Tuʼi Fakamau 21:1-25
-
Te fakatuʼutuʼu ke mole puli te telepi ʼo Pesamino (1-25)
21 Neʼe fai e te kau tagata ʼo Iselaele te fakapapau ʼaeni ʼi Misipa:+ “ ʼE mole foaki anai e he tahi ia tatou tona ʼofafine ke ʼohoana mo he tagata Pesamino.”+
2 Koia neʼe olo ai te kau Iselaele ki Petele+ ʼo nonofo ai ia muʼa ʼo te ʼAtua moʼoni ʼo kaku ki te afiafi. Neʼe natou kalaga mo fetagihi ʼi tonatou lotomamahi.
3 Neʼe natou ui: “Sehova e, te ʼAtua ʼo Iselaele, he koʼe neʼe hoko te faʼahi ʼaia ʼi Iselaele? He koʼe ʼe puli anai he telepi ʼi te ʼaho nei ʼi te hahaʼi ʼo Iselaele?”
4 ʼI te ʼaho ake, neʼe natou ʼaʼala uhuuhu leva ʼo laga he ʼaletale ke momoli ai ni holokoseta pea mo he ʼu molaga ʼo te tokalelei.+
5 Pea neʼe fehuʼi e te kau Iselaele: “Ko te telepi fea ʼi te ʼu telepi fuli ʼo Iselaele neʼe mole haʼu ʼo fakatahi mo tatou ia muʼa ʼo Sehova?” Neʼe natou fai te fehuʼi ʼaia he neʼe natou fakapapau ʼe matehi anai ia natou ʼae ʼe mole hake ki Misipa ʼo tutuʼu ia muʼa ʼo Sehova.
6 Neʼe lotomamahi te kau Iselaele ʼuhi ko te meʼa ʼae neʼe hoko ki ʼonatou tehina ʼo te telepi ʼo Pesamino. Neʼe natou ui: “ ʼI te ʼaho nei, kua puli leva he telepi ʼi Iselaele.
7 Kotea ʼae ʼe feala ke tou fai ke maʼu ai e te ʼu tagata ʼo Pesamino ʼae ʼe kei maʼuʼuli honatou ʼu ʼohoana? Neʼe kua tou fakapapau foki ia muʼa ʼo Sehova+ ʼe mole tou foaki age anai ʼotatou ʼofafine ke ʼohoana mo natou.”+
8 Neʼe natou fehuʼi: “Ko te telepi fea ʼi te ʼu telepi fuli ʼo Iselaele ʼae neʼe mole alu ʼo tuʼu ia muʼa ʼo Sehova, ʼi Misipa?”+ Neʼe iloʼi leva neʼe mole alu he tahi ʼi te kolo ʼo Sapesi-kileate ki te nofoʼaga ʼae neʼe fakatahitahi ai te hahaʼi.
9 ʼI te temi ʼae neʼe lau ai te hahaʼi, neʼe iloʼi ai neʼe mole he tahi mai Sapesi-kileate.
10 Koia neʼe fekauʼi ai e te hahaʼi ʼo Iselaele ke olo ki ai he kau solia malolohi ʼe toko 12 000. Pea neʼe natou fai age te fakatotonu ʼaeni kia natou: “Kotou olo ʼo matehi ʼaki te heleta te hahaʼi ʼo Sapesi-kileate, ʼo feia mo te hahaʼi fafine pea mo te ʼu fanau.+
11 Koʼeni te meʼa ʼae ka kotou fai: ʼE kotou matehi anai te ʼu tagata fuli, ʼo feia mo te ʼu fafine fuli ʼae neʼe momoe mo he tagata.”
12 Pea neʼe natou maʼu ʼi te hahaʼi ʼo Sapesi-kileate he ʼu taʼahine kei nonofo taupoʼou ʼe toko 400, ʼei, neʼe heʼeki momoe mo he tagata. Neʼe natou ʼave ai natou ki te nofoʼaga ʼi Silo,+ ʼae ʼe tuʼu ʼi te fenua ʼo Kanaane.
13 Neʼe fekauʼi leva e te hahaʼi ʼo Iselaele he ʼu tagata ʼave logo ke olo ki te ʼu tagata ʼo Pesamino, ʼae neʼe nonofo ʼi te fuʼu maka ʼo Limoni.+ Neʼe natou olo ʼo kumi te tokalelei mo natou.
14 Pea neʼe toe liliu mai leva te ʼu tagata ʼo Pesamino kio natou. Neʼe foaki kia natou te ʼu taʼahine ʼo Sapesi-kileate ʼae neʼe mole matehi.+ Kae neʼe mole hokohoko leva te ʼu tagata fuli.
15 Neʼe lotomamahi te hahaʼi ʼuhi ko te meʼa ʼae neʼe hoko ki te telepi ʼo Pesamino,+ he neʼe fakatupu e Sehova he maveuveu ʼi te ʼu telepi ʼo Iselaele.
16 Neʼe ui e te kau takitaki ʼo te hahaʼi ʼo Iselaele: “Neʼe kua matehi te hahaʼi fafine fuli ʼo te telepi ʼo Pesamino. Koia, kotea ʼae ʼe feala ke tou fai ke maʼu ai e te ʼu tagata ʼae ʼe kei maʼuʼuli honatou ʼu ʼohoana?”
17 Neʼe natou toe ui: “ ʼE tonu ke taupau e te ʼu tagata ʼaia ʼo Pesamino tonatou tofiʼa, ke mole puli ai he telepi ʼi Iselaele.
18 Kae ʼe mole feala ke tou foaki age ʼotatou ʼofafine ke ʼohoana mo natou, koteʼuhi neʼe fai e te hahaʼi ʼo Iselaele te fakapapau ʼaeni: ‘Ke malaʼia ia ia ʼae ʼe ina foaki hona ʼofafine ke ʼohoana mo he tagata Pesamino.’ ”+
19 Neʼe natou ui leva: “Koʼeni ʼe fai ʼi te taʼu fuli he ʼaho lahi maʼa Sehova ʼi Silo.+ ʼE tuʼu te kolo ʼaia ʼi te potu noleto ʼo Petele, ʼi te potu esite ʼo te ala lahi ʼae ʼe alu mai Petele ki Sekemi pea ʼi te potu saute ʼo Lepone.”
20 Pea neʼe natou fakatotonu ki te ʼu tagata ʼo Pesamino: “Kotou olo ʼo fenonoʼi ʼi te ʼu gaueʼaga vite.
21 ʼE ʼomai anai te ʼu taʼahine ʼo Silo mai tonatou kolo ʼo olo ʼo memeʼe. Pea ka kotou sisio kia natou, ʼe kotou mavae anai mai te ʼu gaueʼaga vite ʼo tahi puke hana fafine ke ʼohoana mo ia. Pea ʼe kotou toe liliu anai ki te fenua ʼo Pesamino.
22 Pea kapau ʼe ʼomai ʼanatou tamai peʼe ko ʼonatou tokolua ʼo meo mai kia matou, ʼe matou ui age anai: ‘Fakalelei siʼokotou loto, kae ke kotou lotomahino. ʼI te ʼu tau ʼae neʼe matou fai, neʼe mole feʼauga te ʼu fafine ʼae neʼe puke ke tahi maʼu e te tagata hana fafine.+ Pea neʼe mole feala ke kotou foaki age honatou ʼu ʼohoana naʼa tukugakoviʼi ai koutou.’ ”+
23 Neʼe mulimuli leva ki ai te ʼu tagata ʼo Pesamino. Neʼe natou tahi ʼave ai tana fafine ʼi te ʼu taʼahine ʼae neʼe memeʼe. Pea neʼe natou toe liliu ki te fenua ʼae neʼe ko tonatou tofiʼa. Neʼe natou toe laga leva ʼonatou kolo+ pea mo nonofo ai.
24 ʼI te temi ʼaia, neʼe tahi mavete te kau Iselaele ʼo toe liliu ki tona telepi mo tona famili. Neʼe natou mavae mai ai, ʼo tahi liliu ki te fenua ʼae neʼe ko tona tofiʼa.
25 ʼI te temi ʼaia, neʼe mole he hau ʼi Iselaele.+ Neʼe tahi fai pe e te hahaʼi te meʼa ʼae neʼe natou manatu ʼe lelei.*
Nota
^ Peʼe “te meʼa ʼae ʼe lelei ki ʼonatou mata.”
