Numelo 9:1-23
9 Pea neʼe palalau ia Sehova kia Moisese ʼi te toafa ʼo Sinai, ʼi te ʼuluaki mahina+ ʼo te lua taʼu ʼi tanatou ʼosi mavae mai te fenua ʼo Esipito. Neʼe ina ui:
2 “ ʼE teuteuʼi anai e te kau Iselaele te sakilifisio ʼo te Pasikate+ ʼi te temi ʼae kua fakatuʼutuʼu ki ai.+
3 ʼE kotou teuteuʼi anai te sakilifisio ʼaia ʼi te ʼaho 14 ʼo te mahina ʼaeni, ʼi te ʼosi to ʼo te laʼa,* ʼi te temi ʼae kua fakatuʼutuʼu ki ai. ʼE kotou teuteuʼi anai te sakilifisio ʼo te Pasikate ʼo mulimuli ki ʼana lekula fuli pea mo ʼona faʼahiga fai fuli.”+
4 Neʼe ui ai e Moisese ki te kau Iselaele ke natou teuteuʼi te sakilifisio ʼo te Pasikate.
5 Pea neʼe natou teuteuʼi te sakilifisio ʼo te Pasikate ʼi te toafa ʼo Sinai, ʼi te ʼaho 14 ʼo te ʼuluaki mahina, ʼi te ʼosi to ʼo te laʼa.* Neʼe fai e te kau Iselaele ʼo mulimuli ki te ʼu meʼa fuli ʼae neʼe fakatotonu e Sehova kia Moisese.
6 Kae neʼe ʼi ai ni tagata neʼe heʼe maʼa ʼi tanatou fāfā ki he tahi kua mate,+ pea neʼe mole feala ai ke natou teuteuʼi te sakilifisio ʼo te Pasikate ʼi te ʼaho ʼaia. Koia ʼi te ʼaho pe ʼaia, neʼe natou olo ai kia Moisese mo Alone+
7 pea neʼe natou ui age kia Moisese: “ ʼE matou heʼe maʼa he neʼe matou fāfā ki he tahi kua mate. Kae he koʼe ʼe taʼofi anai tamatou momoli kia Sehova te molaga ʼi te temi ʼae kua fakatuʼutuʼu ki ai, fakatahi mo te kau Iselaele?”+
8 Neʼe tali e Moisese kia natou: “Kotou fakatalitali ʼi heni, ke au iloʼi pe kotea ʼae ʼe fakatotonu mai e Sehova ʼo ʼuhiga mo koutou.”+
9 Pea neʼe ui age e Sehova kia Moisese:
10 “Ke ke ui ki te kau Iselaele: ‘Kapau ʼe heʼe maʼa he tagata ia koutou peʼe ʼi ʼokotou taʼiake he neʼe fāfā ki he tahi kua mate+ peʼe kapau ʼe faifagona mamaʼo, ʼe tonu pe anai ke ina teuteuʼi te sakilifisio ʼo te Pasikate kia Sehova.
11 Pea ʼe ina teuteuʼi anai ʼi te ʼaho 14 ʼo te lua mahina,+ ʼi te ʼosi to ʼo te laʼa.* ʼE ina kai anai te sakilifisio ʼaia ʼo te Pasikate mo he ʼu pane hala fakatupu pea mo he ʼu lauʼakau kona.+
12 ʼE mole tonu anai ke ina tuku he meʼa ke toe ki apogipogi,+ pea ʼe mole ina fasiʼi anai he hui ʼe tahi ʼo te manu ʼo te sakilifisio.+ ʼE ina teuteuʼi anai te sakilifisio ʼo te Pasikate ʼo mulimuli ki te ʼu lekula fuli ʼo ʼuhiga mo te Pasikate.
13 Kae kapau neʼe maʼa he tagata pe neʼe mole faifagona mamaʼo kae neʼe mole ina teuteuʼi te sakilifisio ʼo te Pasikate, ʼe tonu anai ke matehi te tagata* ʼaia,+ koteʼuhi neʼe mole ina momoli te molaga ʼa Sehova ʼi te temi ʼae kua fakatuʼutuʼu ki ai. Pea ʼe utu pe anai e te tagata ʼaia te ʼu fua ʼo tana agahala.
14 “ ‘Pea kapau ʼe nofo he matapule ʼi tokotou fenua, ʼe tonu anai ke ina toe teuteuʼi te sakilifisio ʼo te Pasikate kia Sehova.+ ʼE ina fai anai ʼo mulimuli ki te lekula ʼo te Pasikate pea mo tona faʼahiga fai.+ ʼE ko he lao pe anai ʼe tahi maʼa te matapule pea mo te tagata Iselaele.’ ”+
15 ʼI te ʼaho ʼae neʼe fakatuʼu ai te tapenakulo,+ neʼe ʼaofi leva e te ʼao te tapenakulo, ia te fale la ʼo te Fakamoʼoni. Kae ʼi te afiafi neʼe ʼi ai he meʼa neʼe hage ko he afi neʼe tuʼu ʼi te fuga tapenakulo ʼo kaku ki te uhu.+
16 Neʼe hoko tuʼumaʼu pe te faʼahi ʼaeni: ʼI te ʼaho, neʼe ʼaofi e te ʼao ia te tapenakulo, kae ʼi te poʼuli, neʼe ko he meʼa neʼe hage ko he afi.+
17 ʼI te temi ʼae neʼe malaga ai te ʼao mai te fale la, neʼe mavae atu aipe te kau Iselaele,+ pea ʼi te faʼahi ʼae neʼe tuʼu ai te ʼao, neʼe fakatuʼu ai e te kau Iselaele tonatou nofoʼaga.+
18 Neʼe mavae te kau Iselaele ʼo mulimuli ki te fakatotonu ʼa Sehova, pea neʼe natou fakatuʼu tonatou nofoʼaga ʼo mulimuli ki te fakatotonu ʼa Sehova.+ Ka tuʼu maʼu te ʼao ʼi te fuga tapenakulo, neʼe mole natou mavae.
19 Kapau neʼe tuʼu te ʼao ʼi te fuga tapenakulo lolotoga ni tuʼuga ʼaho, neʼe fakalogo pe te kau Iselaele kia Sehova pea neʼe mole natou mavae.+
20 ʼI ʼihi temi, neʼe tuʼu te ʼao lolotoga ni kiʼi ʼaho ʼi te fuga tapenakulo. Ka hoki fakatotonu e Sehova ke natou mavae, pea natou mavae. Kae ka mole fakatotonu e Sehova ke natou mavae, pea mole natou mavae.
21 ʼI ʼihi temi, neʼe tuʼu pe te ʼao mai te afiafi ʼo kaku ki te uhu. Pea ʼi te uhu ka malaga te ʼao, neʼe natou mavae ai. Tatau aipe pe neʼe malaga te ʼao ʼi te ʼaho peʼe ko te poʼuli, kae neʼe natou mavae.+
22 Ka tuʼu te ʼao ʼi te fuga tapenakulo lolotoga ni ʼaho ʼe lua, peʼe ko he mahina katoa, peʼe fualoa age, neʼe mole mavae te kau Iselaele. Kae ka malaga leva te ʼao, pea hoki natou mavae ai.
23 Neʼe natou fakatuʼu tonatou nofoʼaga ʼo mulimuli ki te fakatotonu ʼa Sehova, pea neʼe natou mavae ʼo mulimuli ki te fakatotonu ʼa Sehova. Neʼe natou fakahoko tonatou maʼua kia Sehova, ʼo mulimuli ki te fakatotonu ʼae neʼe fakaha e Sehova kia Moisese.
Nota
^ ʼE fakaʼuhiga ki te temi ʼae ʼe to ai te laʼa ʼo kaku ki te malu ʼo te afiafi.
^ ʼE fakaʼuhiga ki te temi ʼae ʼe to ai te laʼa ʼo kaku ki te malu ʼo te afiafi.
^ ʼE fakaʼuhiga ki te temi ʼae ʼe to ai te laʼa ʼo kaku ki te malu ʼo te afiafi.
^ Hep. nèphèsh. Vakaʼi Te ʼu Kupu.
