Esekiele 29:1-21
29 Neʼe palalau mai ia Sehova ʼi te hogofulu taʼu, ʼi te ʼaho 12 ʼo te mahina hogofulu, ʼo ina ui:
2 “Foha ʼo te tagata, haga kia Falaone te hau ʼo Esipito, mo fakakikite te malaʼia ʼae ka to kia ia, ʼei, ki Esipito katoa pea mo ia.+
3 ʼE ke fakaha age anai ki ai: ‘Koʼeni te folafola ʼa te Tuʼi ʼAliki ko Sehova:
“ ʼE au tauʼi anai ia koe, Falaone te hau ʼo Esipito,+Ia koe ʼae ko te manu lahi ʼo te tai ʼae ʼe takoto ʼi te ʼu vai ʼo te Nile,*+Ia koe ʼae ʼe ke ui: ‘ ʼAʼaku te Nile!
Neʼe au fai maʼaku!’+
4 ʼEi, ʼe au ʼai anai ni mātaʼu ki tou gutu mo fakapipiki ki ʼou ʼuno te ʼu ika ʼo te Nile.
ʼE au fakamavae anai koe ʼi te Nile mo te ʼu ika fuli ʼo te Nile ʼae ʼe pipiki ki ʼou ʼuno.
5 ʼE au liʼaki anai koe ʼi te toafa, ia koe pea mo te ʼu ika fuli ʼo te Nile.
ʼE ke to anai ki he koga meʼa lauʼatea, ʼe mole tae anai peʼe tanaki koe.+
ʼE au foaki anai koe ko he meʼa kai ki te ʼu manu fekai mo te ʼu manulele.+
6 ʼE iloʼi moʼoni leva e te hahaʼi fuli ʼo Esipito ko au ia Sehova,Koteʼuhi neʼe natou hage ko te luna moamoa,* neʼe mole ko he tokoni malohi ki te kau Iselaele.+
7 Neʼe tataʼo koe ʼi te temi ʼae neʼe puke ai e te kau Iselaele tou nima,Pea neʼe lavelavea ʼonatou fuga ʼuma ʼuhi ko koe.
Neʼe ke fasi ʼi te temi ʼae neʼe natou falanaki ai kia koe,Pea neʼe natou fetoki ʼuhi ko koe.”+
8 “ ‘Koia koʼeni te folafola ʼa te Tuʼi ʼAliki ko Sehova: “ ʼE au uga anai ni tagata ke natou tauʼi koe ʼaki te heleta,+ pea ʼe au toʼo anai mai io koe te tagata mo te manu.
9 ʼE tuʼu lavaki anai mo maumau ia Esipito.+ Pea ʼe natou iloʼi moʼoni anai ko au ia Sehova koteʼuhi neʼe ke* ui: ‘ ʼAʼaku te Nile! Ko au ʼae neʼe au fai!’+
10 Koia ʼe au tauʼi anai ia koe pea mo te Nile. ʼE maumau anai mo moamoa ia Esipito, ko he toafa+ mai Miketoli+ ki Siene,+ ʼi te tuʼakoi ʼo Etiopea.
11 ʼE mole fakalaka ai anai he tagata peʼe ko he manu+ pea ʼe mole nofoʼi anai ia taʼu ʼe 40.
12 ʼE au fakaliliu anai te fenua ʼo Esipito ke tuʼu lavaki ʼo kovi age ʼi te ʼu fenua fuli ʼae, pea ʼe toe feia pe anai mo ʼona kolo ia taʼu ʼe 40.+ ʼEi, ʼe au fakamavetevete anai te kau Esipito ʼi te ʼu puleʼaga pea mo te ʼu fenua.”+
13 “ ‘Pea koʼeni te folafola ʼa te Tuʼi ʼAliki ko Sehova: “ ʼE au fakatahiʼi anai te kau Esipito ʼi taku toe fakaliliu mai natou mai te hahaʼi ʼae neʼe au fakamavetevete ai natou, moka ʼosi taʼu ʼe 40.+
14 ʼE au ʼaumai anai te kau pilisoni ʼo Esipito ki tonatou fenua, ia Patolosi.+ Pea ʼe natou liliu ai anai ko he puleʼaga ʼe mole faʼa maʼuhiga.
15 ʼE mole malohi anai ia Esipito ohage ko te ʼu puleʼaga ʼae, pea ʼe mole toe pule anai ki he tahi age ʼu puleʼaga.+ ʼEi, ʼe au fakavaivaiʼi anai ia ia ʼo mole kei feala ai ke ina puleʼi he tahi ʼu puleʼaga.+
16 ʼE mole toe falala anai te hahaʼi ʼo Iselaele ki ai ʼi he temi.+ Kae ʼe natou manatuʼi anai te hala ʼae neʼe natou fai ʼi tanatou kole tokoni ki ai. Pea ʼe iloʼi moʼoni anai e te kau Iselaele ko au ia te Tuʼi ʼAliki ko Sehova.” ’ ”
17 Neʼe palalau mai leva ia Sehova ʼi te 27 taʼu, ʼi te ʼuluaki ʼaho ʼo te ʼuluaki mahina, ʼo ina ui:
18 “Foha ʼo te tagata, neʼe fakamaʼua e te Hau ʼo Papiloni ia Nepukanesa+ he gaue kinakina ki tana kautau ʼi tanatou tauʼi ia Tile.+ Neʼe ʼulu tula fuli ʼana kau solia pea neʼe lavelavea ʼonatou fuga ʼuma. Kae neʼe mole totogi ia ia peʼe ko tana kautau ʼi tanatou kinakina ʼae ʼi te tauʼi ʼo Tile.
19 “Koia koʼeni te folafola ʼa te Tuʼi ʼAliki ko Sehova: ‘ ʼE au foaki anai ia Esipito ki te Hau ʼo Papiloni ia Nepukanesa.+ ʼE ina ʼave anai te koloa, ʼei, ʼe ina kaihaʼa anai he toe koloa lahi. Ko te totogi ʼaia ʼo tana kautau.’
20 “ ‘ ʼE au foaki age anai maʼa ia ia Esipito moʼo totogi tanatou kinakina ʼae ʼi te tauʼi ʼo te kolo* koteʼuhi neʼe natou tau maʼaku,’+ ko te ui ʼaia ʼa te Tuʼi ʼAliki ko Sehova.
21 “ ʼI te ʼaho ʼaia, ʼe au fakahomo anai he tala maʼa* te hahaʼi ʼo Iselaele+ pea ko he faigamalie ʼaia ke ke palalau kia natou. Pea ʼe natou iloʼi moʼoni anai ko au ia Sehova.”
Nota
^ ʼI te vaega ʼaeni mo te ʼu vaega ʼae ka hoa mai, ko te kupu “Nile” ʼe fakaʼuhiga ki te vai tafe mo ʼona tafega vai.
^ Hep. “kaho.”
^ Hep. “ina.”
^ ʼE fakaʼuhiga ki Tile.
^ Peʼe “ ʼe au fakamalohiʼi anai.”
