ʼUluaki Hau 1:1-53
1 Neʼe kua matuʼa leva ia te Hau ko Tavite,+ pea logo la tanatou fakatui ki ai he tahi age ʼu kofu, kae neʼe mole pe mafana ia.
2 Koia, neʼe ui age e ʼana hahaʼi faifekau: “Siʼoku ʼaliki te hau, fakagafua mai ke matou kumi he taʼahine kei nofo taupoʼou, ke haʼu ʼo tauhi pea mo tokaga kia koe. ʼE takoto anai ʼi ʼou tafa ke feala ai hau mafana.”
3 Neʼe natou kumi ai ʼi te fenua katoa ʼo Iselaele he taʼahine ʼe finemui, pea neʼe natou maʼu leva ia Apisake,+ te taʼahine Sunemi,+ ʼo natou ʼaumai ia ia ki te hau.
4 Neʼe finemui ʼaupito ia te taʼahine ʼaia, pea neʼe tauhi leva mo tokaga ki te hau, kae neʼe mole momoe te hau mo ia.
5 Lolotoga te temi ʼaia, neʼe fiameʼalahi ia Atonisa+ te tama ʼa Akite, ʼo ina ui: “ ʼE ko au ʼae ka hau!” Neʼe ina toʼo he saliote fakahau, mo he ʼu tagata heka hosi pea mo he ʼu tagata ʼe toko 50 ke natou feleleʼi ʼi ʼona muʼa.+
6 Kae neʼe mole he temi neʼe palalau age tana tamai ki ai,* ʼo ui: “He koʼe neʼe ke fai te meʼa ʼaia?” Neʼe toe talavou foki te tama ʼaia, pea neʼe hoki tupu ia ki muli mai ia Apesalone.
7 Pea neʼe felogoi ia Atonisa mo te tama ʼa Teselusa ko Soape pea mo Apiata+ te pelepitelo, pea neʼe nā lotolelei ke nā tokoni mo lagolago ki ai.+
8 Kae neʼe mole lagolago ia te pelepitelo ko Satoke,+ mo te foha ʼo Seosata ko Penaia,+ mo te polofeta ko Natane,+ mo Simei,+ mo Lei, pea mo te ʼu tagata tau malolohi ʼa Tavite+ kia Atonisa.
9 Ki muli age, neʼe sakilifisioʼi e Atonisa+ he ʼu ovi, mo he ʼu pipi pea mo he ʼu manu neʼe sino lelei ʼo ovi ki te fuʼu maka ʼo Soelete, ʼae ʼe ovi ki Ene-lokeli. Pea neʼe ina fakaafe ʼona tehina fuli, ia te ʼu foha ʼo te hau pea mo te ʼu tagata fuli ʼo Suta, ia te hahaʼi faifekau ʼa te hau.
10 Kae neʼe mole ina fakaafe ia te polofeta ko Natane, mo Penaia pea mo te ʼu tagata tau malolohi, ʼo feia mo Salomone tona tehina.
11 Neʼe ui leva e Natane+ kia Pate-sepa,+ te faʼe ʼa Salomone:+ “Neʼe mole ke logo koa la kua hau ia Atonisa,+ te tama ʼa Akite? ʼE mole iloʼi e totatou ʼaliki ko Tavite te faʼahi ʼaia.
12 Koia, fakalelei siʼou loto, kae ke ke tuku ke au foaki atu he tokoni, ke feala hau haofaki tou maʼuli* pea mo te maʼuli* ʼo Salomone tau tama.+
13 Alu ki te Hau ko Tavite pea ke ui age ki ai: ‘Siʼoku ʼaliki te hau, neʼe mole koa la ke fakapapau mai kia au: “ ʼE ko tau tama ko Salomone ʼae ka hau ʼo fetogi au, pea mo heka ʼi toku hekaʼaga fakahau”?+ Kae he koʼe koa kua hau Atonisa ia?’
14 ʼI tau lolotoga palalau ʼaia mo te hau, ʼe au haʼu anai mo au ʼo fakamoʼoni ki ʼau palalau.”
15 Neʼe alu ai ia Pate-sepa ki te hau, ki tona koga fale. Neʼe kua matuʼa ia te hau, pea neʼe tokaga ki ai ia Apisake,+ te taʼahine Sunemi.
16 Neʼe tuʼutuli ifo ia Pate-sepa mo tulolo ia muʼa ʼo te hau, pea neʼe ui age e te hau: “Kotea tau kole?”
17 Neʼe ina tali age: “Siʼoku ʼaliki, neʼe ko koe ʼae neʼe ke fakapapau mai kia au ʼi te huafa ʼo Sehova tou ʼAtua: ‘ ʼE ko tau tama ko Salomone ʼae ka hau ʼo fetogi au, pea mo heka ʼi toku hekaʼaga fakahau.’+
18 Kae koʼeni ʼe ko Atonisa ia ʼae kua hau, pea ʼe mole ke iloʼi te faʼahi ʼaia.+
19 Neʼe lahi ʼaupito te ʼu pipi, mo te ʼu manu neʼe sino lelei, pea mo te ʼu ovi ʼae neʼe ina sakilifisioʼi pea neʼe ina fakaafe ʼou foha fuli, mo te pelepitelo ko Apiata pea mo te pule ʼo te foʼi kautau ko Soape.+ Kae neʼe mole ina fakaafe tau tagata faifekau ko Salomone.+
20 Koia, siʼoku ʼaliki te hau, ʼe fakalogo mai ia Iselaele katoa ke ke fakaha age pe ko ai ʼae ka heka anai ʼi tou hekaʼaga fakahau, moʼo fetogi koe.
21 Koteʼuhi, siʼoku ʼaliki te hau, ʼi te temi pe ʼae ka ke mate ai,* ʼe lau anai ko au mo siʼaku tama ko Salomone ko ni hahaʼi kaka.”
22 Pea ʼi tana lolotoga palalau ʼaia mo te hau, neʼe haʼu ia Natane, te polofeta.+
23 ʼI te moʼi temi pe ʼaia, neʼe fakaha ki te hau: “Koʼeni ia Natane, te polofeta!” Neʼe ulu mai leva ʼo tulolo ki te kele ia muʼa ʼo te hau.
24 Pea neʼe ui e Natane: “Siʼoku ʼaliki te hau, neʼe ke fai koa te ʼu palalau ʼaeni: ‘ ʼE ko Atonisa ʼae ka hau ʼo fetogi au, pea mo heka ʼi toku hekaʼaga fakahau’?+
25 Koteʼuhi ʼi te ʼaho nei neʼe lahi ʼaupito te ʼu pipi, mo te ʼu manu neʼe sino lelei, pea mo te ʼu ovi ʼae neʼe ina sakilifisioʼi,+ pea neʼe ina fakaafe ʼou foha fuli, mo te kau pule ʼo te foʼi kautau pea mo Apiata, te pelepitelo.+ ʼE natou lolotoga kakai nei mo iinu mo ia, pea mo natou ui: ‘Ke fua manuʼia tau ʼafio, Hau ko Atonisa!’
26 Kae neʼe mole ina fakaafe ia au ʼaeni ko tau tagata faifekau, mo Satoke, te pelepitelo, mo Penaia,+ te foha ʼo Seosata, ʼo feia mo Salomone, tau tagata faifekau.
27 Siʼoku ʼaliki te hau, neʼe ke fakagafua koa ia te faʼahi ʼaia, kae neʼe mole ke fakaha mai kia au pe ko ai ʼae ʼe tonu ke heka ʼi tou hekaʼaga fakahau, moʼo fetogi koe?”
28 Pea neʼe tali e te Hau ko Tavite: “Kotou pauʼi mai ia Pate-sepa.” Pea neʼe haʼu ai ʼo tuʼu ia muʼa ʼo te hau.
29 Neʼe fakapapau leva e te hau: “ ʼE au tala moʼoni atu ia muʼa ʼo Sehova, te ʼAtua maʼuli, ʼae neʼe ina haofaki au mai ʼoku mamahi fuli,+
30 ʼe au fakahoko anai ʼi te ʼaho nei te fakapapau ʼaeni neʼe au fai atu ʼi te huafa ʼo Sehova, te ʼAtua ʼo Iselaele: ‘ ʼE ko tau tama ko Salomone ʼae ka hau ʼo fetogi au, pea mo heka ʼi toku hekaʼaga fakahau!’ ”
31 Pea neʼe tulolo ia Pate-sepa ki te kele mo punou ia muʼa ʼo te hau pea neʼe ina ui: “Ke maʼuli siʼoku ʼaliki te Hau ko Tavite ʼo heʼe gata!”
32 ʼI te temi pe ʼaia, neʼe ui e te Hau ko Tavite: “Kotou pauʼi mai ia Satoke, te pelepitelo, mo Natane, te polofeta pea mo Penaia,+ te foha ʼo Seosata.”+ Pea neʼe natou ʼomai ai leva kia muʼa ʼo te hau.
33 Neʼe ui age e te hau kia natou: “Kotou toʼo ʼaku hahaʼi faifekau, mo kotou fakaheka ia Salomone ki taku asino* lahi,+ pea kotou olo mo ia ki Kioni.+
34 ʼE fakanofo* anai ia ia ʼi ai e Satoke, te pelepitelo pea mo Natane,+ te polofeta ke liliu ko te hau ʼo Iselaele. Pea kotou pupuhi leva te fakatagi pupuhi pea mo kotou ui: ‘Ke fua manuʼia tau ʼafio, Hau ko Salomone!’+
35 Pea kotou toe liliu mai mo ia, pea ʼe haʼu anai ʼo heka ʼi toku hekaʼaga fakahau. ʼE ko ia ʼae ka hau ʼo fetogi au, pea ʼe au fakanofo anai ia ia ke pule ki Iselaele pea mo Suta.”
36 ʼI te temi pe ʼaia, neʼe ui e Penaia, te foha ʼo Seosata ki te hau: “Ameni! Siʼoku ʼaliki te hau, ke fakamoʼoni e Sehova, tou ʼAtua ki te faʼahi ʼaia.
37 Ohage pe ko te nofo ʼa Sehova mo koe, ke toe nofo te ʼAtua mo Salomone,+ pea ke Ina fakaliliu te kololia ʼo tana pule ʼo lahi age ʼi te kololia ʼo tau pule, siʼoku ʼaliki, te Hau ko Tavite.”+
38 Neʼe olo ai ia te pelepitelo ko Satoke, mo te polofeta ko Natane, mo te foha ʼo Seosata ko Penaia,+ mo te kau Keleti pea mo te kau Peletite+ ʼo fakaheka ia Salomone ki te asino lahi ʼa te Hau ko Tavite,+ pea neʼe natou olo mo ia ki Kioni.+
39 Neʼe toʼo leva e Satoke, te pelepitelo mai te fale la+ te talaʼi manu ʼae neʼe ʼai ai te lolo,+ ʼo ina fakanofo ai ia Salomone,+ pea neʼe natou pupuhi te fakatagi pupuhi. Neʼe kalaga te hahaʼi fuli: “Ke fua manuʼia tau ʼafio, Hau ko Salomone!”
40 Hili ʼaia, neʼe toe liliu te hahaʼi fuli mo ia, ʼo natou puhi fagufagu pea mo fakafiafia lahi, ʼo galulu ai te kele ʼuhi ko tanatou logoaʼa.+
41 Neʼe logo ia Atonisa pea mo tana kau fakaafe fuli ki te logoaʼa ʼaia ʼi tanatou kua ʼosi kakai.+ ʼI te logo pe ʼa Soape ki te pupuhi ʼo te fakatagi pupuhi, neʼe ina ui: “Kotea koa ʼae ʼe logoaʼa feia ai te kolo?”
42 Lolotoga tana palalau ʼaia, neʼe haʼu ia Sonatane,+ te foha ʼo Apiata, te pelepitelo. Pea neʼe ui e Atonisa ki ai: “Haʼu, he ʼe ko koe ko he tagata ʼe lelei, pea ʼe mahino ia, ʼe ke haʼu mo he logo lelei.”
43 Kae neʼe tali age e Sonatane kia Atonisa: “Kailoa ia! Kae neʼe fakanofo e totatou ʼaliki, te Hau ko Tavite, ia Salomone ke hau.
44 Neʼe fekauʼi e te hau ke olo mo ia ia te pelepitelo ko Satoke, mo te polofeta ko Natane, mo te foha ʼo Seosata ko Penaia, mo te kau Keleti pea mo te kau Peletite, pea neʼe natou fakaheka ia ia ki te asino lahi ʼa te hau.+
45 Pea ʼi Kioni, neʼe fakanofo hau leva ia ia e Satoke, te pelepitelo pea mo Natane, te polofeta. Hili ʼaia, neʼe natou toe liliu, mo natou fakafiafia pea koia ʼae ʼe gatutu ai te kolo. Neʼe ko te logoaʼa ʼaia ʼae neʼe kotou logo ki ai.
46 Pea tahi ʼae meʼa, kua heka ia Salomone ʼi te hekaʼaga fakahau.
47 Pea neʼe toe ʼomai foki mo te hahaʼi faifekau ʼa te hau ʼo vikiʼi totatou ʼaliki, te Hau ko Tavite, ʼo natou ui: ‘ ʼOfa pe ke fakaliliu e tou ʼAtua te higoa ʼo Salomone ke iloa age ʼi tou higoa, pea ke lahi age te kololia ʼo tana pule ʼi te kololia ʼo tau pule!’ Pea neʼe punou leva te hau ʼi tona palepale.
48 Pea neʼe toe ui e te hau: ‘Ke vikiʼi ia Sehova, te ʼAtua ʼo Iselaele, he neʼe ina hinoʼi ʼi te ʼaho nei he tahi ke heka ʼi toku hekaʼaga fakahau pea mo fakagafua ke au sio mata ki ai!’ ”
49 Pea neʼe matataku leva ia natou fuli ʼae neʼe fakaafe e Atonisa, ʼo natou tutuʼu ake ai ʼo tahi olo.
50 Neʼe toe mataku foki ia Atonisa ʼuhi ko Salomone, koia neʼe tuʼu ake ai ʼo alu ʼo puke te ʼu tala ʼo te ʼaletale.+
51 Pea neʼe fakaha kia Salomone: “Kua mataku ia Atonisa ia koe, Hau ko Salomone, pea kua alu ʼo puke te ʼu tala ʼo te ʼaletale, ʼo ina ui: ‘Ke fakapapau mai muʼa e te Hau ko Salomone ʼe mole ina matehi anai au ʼaki te heleta.’ ”
52 Neʼe ui e Salomone: “Kapau ʼe ha ʼi tana aga ʼe agatonu, pea ʼe mole to anai ki te kele hona fuluʼi ʼulu ʼe tahi. Kae kapau ʼe ina fai he meʼa ʼe kovi,+ ʼe matehi anai ia ia.”
53 Neʼe fekauʼi leva e te Hau ko Salomone he ʼu tagata ke natou olo ʼo fakahifo mai ia ia mai te ʼaletale. Pea neʼe haʼu ʼo tulolo ia muʼa ʼo te Hau ko Salomone, pea neʼe ui e Salomone ki ai: “Tuʼu ake pea ke toe liliu ki tou ʼapi.”
Nota
^ Peʼe “neʼe fia fakamamahiʼi ai e tana tamai tona loto,” peʼe “neʼe fia fakatonutonuʼi ia ia e tana tamai.”
^ Hep. nèphèsh. Vakaʼi Te ʼu Kupu.
^ Hep. nèphèsh. Vakaʼi Te ʼu Kupu.
^ Hep. “ ʼi te temi pe ʼae ka ʼave ai siʼoku ʼaliki te hau ke takoto fakatahi mo ʼana kui.”
^ Peʼe “asino fafine.”
^ Vakaʼi Te ʼu Kupu.
