Neʼe tau atu ia Sesu mo ʼana tisipulo ki Petesaita. Neʼe ʼaumai leva e te hahaʼi te tagata kivi kia te ia pea neʼe natou kole age ke fa ki ai ke malolo ai.

Neʼe puke e Sesu te nima ʼo te tagata pea ina taki ia ia ki te tuʼa kolo. ʼI tana ʼosi ʼanuhi te ʼu mata ʼo te tagata, neʼe fehuʼi fenei age e Sesu: “ ʼE ke sio ki he meʼa?” Neʼe ina tali fenei age: “ ʼE au sio ki he hahaʼi, kaʼe ʼe natou hage ko he ʼu fuʼu ʼakau ʼe haʼele.” (Maleko 8:23, 24) Neʼe hili e Sesu ʼona nima ki te ʼu mata ʼo te tagata, pea neʼe sio ai leva. Pea neʼe ina fakaliliu ki tona ʼapi ia te tagata, ʼae kua sio lelei leva, pea ina fakatotonu age ke ʼaua naʼa hu ki te kolo.

Ki muli age, neʼe olo ia Sesu mo ʼana tisipulo ki te potu noleto, ki te koga fenua ʼae neʼe tuʼu ai te kolo ko Sesalea Filipo. Neʼe loaloaga tanatou faifagona, ʼo natou haʼele ia teitei kilometa ʼe 40. Neʼe tuʼu ia te kolo ʼi he moʼuga. Mai te kolo ʼaia, neʼe feala ke sisio te hahaʼi ki te Moʼuga ʼo Helemone, ʼae neʼe ʼaofi e te nive. Neʼe lagi ʼaho lua peʼe laka atu tanatou faifagona ʼaia.

Lolotoga tanatou faifagona, neʼe alu tokotahi ia Sesu ki he faʼahi ʼo faikole ai. Neʼe kei toe pe mahina ʼe hiva peʼe hogofulu ʼi muʼa ʼo tona mate, pea neʼe tuʼania ia Sesu ʼo ʼuhiga mo ʼana tisipulo. Neʼe heʼeki faʼa fualoa, tokolahi neʼe mole kei natou muliʼi ia ia, pea ko ʼihi neʼe lagi lotolotolua peʼe lotovaivai. Neʼe lagi natou feʼekeʼaki pe koʼe neʼe fakafisi ki te ʼu faiga ʼa te hahaʼi ke natou fakanofo ia ia ko he hau, pea he koʼe neʼe mole ina fai he fakailoga moʼo fakamoʼoni pe ko ai ia ia.

Neʼe olo age te ʼu tisipulo ki te faʼahi ʼae neʼe faikole ai, pea neʼe fehuʼi fenei age e Sesu kia natou: “ ʼE ko ai te Foha ʼo te tagata, ʼi te lau ʼa te hahaʼi?” Neʼe natou tali fenei age: “ ʼE ui e ʼihi ko Soane Patita, ki ʼihi ko Elia pea ki ʼihi age leva ko Selemia peʼe ko he tahi ʼi te kau polofeta.” ʼEi, neʼe manatu e te hahaʼi ko Sesu neʼe lagi ko he tahi ʼi te ʼu tagata ʼaia kua fakatuʼuake mai te kau mate. Neʼe fia iloʼi e Sesu te manatu ʼo tana kau tisipulo, koia neʼe ina fehuʼi fenei age: “Kaʼe kia koutou, ko ai ia au?” Neʼe foimo tali fenei age e Petelo: “Ko koe ko Kilisito, te ʼAlo ʼo te ʼAtua maʼuli.”—Mateo 16:13-16.

Neʼe ui age e Sesu kia Petelo neʼe feala ke fiafia koteʼuhi neʼe ko te ʼAtua ʼae neʼe ina fakaha age te faʼahi ʼaia ki ai. Pea neʼe hoko atu fenei e Sesu: “ ʼE au tala atu kia koe: Ko koe ko Petelo. Pea ʼi te fuga maka ʼaeni, ʼe au laga anai taku kokelekasio, pea ʼe mole malo anai te mate ia ia.” Ko tona fakaʼuhiga, ʼe laga anai e Sesu totonu he kokelekasio pea ʼe mole puke anai e te mate te hahaʼi ʼo te kokelekasio ʼaia mo kapau ʼe natou agatonu lolotoga tonatou maʼuli katoa ʼi te kele. Neʼe ina fakapapau fenei kia Petelo: “ ʼE au foaki atu anai te ʼu kalavi ʼo te Puleʼaga ʼo selo.”—Mateo 16:18, 19.

Neʼe mole fakamuʼamuʼa ai e Sesu ia Petelo ʼi te tahi ʼu apositolo, pea neʼe mole ina ui ai ko Petelo te fakatafito ʼae ka fakatuʼu ki ai te kokelekasio. Ko Sesu totonu te Maka ʼae ka laga ai tona kokelekasio. (1 Kolonito 3:11; Efeso 2:20) Kaʼe ʼe foaki anai kia Petelo he ʼu kalavi ʼe tolu. ʼE ina maʼu anai te pilivilesio ʼae ke ina avahi, peʼe ke ina foaki, ki he ʼu hahaʼi te fealagia ke natou hu ki te Puleʼaga ʼo selo.

ʼE fakaʼaogaʼi anai e Petelo te ʼuluaki kalavi ʼi te  Penikosite ʼo te taʼu 33 H.T.S., ʼi tana fakaha ki te kau Sutea mo te kau poloselite lotofakahemala te meʼa ʼae ʼe tonu ke natou fai ke haofaki ai natou. ʼE ina fakaʼaogaʼi anai te lua kalavi moʼo avahi ki te kau Samalitana ʼae neʼe tui, te fealagia ke natou hu ki te Puleʼaga ʼo te ʼAtua. Pea ʼi te taʼu 36 H.T.S., ʼe fakaʼaogaʼi anai e Petelo te tolu kalavi moʼo foaki te fealagia ʼaia ki te hahaʼi ʼae neʼe mole ko he kau Sutea pea neʼe mole silikosisio, ohage ko Kolonelio pea mo ʼihi atu.—Gaue 2:37, 38; 8:14-17; 10:44-48.

ʼI tanatou faipalalau ʼaia, neʼe punamaʼuli te kau apositolo ʼa Sesu ʼi tana tala age te ʼu mamahi ʼae ka vave tau anai mo ia ʼi Selusalemi pea mo tona mate. ʼI te mole mahino ʼa Petelo ʼe fakatuʼuake anai ia Sesu ki te maʼuli ʼi selo, neʼe ina toʼo ai ia Sesu pea ina kamata fakatonutonuʼi fenei: “ ʼAliki, tuku tau palalau feia, ʼe mole hoko anai kia koe te ʼu faʼahi ʼaia.” Kaʼe neʼe situʼa ia Sesu kia Petelo, ʼo ina ui fenei: “Fakalaka ʼi ʼoku tuʼa, Satana! Ko koe ko he maka fakatupu tukia kia au, koteʼuhi ʼe mole ke maʼu te ʼu manatu ʼa te ʼAtua, kaʼe ko te ʼu manatu ʼa te tagata.”—Mateo 16:22, 23.

Neʼe pauʼi leva e Sesu te tahi ʼu hahaʼi ke olo age. Pea neʼe ina fakamahino age kia natou pea mo te kau apositolo ʼe mole faigafua anai te liliu ko hana tisipulo. Neʼe ina ui fenei: “Kapau ʼe fia muli mai he tahi ia te au, ke fakafisi kia ia totonu pea ke ina toʼo tona pou fakamamahi pea mo haga muli mai ia te au. Koteʼuhi ko ʼae ʼe faiga ke ina haofaki tona maʼuli, ʼe mate anai ia. Kaʼe ko ʼae ʼe mate ʼuhi ko au peʼe ʼuhi ko te logo lelei, ʼe toe maʼuli anai.”—Maleko 8:34, 35.

Koia, ke tuha te ʼu tisipulo ʼa Sesu mo tona ʼofa, ʼe tonu ke natou lototoʼa pea mo maʼuli fakasakilifisio. Neʼe ui fenei e Sesu: “Ko ʼae ʼe ufiufi anai kia te au mo ʼaku folafola ʼi te taʼiake heʼe agatonu mo agahala ʼaeni, ʼe toe ufiufi anai mo te Foha ʼo te tagata ki ai, moka haʼu ʼi te kololia ʼo tana Tamai fakatahi mo te kau ʼaselo maʼoniʼoni.” (Maleko 8:38) ʼEi, ka haʼu anai ia Sesu, “ ʼe ina liufaki anai kia natou takitokotahi ʼo mulimuli ki tanatou aga.”—Mateo 16:27.