ʼUluaki Koloniko 5:1-26
5 Koʼeni te ʼu foha ʼo Lupeni,+ te ʼuluaki foha ʼo Iselaele. Neʼe ko ia te ʼuluaki foha, kae neʼe foaki tona ʼuhiga ʼuluaki tupu ki te ʼu foha ʼo Sosefo,+ te foha ʼo Iselaele ʼuhi ko tana ʼulihi te moeʼaga ʼo tana tamai.+ Koia, ʼi te tohi hako ʼo tonatou famili, neʼe mole tuʼu ai tona ʼuhiga ʼuluaki tupu.
2 Logo la neʼe maʼoluga age ia Suta+ ʼi ʼona tehina pea neʼe hifo mai tona hologa te tagata takitaki,+ kae neʼe foaki kia Sosefo te ʼuhiga ʼuluaki tupu.
3 Ko te ʼu foha ʼo Lupeni, te ʼuluaki foha ʼo Iselaele, neʼe ko Anoke, mo Palu, mo Eselone pea mo Kalemi.+
4 Ko te ʼu foha ʼo Soele neʼe ko Semaea, pea ko Semaea ko te tamai ʼa Koke, ko Koke ko te tamai ʼa Simei,
5 ko Simei ko te tamai ʼa Mikea, ko Mikea ko te tamai ʼa Leasa, ko Leasa ko te tamai ʼa Paale,
6 pea ko Paale ko te tamai ʼa Peela, ʼae neʼe ʼave popula e Tilekate-pilenesele,+ te Hau ʼo Asilia, pea neʼe kau ʼi te kau pule ʼo te kau Lupeni.
7 Ko ʼona tehina ʼo mulimuli ki te tohi hako ʼo ʼonatou famili, neʼe ko Seiele te pule, mo Sakalia,
8 mo Pela te foha ʼo Asase, te foha ʼo Sema, te foha ʼo Soele, ʼae neʼe maʼuli ʼi Aloele+ ʼo kaku ki Nepo pea mo Paale-meoni.+
9 Neʼe nofo ʼi te potu esite ʼo kaku ki te kamataʼaga ʼo te toafa, ʼae neʼe hoko atu ki te Vai Tafe ʼo Efalate,+ koteʼuhi neʼe liliu ʼo lahi tanatou faga manu ʼi te fenua ʼo Kileate.+
10 ʼI te temi pule ʼo Saulo, neʼe natou tauʼi te kau Hakali pea mo malo ai. Koia, neʼe natou nonofo ai leva ʼi ʼonatou fale la ʼi te fenua katoa ʼi te potu esite ʼo Kileate.
11 Neʼe nonofo te hologa ʼo Kate ʼo ovi kia natou ʼi te fenua ʼo Pasani ʼo kaku ki Salaka.+
12 ʼI Pasani, neʼe ko Soele te pule, mo Safame te lua, pea neʼe toe ʼi ai foki mo Saenai pea mo Sapate.
13 Pea ko ʼonatou tehina ʼae neʼe kau ki ʼonatou famili neʼe ko Mikaele, mo Mesulame, mo Sepa, mo Solai, mo Saekane, mo Tesia pea mo Epele. Neʼe fakatahiʼi ai ko te toko fitu.
14 Neʼe ko te ʼu foha ʼaia ʼo Apihaile, te foha ʼo Huli, te foha ʼo Saloase, te foha ʼo Kileate, te foha ʼo Mikaele, te foha ʼo Sesisai, te foha ʼo Saseto, te foha ʼo Puse.
15 Ko Asi, te foha ʼo Apetiele, te foha ʼo Kuni neʼe ko te pule ʼo tonatou famili.
16 Neʼe natou nonofo ʼi Kileate,+ mo Pasani+ pea mo te ʼu kolo liliki ʼi te ʼu tafaʼaki, pea mo te ʼu koga meʼa lunaʼia fuli ʼo Salona ʼo kaku ki ʼonatou tuʼakoi.
17 Neʼe tohi fuli ʼonatou higoa ʼi te tohi hako ʼi te temi pule ʼo Sotame,+ te Hau ʼo Suta pea ʼi te temi pule ʼo Selopoamo,*+ te Hau ʼo Iselaele.
18 Neʼe maʼu ʼi te foʼi kautau ʼa te kau Lupeni, mo te kau Kate pea mo te vaelua ʼo te telepi ʼo Manase te ʼu tagata tau malolohi ʼe toko 44 760, neʼe natou toʼo he ʼu meʼa tali tau, mo he ʼu heleta, mo he ʼu nahau, pea neʼe akoako natou ki te tau.
19 Neʼe natou tauʼi te kau Hakali,+ mo Setule, mo Nafise+ pea mo Notape.
20 Neʼe tokoni te ʼAtua kia natou ʼi te tau ʼaia, ʼo ina tuku ai ki ʼonatou nima te kau Hakali pea mo natou fuli ʼae neʼe fakatahi mo natou. Neʼe natou kole ki te ʼAtua ke tokoni age ʼi te tau, pea neʼe ina tali tanatou kole he neʼe natou falala kia te ia.+
21 Neʼe natou toʼo ʼanatou faga manu, ia te ʼu kamelo ʼe 50 000, mo te ʼu ovi ʼe 250 000 mo te ʼu asino ʼe 2 000, pea mo puke ni hahaʼi* ʼe toko 100 000.
22 Neʼe kaugamalie te ʼu fili ʼae neʼe natou matehi, he neʼe tau te ʼAtua moʼoni maʼa natou.+ Pea neʼe natou maʼuʼuli leva ʼi te fenua ʼo ʼonatou fili ʼo kaku ki te temi ʼae neʼe ʼave popula ai natou.+
23 Neʼe maʼuʼuli te hologa ʼo te vaelua ʼo te telepi ʼo Manase+ ʼi te potu fenua ʼae ʼe kamata mai Pasani ʼo kaku ki Paale-helemoni, mo Senili pea mo te Moʼuga ʼo Helemoni.+ Neʼe natou kaugamalie ʼaupito.
24 Koʼeni te ʼu pule ʼo ʼonatou famili: Ko Efele, mo Sisei, mo Eliele, mo Aselieli, mo Selemia, mo Hotavia pea mo Satetiele. Neʼe ko he ʼu tagata tau malolohi mo iloa, pea neʼe ko te ʼu pule ʼo ʼonatou famili.
25 Kae neʼe mole natou nonofo agatonu ki te ʼAtua ʼo ʼanatou kui ʼo natou tauhi ki* te ʼu ʼatua ʼo te hahaʼi ʼo te fenua,+ ʼae neʼe fakaʼauha e te ʼAtua ʼi ʼonatou muʼa.
26 Koia, neʼe uga ai e te ʼAtua ʼo Iselaele ia Pulu, te Hau ʼo Asilia+ (ʼae ko Tilekate-pilenesele,+ te Hau ʼo Asilia) ke ina ʼave popula te kau Lupeni, mo te kau Kate pea mo te vaelua ʼo te telepi ʼo Manase ki Salaki, mo Sapole, mo Hala pea mo te potu fenua ʼo te vai tafe ʼo Kosani.+ ʼE kei natou nonofo ai pe ʼo kaku mai ki te ʼaho nei.
Nota
^ ʼE fakaʼuhiga kia Selopoamo 2.
^ Hep. nèphèsh. Vakaʼi Te ʼu Kupu.
^ Hep. “fai he ʼu aga heʼe ʼaoga mo.”
