Kua hili ki ai ni taʼu talu mai te ʼosi papitema ʼo Sesu, pea kua liliu ʼo iloa. Ko te toko lauʼi afe kau Sutea neʼe natou sisio ki ʼana milakulo, pea neʼe mafola ʼi te fenua katoa te ʼu fakamatala ʼo ʼuhiga mo ʼana gaue. Neʼe hoko leva te ʼAho Lahi ʼo Te ʼu Tapenakulo (peʼe Te ʼu Pola) ʼi Selusalemi, pea tokolahi neʼe natou kumi ia ia.

Neʼe kehekehe te ʼu manatu ʼa te hahaʼi ʼo ʼuhiga mo Sesu. Neʼe ui fenei e ʼihi: “ ʼE ko he tagata lelei.” Kaʼe neʼe ui fenei e ʼihi age: “Kailoa ia. ʼE ina fakaheʼi te hahaʼi.” (Soane 7:12) Neʼe tuʼa lahi te fefanafanaʼaki feia ʼa te hahaʼi lolotoga te ʼu ʼuluaki ʼaho ʼo te lafeti fakafiafia ʼaia. Kaʼe neʼe mole he tahi neʼe lotomalohi ke ina fakaha ia muʼa ʼo te hahaʼi ʼe kau mo Sesu, he neʼe matataku te hahaʼi naʼa iita te kau takitaki Sutea.

ʼI te kua ʼaho fa ʼo te fai ʼo te ʼaho lahi, neʼe alu ia Sesu ki te fale lotu. Tokolahi te hahaʼi neʼe natou punamaʼuli ʼi te lelei ʼo tana faiakonaki. Neʼe mole kau ki te ʼu faleako ʼo te kau lapi, koia neʼe feʼekeʼaki fenei e te kau Sutea: “ ʼE iloʼi feafeaʼi e te tagata ʼaeni te ʼu Tohi Taputapu kaʼe neʼe mole kau ki he ʼu ako fakalotu?”—Soane 7:15.

Neʼe fakamahino fenei e Sesu: “Ko te ʼu meʼa ʼae ʼe au akoʼi ki te hahaʼi ʼe mole ʼaʼaku ia, kaʼe ʼe ʼa ia ʼae neʼe ina fekauʼi mai au. Kapau ʼe fia fai e he tahi te finegalo ʼo te ʼAtua, ʼe ina iloʼi anai pe ʼe haʼu mai te ʼAtua te ʼu meʼa ʼae ʼe au akoʼi ki te hahaʼi, peʼe au fakaha pe au ʼaku manatu.” (Soane 7:16, 17) Neʼe alu tahi te faiakonaki ʼa Sesu pea mo te Lao ʼa te ʼAtua, koia neʼe ha lelei ai neʼe loto ke fakakololiaʼi ia te ʼAtua kaʼe mole ko ia totonu.

Pea neʼe ui fenei e Sesu: “Neʼe mole foaki atu koa la e Moisese ia te Lao? Kaʼe ʼe mole he tahi ia koutou ʼe fakalogo ki te Lao. He koʼe ʼe kotou faiga ke kotou matehi au?” Neʼe mole iloʼi e ʼihi te ʼu faiga ʼaia ke matehi ia Sesu he neʼe lagi natou ʼomai mai te tahi ʼu kolo. Neʼe lagi faigataʼa kia natou hanatou tui ʼe fia matehi e he tahi he tagata faiako feia. Koia neʼe natou manatu ai neʼe palalau noa pe ia Sesu. Neʼe natou ui fenei: “ ʼE nofo ia koe he temonio. Ko ai ʼae ʼe faiga ke ina matehi koe?”—Soane 7:19, 20.

ʼI tona ʼuhiga moʼoni, ʼi te taʼu katoa vaelua ki muʼa atu, neʼe fia matehi e te kau takitaki Sutea ia Sesu he neʼe ina fakamalolo he tagata ʼi te ʼaho ʼo te Sapato. ʼI te lakaga leva ʼaeni, neʼe fakaʼaogaʼi e Sesu he ʼu manatu neʼe feala ke natou fakakaukau ki ai pea neʼe ha ai mo tanatou mole fakapotopoto. Neʼe ina fakamanatuʼi age, ʼi te Lao, neʼe tonu ke silikosisioʼi he kiʼi toe tagata kei meamea ʼi tona valu ʼaho, tatau aipe pe neʼe ko te ʼaho ʼo te Sapato. Pea neʼe ina fehuʼi fenei: “Kapau ʼe silikosisioʼi he tagata ʼi te sapato ke mole maumauʼi ai te Lao ʼa Moisese, ʼe kotou iita kovi koa kia au he neʼe au fakamalolo katoa he tagata ʼi te sapato? Tuku takotou fakamauʼi ʼo mulimuli ki te meʼa ʼae ʼe ha, kaʼe kotou fakamauʼi ʼaki he fakamau ʼe faitotonu.”—Soane 7:23, 24.

Ko te hahaʼi ʼo Selusalemi ʼae neʼe natou iloʼi te meʼa ʼae neʼe hoko, neʼe natou ui fenei: “ ʼE mole ko te tagata koa la ʼaeni ʼae ʼe natou faigaʼi [te kau pule] ke natou matehi? Pea koʼeni ʼe palalau ia muʼa ʼo te hahaʼi kaʼe ʼe mole natou leaʼi ia ia. Pe kua mahino koa ia te kau pule ʼe ko ia ia Kilisito?” Kaʼe he koʼe koa neʼe mole tui ia te hahaʼi ko Sesu ʼe ko Kilisito? Neʼe natou ui fenei: “ ʼE tou iloʼi pe ʼe haʼu maifea te tagata ʼaia, kaʼe ka haʼu ia Kilisito ʼe mole iloʼi anai e he tahi pe ʼe haʼu maifea.”—Soane 7:25-27.

ʼI te fale lotu, neʼe tali fenei e Sesu: “ ʼE kotou iloʼi ia au pea ʼe kotou iloʼi pe ʼe au haʼu maifea. Pea neʼe mole au haʼu ʼi toku loto faʼitaliha, kaʼe ko Ia ʼae neʼe ina fekauʼi mai au ʼe moʼoni, pea ʼe mole kotou iloʼi ia ia. ʼE au iloʼi ia ia, koteʼuhi ʼe au fakafofoga ia ia, pea ʼe ko Ia ʼae neʼe ina fekauʼi mai au.” (Soane 7:28, 29) ʼI tanatou logo ki te ʼu palalau ʼaia ʼa Sesu, neʼe faiga ʼihi ke natou puke ia ia, ke pilisoniʼi pe ʼe ke matehi. Kaʼe neʼe mole hona fua, koteʼuhi neʼe heʼeki hoko mai te temi ʼae ke mate ai Sesu.

Kaʼe tokolahi neʼe natou tui kia Sesu, he neʼe lahi te ʼu gaue fakaofoofo neʼe ina fai. Neʼe haʼele ʼi te fuga tai, neʼe ina fakagona te matagi, mo fafaga fakamilakulo  te toko lauʼi afe hahaʼi ʼaki ni foʼi pane pea mo ni kiʼi ika. Neʼe ina fakamalolo te kau mahahaki, mo te kau ketu, mo te kau kivi, mo te kau kilia, pea neʼe ina fakatuʼuake mo te kau mate. Koia, neʼe tonu tanatou fai ia te fehuʼi ʼaeni: “Ka haʼu ia Kilisito, ʼe ina fai anai koa he ʼu milakulo ʼo lahi age ʼi te ʼu milakulo ʼae neʼe fai e te tagata ʼaeni?”—Soane 7:31.

ʼI te logo ʼa te kau Faliseo ki te ʼu palalau ʼaia neʼe fai e te hahaʼi, neʼe fekauʼi e te kau pelepitelo pule mo te kau Faliseo te ʼu tagata leʼo ke natou puke ia Sesu.