Neʼe ʼomai ni tagata mai te potu Esite. Neʼe ko te kau masi. Ko he ʼu tagata ʼe natou sivi te ʼu fetuʼu. ʼI tanatou manatu ʼe feala ai hanatou tala fakakikite te ʼu aluʼaga ʼae ka hoko ʼi te maʼuli ʼo te hahaʼi. (Esaia 47:13) Neʼe natou sisio ki he “fetuʼu” mai tonatou fenua ʼi te potu Esite. Pea natou muliʼi ia kilometa ʼe lauʼi teau, ʼo tupu ai tanatou tau ki Selusalemi, kaʼe mole ko Petelehemi.

ʼI te kaku atu ki ai ʼa te kau masi, neʼe natou fakalavelave fenei: “ ʼE ʼifea te tamasiʼi ʼae ka liliu anai ko te hau ʼo te kau Sutea? He neʼe matou sisio ki tona fetuʼu ʼi tamatou ʼi te potu Esite, pea neʼe matou ʼomai ke matou hu kia te ia.”—Mateo 2:1, 2.

Neʼe logo ia te Hau ko Helote, ʼae neʼe ʼi Selusalemi, ki te faʼahi ʼaia pea neʼe mole ina leleiʼia. Koia neʼe ina pauʼi ai te kau pelepitelo pule pea mo te tahi ʼu takitaki lotu Sutea, ʼo ina fakalavelave age pe neʼe tonu ke tupu ʼifea ia Kilisito. Ohage pe ko tona tala ʼi te Tohi-Tapu, neʼe natou tali: “ ʼI Petelehemi.” (Mateo 2:5; Mikea 5:1) Neʼe fekauʼi fakafufu e Helote te kau masi, ʼo ina ui fenei age kia natou: “Kotou olo ʼo kumi lelei ia te tamasiʼi, pea ka kotou maʼu ia ia, kotou toe liliu mai ʼo fakaha mai ke au alu foki mo au ʼo hu kia te ia.” (Mateo 2:8) Kaʼe ko te meʼa ʼae neʼe loto moʼoni ki ai ia Helote, ke ina maʼu te tamasiʼi pea ke ina matehi.

Hili te mavae ʼa te kau masi, neʼe hoko te aluʼaga fakapunamaʼuli. Ko te “fetuʼu” ʼae neʼe natou sisio ki ai ʼi tanatou ʼi te potu Esite neʼe ina taki natou. ʼE mahino ia, neʼe mole hage ia ko te ʼu fetuʼu fuli, kaʼe neʼe ha tafito moʼo taki natou. Neʼe muliʼi e te kau masi ia te fetuʼu ʼaia, ʼo kaku ki tana tuʼu ʼi te ʼapi ʼae neʼe kua nonofo ai ia Sosefo, mo Malia pea mo tanā tamasiʼi.

ʼI te feulufi atu ʼa te kau masi ki te ʼapi, neʼe natou maʼu ai ia Malia pea mo te tamasiʼi ko Sesu. Neʼe natou olo ai ʼo hu kia te ia, pea mo natou foaki age he ʼu meʼa ʼofa ko te aulo, mo te iseso hina pea mo te mila. Ki muli age, ʼi tanatou ʼamanaki toe liliu kia Helote, neʼe fakatokaga age e te ʼAtua kia natou ʼi he moemisi, ke ʼaua naʼa natou fai te faʼahi ʼaia. Koia neʼe natou toe liliu ai ki tonatou fenua ʼi te tahi ala kehe.

ʼI tau manatu la, ko ai ʼae neʼe ina fakaha te “fetuʼu” ʼae neʼe ina taki te kau masi? Ke ke manatuʼi, neʼe mole ina taki fakahagatonu natou kia Sesu, ʼi Petelehemi. Kaʼe neʼe ina taki natou ki Selusalemi, ʼo natou felaveʼi ai mo te Hau ko Helote, ʼae neʼe ina fia matehi ia Sesu. Neʼe feala pe ke hoko te faʼahi ʼaia, mo ka na pau la neʼe mole fakatokaga age e te ʼAtua ki te kau masi ke ʼaua naʼa natou fakaha kia Helote te potu ʼae ʼe nofo ai ia Sesu. ʼE mahino ia, neʼe ko te fili ʼo te ʼAtua, ia Satana, ʼae neʼe ina fia matehi ia Sesu, pea neʼe ina fakaʼaogaʼi te faʼahi ʼaia moʼo fakahoko ʼo tana fakatuʼutuʼu.