Hili te palalau ʼa Sesu ʼo ʼuhiga mo te fakamolemole ʼi te ʼapi ʼo Simone, te Faliseo, neʼe ina kamata atu aipe tana tahi foli ia Kalilea ʼo faifakamafola ai. Ko te taʼu lua ʼaia ʼo tona minisitelio, pea neʼe mole fealuʼaki tokotahi. Neʼe fakatahi mo ia te kau apositolo ʼe toko 12 pea mo he ʼu fafine neʼe ina “fakamalolo mai ni mahaki mo ni laumalie kovi.” (Luka 8:2) Neʼe kau ai ia Malia Maketalena, mo Susana pea mo Soana, ʼae neʼe ʼohoana mo te tagata neʼe gaue maʼa te Hau ko Helote Atipasi.

ʼI te kaugā malie ʼo natou ʼae neʼe logo ki te ʼu meʼa ʼae neʼe fai e Sesu, neʼe toe lahi ai foki mo te fakafifihi ki tana gaue. Neʼe ha lelei te faʼahi ʼaia ʼi te temi ʼae neʼe ʼaumai ai kia Sesu te tagata neʼe ulu sino ai te temonio, neʼe kivi pea ʼalelo mate, pea neʼe fakamalolo ia ia e Sesu. Neʼe mole kei puleʼi e te temonio ia te tagata, pea neʼe toe sio pea mo toe palalau ai. Neʼe punamaʼuli ia te hahaʼi, ʼo natou ui fenei: “ ʼE mole koa la ko te Foha ʼaeni ʼo Tavite?”—Mateo 12:23.

Neʼe kaugā malie ʼaupito te hahaʼi ʼae neʼe ʼomai ki te ʼapi ʼae neʼe nofo ai ia Sesu, ʼo mole pe la feala kia ia mo ʼana tisipulo ke natou kakai. Kaʼe neʼe mole manatu ia te hahaʼi fuli ʼaia neʼe ko Sesu te ‘Foha ʼo Tavite’ ʼae neʼe fakapapauʼi mai. Neʼe ʼomai ʼihi kau sekelipa pea mo ʼihi kau Faliseo mai mamaʼo, mai Selusalemi kaʼe mole ʼuhi he neʼe natou loto ke akoʼi natou e Sesu peʼe natou fia lagolago kia te ia. Neʼe natou ui fenei ki te hahaʼi: “Kua ulu sino ia Pelesepu ʼi te tagata ʼaeni” pea ʼe gaue fakatahi mo “te pule ʼo te kau temonio.” (Maleko 3:22) ʼI te logo ʼa te famili ʼo Sesu ki te gatutu ʼaia, neʼe natou ʼomai ke natou ʼave ia ia. Kotea tona tupuʼaga?

ʼI te temi ʼaia, neʼe mole tui te ʼu tehina ʼo Sesu ko ia ʼe ko te ʼAlo ʼo te ʼAtua. (Soane 7:5) ʼE hage ia ko ia ʼae neʼe ina fakatupu ia te maveuveu ʼaia, neʼe mole kei hage ko ia ʼae neʼe natou iloʼi pea mo natou lahilahi fakatahi ake ʼi Nasaleti. Neʼe natou manatu ai kua lagi puli tona ʼatamai, he neʼe natou ui fenei: “Kua ʼulu vale ia.”—Maleko 3:21.

 Kaʼe kotea ʼae neʼe fakaha e Sesu ʼaki te meʼa ʼae neʼe ina fai? Neʼe ina fakamalolo te tagata neʼe ulu sino ai te temonio, pea kua feala leva ke sio pea mo palalau. Neʼe mole feala ki he tahi ke fakafisi ki te faʼahi ʼaia. Neʼe faiga te kau sekelipa mo te kau Faliseo ke lotolotolua te hahaʼi ʼo ʼuhiga mo Sesu, ʼo natou fai ai he tukugakovi loi ʼo ʼuhiga mo ia. Neʼe natou ui fenei: “ ʼE kapu e te tagata ʼaeni te kau temonio ʼaki ia Pelesepu, te pule ʼo te kau temonio.”—Mateo 12:24.

Neʼe iloʼi e Sesu te manatu ʼa te kau sekelipa mo te kau Faliseo, koia neʼe ina ui fenei: “ ʼE to anai he puleʼaga mo kapau ʼe fetauʼaki pe tana hahaʼi, pea ʼe mole tuʼu anai he kolo peʼe ko he loto fale mo kapau ʼe fetauʼaki pe tana hahaʼi. ʼO toe feia pe, kapau ʼe kapu e Satana ia Satana, ʼe fakafeagai pe ia kia ia totonu. ʼE lava tuʼu feafeaʼi anai tona puleʼaga?”—Mateo 12:25, 26.

Neʼe ko he ʼu palalau fakapotopoto. Neʼe iloʼi e te kau Faliseo ko ʼihi Sutea neʼe natou kapu te ʼu temonio. (Gaue 19:13) Koia neʼe fehuʼi fenei e Sesu: “Kapau ʼe au kapu te kau temonio ʼaki ia Pelesepu, ʼe kapu e ʼokotou foha te kau temonio ʼaki ia ai?” ʼI tona fakahagatonu, neʼe ui age e Sesu ko tanatou tukugakovi neʼe tonu pe ke natou fai kia natou totonu. Pea neʼe hoko atu e Sesu tana palalau, ʼo ina ui fenei: “Kaʼe kapau ʼe au kapu te kau temonio ʼaki te laumalie ʼo te ʼAtua, kua kaku moʼoni atu ia te Puleʼaga ʼo te ʼAtua.”—Mateo 12:27, 28.

Neʼe fakaha e Sesu ko tana kapu ia te ʼu temonio neʼe ko he fakamoʼoni ʼaia ʼo tona malohi age ia Satana, ʼo ina fai ai te lea fakatata ʼaeni: “ ʼE lava ulufi feafeaʼi e he tahi te ʼapi ʼo he tagata malohi ʼo kaihaʼa ʼona koloa? ʼE tonu muʼa ke ina haʼihaʼi ia te tagata malohi ʼaia pea ʼe hoki feala leva ke ina kaihaʼa tona ʼapi. Ko ʼae ʼe mole kau mo au, ʼe fakafeagai ia kia te au, pea ko ʼae ʼe mole ina fakatahiʼi mo au te hahaʼi, ʼe ina fakamavetevete.” (Mateo 12:29, 30) ʼE mahino papau ia neʼe fakafeagai te kau sekelipa mo te kau Faliseo kia Sesu, ʼo fakamoʼoni ai tanatou kau mo Satana. Neʼe natou fakamavetevete te hahaʼi ke natou mamaʼo ai mai te ʼAlo ʼo te ʼAtua, ʼae neʼe gaue ʼaki te tokoni ʼa Sehova.

Neʼe fai e Sesu te fakatokaga ʼaeni ki te kau fakafeagai ʼaia neʼe kau mo Satana: “Ko he faʼahiga agahala pe peʼe ko he faʼahiga laukovi pe ʼe fai e te ʼu foha ʼo te tagata, ʼe fakamolemole anai kia natou. Kaʼe ko ʼae ʼe laukovi ki te laumalie maʼoniʼoni, ʼe mole fakamolemole anai ki ai ʼo talu ai, he ʼe lakahala ia ʼo heʼe gata ʼuhi ko tana agahala.” (Maleko 3:28, 29) Fakakaukauʼi age muʼa te fakaʼuhiga ʼo te ʼu palalau ʼaia kia natou ʼae ʼe natou ui, ko te ʼu gaue ʼae neʼe fakahoko ʼaki te laumalie ʼo te ʼAtua ʼe ko he ʼu gaue ia ʼa Satana.