Hili ʼaho ʼe lua ki te nofo ʼa Sesu ʼi Samalia, neʼe alu leva ki te koga fenua ʼae neʼe lahilahi ake ai. Neʼe lahi tana faifakamafola ʼi Sutea, kaʼe neʼe mole toe liliu ia ki Kalilea ʼo malolo. Neʼe ina kamata ai he minisitelio ʼe lahi age. Pea neʼe mole ʼamanaki ia Sesu ʼe fakatalitali lelei anai ia ia, he neʼe ina ui fenei: “ ʼE mole fakaʼapaʼapaʼi ia he polofeta ʼi tona fenua totonu.” (Soane 4:44) Neʼe mole nonofo ʼana tisipulo mo ia, he ʼe kua natou toe liliu ki ʼonatou famili mo ʼanatou gaue.

Kotea ia te logo ʼae neʼe kamata fakamafola e Sesu? Neʼe ko te logo ʼaeni: “Kua ovi mai te Puleʼaga ʼo te ʼAtua. Kotou fakahemala pea mo kotou tui ki te logo lelei.” (Maleko 1:15) Pea neʼe tali feafeaʼi e te hahaʼi? Tokolahi te kau Kalilea neʼe natou tali leleiʼi ia Sesu pea mo fakaʼapaʼapaʼi ia ia. Kaʼe neʼe mole hoko te ʼu faʼahi ʼaia ʼuhi pe ko tana logo. Ko ʼihi ʼi te kau Kalilea neʼe natou kau ki te Pasikate ʼi he ʼu mahina ki muʼa atu ʼi Selusalemi, pea neʼe natou sisio ki te ʼu milakulo ʼae neʼe fakahoko e Sesu.—Soane 2:23.

Ko te kolo fea ʼo Kalilea ʼae neʼe kamata ai e Sesu ia tona minisitelio lahi? Neʼe lagi ina kamata ʼi Kana, ʼae neʼe ina fakaliliu ai ia te vai ko te vino, ʼi te kaitahi ʼo te faiʼohoana. Ko te tuʼa lua leva ʼae ʼo tana ʼi ai, pea neʼe logo ia Sesu ʼe ʼi ai he kiʼi tama ʼe kovi tona mahaki pea kua vave mate. Ko te foha ʼo he tagata ʼe gaue ki te puleʼaga ʼo Helote Atipasi, te hau ʼae neʼe ina fakatotonu ke tuʼusi ia te foʼi ʼulu ʼo Soane Patita ki muli age. Neʼe logo ia te tagata ʼaia neʼe haʼu ia Sesu mai Sutea ʼo alu ki Kana. Koia, neʼe mavae ai te tagata mai tona ʼapi ʼi Kapenaume ʼo alu ki Kana, ke ina maʼu ia Sesu. ʼI te lotomamahi ʼo te tagata ʼaia, neʼe ina kole fenei age: “ ʼAliki, ta olo naʼa mate taku tamasiʼi.”—Soane 4:49.

ʼE mahino ia, neʼe punamaʼuli te tagata ʼi te tali ʼaeni neʼe fai age e Sesu: “Alu la, kua malolo tou foha.” (Soane 4:50) Neʼe tui ia te tagata gaue ʼa Helote kia Sesu pea neʼe liliu ai ki tona ʼapi. ʼI te ala neʼe felaveʼi ai mo ʼana kaugana, neʼe natou ʼomai ʼo fakaha age ia te logo lelei. Kua malolo ia tou foha. Pea neʼe ina fakalavelave age kia natou pe neʼe ko te temi tonu fea ʼae neʼe lelei ai, he neʼe ina fia iloʼi papau pe neʼe hoko ʼuhi ko Sesu.

Neʼe natou tali fenei age: “Neʼe puli tona fiva ʼanafi, ʼi te vaʼevaʼe hola tahi hili hoʼata.”—Soane 4:52.

Neʼe mahino ai ki te tagata neʼe ko te hola pe ʼaia ʼae neʼe ui age ai e Sesu: “Kua malolo tou foha.” Hili ia, ko te tagata maʼu koloa ʼaia koteʼuhi neʼe ʼi ai ʼana kaugana, pea ko tona loto fale katoa neʼe natou liliu ko he ʼu tisipulo ʼa Kilisito.

Neʼe fakahoko e Sesu te ʼu milakulo ʼe lua ʼi Kana. Neʼe ina fakaliliu ia te vai ko te vino pea ki muli age neʼe ina fakamalolo ia he kiʼi tama kaʼe neʼe mole sio ki ai, he neʼe mamaʼo ia kilometa ʼe 26. Kaʼe neʼe mole ko te ʼu milakulo pe ʼaia neʼe fai e Sesu. Neʼe maʼuhiga ia te fakamalolo ʼaia, koteʼuhi neʼe ko te kamataʼaga ʼaia ʼo tona minisitelio lahi ʼi Kalilea. Neʼe ha lelei ai ʼe ko ia ko he polofeta ʼa te ʼAtua. Kaʼe ʼe fakaʼapaʼapaʼi anai koa ia te polofeta ʼaia ʼi tona fenua totonu?

ʼE ha anai te faʼahi ʼaia ʼi te toe liliu ʼa Sesu ki tona ʼapi ʼi Nasaleti. Kotea ʼae ka hoko ki ai?