Lua Samuele 5:1-25
5 Ki muli age, neʼe ʼomai te ʼu telepi fuli ʼo Iselaele kia Tavite ʼi Hepelone,+ ʼo natou ui: “Koʼeni ʼe tou kaiga totonu.*+
2 ʼI te temi muʼa, ʼi te kei hau ʼa Saulo kia matou, neʼe ko koe ʼae neʼe ke taki ia Iselaele ki te ʼu tau.+ Pea neʼe ui atu e Sehova: ‘ ʼE ke tokaga anai ki taku hahaʼi ko Iselaele, pea ʼe ke liliu anai ko te tagata takitaki ʼo Iselaele.’ ”+
3 Neʼe ʼomai te kau takitaki fuli ʼo Iselaele ki te hau ʼi Hepelone, pea neʼe fai e te Hau ko Tavite he fuakava mo natou+ ʼi Hepelone ia muʼa ʼo Sehova. Neʼe natou fakanofo leva ia Tavite ko te hau ʼo Iselaele.+
4 Neʼe hau ia Tavite ʼi tona taʼu 30, pea neʼe hau lolotoga taʼu ʼe 40.+
5 ʼI Hepelone, neʼe hau lolotoga taʼu ʼe 7 mo mahina ʼe 6 ki Suta, pea neʼe hau lolotoga taʼu ʼe 33 ʼi Selusalemi+ ki Iselaele katoa mo Suta.
6 Neʼe alu leva te hau mo tana kau tagata ki Selusalemi ʼo tauʼi te kau Sepusi+ ʼae neʼe nonofo ʼi te fenua. Neʼe natou manukiʼi ia Tavite, ʼo natou ui: “ ʼE mole ke hu mai anai ki te kolo ʼaeni! Maʼia mo te kau kivi pea mo te kau ketu ʼe natou kapu anai koe.” Neʼe natou manatu: ‘ ʼE mole hu mai anai ia Tavite ki te kolo ʼaeni.’+
7 Kae neʼe toʼo e Tavite te kolo tau ko Sione, ʼae ʼe higoa ʼi te temi nei ko te Kolo ʼo Tavite.+
8 Neʼe ui e Tavite ʼi te ʼaho ʼaia: “Ke fakalaka ʼi te tafega vai ia natou ʼae ʼe natou ʼohofi te kau Sepusi, pea ke natou matehi ‘te kau ketu mo te kau kivi,’ ʼae ʼe fehiʼa ki ai ia Tavite!” Ko te tupuʼaga la ʼaia ʼo te ui: “ ʼE mole hu anai te kau kivi mo te kau ketu ki te loto fale.”
9 Neʼe nofo leva ia Tavite ʼi te kolo tau pea neʼe fakahigoa* ko te Kolo ʼo Tavite. Neʼe kamata laga leva e Tavite he ʼu kaupa mo he ʼu fale ʼi Milo*+ pea mo te tahi age ʼu potu ʼo te kolo.+
10 Neʼe liliu ai ia Tavite ʼo malohi ʼaupito,+ pea neʼe nofo ia Sehova, te ʼAtua ʼo te ʼatu kautau mo ia.+
11 Neʼe fekauʼi e Hilame,+ te Hau ʼo Tile he kau tagata ʼave logo ke olo kia Tavite, mo he kau tufuga ʼakau, mo he kau tufuga maka ke natou laga he ʼu kaupa, pea neʼe ina ʼave he ʼu ʼakau ko te sete.+ Neʼe natou kamata laga he ʼapi* maʼa Tavite.+
12 Neʼe iloʼi ai e Tavite neʼe fakatuʼu e Sehova ke malohi tona tuʼulaga fakahau ʼi Iselaele+ pea ke maʼoluga tona puleʼaga+ ʼuhi ko Iselaele, Tana hahaʼi.+
13 ʼI tana ʼosi mavae mai Hepelone ʼo alu ki Selusalemi, neʼe lahi te ʼu ʼohoana ʼo Tavite mo ʼana fafine.+ Neʼe toe lahi foki mo ʼona foha mo ʼona ʼofafine.+
14 Koʼeni te ʼu higoa ʼo natou ʼae neʼe tutupu ʼi Selusalemi: ko Samua, mo Sopeape, mo Natane,+ mo Salomone,+
15 mo Sipale, mo Elisua, mo Nefeke, mo Safia,
16 mo Elisama, mo Eliata pea mo Elifeleti.
17 ʼI te logo ʼa te kau Filisitini kua fakanofo hau ia Tavite ki Iselaele,+ neʼe natou ʼomai fuli ai ʼo tauʼi.+ ʼI te iloʼi e Tavite te faʼahi ʼaia, neʼe alu ki tona nonoʼaga ʼi te moʼuga.+
18 Neʼe ʼomai te kau Filisitini ʼo natou mavetevete ʼi te Potu Fenua Laulelei ʼo Lefaimi.+
19 Neʼe fehuʼi e Tavite kia Sehova:+ “ ʼE tonu koa ke au alu ʼo tauʼi te kau Filisitini? ʼE ke tuku mai anai koa ia natou ki ʼoku nima?” Neʼe tali e Sehova: “Alu, pea ʼe au tuku moʼoni atu anai te kau Filisitini ki ʼou nima.”+
20 Neʼe alu ai ia Tavite ki Paale-pelatesimi, ʼo matehi ai ia natou. Neʼe ina ui leva: “Ohage ko he kaupa neʼe maumauʼi e te ʼu vai, neʼe feia te ʼohofi e Sehova ʼoku fili+ ʼi ʼoku muʼa ʼo ina fakaʼaogaʼi au.” Koia, neʼe ina fakahigoaʼi te koga meʼa ʼaia ko Paale-pelatesimi.+
21 Neʼe liʼaki e te kau Filisitini ʼonatou taula ʼatua ʼi ai, pea neʼe toʼo e Tavite mo tana kau tagata te ʼu taula ʼatua ʼaia.
22 Ki muli age, neʼe toe ʼomai te kau Filisitini ʼo mavetevete ʼi te Potu Fenua Laulelei ʼo Lefaimi.+
23 Neʼe fakafehuʼi e Tavite ia Sehova, kae neʼe Ina tali age: “ ʼAua naʼa ke alu fakahagatonu kia natou. Kae alu ʼo tauʼi mai natou mai muli ʼo haga ki te ʼu fuʼu paka.
24 Ka ke logo ki he logoaʼa ohage ko te haʼele ʼa he kau solia ʼi te tumutumu ʼo te ʼu fuʼu paka, pea ke ʼohofi fakavilivili natou, he ʼe alu anai ia Sehova ʼi ʼou muʼa ʼo matehi te kautau ʼo te kau Filisitini.”
25 Neʼe mulimuli pe ia Tavite ki ai, ohage pe ko tona fakatotonu age e Sehova, pea neʼe ina matematehi te kau Filisitini+ mai Kepa+ ki Kesele.+
Nota
^ Hep. “ko matou ko tou hui pea mo tou kakano.”
^ Peʼe lagi “neʼe ina fakahigoaʼi.”
^ Ko he kupu Fakahepeleo ʼe ko tona fakaʼuhiga “fakafonu.”
^ Peʼe “fale hau.”
