Lua Samuele 11:1-27
11 ʼI te kamata ʼo te taʼu,* ʼi te temi ʼae ʼe olo ai te ʼu hau ki te tau, neʼe fekauʼi e Tavite ia Soape, mo ʼana tagata faifekau pea mo te kautau ʼo Iselaele katoa ke natou tamateʼi te kau Amone. Pea neʼe natou ʼa takai leva te kolo ko Lapa,+ kae neʼe nofo ia Tavite ʼi Selusalemi.+
2 ʼI te tahi afiafi, neʼe tuʼu ake ia Tavite mai tona palepale ʼo alu ʼo haʼele ʼi te fuga fale ʼo te fale hau. Pea neʼe sio mai ʼi te fuga fale ki te maʼanu ʼa he fafine, pea neʼe finemui ʼaupito ia.
3 Neʼe fekauʼi leva e Tavite he tahi ke alu ʼo fakalavelave pe ko ai te fafine ʼaia, pea neʼe fakaha age ki ai: “ ʼE ko Pate-sepa,+ te ʼofafine ʼo Eliame,+ pea ʼe ʼohoana ia mo Ulia,+ te tagata Heti.”+
4 Neʼe fekauʼi leva e Tavite he kau tagata ʼave logo ke natou ʼaumai ia ia.+ Neʼe haʼu ai kia Tavite, pea neʼe momoe leva ia Tavite mo ia.+ (Neʼe hoko te faʼahi ʼaia lolotoga te fakamaʼa e te fafine ia ia mai tona heʼe maʼa.*)+ Hili ʼaia, neʼe toe liliu ki tona ʼapi.
5 Neʼe faitama leva te fafine, pea neʼe ina fakaha kia Tavite: “Kua au faitama.”
6 Neʼe fakatotonu ai e Tavite kia Soape: “Fekauʼi mai ia Ulia, te tagata Heti.” Pea neʼe fekauʼi e Soape ia Ulia ke alu kia Tavite.
7 ʼI te tau mai ʼa Ulia, neʼe fehuʼi age e Tavite pe ʼe feafeaʼi ia Soape, ʼo feia mo te kau solia, pea ʼe fakaalu feafeaʼi te tau.
8 Pea neʼe ui leva e Tavite kia Ulia: “Alu ki tou ʼapi ʼo malolo.”* ʼI te mavae ʼa Ulia ʼi te fale hau, neʼe momoli age ki ai te meʼa ʼofa ʼa te hau.*
9 Kae neʼe moe ia Ulia ʼi te huʼaga ʼo te fale hau mo te ʼu tagata faifekau fuli ʼo tona ʼaliki, pea neʼe mole alu ia ki tona ʼapi.
10 Pea neʼe fakaha kia Tavite: “Neʼe mole alu ia Ulia ki tona ʼapi.” Neʼe ui e Tavite kia Ulia: “Neʼe mole koa la hoki ke tau mai pe? He koʼe neʼe mole ke alu ki tou ʼapi?”
11 Neʼe tali e Ulia kia Tavite: “ ʼE nofo te Aleka,+ mo Iselaele mo Suta ʼi te ʼu fale la, pea ʼe nofo toku ʼaliki ko Soape mo te ʼu tagata faifekau ʼo toku ʼaliki ʼi tuʼa. ʼE tonu anai koa ke au alu ki toku ʼapi, ʼo kai mo inu pea mo momoe mo toku ʼohoana?+ ʼE au tala moʼoni atu kia koe, ʼe mole au fai anai te faʼahi ʼaia!”
12 Neʼe ui leva e Tavite kia Ulia: “Toe nofo ʼi heni ʼi te ʼaho nei, pea apogipogi ʼe au tuku anai koe ke ke alu.” Neʼe nofo ai ia Ulia ʼi Selusalemi ʼi te ʼaho ʼaia pea mo te ʼaho ʼae neʼe hoa mai ki ai.
13 Pea neʼe fekauʼi e Tavite ke alu age, ke nā kakai mo iinu, ʼo ina fakainu ai ke konahia. Kae ʼi te afiafi, neʼe alu ia ʼo moe ʼi tona palepale mo te hahaʼi faifekau ʼo tona ʼaliki. Neʼe mole alu ia ki tona ʼapi.
14 ʼI te uhu ake, neʼe fai e Tavite he tohi kia Soape pea neʼe ʼave e Ulia te tohi ʼaia.
15 Neʼe tohi e Tavite: “Kotou tuku ia Ulia ʼi te ʼu ʼatu muʼa, ʼae ʼe fakamataku ʼaupito ai te tau. Pea kotou mavae kehe leva mai ia ia, ke tupu ai hona matehi.”+
16 Neʼe vakavakaʼi lelei e Soape te kolo, pea neʼe ina fakatuʼu leva ia Ulia ʼi te faʼahi ʼae neʼe ina iloʼi ʼe tutuʼu ai te kau tagata tau malolohi.
17 ʼI te ʼomai ʼa te kau tagata ʼo te kolo ʼo tauʼi ia Soape, neʼe mamate ʼihi tagata faifekau ʼa Tavite, pea neʼe kau ai ia Ulia, te tagata Heti.+
18 Neʼe fekauʼi leva e Soape he tagata ʼave logo ke ina fakamatala age kia Tavite te ʼu logo fuli ʼo ʼuhiga mo te tau.
19 Neʼe ina fakatotonu ki te tagata ʼave logo: “Ka ke ʼosi fakaha age ki te hau te ʼu logo fuli ʼo ʼuhiga mo te tau,
20 ʼe lagi ita anai pea ʼe ina fehuʼi atu anai: ‘He koʼe neʼe kotou fakaovi feia ki te kolo? Neʼe mole kotou iloʼi koa la ʼe natou fana mai anai he ʼu kauʼi nahau mai ʼoluga ʼo te kaupa?
21 Ko ai ʼae neʼe ina matehi ia Apimeleke,+ te foha ʼo Selupesete?+ Neʼe mole koa la ko he fafine ʼae neʼe ina li ifo ki ai he maka momosi fulumeto mai te kaupa, ʼo mate ai ʼi Tepesi? He koʼe koa neʼe kotou fakaovi feia ki te kaupa?’ Pea ʼe ke ui leva ki ai: ‘Kua toe mate foki mo tau tagata faifekau ko Ulia, te tagata Heti.’ ”
22 Neʼe alu ai leva te tagata ʼave logo pea neʼe ina fakaha kia Tavite te ʼu meʼa fuli ʼae neʼe fakatotonu age e Soape.
23 Neʼe ui e te tagata ʼave logo kia Tavite: “Neʼe malolohi age ʼanatou tagata ia matou, pea neʼe natou ʼomai ʼo tauʼi matou ʼi te tuʼa kolo. Kae neʼe matou tauʼi leva ia natou, ʼo natou holomuli ai ki te huʼaga ʼo te matapa ʼo te kolo.
24 Neʼe fana e te kau solia mai te kaupa ni kauʼi nahau ki ʼau tagata faifekau, pea ko ʼihi ʼo ʼau tagata faifekau neʼe mamate, siʼoku hau. Neʼe toe mate foki mo tau tagata faifekau ko Ulia, te tagata Heti.”+
25 Pea neʼe ui e Tavite ki te tagata ʼave logo ʼaia: “ ʼE tonu ke ke ui kia Soape: ‘ ʼAua naʼa ke tuʼania ʼo ʼuhiga mo te faʼahi ʼaia neʼe hoko, koteʼuhi ʼe tonu ke mamate ʼihi ʼi te tau. Ke hoko atu tau tauʼi malohi te kolo pea mo maumauʼi.’+ Pea ko koe, fakalotomalohiʼi ia Soape.”
26 ʼI te temi ʼae neʼe logo ai te ʼohoana ʼo Ulia kua mate ia Ulia tona ʼohoana, neʼe putu ai.
27 ʼI te ʼosi pe ʼo tona temi putu, neʼe fekauʼi e Tavite ke ʼaumai ki tona fale hau, pea neʼe liliu ai ko tona ʼohoana.+ Neʼe ina fanauʼi leva he tamasiʼi tagata. Kae neʼe mole leleiʼia e* Sehova te meʼa ʼae neʼe fai e Tavite.+
Nota
^ ʼE fakaʼuhiga ki te temi ʼae ʼe mātala ai te ʼu fisiʼi ʼakau.
^ Lagi hili te maligi ʼo tona fatu.
^ Hep. “ ʼo fufulu ʼou vaʼe.”
^ Peʼe “ ʼave te vahe ʼo te hau ki ai,” pea ʼe fakaʼuhiga ki te vahe ʼae ʼe ʼave e he tagata faifakaafe ki he tahi ʼe ina fakaʼapaʼapaʼi.
^ Hep. “neʼe kovi kia mata ʼo.”
