Neʼe hoki ʼosi age pe te ui ʼa Sesu kia natou ʼae neʼe fagono kia te ia ʼi Pele, “tokolahi ia natou ʼae ʼe mumuʼa ʼe natou mumuli anai, pea ko natou ʼae ʼe mumuli ʼe natou mumuʼa anai.” (Mateo 19:30) Neʼe ina tataʼo ʼana palalau ʼaki te lea fakatata ʼo te kau gaue ʼo te gaueʼaga vite. Neʼe ina ui fenei:

“ ʼE feala ke fakatatau te Puleʼaga ʼo selo ki te pule ʼo he ʼapi ʼe alu ʼi te kei uhuuhu ʼo kumi he kau gaue ki tana gaueʼaga vite. ʼI tana ʼosi tukuʼaki mo te kau gaue ki he foʼi tenalio ʼe tahi ʼi te ʼaho, neʼe ina fekauʼi ai natou ki tana gaueʼaga vite. Neʼe toe alu ʼi te vaʼevaʼe hola hiva uhu, pea neʼe sio ai ki ʼihi ʼe natou tutuʼu noa ʼi te fakatauʼaga koloa. Neʼe ina ui fenei age kia natou: ‘Kotou olo mo koutou ki te gaueʼaga vite pea ʼe au foaki atu anai te meʼa ʼae ʼe totonu.’ Neʼe natou olo ai. Pea neʼe toe alu ʼi te vaʼevaʼe fetapa mo te vaʼevaʼe hola tolu hili hoʼata, pea neʼe ina toe fai feia pe. Pea ʼi te vaʼevaʼe hola nima afiafi, neʼe toe alu leva ʼo ina maʼu ʼihi ʼe natou tutuʼu noa, pea neʼe ina ui fenei age kia natou: ‘He koʼe ʼe kotou tutuʼu noa ʼi heni ʼi te ʼaho katoa?’ Neʼe natou tali fenei age: ‘Koteʼuhi neʼe mole he tahi neʼe ina fakagaueʼi matou.’ Neʼe ina ui fenei age kia natou: ‘Kotou olo mo koutou ki te gaueʼaga vite.’ ”—Mateo 20:1-7.

ʼI te logo ʼa te hahaʼi ki te talanoa ʼa Sesu ʼo ʼuhiga mo “te Puleʼaga ʼo selo” pea mo “te pule ʼo he ʼapi,” neʼe lagi natou manatu neʼe fakaʼuhiga kia Sehova ʼAtua. ʼE fakata ʼi te Tohi-Tapu ia Sehova ki te pule ʼo he gaueʼaga vite, ʼae neʼe ko te puleʼaga ʼo Iselaele. (Pesalemo 80:9, 10; Esaia 5:3, 4) Ko natou ʼae neʼe kau ki te fuakava ʼo te Lao, neʼe natou hage ko te kau gaue ʼo te gaueʼaga vite. Kaʼe neʼe mole fai e Sesu he lea fakatata moʼo palalau ki te temi ʼae kua hili. Neʼe talanoa ia ki he aluʼaga neʼe hoko ʼi tona temi.

Ko te kau takitaki lotu, ohage ko te kau Faliseo ʼae neʼe heʼeki faʼa fualoa atu neʼe natou fia ʼahiʼahiʼi ia Sesu ʼo ʼuhiga mo te mavete, neʼe hinoʼi natou ke natou gaue tuʼumaʼu ʼo tauhi ki te ʼAtua. Koia neʼe natou hage ai ko te kau gaue temi katoa ʼae neʼe natou ʼamanaki ke li fuli age tonatou totogi, ʼae neʼe ko te foʼi tenalio ʼi te ʼaho.

Neʼe hage ki te kau pelepitelo pea mo te tahi kau takitaki lotu, neʼe veliveli age te gaue ʼa te hahaʼi Sutea malalo maʼa te ʼAtua, ʼo natou hage ko te kau gaue vaeluaʼi temi ʼi te gaueʼaga ʼa te ʼAtua. ʼI te lea fakatata ʼa Sesu, ko natou ʼaia neʼe ko te ʼu tagata ʼae neʼe foaki age te gaue “ ʼi te vaʼevaʼe hola hiva uhu” peʼe ki muli age, ʼi te vaʼevaʼe fetapa, mo te hola tolu hili hoʼata pea ʼi te hola nima afiafi leva.

Ko te ʼu tagata mo te ʼu fafine ʼae neʼe natou mulimuli ia Sesu, neʼe “ko te kau malaʼia” kia mata ʼo te kau takitaki lotu. (Soane 7:49) Teitei pe ʼi tonatou maʼuli katoa, neʼe ko he ʼu hahaʼi tautai pe neʼe ʼi ai tanatou tahi age ʼu gaue neʼe mole faʼa maʼuhiga. Kaʼe ʼi te fakaʼosi ʼo te taʼu 29 H.T.S., ko “te pule ʼo te gaueʼaga vite” neʼe ina fekauʼi ia Sesu ke ina pauʼi te hahaʼi malalo ʼaia ke natou gaue maʼa te ʼAtua, ʼo natou liliu ko he ʼu tisipulo ʼa Kilisito. Neʼe ko natou ʼaia neʼe ui e Sesu neʼe “mumuli,” he neʼe natou kamata gaue ʼi te gaueʼaga vite ʼi te hola nima afiafi.

Moʼo fakaʼosi e Sesu tana lea fakatata, neʼe ina fakamatala te meʼa ʼae neʼe hoko ʼi te kua ʼosi ʼo te ʼaho gaue. Neʼe ina ui fenei: “ ʼI te afiafi, neʼe ui fenei e te pule ʼo te gaueʼaga vite ki tana tagata takitaki gaue: ‘Pauʼi te kau gaue pea ke li age ʼonatou totogi, ʼo ke kamata mai te kau gaue ʼae neʼe mumuli mai pea ke fakaʼosi kia natou ʼae neʼe mumuʼa mai.’ ʼI te olo age ʼa te ʼu tagata ʼae neʼe kamata gaue ʼi te vaʼevaʼe hola nima afiafi, neʼe natou tahi maʼu tana foʼi tenalio ʼe tahi. Pea ʼi te olo age ʼa natou ʼae neʼe mumuʼa, neʼe natou manatu ʼe lahi age anai ʼonatou totogi, kaʼe neʼe toe totogi natou ʼaki te foʼi tenalio ʼe tahi. ʼI tanatou maʼu ʼonatou totogi, neʼe natou kamata mumuna ki te pule ʼo te ʼapi, pea mo natou ui fenei: ‘Ko natou ʼaeni neʼe mumuli mai, neʼe natou gaue pe ʼi he hola katoa, kaʼe ʼe ke fakatatau natou pea mo matou ʼaeni neʼe gaue kinakina mo laʼaina ʼi te ʼaho katoa!’ Kaʼe neʼe ina tali fenei age ki te tahi ia natou: ‘Tagata, ʼe mole au fai atu he aga ʼe kovi. Neʼe mole koa la ta tukuʼaki ki he foʼi tenalio ʼe tahi? Toʼo tou totogi pea ke alu. ʼE au fia foaki ki ʼae neʼe muli mai ke tatau mo koe. ʼE mole feala koa la ke au fai te meʼa ʼae ʼe au loto ki ai ʼaki ʼoku koloa? Peʼe ke maheka koa koe he ʼe au fai te meʼa ʼae ʼe lelei?’ Koia, ko natou ʼae  ʼe mumuli ʼe natou mumuʼa anai, pea ko natou ʼae ʼe mumuʼa ʼe natou mumuli anai.”—Mateo 20:8-16.

Neʼe lagi feʼekeʼaki e te ʼu tisipulo pe neʼe kotea te fakaʼuhiga ʼo te koga fakaʼosi ʼo te lea fakatata ʼa Sesu. Neʼe manatu te kau takitaki lotu Sutea ko natou ʼae neʼe “mumuʼa.” Neʼe natou liliu feafeaʼi ʼo “mumuli”? Pea neʼe liliu feafeaʼi te ʼu tisipulo ʼa Sesu ʼo “mumuʼa”?

Ko te ʼu tisipulo ʼa Sesu, kia mata ʼo te kau Faliseo pea mo ʼihi atu neʼe natou “mumuli,” neʼe feala ai ke natou ʼamanaki ke li katoa age tonatou totogi, peʼe ke natou “mumuʼa.” ʼAki te mate ʼo Sesu, neʼe liakī te puleʼaga ʼo Iselaele, kaʼe neʼe filifili e te ʼAtua he puleʼaga foʼou, “te Iselaele ʼa te ʼAtua.” (Kalate 6:16; Mateo 23:38) Neʼe talanoa ia Soane Patita ʼo ʼuhiga mo natou, ʼi te temi ʼae neʼe palalau ai ki he papitema ʼaki te laumalie maʼoniʼoni ʼae neʼe tonu ke hoko ki muli age. Ko natou ʼae neʼe “mulimuli,” neʼe ko natou ʼae neʼe ʼuluaki papitemaʼi ʼaki te laumalie maʼoniʼoni pea foaki age ai te pilivilesio ʼae ke natou liliu ko he ʼu fakamoʼoni ʼa Sesu “ki te ʼu potu taupotu ʼo te kele.” (Gaue 1:5, 8; Mateo 3:11) Neʼe lagi ʼi ai he ʼu faʼahi neʼe mahino ki ai te ʼu tisipulo ʼo ʼuhiga mo te fetogi katoa ʼae neʼe talanoa ki ai Sesu, pea neʼe lagi natou mahino ai ʼe iita lahi anai kia natou te kau takitaki lotu, ʼae neʼe liliu ʼo “mumuli.”