Selemia 24:1-10
-
Te ʼu fiku ʼae ʼe kano lelei mo ʼae ʼe kovi (1-10)
24 Neʼe fakaha mai leva e Sehova te ʼu kato fiku ʼe lua neʼe hili ia muʼa ʼo te fale lotu ʼo Sehova. (ʼI te temi ʼaia, neʼe kua ʼave popula mai Selusalemi ki Papiloni e te Hau ʼo Papiloni ko Nepukanesa ia Sekoniasi*+ foha ʼo Soakimi,+ te hau ʼo Suta, pea mo te ʼu tama ʼaliki ʼo Suta, mo te ʼu tufuga ukamea* pea mo te ʼu tufuga kehekehe.)+
2 ʼE ʼai ʼi te tahi kato te ʼu fiku ʼe kano lelei ʼosi. Neʼe hage ia ko te ʼu fiku ʼo te ʼuluaki taʼukai. Kae ʼe ʼai ʼi te tahi kato te ʼu fiku ʼe kovi ʼosi ʼo mole feala pe la tona kai.
3 Pea neʼe fehuʼi mai e Sehova: “Selemia, kotea ʼae ʼe ke sio ki ai?” Neʼe au tali age: “Ko te ʼu fiku. ʼE ʼi ai te ʼu fiku ʼe kano lelei ʼosi, kae ʼe ʼi ai te ʼu fiku ʼe kovi ʼosi ʼo mole feala pe la tona kai.”+
4 Neʼe palalau mai leva ia Sehova, ʼo ina ui:
5 “Koʼeni te folafola ʼa Sehova, te ʼAtua ʼo Iselaele: ‘Ko te kau popula ʼo Suta ʼae neʼe au kapu ʼi te fenua ʼaeni ʼo ʼave ki te fenua ʼo te kau Kaletea, ʼe natou hage ko te ʼu fiku kano lelei ʼaeni pea ʼe au tokaga lelei anai kia natou.
6 ʼE au tokaga anai ke fua lelei kia natou pea ʼe au toe ʼaumai anai ki te fenua ʼaeni.+ ʼE au fakatuʼu anai natou kae ʼe mole au maumauʼi anai. ʼE au to anai natou kae ʼe mole au taʼaki anai.+
7 ʼEi, ʼe au uga anai tonatou loto ke natou fia iloʼi ia au, ke natou iloʼi ko au ko Sehova.+ ʼE natou liliu anai ko taku hahaʼi pea ʼe au liliu anai ko tonatou ʼAtua,+ he ʼe natou toe liliu mai anai kia te au ʼi tonatou loto katoa.+
8 “ ‘Kae koʼeni te folafola ʼa Sehova ʼo ʼuhiga mo te ʼu fiku kovi ʼae ʼe mole feala pe la tona kai:+ “ ʼE feia anai taku faʼahiga sio ki te Hau ʼo Suta ko Setesiasi,+ mo ʼana tama ʼaliki pea mo te hahaʼi ʼo Selusalemi ʼae neʼe hao, ia natou ʼae neʼe nonofo ʼi te fenua ʼaeni pea mo natou ʼae ʼe nonofo ʼi Esipito.+
9 ʼE natou liliu anai ko he meʼa fakalialia ki te ʼu puleʼaga fuli ʼo te kele, ʼuhi ko te malaʼia ʼae ka au fakahoko anai kia natou.+ ʼE fakalainoaʼi anai natou ʼi te ʼu potu fuli ʼae ka au fakamavetevete ai natou.+ ʼE vaʼi anai natou mo talanoaʼi ʼi te ʼu takuga lea mo te ʼu faitutuku.+
10 ʼEi, ʼe au ʼaumai anai kia natou te tau,+ mo te hoge pea mo te ʼu taʼi mahaki*+ ʼo kaku ki tanatou pupuli ʼi te fenua ʼae neʼe au foaki kia natou mo ʼanatou kui.” ’ ”
Nota
^ ʼE toe higoa ko Seoakini peʼe ko Konia.
^ Peʼe lagi “te ʼu tagata laga kaupa.”
^ Peʼe “te mahaki.”
