Kua vave fanau pe ia Elisapeta. Lolotoga mahina ʼe tolu, neʼe nofo mo tona kaiga ko Malia. Kua tonu leva ke liliu ia Malia ki tona ʼapi ʼi Nasaleti he ʼe tuʼu mamaʼo. Pea tahi, ʼe toe fakaatalitali mo ia ke fanauʼi tana tamasiʼi ʼi ni mahina ʼe ono.

Mole fualoa ʼi te ʼosi mavae ʼa Malia, pea fanau ia Elisapeta. Neʼe malolo pe ia Elisapeta mo te kiʼi toe. Neʼe fiafia ia Elisapeta mo Sakalia. ʼI te fakaha age e Elisapeta tana kiʼi toe ki ʼona vahaʼa fale pea mo ʼona kaiga, neʼe natou toe fakafiafia foki mo natou.

Neʼe ui ʼi te Lao ʼae neʼe foaki e te ʼAtua ki Iselaele, neʼe tonu ke silikosisioʼi he tamasiʼi tagata ʼi tona ʼaho valu, pea neʼe toe foaki ai mo tona higoa. (Levitiko 12:2, 3) Neʼe manatu ʼihi neʼe tonu ke foaki e Sakalia tona higoa ki tona foha. Kaʼe neʼe fakafisi ia Elisapeta ki ai, ʼo ina ui fenei: “Kailoa! kaʼe ʼe higoa anai ko Soane.” (Luka 1:60) ʼE ke manatuʼi neʼe ui age e te ʼaselo ko Kapeliele ke fakahigoaʼi te tamasiʼi ʼaia ko Soane.

Neʼe mole leleiʼia e te ʼu vahaʼa fale pea mo te ʼu kaiga te faʼahi ʼaia, ʼo natou ui fenei: “ ʼE mole he tahi ʼi tou famili ʼe higoa feia.” (Luka 1:61) Pea neʼe natou palalau fakatuli age kia Sakalia, ʼo natou fakalavelave age ki ai pe ʼe kotea te higoa ʼae ʼe ina fia foaki ki tona foha. Neʼe kole age e Sakalia ke ʼavage he lauʼi papa pea neʼe ina tohi fenei: “Ko tona higoa ko Soane.”—Luka 1:63.

ʼI te temi pe ʼaia, neʼe hoko te milakulo, he neʼe toe palalau ia Sakalia. ʼE lagi ke manatuʼi neʼe mole kei feala hana palalau, he neʼe mole tui ki te ui age e te ʼaselo ʼe fanauʼi anai e Elisapeta he tama. Koia, ʼi te toe palalau leva ʼa Sakalia, neʼe punamaʼuli ai ʼona vahaʼa fale pea natou feʼekeʼaki fenei: “ ʼE feafeaʼi anai te kiʼi tamasiʼi ʼaeni moka lahi ake?” (Luka 1:66) Neʼe natou mahino ai neʼe ko te finegalo ʼo te ʼAtua ke fakahigoaʼi te tamasiʼi ko Soane.

Neʼe fonu leva ia Sakalia ʼi te laumalie maʼoniʼoni, pea neʼe ina ui fenei: “Ke vikiʼi ia Sehova, te ʼAtua ʼo Iselaele, koteʼuhi neʼe ina tokagaʼi tana hahaʼi pea mo fakaʼateainaʼi natou. Pea neʼe ina fakatupu maʼa  tatou he fakamaʼuli malohi mai te ʼapi ʼo tana kaugana ko Tavite.” (Luka 1:68, 69) Ko te “fakamaʼuli malohi” ’ae neʼe talanoa ki ai Sakalia ʼe ko te ʼAliki ko Sesu ʼae neʼe kua vave tupu. Neʼe ui e Sakalia, ʼaki ia Ia ʼaia, ko te ʼAtua “ ʼi tana ʼosi haofaki tatou mai ʼotatou fili, ʼe ina tuku mai anai te fealagia ʼae ke tou fai he tauhi taputapu kia te ia ʼo mole tou matataku, pea ke tou tauhi ʼaki te agatonu pea mo te faitotonu ʼi ʼona muʼa ʼi te ʼaho fuli.”—Luka 1:74, 75.

Pea neʼe fakakikite fenei e Sakalia ʼo ʼuhiga mo tona foha: “Ko koe, kiʼi tamasiʼi, ʼe fakahigoaʼi anai koe ko he polofeta ʼo te Maʼoluga, koteʼuhi ʼe ke haʼele anai ia muʼa ʼo Sehova ʼo fakatokatoka ʼona ala, ke iloʼi e tana hahaʼi ʼe haofaki anai natou ʼaki te fakamolemole ʼo ʼanatou agahala, ʼuhi ko te manavaʼofa lahi ʼo totatou ʼAtua. Ko te manavaʼofa ʼaia mai te lagi ʼe hage anai ko te mafoa ʼo te ʼaho, moʼo foaki te malama kia natou ʼae ʼe heheka ʼi te fakapoʼuli pea mo te koga fenua ʼo te mate pea mo taki ʼotatou vaʼe ʼi te ala ʼo te tokalelei.” (Luka 1:76-79) ʼE ko he lea fakapolofeta fakalotomalohi!

’I te temi leva ʼaia, ko Malia, ʼae neʼe heʼeki ʼohoana, neʼe kua tau ki tona ʼapi ʼi Nasaleti. Kotea anai te meʼa ka hoko kia ia moka iloʼi ʼe kua faitama?