼe natou kai te ʼu pane pea mo te ʼu kiʼi ika ʼae neʼe ina fafaga ʼaki ia natou.

Neʼe hoko atu fenei e Sesu ʼana palalau: “Neʼe kai e ʼakotou kui te mane ʼi te toafa kaʼe neʼe natou mamate.” Pea neʼe ina fakamahino fenei: “Ko au te pane maʼuli ʼae neʼe hifo mai selo. Kapau ʼe kai e he tahi te pane ʼaia, ʼe maʼuli anai ʼo heʼe gata. Pea ko te pane ʼae ʼe au foaki anai ke maʼuli ai te malamanei, ʼe ko toku kakano.”—Soane 6:48-51.

ʼI te Pasikate ʼo te taʼu 30 H.T.S., neʼe ui e Sesu kia Nikotemo neʼe ʼofa mamahi te ʼAtua ki te malamanei ʼo ina foaki ai tona ʼAlo ko te Fakamaʼuli ʼo te malamanei. ʼI te temi leva ʼae neʼe palalau ai Sesu ki te hahaʼi, neʼe ina fakaha lelei ia te ʼaoga ʼae ke natou kai ki tona kakano, ko tona fakaʼuhiga ke natou tui ki te sakilifisio ʼae ka ina foaki anai. Neʼe tonu ke natou fai te meʼa ʼaia ke feala hanatou maʼu te maʼuli heʼe gata.

Kaʼe neʼe iita te hahaʼi ʼi te ʼu palalau ʼa Sesu. Neʼe natou fehuʼi fenei: “ ʼE lava feafeaʼi ki te tagata ʼaeni ke ina foaki mai tona kakano ke tou kai?” (Soane 6:52) Neʼe loto e Sesu ke natou mahino neʼe ko he ʼu palalau fakatata ʼae neʼe ina fai. Neʼe ha te faʼahi ʼaia ʼi tana hoko atu fenei:

“Kapau ʼe mole kotou kai te kakano ʼo te Foha ʼo te tagata pea mo inu ki tona taʼataʼa, ʼe mole ia koutou te maʼuli. Ko ʼae ʼe ina kai toku kakano pea mo inu toku taʼataʼa ʼe ina maʼu te maʼuli heʼe gata. . . . Koteʼuhi ko toku kakano ʼe ko te meʼa kai moʼoni pea ko toku taʼataʼa ʼe ko te meʼa inu moʼoni. Ko ʼae ʼe ina kai toku kakano pea mo inu toku taʼataʼa ʼe fakatahi mo au.”—Soane 6:53-56.

Fakakaukauʼi age muʼa te manatu ʼa te kau Sutea ʼi tanatou fagono ki te ʼu palalau ʼaia. Neʼe lagi ko he meʼa fakalialia kia natou, he neʼe lagi natou manatu neʼe uga e Sesu ke natou kai tagata peʼe ke natou maumauʼi te lao ʼa te ʼAtua, ʼae ʼe ina tapuʼi te kai peʼe ko te inu ʼo te toto. (Senesi 9:4; Levitiko 17:10, 11) Kaʼe neʼe mole manatu ia Sesu ke natou kai moʼoni he kakano peʼe ke natou inu moʼoni he toto. Neʼe ina fakaha ko natou fuli ʼae neʼe fia maʼuʼuli ʼo heʼe gata, neʼe tonu ke natou tui ki te sakilifisio ʼae ka ina foaki anai moka ina momoli tona sino haohaoa pea mo liligi tona taʼataʼa. Kaʼe neʼe tokolahi pe ʼana tisipulo neʼe mole natou mahino ki tana akonaki ʼaia. Neʼe ui fenei e ʼihi: “Kotea koa te taʼi palalau ʼaia? Ko ai ʼae ʼe kei fia fakalogo ki ai?”—Soane 6:60.

Neʼe iloʼi e Sesu neʼe muhumuhu ʼihi ʼo ʼana tisipulo, koia neʼe ina fehuʼi fenei ai: “ ʼE kotou tukia koa ʼuhi ko ʼaku palalau? Pea ʼe feafeaʼi age leva mo kapau ʼe kotou sisio ki te hake ʼo te Foha ʼo te tagata ki te potu ʼae neʼe nofo ai ʼi muʼa atu? . . . Ko te ʼu palalau ʼae neʼe au fai atu ʼe haʼu mai te laumalie maʼoniʼoni pea ʼe maʼuli. Kaʼe ʼe ʼi ai ʼihi ia koutou ʼe mole natou tui.” Hili ʼaia, tokolahi te kau tisipulo neʼe natou mavae pea neʼe mole kei natou mulimuli ia te ia.—Soane 6:61-64.

Pea neʼe fai leva e Sesu te fehuʼi ʼaeni ki tana kau apositolo ʼe toko 12: “ ʼE kotou fia olo koa mo koutou?” Neʼe tali fenei age e Petelo kia te ia: “ ʼAliki, ke matou olo la kia ai? ʼE ke maʼu te ʼu folafola ʼo te maʼuli heʼe gata. ʼE matou tui pea ʼe matou iloʼi ʼe ko koe te Maʼoniʼoni ʼa Te ʼAtua.” (Soane 6:67-69) Neʼe ha ai tanatou nonofo agatonu, logo la ʼi te temi ʼaia neʼe mole mahino katoa ia Petelo pea mo te tahi ʼu apositolo ki te akonaki ʼa Sesu ʼo ʼuhiga mo te faʼahi ʼaia.

Logo la neʼe fiafia ia Sesu ʼi te tali ʼae neʼe fai e Petelo, kaʼe neʼe ina ui fenei: “Neʼe mole koa la au filifili koutou, te toko hogofulu-ma-lua? Kaʼe ʼe ʼi ai he tahi ia koutou ʼe ko te tagata fasituʼu.” (Soane 6:70) Neʼe palalau ia Sesu ʼo ʼuhiga mo Sutasi Isekaliote. ʼI te temi ʼaia, neʼe lagi kua tokagaʼi e Sesu te kamata mulimuli ʼa Sutasi ki ʼona holi ʼae ʼe kovi.

Kaʼe neʼe fiafia ia Sesu ʼi tana iloʼi ʼae ʼe hoko atu pe anai te mulimuli ʼa Petelo pea mo te tahi ʼu apositolo ia te ia, pea mo tanatou kau mo ia ki te gaue ʼae ʼe ina haofaki te ʼu maʼuli.