ʼI tana kei ʼi Sutea, neʼe tali e Sesu te fakaafe ʼa he Faliseo ke nā kakai. Neʼe lagi ko he kai ʼi te hoʼata, kaʼe neʼe mole ko he kai ʼi te afiafi. (Luka 11:37, 38) ʼO mulimuli ki tanatou talatisio, ʼi muʼa ʼo tanatou kakai, neʼe fanofano te kau Faliseo ʼo aʼu ki ʼonatou tuli nima. Kaʼe neʼe mole fai e Sesu te faʼahi ʼaia. (Mateo 15:1, 2) Ko he tahi neʼe fanofano ʼo aʼu ki ʼona tuli nima, neʼe mole ina maumauʼi te Lao ʼa te ʼAtua, kaʼe neʼe ko he meʼa neʼe mole fakamaʼua e te ʼAtua ke fai.

Neʼe punamaʼuli te Faliseo ʼi te mole mulimuli ʼa Sesu ki te talatisio ʼaia. Neʼe iloʼi e Sesu pea neʼe ina ui fenei: “Ko koutou kau Faliseo, ʼe kotou fakamaʼa te tuʼa ipu pea mo te tuʼa pa, kaʼe ʼe fonu ia loto ko te manumanū pea mo te agakovi. Hahaʼi vavale! ʼE mole kotou iloʼi koa la, ko ia ʼae neʼe ina gaohi ia tuʼa neʼe ina toe gaohi foki mo loto?”—Luka 11:39, 40.

Koia neʼe mole fia talanoa ia Sesu ki te maʼuhiga ʼae ke fanofano he tahi ʼi muʼa ʼo tana kai, kaʼe neʼe ina valoki te malualoi ʼa te kau takitaki lotu. Ko te kau Faliseo pea mo ʼihi atu, ʼae neʼe natou fanofano ʼo mulimuli ki te talatisio, neʼe mole natou fakamaʼa ʼonatou loto, ʼo natou toʼo te agakovi mai ai. Koia neʼe fai ai e Sesu te tokoni ʼaeni kia natou: “Kotou foaki ia te ʼu meʼa ʼae ʼi loto ko he ʼu meʼa ʼofa, pea ʼe maʼa anai ia meʼa fuli ia koutou.” (Luka 11:41) ʼE moʼoni, ʼe tonu ke foaki e he tahi he meʼa ʼuhi ko tona ʼofa, kaʼe mole ko hana fia fakaha ki te hahaʼi ʼe faitotonu.

Neʼe mole fia ui e Sesu neʼe mole foaki e te ʼu tagata ʼaia he ʼu meʼa ʼofa. Kailoa ia, he neʼe ina fakaha fenei: “ ʼE kotou foaki te vahe hogofulu ʼo te menite, mo te pekanone pea mo te tahi ʼu kiʼi ʼakau ʼo te ʼoloto kaʼe ʼe kotou meʼa noaʼi te ʼofa ki te ʼAtua pea mo tana faitotonu! ʼE moʼoni, neʼe maʼua ke foaki te vahe hogofulu ʼo te ʼu meʼa ʼaia, kaʼe neʼe mole tonu ia ke meʼa noaʼi te ʼofa ki te ʼAtua pea mo tana faitotonu.” (Luka 11:42) Neʼe fakamaʼua ʼi te Lao ʼa te ʼAtua ke foaki te vahe hogofulu ʼo te ʼu fua ʼo te gaueʼaga. (Tetelonome 14:22) Neʼe kau ki ai te menite, mo te pekanone pea mo te ʼu kiʼi ʼakau ʼae neʼe fakaʼaogaʼi moʼo fakamagoni ʼaki te meʼa kai. Neʼe tokaga fakalelei te kau Faliseo ke natou foaki te vahe hogofulu ʼo te ʼu kiʼi ʼakau ʼaia. Kaʼe neʼe natou mulimuli koa ki te ʼu meʼa ʼae neʼe maʼuhiga age ʼi te Lao, ohage la ko te fai ʼo te meʼa ʼae ʼe faitotonu pea mo agavaivai ia muʼa ʼo te ʼAtua?—Mikea 6:8.

Neʼe hoko atu fenei e Sesu: “Malaʼia kia koutou, kau Faliseo, koteʼuhi ʼe kotou leleiʼia te ʼu ʼuluaki hekaʼaga ʼi te ʼu sinakoka pea mo te ʼu fakamalo ʼi te ʼu fakatauʼaga koloa! Malaʼia kia koutou, koteʼuhi ʼe kotou hage ko he ʼu fale maka ʼe mole tokagaʼi, pea ʼe haʼeleʼi e te tagata kaʼe ʼe mole iloʼi!” (Luka 11:43, 44) ʼEi, neʼe feala ke tukia te hahaʼi ʼi te ʼu fale maka ʼaia pea natou liliu ai ʼo heʼe maʼa. Neʼe toʼo e Sesu te faʼifaʼitaki ʼaia moʼo fakaha fakalelei, ko te aga heʼe maʼa ʼa te kau Faliseo neʼe mole ha ki tuʼa.—Mateo 23:27.

Neʼe ʼi ai te tagata neʼe poto ʼi te Lao ʼa te ʼAtua pea neʼe meo fenei: “ ʼAliki, ʼi tau palalau feia, ʼe ke fakagalivaleʼi foki mo matou.” Kaʼe neʼe tonu ke mahino te ʼu tagata ʼaia neʼe mole natou tokoni ki te hahaʼi. Neʼe ui fenei e Sesu: “Malaʼia mo koutou ʼae ʼe popoto ʼi te Lao, koteʼuhi ʼe kotou haʼi he ʼu kavega mamafa ki te hahaʼi ke natou fua, kaʼe ko koutou totonu ʼe mole kotou fāfā pe la ki ai ʼaki hokotou kauʼi tuhi! Malaʼia kia koutou, koteʼuhi ʼe kotou laga te ʼu fale maka maʼa te kau polofeta, kaʼe neʼe matehi natou e ʼakotou kui!”—Luka 11:45-47.

Ko te ʼu kavega mamafa ʼae neʼe talanoa ki ai ia Sesu neʼe ko te ʼu talatisio ʼae neʼe feʼavegutuʼaki pea mo te fakamahino ʼa te kau Faliseo ia te Lao. Neʼe kinakina age te maʼuli ʼo te hahaʼi ʼuhi ko te ʼu tagata ʼaia. Neʼe natou fakakinauʼi te hahaʼi ke natou haga mulimuli ki te ʼu talatisio. Neʼe matehi e ʼanatou kui te kau polofeta ʼa te ʼAtua, ʼo kamata mai ia Apele. Pea neʼe faʼifaʼitakiʼi e te ʼu tagata ʼaia ʼanatou kui, logo la tanatou fia fakaha ʼe natou fakaʼapaʼapa ki te kau polofeta ʼaki tanatou laga he ʼu fale maka maʼa natou. Neʼe natou kumi ke natou matehi te Polofeta ʼa te ʼAtua ʼae ʼe maʼuhiga ʼaupito. Neʼe ui e Sesu ʼe fakamauʼi anai e te ʼAtua te taʼiake ʼaia. Pea neʼe hoko te fakamau ʼaia hili taʼu ʼe 38 ki muli age, ʼi te taʼu 70 H.T.S.

 Neʼe hoko atu fenei e Sesu: “Malaʼia kia koutou ʼae ʼe popoto ʼi te Lao, koteʼuhi neʼe kotou toʼo te kalavi ʼae ʼe ina avahi te matapa ki te ʼatamai malama. Neʼe mole kotou hu ki ai, pea ʼe mole kotou fakagafua ke hu ia natou ʼae ʼe fia hu ki ai!” (Luka 11:52) Ko te ʼu tagata ʼaia, ʼae neʼe tonu ke natou akoʼi te fakaʼuhiga ʼo te Folafola ʼa te ʼAtua, neʼe natou taʼofi te hahaʼi ke natou iloʼi pea mo mahino ki ai.

Kotea ʼae neʼe fai e te kau Faliseo pea mo te kau sekelipa? ʼI te mavae ʼa Sesu, neʼe natou iita mo fakaʼefihi age ki ai, pea neʼe natou fai age ni tuʼuga fehuʼi. Neʼe mole natou fai te ʼu fehuʼi ke ina akoʼi age kia natou he tahi ʼu meʼa. Kaʼe neʼe natou fia maʼu he hala ʼi te ʼu palalau ʼa Sesu ke feala ai hanatou puke ia ia.