ʼI he ʼu temi kehekehe ʼo te minisitelio ʼo Sesu, neʼe ina fakaha lelei ia te maʼuhiga ʼo te fia malalo. (Luka 14:8-11) Neʼe faiga ke ina maʼu he ʼu tagata mo he ʼu fafine ʼe natou fia tauhi ki te ʼAtua ʼaki te fia malalo. Kaʼe ʼo kaku mai ki te temi ʼaia, neʼe lagi iloʼi e te hahaʼi ko ʼihi ia natou neʼe mole lelei ʼonatou maʼuli.

Neʼe tokagaʼi e te kau Faliseo pea mo te kau sekelipa, ko te ʼu hahaʼi ʼae neʼe natou meʼa noaʼi, neʼe natou fia iloʼi ia Sesu pea mo fia fagono ki tana logo. Neʼe natou muhumuhu fenei: “ ʼE fakatalitali lelei e te tagata ʼaeni ia te kau agahala pea mo kakai mo natou.” (Luka 15:2) Neʼe manatu te kau Faliseo mo te kau sekelipa ʼe natou maʼoluga age natou pea neʼe natou gaohi te hahaʼi ohage ko he ʼu ʼotaʼota. Moʼo fakaha ia tanatou fehihiʼa ia natou, neʼe fakahigoaʼi natou e te kau takitaki ko he kau ‘am haʼarèts, neʼe ko he kupu Fakahepeleo, ko tona fakaʼuhiga “hahaʼi ʼo te fenua [peʼe ʼo te kele].”

Kaʼe neʼe kehe ia te aga ʼa Sesu, he neʼe fakaʼapaʼapa, mo agalelei pea mo manavaʼofa ki te hahaʼi fuli. Koia, tokolahi te hahaʼi malalo neʼe natou fia fagono kia Sesu, ʼo kau ai mo natou ʼae neʼe iloʼi neʼe natou fai ia he ʼu agahala. Kaʼe kotea ʼae neʼe logoʼi e Sesu ʼuhi ko te ʼu valoki ʼae neʼe fai age ʼi tana tokoni ki te hahaʼi malalo ʼaia? Pea kotea te meʼa ʼae neʼe ina fai?

ʼE tou maʼu tona tali ʼi tana fai ia he lea fakatata neʼe malave loto pea neʼe tatau mo ʼae neʼe ina fai ʼi muʼa atu ʼi Kapenaume. (Mateo 18:12-14) ʼI te ʼu lea fakatata ʼaia ʼe lua, neʼe hage te kau Faliseo ko ni hahaʼi faitotonu. Neʼe fakatatau natou e Sesu ki ni ovi ʼe puipui lelei ʼi te faga ovi ʼa te ʼAtua. Kaʼe, ko te hahaʼi malalo neʼe fakatatau natou ki he ovi neʼe hehe mo puli. Neʼe ui fenei e Sesu:

“Kotou fakakaukauʼi age muʼa he tagata ʼe ina maʼu ni ovi ʼe 100. Pea ka puli he tahi ia natou, ʼe mole ina tuku anai koa ʼana ovi ʼe 99 ʼi te toafa kaʼe alu ʼo kumi ia ia ʼae neʼe puli ʼo kaku ki tana maʼu? Pea ka ina maʼu, ʼe ina hili ki ʼona fuga ʼuma pea mo fakafiafia. Pea ka tau mai ki tona loto fale, ʼe ina pauʼi anai ʼona kaumeʼa mo ʼona vahaʼa fale, ʼo ina ui fenei age kia natou: ‘Tou fakafiafia, he ʼe kua au maʼu taku ovi ʼae neʼe puli.’ ”—Luka 15:4-6.

Neʼe fakamahino feafeaʼi e Sesu ia te lea fakatata ʼaia? Neʼe ina ui fenei: “ ʼE au tala atu kia koutou, ʼe toe feia pe anai ʼo ʼuhiga mo he tagata agahala ʼe tahi ʼe fakahemala. ʼE fiafia lahi age anai ʼi selo ʼo ʼuhiga mo ia ʼi he toko 99 kau faitotonu ʼe mole ʼaoga kia natou ke natou fakahemala.”—Luka 15:7.

ʼE mahino ia, neʼe punamaʼuli te kau Faliseo ki te palalau ʼa Sesu ʼo ʼuhiga mo te fakahemala. Neʼe natou manatu ʼe natou faitotonu pea neʼe mole ʼaoga te fakahemala kia natou. ʼI he ʼu taʼu ki muʼa atu, ko ʼihi ia natou neʼe natou valoki ia Sesu, ʼuhi ko tana kakai fakatahi mo te kau tanaki tukuhau pea mo te kau agahala. Pea neʼe ina ui fenei age: “Neʼe  mole au haʼu ʼo pauʼi te kau faitotonu, kaʼe ko te kau agahala.” (Maleko 2:15-17) Maʼa te kau Faliseo neʼe mole he ʼaoga ke natou fakahemala, koia neʼe mole ʼi ai he fiafia ʼi selo ʼo ʼuhiga mo natou. Kaʼe neʼe kehe ia mo kapau neʼe fakahemala moʼoni ia he tagata neʼe agahala.

Neʼe fia tataʼo e Sesu tana manatu ʼo ʼuhiga mo te fiafia lahi ʼae ʼe maʼu ʼi selo moka toe liliu mai kia Sehova he tahi neʼe agahala. Koia neʼe ina fai ai he tahi lea fakatata ʼo ʼuhiga mo he aluʼaga neʼe hoko ʼi he loto fale. Neʼe ina ui fenei: “ ʼE toe feia pe mo he fafine mo ʼana foʼi piesi talame ʼe hogofulu. Pea kapau ʼe puli he foʼi piesi ʼe tahi ʼi te ʼu foʼi piesi ʼaia, ʼe mole ina tutu anai koa he malama, mo hiko tona fale pea mo kumi fakalelei ʼo kaku ki tana maʼu? Pea ka ina maʼu, ʼe ina pauʼi fakatahi anai ʼona kaumeʼa mo ʼona vahaʼa fale, ʼo ina ui fenei age: ‘Tou fakafiafia, he ʼe kua au maʼu te foʼi piesi talame ʼae neʼe puli.’ ”—Luka 15:8, 9.

Ko te fakamahino ʼae ka fai e Sesu neʼe tatau mo ʼae neʼe ina fai hili tana fai ia te lea fakatata ʼo te ovi ʼae neʼe puli. Neʼe ina ui fenei: “ ʼO toe feia pe, ʼe au tala atu kia koutou, ʼe fiafia te kau ʼaselo ʼa te ʼAtua ʼi he tagata agahala ʼe tahi ʼe fakahemala.”—Luka 15:10.

Ke ke fakakaukauʼi age muʼa ia te fiafia ʼaupito ʼa te kau ʼaselo ʼa te ʼAtua moka toe liliu mai he tahi neʼe agahala. Pea ʼe maʼuhiga, koteʼuhi ko te kau agahala ʼae neʼe fakahemala ʼe natou maʼu anai honatou nofoʼaga ʼi te Puleʼaga ʼo te ʼAtua ʼi selo pea ʼe natou maʼoluga age anai ʼi te kau ʼaselo. (1 Kolonito 6:2, 3) Logo la te faʼahi ʼaia, kaʼe ʼe mole maheheka te kau ʼaselo. Koia, kotea te meʼa ʼae ʼe tonu ke tou logoʼi mo kapau ʼe fakahemala moʼoni he tahi pea mo toe liliu mai ki te ʼAtua?