Neʼe lagi kei nofo pe ia Sesu ʼi Samalia peʼe ʼi Kalilea. Neʼe fakafehuʼi ia ia e te kau Faliseo ʼo ʼuhiga mo te haʼu ʼo te Puleʼaga, he neʼe natou manatu ʼe haʼu fakaʼaliʼaliki. Kaʼe neʼe tali fenei age e Sesu: “Ko te Puleʼaga ʼo te ʼAtua ʼe mole haʼu fakahaha ia. Pea ʼe mole ui fenei anai e te hahaʼi: ‘ ʼE ʼi heni!’ peʼe ‘ ʼE ʼi he!’ Koteʼuhi ko te Puleʼaga ʼo te ʼAtua ʼe ʼi te lotolotoiga ʼo koutou.”—Luka 17:20, 21.

Neʼe lagi mahino ʼihi neʼe ui e Sesu ko te Puleʼaga ʼe ʼafio ʼi te ʼu loto ʼo te ʼu kaugana ʼa te ʼAtua. Kaʼe ʼe mole koia, koteʼuhi neʼe mole feala ke nofo te Puleʼaga ʼi te ʼu loto ʼo te kau Faliseo ʼae neʼe palalau ki ai Sesu. Kaʼe ko te Puleʼaga neʼe ʼi te lotolotoiga ʼo natou, he ʼe ko Sesu, te Hau ʼo te Puleʼaga ʼo te ʼAtua, neʼe kua nofo tonu mo natou.—Mateo 21:5.

ʼI te lagi ʼosi mavae ʼa te kau Faliseo, neʼe fakaha e Sesu ki ʼana tisipulo he tahi age ʼu manatu ʼo ʼuhiga mo te haʼu ʼo te Puleʼaga. Neʼe ina fai te ʼuluaki fakatokaga ʼaeni ʼo ʼuhiga mo tana ʼi heni ʼi tona ʼuhiga Hau: “ ʼE hoko mai anai he ʼu ʼaho ʼe kotou fakaʼamu anai ki te temi ʼae ka nofo ai te Foha ʼo te tagata mo koutou, kaʼe ʼe mole kotou sisio anai ki ai.” (Luka 17:22) Neʼe fakaha ai e Sesu ʼe ʼafio anai te Foha ʼo te tagata ʼi te Puleʼaga ʼi he temi ki ʼamuli. ʼI muʼa ʼo te hoko mai ʼo te temi ʼaia, neʼe lagi fakaʼamu e ʼihi tisipulo ke natou sisio ki tana ʼafio, kaʼe neʼe tonu ke natou haga fakatalitali ʼo kaku ki te temi ʼae kua fakatuʼutuʼu e te ʼAtua ke haʼu ai te Foha ʼo te tagata.

Neʼe hoko atu fenei e Sesu: “ ʼE ui fenei anai e te hahaʼi kia koutou: ‘ ʼE ʼi he!’ peʼe ‘ ʼE ʼi heni!’ ʼAua naʼa kotou olo peʼe kotou tuli ia natou. Koteʼuhi ʼe hage ko te tapa ʼo te hila ʼae ʼe ha mai te tahi potu lagi ki te tahi potu lagi, pea ʼe toe feia anai te Foha ʼo te tagata ʼi tona ʼaho.” (Luka 17:23, 24) He koʼe ʼe mole faihala anai te ʼu tisipulo ʼa Sesu ʼo natou tuli, peʼe natou muliʼi, he kau mesia loi? Neʼe ui e Sesu ko te haʼu ʼa te Mesia moʼoni ʼe hage anai ko he tapa ʼo he hila ʼe feala ke sio ki ai mai mamaʼo. ʼE ha lelei anai ki te hahaʼi fuli ʼae ʼe nonofo tokaga ia te ʼu fakamoʼoni ʼo te ʼi heni ʼa Sesu ʼi tona ʼuhiga Hau.

Neʼe fai leva e Sesu he ʼu fakatatau mo te ʼu aluʼaga neʼe hoko ʼi te temi muʼa, moʼo fakaha te ʼu aga ʼa te hahaʼi ʼi tana ʼi heni. Neʼe ina ui fenei: “Ohage ko te ʼu aluʼaga ʼae neʼe hoko ʼi te temi ʼo Noe, ʼe toe tatau pe anai mo te ʼu ʼaho ʼo te Foha ʼo te tagata . . . Neʼe toe hage pe ko te temi ʼo Lote: Neʼe natou kakai pea mo iinu, neʼe natou totogi ni meʼa, neʼe natou fakatau, neʼe natou to magisi pea mo natou laga fale. Kaʼe ʼi te ʼaho ʼae neʼe mavae ai ia Lote mai Sotoma, neʼe to ifo mai te lagi te ʼua afi mo te sulifa, ʼo fakaʼauha ia natou fuli. Pea ʼe toe feia pe anai ʼi te ʼaho ʼae ka ha ai te Foha ʼo te tagata.”—Luka 17:26-30.

Neʼe mole ui e Sesu neʼe tupu te fakaʼauha ʼo te hahaʼi ʼi te temi ʼo Noe pea mo te temi ʼo Lote he neʼe natou fai te ʼu meʼa mahani, ohage ko te kai, te inu, te totogi, te fakatau ʼo ni meʼa, te to magisi pea mo te laga fale. Ko Noe mo Lote pea mo ʼonā famili neʼe natou fai mo natou ʼihi ʼi te ʼu meʼa ʼaia. Ko te meʼa ʼae neʼe kehe ai, he neʼe fai e te hahaʼi te ʼu meʼa ʼaia kaʼe neʼe mole natou tokagaʼi te finegalo ʼo te ʼAtua  pea mo te temi ʼae neʼe natou maʼuʼuli ai. Koia neʼe fakalotomalohiʼi e Sesu ʼana tisipulo ke natou tokagaʼi te finegalo ʼo te ʼAtua pea ke natou lagolago malohi ki tona fakahoko. Neʼe ina fakaha ai kia natou te meʼa ʼae neʼe tonu ke natou fai ke puipui ai natou, peʼe ke haofaki natou ʼi te temi ʼae ka fakahoko ai e te ʼAtua te fakaʼauha.

ʼE tonu ke tokakaga te ʼu tisipulo naʼa fakaleluʼi natou e te ʼu meʼa ʼo te malama, “te ʼu meʼa ʼae ʼi muli.” Neʼe ui fenei e Sesu: “ ʼI te ʼaho ʼaia ko ia ʼae ʼe ʼi te fuga ʼato ke ʼaua naʼa hifo ifo ʼo toʼo ʼona koloa ʼi fale, ʼo feia mo ia ʼae ʼe ʼi te gaueʼaga ke ʼaua naʼa toe liliu ki te ʼu meʼa ʼae ʼi muli. Kotou manatuʼi te ʼohoana ʼo Lote.” (Luka 17:31, 32) Neʼe liliu ko he maka masima.

Neʼe hoko atu e Sesu tana fakamatala te ʼu meʼa ka hoko anai ʼi te temi ʼae ka ʼafio ai anai te Foha ʼo te tagata. Neʼe ina ui fenei ki ʼana tisipulo: “ ʼI te po ʼaia ʼe takoto anai he toko lua ʼi te palepale ʼe tahi, pea ʼe toʼo anai te tahi kaʼe tuku te tahi.” (Luka 17:34) Koia, ʼe haofaki anai ʼihi, kaʼe tuku anai ʼihi, peʼe mamate anai.

Neʼe fehuʼi fenei age e te kau tisipulo: “ ʼIfea, ʼAliki?” Pea neʼe tali fenei age e Sesu kia natou: “ ʼE fakatahi anai te ʼu akuila ʼi te potu ʼae ʼe tuku ai te sino mate.” (Luka 17:37) ʼEi, ʼe hage anai ʼihi ko te ʼu akuila ʼae ʼe sisio mamaʼo. Ko te ʼu tisipulo ʼaia ʼe natou fakatahitahi anai ki te Kilisito moʼoni, te Foha ʼo te tagata. ʼI te temi ʼae ka ʼafio ai, ʼe foaki anai e Sesu ki ʼana tisipulo agatonu te ʼu moʼoni ʼae ʼe haofaki ʼaki te ʼu maʼuli.