Tuʼi Fakamau 4:1-24
4 ʼI te ʼosi mate ʼa Euti, neʼe toe fai pe e te kau Iselaele te meʼa ʼae ʼe kovi kia mata ʼo Sehova.+
2 Neʼe tuku* leva natou e Sehova ki te ʼu nima ʼo te hau ʼo Kanaane ko Sapini,+ ʼae neʼe pule ʼi Atesoli. Ko te pule ʼo tana foʼi kautau neʼe ko Sisela, pea neʼe nofo ʼi Aloseti+ ʼo te ʼu puleʼaga.*
3 Neʼe tagi leva te kau Iselaele kia Sehova ke tokoni age.+ Neʼe maʼu e Sapini* ʼana saliote ʼe 900 neʼe fakapipiki ai he ʼu hele ʼi te ʼu foʼi teka,*+ pea neʼe kovi ʼosi tana gaohi koviʼi te kau Iselaele+ lolotoga taʼu ʼe 20.
4 ʼI te temi ʼaia, neʼe fakamauʼi e Tepola, te fafine polofeta,+ te ʼohoana ʼo Lapitoti ia te kau Iselaele.
5 Neʼe ko tana agamahani te heka ʼi te lalo fuʼu palema ʼo Tepola, ʼi te vaha ʼo Lama+ mo Petele,+ ʼi te potu moʼugaʼia ʼo Efalaimi. Neʼe ʼomai te kau Iselaele kia ia ke ina fakaha age te ʼu tonu ʼa te ʼAtua.
6 Neʼe ina fekauʼi he tagata ʼave logo ke alu ki Ketesi-nefetali+ ʼo kumi mai ia Palake,+ te foha ʼo Apinoame. Pea neʼe ina ui age kia Palake: “Neʼe fakatotonu e Sehova, te ʼAtua ʼo Iselaele: ‘Alu ki* te Moʼuga ʼo Tapole. Ke ke ʼave ni tagata ʼe 10 000 mai te ʼu telepi ʼo Nefetali pea mo Sepulone.
7 ʼE au ʼaumai anai kia koe, ʼi te vai tafe* ʼo Kisone,+ ia Sisela, te pule ʼo te foʼi kautau ʼa Sapini, mo ʼana saliote pea mo ʼana tagata solia. Pea ʼe au tuku anai ia ia ki ʼou nima.’ ”+
8 Kae neʼe ui age e Palake ki ai: “Kapau ʼe ke haʼu mo au, pea ʼe au alu anai. Kae kapau ʼe mole ke haʼu mo au, pea ʼe mole au alu anai.”
9 Neʼe ina tali age: “ ʼE au alu anai mo koe. Kae ʼe mole ke maʼu anai he kololia ʼi te tau ʼaeni ʼe ke alu ʼo fai, koteʼuhi ʼe tuku* anai e Sehova ia Sisela ki te ʼu nima ʼo he fafine.”+ Pea neʼe tuʼu ake ia Tepola ʼo alu mo Palake ki Ketesi.+
10 Neʼe pauʼi e Palake te ʼu telepi ʼo Sepulone pea mo Nefetali+ ke natou fakatahitahi ki Ketesi. Pea neʼe mulimuli ia ia ni tagata ʼe 10 000. Neʼe toe alu foki ia Tepola mo ia.
11 Ko Hepele, te tagata Kenite neʼe mavae kehe mai te tahi kau Kenite,+ ia te hologa ʼo Opapi, te tamai ʼo te ʼohoana ʼo Moisese.+ Pea neʼe ina fakatuʼu tona fale la ʼo ovi ki te fuʼu ʼakau lahi ʼo Sananimi, ʼae ʼe ovi ki Ketesi.
12 Neʼe fakaha age kia Sisela kua hake ia Palake, te foha ʼo Apinoame, ki te Moʼuga ʼo Tapole.+
13 Neʼe fakatahiʼi atu aipe e Sisela ʼana saliote fuli, te ʼu saliote ʼe 900 neʼe fakapipiki ai he ʼu hele ʼi te ʼu foʼi teka,* ʼo feia mo ʼana solia fuli ʼae neʼe mavae mo ia mai Aloseti ʼo te ʼu puleʼaga. Neʼe natou olo ai ki te vai tafe ʼo Kisone.+
14 Pea neʼe ui leva e Tepola kia Palake: “Tuʼu ake, koteʼuhi ʼe tuku atu anai e Sehova ia Sisela ki ʼou nima ʼi te ʼaho nei. ʼEi, ʼe haʼele ia Sehova ʼi ʼou muʼa.” Neʼe hifo ai ia Palake mai te Moʼuga ʼo Tapole pea neʼe mulimuli ia ia te ʼu tagata ʼe toko 10 000.
15 Pea neʼe fakatupu e Sehova he maveuveu+ ʼi te foʼi kautau katoa ʼa Sisela pea mo ʼana tagata taki saliote fuli, ia muʼa ʼo Palake. Neʼe hifo leva ia Sisela mai tana saliote ʼo hola.
16 Neʼe tuli e Palake te ʼu saliote mo te kau solia ʼo kaku ki Aloseti ʼo te ʼu puleʼaga. Neʼe matehi fuli ai te kau solia ʼa Sisela ʼaki te heleta, ʼei, neʼe mole he tahi neʼe hao.+
17 Kae neʼe hola lalo ia Sisela ki te fale la ʼo Saele,+ te ʼohoana ʼo Hepele,+ te tagata Kenite, he neʼe tokalelei ia te hau ʼo Atesoli ko Sapini+ mo te famili ʼo Hepele, te tagata Kenite.
18 Pea neʼe alu ia Saele ʼo fakafelaveʼi kia Sisela. Pea neʼe ina ui age: “Ulu mai, siʼoku ʼaliki, ulu mai. ʼAua naʼa ke mataku.” Neʼe ulu ai ki tona fale la pea neʼe fakakafuʼi ia ia e Saele.
19 Pea neʼe ina ui age ki ai: “Fakalelei siʼou loto, ke ke foaki mai he moʼi vai ke au inu, he ʼe au fia inu.” Neʼe ina avahi ai he ʼaiʼaga* huʼa pipi ʼo ina foaki age ke inu,+ pea neʼe ina toe fakakafuʼi leva ia ia.
20 Neʼe ui age e Sisela ki ai: “Ke ke tuʼu ʼi te huʼaga ʼo te fale la, pea kapau ʼe haʼu he tahi ʼo fehuʼi atu: ‘ ʼE ʼi ai koa he tagata ʼi heni?’ pea ke ke tali age: ‘Kailoa!’ ”
21 Kae neʼe toʼo e Saele, te ʼohoana ʼo Hepele, ia he faʼo ʼo te fale la pea mo he hamale. Pea neʼe fakaovi fakalogologo kia Sisela ʼo tutuki te faʼo ki ʼona niania, ʼo ulu ai te faʼo ki te kele, kae neʼe lolotoga moe mate ia Sisela he neʼe kua gaʼegaʼe. Pea neʼe mate ai.+
22 Pea neʼe tau mai leva ia Palake ʼae neʼe ina tuli ia Sisela. Neʼe alu ia Saele ʼo fakafelaveʼi kia ia, pea neʼe ina ui age: “Haʼu, pea ʼe au fakaha atu anai te tagata ʼae ʼe ke kumi.” Neʼe ulu ai ki tona fale la, pea neʼe sio ki te tuku mai ʼa Sisela kua mate, mo te faʼo ʼo te fale la kua tutuki ʼi ʼona niania.
23 Koia, ʼi te ʼaho ʼaia, neʼe tuku ai e te ʼAtua ke malo te kau Iselaele ʼi te hau ʼo Kanaane ko Sapini.+
24 Neʼe ʼaʼasili malohi ai te tauʼi ʼo te hau ʼo Kanaane ko Sapini e te kau Iselaele,+ ʼo kaku pe ki tanatou hoki matehi ia ia.+
Nota
^ Hep. “fakatau.”
^ Peʼe “Aloseti-ha-koimi.”
^ Hep. “Neʼe ina maʼu.”
^ Peʼe “neʼe fakapipiki ai te ʼu hele piko.” Hep. “saliote ukamea.”
^ Peʼe “Fakaʼatu ʼau tagata ki te tau ʼi.”
^ Vakaʼi Te ʼu Kupu.
^ Hep. “fakatau.”
^ Peʼe “neʼe fakapipiki ai te ʼu hele piko.” Hep. “saliote ukamea.”
^ Ko he taga neʼe fai ʼaki te kiliʼi manu.
