Lua Samuele 16:1-23
16 Neʼe fakalaka atu pe ia Tavite ʼi te tumutumu ʼo te moʼuga,+ kae haʼu ia Tesipa,+ te tagata gaue ʼa Mefiposete+ ʼo fakafelaveʼi mai kia ia, mo he hoaʼi asino, pea neʼe ina hili ki ai te ʼu foʼi pane ʼe 200, mo he ʼu foʼi keke vite ʼe 100, mo he ʼu foʼi keke ʼe 100 neʼe fai ʼaki te ʼu fuaʼi ʼakau ʼo te temi vela,* pea mo he ʼaiʼaga vino lahi.+
2 Pea neʼe ui e te hau kia Tesipa: “He koʼe neʼe ke ʼaumai te ʼu meʼa ʼaeni?” Neʼe tali e Tesipa: “Siʼoku hau, neʼe au ʼaumai te ʼu asino ke heheka ai te hahaʼi ʼo tou loto fale. Ko te ʼu foʼi pane mo te ʼu fuaʼi ʼakau ʼo te temi vela ke fafaga ʼaki te kau tagata tupulaga. Pea ko te vino ke fakainu ʼaki natou ʼae ʼe gaʼegagaʼe anai ʼi te toafa.”+
3 Neʼe ui age e te hau ki ai: “Pea ʼe ʼifea te foha* ʼo tou pule?”+ Neʼe tali e Tesipa ki te hau: “ ʼE nofo ia ʼi Selusalemi, he neʼe ina ui: ‘ ʼI te ʼaho nei, ʼe liufaki mai anai kia au e te hahaʼi ʼo Iselaele te pule fakahau ʼo taku tamai.’ ”+
4 Neʼe ui leva e te hau kia Tesipa: “Koʼeni, ko te ʼu meʼa fuli ʼa Mefiposete ʼe ʼa koe.”+ Neʼe tali e Tesipa: “ ʼE au tulolo ʼi ʼou muʼa. ʼOfa pe, siʼoku ʼaliki te hau, ke ke ʼofa ia au.”+
5 ʼI te temi ʼae neʼe tau ai te Hau ko Tavite ki Pasulimi, neʼe haʼu he tagata ʼo te famili ʼo Saulo, neʼe higoa ko Simei,+ te foha ʼo Kela pea neʼe laukovi leʼo lahi ʼi tana fakaovi mai ki ai.+
6 Neʼe ina tuki makaʼi ia Tavite, mo te hahaʼi faifekau fuli ʼa te Hau ko Tavite, mo te hahaʼi fuli pea mo te kau tagata malolohi ʼae neʼe ʼi tona faʼahi mataʼu mo tona faʼahi hema.
7 Neʼe ui e Simei ʼi tana laukovi ʼaia ki te hau: “Alu, alu, tagata faifakapo, tagata ʼe mole hona ʼuhiga!
8 ʼE toe liufaki atu kia koe e Sehova tau aga koteʼuhi neʼe ke matehi te famili ʼo Saulo, ʼae neʼe ke toʼo mai ai tona tuʼulaga hau. Kae ʼe foaki e Sehova te pule ki te ʼu nima ʼo Apesalone tou foha. Koia, ʼe hoko kia koe he ʼu malaʼia he ʼe ko koe ko he tagata faifakapo!”+
9 Pea neʼe ui e Apisai, te tama ʼa Teselusa,+ ki te hau: “Siʼoku ʼaliki te hau, ko ai koa te kuli mate ʼaia+ ke laukovi mai kia koe?+ Fakalelei siʼou loto, kae ke ke fakagafua mai ke au alu ʼo tuʼusi tona ʼulu.”+
10 Kae neʼe ui age e te hau: “ ʼU tama ʼa Teselusa,+ kotea tona ʼuhiga kia koulua pea mo au? Kolua tuku ke laukovi mai kia au,+ he neʼe ko Sehova ʼae neʼe ina ui age ki ai:+ ‘Laukovi kia Tavite!’ Pea ko ai koa ʼae ʼe feala ke ina ui: ‘He koʼe koa ʼe ke fai te faʼahi ʼaia?’ ”
11 Neʼe ui leva e Tavite kia Apisai mo ʼana hahaʼi faifekau fuli: “Ko toku foha totonu, ʼae neʼe au foaki ki ai te maʼuli, ʼe ina kumi ke ina matehi au,*+ pea ʼe feafeaʼi age la ki te tagata Pesamino ʼaeni!+ Kotou haganoa ki ai, tuku ke laukovi mai kia au, he neʼe ko Sehova ʼae neʼe ina fakatotonu age!
12 ʼE lagi sio mai anai ia Sehova ki toku mamahi.+ ʼI te ʼaho nei, ʼe laukovi leʼo lahi mai kia au, kae ʼe lagi toe liufaki mai anai e Sehova he ʼu tapuakina.”+
13 Neʼe hoko atu e Tavite mo ʼana tagata tanatou haʼele. Pea neʼe toe haʼele foki mo Simei ʼi te faʼahi ʼo te moʼuga, ʼo laukovi leʼo lahi kia Tavite,+ mo tuki makaʼi natou pea mo laku te efu kia natou.
14 ʼI te tau leva ʼa te hau mo te hahaʼi fuli ʼae neʼe fakatahi mo ia ki te potu ʼae neʼe natou olo ki ai, neʼe kua natou gaʼegagaʼe. Neʼe natou nonofo ai ʼo ʼai tanatou kiʼi malolo.
15 Lolotoga te temi ʼaia, neʼe tau atu ki Selusalemi ia Apesalone mo te ʼu tagata fuli ʼo Iselaele, pea neʼe fakatahi mo ia ia Asitofele.+
16 ʼI te temi ʼae neʼe haʼu ai ia Usai,+ te tagata Alaki,+ te kaumeʼa ʼo Tavite kia Apesalone, neʼe ui e Usai kia Apesalone: “Siʼoku Hau, ke fua manuʼia tau ʼafio!+ Siʼoku Hau ke fua manuʼia tau ʼafio!”
17 Pea neʼe ui e Apesalone kia Usai: “ ʼE ko tou ʼofa agatonu koa ʼaeni ʼe ke fakaha ki tou kaumeʼa? He koʼe neʼe mole ke alu mo tou kaumeʼa?”
18 Neʼe tali age e Usai kia Apesalone: “Kailoa ia, kae ʼe au kau mo ia ʼae neʼe filifili e Sehova, mo te hahaʼi ʼaeni pea mo te ʼu tagata fuli ʼo Iselaele. ʼE au nofo anai mo te tagata ʼaia.
19 Pea ʼe au toe ui: Ko ai ʼae ʼe tonu ke au fakalogo ki ai? ʼE mole koa la ko tona foha? ʼE au fakalogo anai kia koe ohage pe ko taku fakalogo ki tau tamai.”+
20 Pea neʼe ui leva e Apesalone kia Asitofele: “Tuku mai he tokoni.+ Kotea ʼae ʼe tonu ke tou fai?”
21 Neʼe ui e Asitofele kia Apesalone: “Alu ʼo momoe mo te ʼu fafine ʼo tau tamai,+ natou ʼae neʼe ina tuku ke tokakaga ki te fale hau.+ Pea ʼe iloʼi ai leva e Iselaele katoa kua fehiʼaʼinaʼi koe e tau tamai, pea ʼe lotomalohi ai anai ia natou ʼae ʼe lagolago kia koe.”
22 Koia, neʼe fakatuʼu ai he fale la maʼa Apesalone ʼi te fuga fale,+ pea neʼe momoe ia Apesalone mo te ʼu fafine ʼo tana tamai+ ia muʼa ʼo te kau Iselaele fuli.+
23 ʼI te temi ʼaia, ko te ʼu tokoni ʼae neʼe fai e Asitofele+ neʼe hage ko* te folafola ʼa te ʼAtua moʼoni. Neʼe fakaʼuhiga feia e Tavite mo Apesalone te ʼu tokoni fuli ʼae neʼe fai e Asitofele.
Nota
^ ʼE fakaʼuhiga tafito ki he ʼu fuaʼi fiku pea lagi mo he ʼu fuaʼi palema.
^ Peʼe “mokopuna.”
^ Hep. nèphèsh. Vakaʼi Te ʼu Kupu.
^ Peʼe “neʼe hage ko he tahi ʼe ina vakaʼi.”
