Logo la neʼe tonu ke alu ia Sesu ki Selusalemi, kaʼe lagi neʼe kei nofo pe mo ʼana tisipulo ʼi te ʼapi ʼo Sakeo. Neʼe manatu ʼana tisipulo, neʼe kua vave fakatuʼu ia “te Puleʼaga ʼo te ʼAtua” pea fakanofo Hau ai ia Sesu. (Luka 19:11) Kaʼe neʼe hala tanatou mahino, ohage pe ko tanatou mole mahino ʼae neʼe tonu ke mate ia Sesu. Koia neʼe fai ai e Sesu he lea fakatata, moʼo tokoni kia natou ke natou mahino neʼe kei mamaʼo atu ia te fakatuʼu ʼo te Puleʼaga ʼo te ʼAtua.

Neʼe ina ui fenei: “Neʼe folau ia te tagata ʼaliki ki he fenua mamaʼo ke ina maʼu te pule fakahau pea mo toe liliu mai.” (Luka 19:12) Neʼe feala ke loaloaga te faifolau ʼaia. ʼE mahino ia ko Sesu ʼe ko “te tagata ʼaliki” ʼae neʼe folau ki “he fenua mamaʼo,” te lagi, ke foaki age ai e tana Tamai ia te pule fakahau.

ʼI te lea fakatata, ʼi muʼa ʼo te alu ʼa “te tagata ʼaliki,” neʼe ina pauʼi ʼana tagata faifekau ʼe toko hogofulu, pea ina foaki age kia natou takitahi te foʼi mina siliva pea ina ui fenei age kia natou: “Kotou gaueʼi te ʼu foʼi mina ʼaeni ʼo kaku ki taku toe liliu mai.” (Luka 19:13) Ko te ʼu foʼi mina siliva neʼe ko te ʼu foʼi piesi maʼuhiga. Ko he foʼi mina ʼe tatau mo te totogi ʼo mahina ʼe tolu ʼo he tagata gaue kele.

Neʼe lagi mahino ia te ʼu tisipulo neʼe natou hage ko te ʼu tagata faifekau ʼe toko hogofulu ʼo te lea fakatata, he ʼe ki muʼa atu, neʼe fakatatau natou e Sesu ki he kau gaue ʼe natou tanaki te taʼukai. (Mateo 9:35-38) ʼE mahino ia, neʼe mole ina kole age ke natou tanaki moʼoni he taʼukai. Kailoa ia, kaʼe neʼe tonu ke natou tanaki he tahi ʼu tisipulo ʼae ka natou hau anai ʼi te Puleʼaga ʼo te ʼAtua. Neʼe fakaʼaogaʼi e te ʼu tisipulo tonatou temi, mo tonatou malohi pea mo te ʼu koloa fuli ʼae neʼe natou maʼu moʼo fakahoko te gaue ʼaia.

Kotea te tahi age meʼa neʼe fakaha e Sesu ʼi tana lea fakatata? Neʼe ina ui fenei: “Neʼe fehihiʼa te hahaʼi ʼo tona fenua kia ia [te tagata ʼaliki] pea mo natou fekauʼi age ki ai he kau fakafofoga ke natou ui fenei age: ‘ ʼE mole matou loto ke ke liliu ko homatou hau.’ ” (Luka 19:14) Neʼe iloʼi e te ʼu tisipulo neʼe mole tali e te kau Sutea ia Sesu, pea neʼe loto pe la ʼihi ke natou matehi ia ia. Hili te mate pea mo te alu ʼa Sesu ki selo, tokolahi te kau Sutea neʼe natou fakaha tanatou manatu ʼo ʼuhiga mo ia ʼaki tanatou fakatagaʼi ʼana tisipulo. Neʼe fakaha lelei e te kau fakafeagai ʼaia tanatou mole loto ʼae ke Hau ia Sesu kia natou.—Soane 19:15, 16; Gaue 4:13-18; 5:40.

ʼO ʼuhiga mo te ʼu tagata faifekau ʼe toko hogofulu, kotea ʼae neʼe natou fai ʼaki ʼanatou foʼi mina ʼo kaku ki te maʼu e “te tagata ʼaliki” “te pule fakahau” pea mo tana toe liliu mai? Neʼe ui fenei e Sesu: “Ki muli age, ʼi tana toe liliu mai hili tana maʼu te pule fakahau, neʼe ina pauʼi te ʼu tagata faifekau ʼae neʼe ina foaki age kia natou te falā, ke ina iloʼi ai te fua ʼo tanatou gaue. Neʼe haʼu te tahi pea mo ina ui fenei age: ‘ ʼAliki, kua liliu tau foʼi mina ʼe tahi ko mina ʼe hogofulu.’ Neʼe ina ui fenei ki ai: ‘ ʼE lelei ʼosi, tagata faifekau agalelei! ʼUhi ʼae neʼe ke agatonu ʼo ʼuhiga mo he ʼu meʼa ʼe mole lalahi, ke ke pule kia kolo ʼe hogofulu.’ Neʼe haʼu leva te tahi age ʼo ina ui fenei: ‘ ʼAliki, kua liliu tau foʼi mina ʼe tahi ko mina ʼe nima.’ ʼO toe feia aipe, neʼe ina ui fenei ki te tagata faifekau ʼaia: ‘Ke ke toe pule mo koe kia kolo ʼe nima.’ ”—Luka 19:15-19.

Kapau neʼe mahino ki te ʼu tisipulo neʼe natou hage ko te ʼu tagata faifekau ʼae neʼe natou fakaʼaogaʼi tonatou temi, mo tonatou malohi pea mo ʼonatou koloa fuli moʼo fai he tahi age ʼu tisipulo, neʼe feala ke natou tui papau ʼe fiafia anai ia Sesu. Pea neʼe feala ke natou falala ʼe ina fakapale anai tanatou faʼa gaue. ʼE mahino ia, neʼe mole tatau fuli te ʼu aluʼaga ʼo te ʼu tisipulo ʼa Sesu, ʼo feia mo ʼonatou fealagia pea mo ʼonatou faiva. Kaʼe ko Sesu, ʼae ʼe ina maʼu “te pule fakahau,” ʼe ina fakamoʼoni pea mo tapuakiʼi anai tanatou agatonu pea mo ʼanatou faiga ʼi te fai ʼo he ʼu tisipulo.—Mateo 28:19, 20.

Kaʼe ʼi te fakaʼosi e Sesu tana lea fakatata, neʼe talanoa ki he tahi neʼe kehe age tana aga. Neʼe ina ui fenei: “Pea neʼe haʼu leva te tahi age [tagata faifekau] ʼo ina ui fenei: ‘ ʼAliki, koʼeni tau foʼi mina ʼe tahi neʼe au fufu ʼi he kie. Sio mai, neʼe au mataku ia koe koteʼuhi ko koe ko he tagata agafefeka. ʼE ke tae te falā ʼae neʼe mole ke gaueʼi pea ʼe ke utu te meʼa ʼae neʼe mole ke to.’ Neʼe ina ui fenei age: ‘Tagata faifekau  agakovi, ʼe au fakamauʼi koe ʼo mulimuli ki ʼau palalau. Neʼe ke iloʼi ko au ko he tagata agafefeka, ʼe au tae te falā ʼae neʼe mole au gaueʼi pea mo utu te meʼa ʼae neʼe mole au to. He koʼe koa la neʼe mole ke tuku taku falā ki te kau tagata faipaʼaga? Pea, ʼi taku toe liliu mai, ʼe au tae anai mo tona tupu.’ Neʼe ina ui fenei leva kia natou ʼae neʼe tutuʼu ovi age: ‘Kotou toʼo tana foʼi mina ʼe tahi ʼo kotou foaki age kia ia ʼae ʼe ina maʼu te ʼu foʼi mina ʼe hogofulu.’ ”—Luka 19:20-24.

ʼI te mole gaue ʼa te tagata faifekau ʼaia moʼo fakatuputupu te koloa ʼo te puleʼaga ʼo tona ʼaliki, neʼe puli fuli ai ʼona koloa. Neʼe fakaʼamu e te kau apositolo ki te temi ʼafio ʼa Sesu ʼi te Puleʼaga ʼo te ʼAtua. Koia, ʼaki te meʼa ʼae neʼe ui e Sesu ʼo ʼuhiga mo te tagata faifekau fakamuli, neʼe lagi natou mahino ai, kapau neʼe mole natou faʼa gaue, pea ʼe mole natou kau anai ki te Puleʼaga.

Ko te ʼu palalau ʼaia ʼa Sesu neʼe lagi ina uga ai te kau tisipulo agatonu ke lahi age ʼanatou faiga. Neʼe ina fakaʼosi fenei: “ ʼE au tala atu kia koutou, ko ʼae ʼe ina maʼu hana meʼa, ʼe toe foaki lahi age anai, kaʼe ko ʼae ʼe mole ina maʼu hana meʼa, ʼe toʼo anai mo te meʼa ʼae ʼe ina maʼu.” Pea neʼe ina ui ʼo ʼuhiga mo ʼona fili, ʼae neʼe mole natou loto ‘ke hau kia natou,’ ʼe matehi anai natou. Pea neʼe hoko atu leva tona fagona ki Selusalemi.—Luka 19:26-28.