Taʼaga Lea 8:1-36
8 ʼE mole koa la ko te poto ʼae ʼe pauʼi?
ʼE mole koa la ko te leʼo ʼo te ʼatamai?+
2 ʼI te ʼu potu maʼoluga,+ ʼi te ala,ʼE tuʼu ovi ki te magafa.
3 ʼE ovi ki te ʼu matapa ʼo te kolo,Ki ʼona huʼaga,Pea ʼe haga kalaga malohi:+
4 “Hahaʼi, ko koutou ʼae ʼe au pauʼi,ʼE au palalau atu kia koutou fuli!
5 Hahaʼi ʼae ʼe hoko tui, kotou ako te aga fakaʼeteʼete.+Hahaʼi agavale, ke kotou liliu ʼo ʼatamai.
6 Kotou fakalogo mai he ʼe maʼuhiga te meʼa ʼae ka au fakaha atu.ʼE puʼaki atu e ʼoku laugutu te meʼa ʼae ʼe totonu,
7 ʼE fanafana e toku gutu te moʼoni,Pea ʼe fehiʼa ʼoku laugutu ki te agakovi.
8 ʼE moʼoni fuli ʼaku palalau.
ʼE mole maʼu ai he kaka peʼe ko he loi.
9 ʼE mahino gafua ʼaku palalau fuli kia natou ʼae kua fakasiosio tonu,Pea ʼe totonu fuli ia kia natou ʼae kua natou maʼu te ʼatamai malama.
10 Kotou filifili taku fakatonutonu ʼi te siliva,Te ʼatamai malama ʼi te aulo ʼae neʼe fakamaʼa.+
11 ʼE lelei age te poto ʼi te ʼu feo.*ʼE lahi age tona maʼuhiga ʼi te ʼu koloa fuli.
12 Ko au te poto ʼe au nofo mo te aga fakaʼeteʼete,Kua au maʼu te ʼatamai malama mo te fealagia fakakaukau.+
13 Ko te manavasiʼi kia Sehova ko te fehiʼa ki te meʼa ʼae ʼe kovi.+
ʼE mole au leleiʼia te fiatuʼu, te fialahi,+ te mamiō kovi, pea mo te ʼu fasituʼu.+
14 ʼE au maʼu ni tokoni lelei pea mo te aga fakapotopoto,+ʼAʼaku te ʼatamai+ mo te malohi.+
15 ʼE hoko atu te pule ʼa te ʼu hau ʼuhi ko au,Pea ʼe fai e te hahaʼi maʼu tuʼulaga ni lao faitotonu.+
16 ʼE hoko atu te pule ʼa te kau tama ʼaliki ʼuhi ko au,Pea ʼe faifakamau te kau ʼaliki ʼi te faitotonu.
17 ʼE au ʼofa kia natou ʼae ʼe ʼoʼofa kia au,Pea ka natou kumi au ʼe natou maʼu au.+
18 ʼE au maʼu te koloa mo te kololia,Te ʼu koloa ʼae ʼe tologa, mo te faitotonu.
19 ʼE lelei age te meʼa ʼae ʼe feala ke au momoli ʼi te aulo ʼae kua fakamaʼa,Pea ʼe lelei age te meʼa ʼae ʼe feala ke au foaki ʼi te siliva ʼae ʼe lelei.+
20 ʼE maʼu te faitotonu ʼi te ala ʼae ʼe au haʼele ai,ʼEi, ʼe fakaʼapaʼapaʼi te meʼa ʼae ʼe totonu ʼi te ʼu ala ʼae ʼe au haʼele ai.
21 ʼE au foaki he tofiʼa lelei kia natou ʼae ʼe ʼoʼofa kia au,Pea ʼe au fakafonu ʼonatou fale tanakiʼaga meʼa.
22 Neʼe ko au ʼae neʼe ʼuluaki fakatupu e Sehova+ʼI ʼana gaue fuli ʼo te temi muʼa.+
23 Neʼe fakanofo au ki toku tuʼulaga talu mai fualoa,+Talu mai te kamata, ia muʼa ʼo te fakatuʼu ʼo te kele.+
24 Neʼe fanauʼi au kae neʼe heʼeki ʼi ai he tai loloto,+Pea neʼe heʼeki fofonu te ʼu matapuna vai.
25 Neʼe fanauʼi au ʼi muʼa ʼo te fakatuʼu ʼo te ʼu kiʼi moʼuga,ʼI muʼa ʼo te faʼu ʼo te ʼu moʼuga lalahi,
26 Kae neʼe heʼeki ina fakatupu te kele mo ʼona fenua laulelei,Peʼe ko he potu kele.
27 Neʼe kua au nofo mo ia ʼi tana teuteuʼi te lagi.+ʼI tana tohi he laini ʼi te vaha ʼo te lagi mo te tai,+
28 ʼI tana hili te ʼu ʼao ki ʼoluga,ʼI tana fakatupu te ʼu matapuna vai mai te ʼu potu loloto ʼo te kele,
29 ʼI tana fakatotonu ki te taiKe mole fakalaka ʼi te tuʼakoi ʼae neʼe ina fakatuʼu,+ʼI tana fai te ʼu fakatafito ʼo te kele,
30 Neʼe au gaue ai ʼi ʼona tafa ohage ko he tufuga faiva.+
Neʼe ina pele ʼosi au+ ʼi te ʼaho fuli.Neʼe au fiafia tuʼumaʼu pe ʼi ʼona muʼa.+
31 Neʼe au fakafiafia ʼi te kele ʼae kua feala tona nofoʼi,Pea neʼe makehe toku ʼofa ki te ʼu foha ʼo te tagata.
32 Siʼoku ʼu foha, ʼi te temi nei, kotou fakalogo mai,He ʼe manuʼia ai ia natou ʼae ʼe natou mulimuli ki ʼaku fakatotonu.
33 Kotou fakalogo ki te fakatonutonu+ ke kotou fakapotopoto ai,ʼAua naʼa kotou meʼa noaʼi ʼi he temi.
34 Manuʼia te tagata ʼae ʼe fia fakalogo maiPea ʼe haʼu ʼi te ʼaho fuli ki toku ʼapi, ʼi te mafoata,ʼO talitali ʼi toku huʼaga.
35 ʼE maʼuli anai ia ia ʼae ʼe ina maʼu au,+Pea ʼe ʼofa ai ia Sehova.
36 ʼE tuʼutamakiʼia anai ia ia ʼae ʼe mole ina tokagaʼi au,Pea ko natou ʼae ʼe natou fehihiʼa ia au ʼe natou leleiʼia te mate.”+
Nota
^ Vakaʼi Te ʼu Kupu.
