Te ʼu Gaue ʼa Te Kau Apositolo 23:1-35
23 Neʼe sioʼi fakamamaʼu e Paulo te Sanetualio* pea neʼe ina ui: “ ʼU tagata, ʼu tehina, ʼo kaku mai ki te ʼaho ʼaeni mo taku maʼuli mo he leʼo ʼo loto ʼe maʼa+ ia muʼa ʼo te ʼAtua.”
2 Kae neʼe fakatotonu e te pelepitelo lahi ko Ananiasi kia natou ʼae neʼe tutuʼu ovi kia Paulo, ke natou pāki tona gutu.
3 Neʼe ui e Paulo ki ai: “ ʼE tauteaʼi anai koe e te ʼAtua, tagata malualoi.* ʼE ke heka koa ʼo fakamauʼi au ʼo mulimuli ki te Lao pea ke toe maumauʼi foki te Lao ʼi tau fakatotonu ʼae ke pāki au?”
4 Neʼe ui e natou ʼae neʼe tutuʼu ovi age ki ai: “ ʼE ke leakovi koa ki te pelepitelo lahi ʼa te ʼAtua?”
5 Pea neʼe ui e Paulo: “ ʼU tehina, neʼe mole au iloʼi ʼe ko te pelepitelo lahi. Koteʼuhi kua tohi: ‘ ʼE mole tonu ke ke leakoviʼi he pule ʼo tau hahaʼi.’ ”+
6 Neʼe iloʼi e Paulo, ʼi te Sanetualio, neʼe ʼi ai te kau Satuseo pea mo te kau Faliseo. Koia neʼe kalaga ai: “ ʼU tagata, ʼu tehina, ko au ko he Faliseo,+ foha ʼo te kau Faliseo. ʼE fakamauʼi au ʼuhi ko taku tui ki te fakatuʼuake ʼo te kau mate.”
7 ʼUhi ko tana palalau ʼaia, neʼe hoko ai te maveuveu ʼi te kau Faliseo mo te kau Satuseo, pea neʼe vaelua ai leva te fono.
8 Koteʼuhi ʼe ui e te kau Satuseo ʼe mole he fakatuʼuake, mo he ʼu ʼaselo pea mo he ʼu laumalie kae ʼe tala e te kau Faliseo ʼe moʼoni te ʼu faʼahi ʼaia.+
9 Neʼe hoko ai te toe maveuveu lahi, pea neʼe tutuʼu ake ʼihi sekelipa neʼe kau ki te faʼahi ʼo te kau Faliseo pea natou fakafeagai malohi, ʼo ui: “ ʼE mole matou maʼu he hala ʼi te tagata ʼaeni, kae kapau la neʼe palalau age ki ai he laumalie peʼe ko he ʼaselo+ . . .”
10 ʼI te ʼaʼasili kovi ʼo te maveuveu, neʼe tuʼania te kamutoa naʼa natou matehi ia Paulo. Koia, neʼe ina fakatotonu ki te kau solia ke natou hihifo ʼo toʼo ia ia mai ia natou pea mo ʼave ki te fale solia.
11 Kae ʼi te po ʼaia, neʼe tuʼu ia te ʼAliki ʼi ʼona tafa ʼo ina ui: “Lotomalohi!+ Koteʼuhi, ohage pe ko tau foaki he fakamoʼoni katoa ʼo ʼuhiga mo au ʼi Selusalemi, ʼe tonu ke ke toe foaki foki he fakamoʼoni ʼi Loma.”+
12 ʼI te uhu ake, neʼe fonofono te kau Sutea pea natou fakapapau* ke mole natou kakai mo iinu mo kapau heʼeki natou matehi ia Paulo.
13 Neʼe ko te ʼu tagata ʼe toko 40 tupu ʼae neʼe fonofono pea mo fai te fakapapau ʼaia.
14 Neʼe olo te ʼu tagata ʼaia ki te kau pelepitelo pule mo te kau takitaki Sutea ʼo natou ui: “Kua matou fakapapau ke mole matou kakai mo kapau heʼeki matou matehi ia Paulo.
15 Koia ʼi te temi nei, ʼe tonu kia koutou mo te Sanetualio ke kotou fakaha ki te kamutoa ke ina fakahifo mai ia ia he ʼe kotou toe fia vakavakaʼi lelei tona aluʼaga. Kae ʼi muʼa ʼo tana tau mai, ʼe matou fakaatalitali anai ke matou matehi ia ia.”
16 Kae neʼe logo ia te tama ʼa te tokolua ʼo Paulo ki tanatou fakatuʼutuʼu, pea neʼe hu ki te fale solia ʼo fakamatala kia Paulo.
17 Neʼe pauʼi leva e Paulo te tahi ʼo te ʼu pule solia ʼo ina ui age: “ ʼAve te tama ʼaeni ki te kamutoa, he ʼe ʼi ai te meʼa ʼe ina fia fakaha age ki ai.”
18 Neʼe ina taki ia ia ki te kamutoa ʼo ina ui: “Neʼe pauʼi au e te tagata pilisoni ko Paulo pea ina kole mai ke au ʼaumai te tama ʼaeni kia koe, koteʼuhi ʼe ʼi ai te meʼa ʼe ina fia fakaha atu.”
19 Neʼe toʼo e te kamutoa tona nima ʼo nā olo ki he faʼahi ʼateaina, pea neʼe ina fehuʼi age: “Kotea ʼae ʼe ke fia fakaha mai?”
20 Neʼe ina tali: “Kua tonu tahi te kau Sutea ke natou kole atu ke ke fakahifo age apogipogi ia Paulo ki te Sanetualio, takua ke natou iloʼi he tahi age ʼu faʼahi ʼo ʼuhiga mo tona aluʼaga.+
21 Kae ʼaua naʼa ke tui kia natou, koteʼuhi ko ʼanatou tagata ʼe toko 40 tupu ʼe natou fakaatalitali ke natou ʼohofi ia ia, pea neʼe natou fakapapau ke mole natou kakai mo iinu mo kapau ʼe heʼeki natou matehi ia ia.+ ʼE natou teuteu nei mo fakaatalitali ke ke tali tanatou kole.”
22 Neʼe tuku leva e te kamutoa te tama ke alu, ʼi tana ʼosi fakatotonu age: “ ʼAua naʼa ke fakamatala ki he tahi neʼe ke fakaha mai te meʼa ʼaeni.”
23 Pea neʼe ina pauʼi te ʼu pule solia ʼe toko lua, ʼo ina ui age: “Kolua teuteuʼi he kau solia ʼe toko 200, mo he ʼu tagata heka hosi ʼe toko 70 pea mo he ʼu tagata ʼe toko 200 mo ʼanatou tao ke natou olo ʼi te vaʼevaʼe hola hiva poʼuli* ki Sesalea.
24 Pea fakatoʼo age kia Paulo he ʼu hosi ke heka ai, ke ʼave haohaoa ia ia ki te kovana ko Felise.”
25 Pea neʼe ina fai leva te tohi ʼaeni:
26 “Ko au ia Kolote Lisiasi ʼe au fakaʼapaʼapa atu kia te koe, Kovana Lahi ko Felise!
27 Neʼe puke te tagata ʼaena e te kau Sutea mo natou ʼamanaki matehi ia ia, kae neʼe au haʼu fakavilivili mo ʼaku tagata solia ʼo haofaki,+ koteʼuhi neʼe au iloʼi ʼe ko te tagata Loma.+
28 Pea ʼi taku fia iloʼi te tupuʼaga ʼo tanatou tukugakoviʼi ia ia, neʼe au fakahifo ki tonatou Sanetualio.+
29 Neʼe au iloʼi ai neʼe natou tukugakoviʼi ia ia ʼo ʼuhiga mo he ʼu faʼahi ʼo tanatou Lao,+ kae neʼe mole ina fai he hala ʼe tuha ke matehi peʼe ke pilisoniʼi.
30 Kae ʼuhi neʼe fakaha mai neʼe fai he fonofono ke matehi te tagata ʼaena,+ neʼe au foimo tuku atu ia ia mo fakatotonu kia natou ʼae ʼe natou tukugakoviʼi ke natou tagi kia te koe totonu.”
31 Neʼe toʼo ai e te ʼu tagata solia ʼaia ia Paulo,+ ʼo mulimuli ki te ʼu fakatotonu ʼae neʼe foaki age, ʼo natou ʼave ia ia ʼi te poʼuli ki Atipateli.
32 ʼI te ʼaho ake, neʼe natou tuku te ʼu tagata heka hosi ke natou hoko atu mo ia, kae toe liliu natou ki te fale solia.
33 Neʼe hu te kau tagata heka hosi ki Sesalea. Neʼe natou fakatoʼo age te tohi ki te kovana pea natou toe fakaha age foki ia Paulo.
34 Neʼe ina lau te tohi, pea ina fakalavelave age pe ʼe haʼu mai te potu fenua fea. Neʼe ina iloʼi ai neʼe haʼu mai Silisia.+
35 Neʼe ina ui: “ ʼE au fagono katoa anai kia koe moka tau mai te hahaʼi ʼae ʼe natou tukugakoviʼi koe.”+ Pea neʼe ina fakatotonu ke leʼoleʼo ia Paulo ʼi te fale hau ʼo Helote.
Nota
^ Vakaʼi Te ʼu Kupu.
^ Peʼe “ ʼe ke hage ko he kaupa ʼuli neʼe pena hina.”
^ Neʼe natou manatu ʼe feala ke hoko he malaʼia mo kapau ʼe mole natou fakahoko ia te fakapapau ʼaia.
^ Klka. “tolu hola ʼo te poʼuli.”
