Hili he kiʼi temi ki te kau ʼa Sesu ki te Pasikate ʼo te taʼu 30 H.T.S., neʼe pilisoniʼi ia Soane Patita. Neʼe loto e Soane ke liliu ʼana tisipulo ko he ʼu tisipulo ʼa Sesu. Kaʼe ʼi te ʼu mahina ʼae neʼe hoa mai ki te pilisoniʼi ʼo Soane, neʼe mole ko natou fuli ʼae neʼe natou mulimuli ki te faʼahi ʼaia.

Pea ʼi te fakaovi ki te Pasikate ʼo te taʼu 31 H.T.S., neʼe ʼomai ʼihi ʼo te ʼu tisipulo ʼa Soane kia Sesu, ʼo natou fehuʼi fenei age: “Ko matou mo te kau Faliseo ʼe matou sesunio tuʼumaʼu, kaʼe he koʼe ʼe mole sesunio ʼau tisipulo?” (Mateo 9:14) Neʼe fai e te kau Faliseo ia te sesunio ohage ko he toʼotoʼoga fakalotu. Ki muli age, neʼe fakaʼaogaʼi e Sesu ia he lea fakatata ʼo ʼuhiga mo he Faliseo fialahi neʼe faikole fenei: “E ʼAtua, ʼe au fakamalō atu ʼi taku mole hage ko te hahaʼi ʼae . . . Kaʼe ʼe au sesunio tuʼa lua ʼi te vahaʼa.” (Luka 18:11, 12) Pea lagi neʼe toe fai e te ʼu tisipulo ʼa Soane ia te sesunio ohage ko he talatisio. Peʼe lagi neʼe natou sesunio ʼuhi ko tonatou lotomamahi ʼi te pilisoniʼi ʼo Soane. Pea neʼe natou feʼekeʼaki pe koʼe ʼe mole sesunio ia te ʼu tisipulo ʼa Sesu, moʼo fakaha ʼe natou lotomamahi ʼuhi ko te faʼahi ʼae neʼe hoko kia Soane.

Neʼe tali age e Sesu kia natou ʼo ina fakaʼaogaʼi ia he lea fakatata: “ ʼI te kei nofo ʼa te tagata ʼohoana mo ʼona kaumeʼa, ʼe mole he tupuʼaga ʼo hanatou lotomamahi ai. Kaʼe ʼe hoko mai anai te temi ʼae ka toʼo ai te tagata ʼohoana mai ia natou, pea ʼe hoki natou sesunio ai anai.”—Mateo 9:15.

Pea neʼe toe palalau ia Soane ʼo ʼuhiga mo Sesu ohage ko he tagata ʼohoana. (Soane 3:28, 29) Koia, ʼi te temi ʼae ʼe nofo ai Sesu mo ʼana tisipulo, ʼe mole natou sesunio. Ki muli age, moka hoki mate anai ia ʼe lotomamahi anai ʼana tisipulo pea ʼe mole natou toe fia kakai anai. Kaʼe, ka fakatuʼuake anai ia ia, ʼe mole kei ʼi ai he tupuʼaga ʼo hanatou lotomamahi pea mo sesunio. ʼE ko he meʼa fakafiafia ʼaupito anai.

Hili ʼaia, neʼe fai e Sesu ia te ʼu lea fakatata ʼaeni ʼe lua: “ ʼE mole tui he moʼi kie foʼou ki he kofu ʼafeā, koteʼuhi ʼe haeʼi anai e te moʼi kie foʼou ia te kofu pea ʼe kovi age anai tona mahae. Pea ʼe mole ʼai e te hahaʼi ia te vino foʼou ki he ʼu ʼaiʼaga vino ʼafeā. He ʼe kapau ʼe natou fai feia, ʼe mahae anai ia te ʼu ʼaiʼaga vino, ʼo hali ai te vino pea maumau te ʼu ʼaiʼaga vino. Kaʼe ʼe ʼai e te hahaʼi ia te vino foʼou ki he ʼu ʼaiʼaga vino foʼou.” (Mateo 9:16, 17) Kotea ʼae neʼe fia fakaha e Sesu?

Neʼe tokoni ia Sesu ki te ʼu tisipulo ʼa Soane Patita ke natou mahino neʼe mole tonu ke natou mulimuli ki te ʼu talatisio ʼafeā ʼo te Lotu Sutea, ohage la ko te faʼahiga fakahoko ʼo te sesunio. Neʼe mole haʼu ia ke ina fakafoʼou ia he faʼahiga tauhi kua ʼafeā pea kua ʼamanaki ke liakī. Ko te tauhi ʼae neʼe fakalotomalohiʼi e Sesu ke fai e ʼana tisipulo, neʼe mole mulimuli ki ai te Lotu Sutea ʼo te temi ʼaia mo ʼana talatisio fakatagata. Koia, ko te tupuʼaga ʼaia ʼo te lea fakatata ʼae ʼe mole tui he moʼi kie foʼou ki he kofu ʼafeā pea mo ʼai ia he vino foʼou ki he ʼaiʼaga vino ʼafeā.