Senesi 29:1-35
29 Hili ʼaia, neʼe hoko atu e Sakopo tona fagona ʼo alu ki te fenua ʼo te hahaʼi ʼo te potu Esite.
2 Neʼe sio leva ki he vai keli ʼi he koga meʼa lunaʼia pea mo ni faga ovi ʼe tolu neʼe takokoto ʼo ovi ki ai, koteʼuhi neʼe fakainu mahani ʼi te vai keli ʼaia ni faga manu. Neʼe pupunu te vai keli ʼaki he foʼi maka lahi ʼosi.
3 ʼI te temi ʼae neʼe kua fakatahiʼi ai te faga manu fuli ki ai, neʼe teka e te ʼu tagata tauhi ovi te foʼi maka ʼo natou fakainu ai te faga ovi. Hili ʼaia, neʼe natou toe teka te foʼi maka moʼo pupunu ʼaki te vai keli.
4 Pea neʼe fehuʼi age e Sakopo kia natou: “Siʼoku ʼu tehina, ʼe kotou ʼomai mai te kolo fea?” Neʼe natou tali age: “Mai Halani.”+
5 Neʼe ina ui age kia natou: “ ʼE kotou iloʼi koa ia Lapane,+ te mokopuna ʼo Naole?”+ Neʼe natou tali age: “ ʼEi, ʼe matou iloʼi ia ia.”
6 Neʼe ina ui age: “ ʼE lelei pe ia ia?” Neʼe natou tali age: “ ʼEi, ʼe lelei pe. Pea koʼena tona ʼofafine ko Lasele+ ʼe haʼu mo tana faga ovi!”
7 Neʼe ina ui: “ ʼE kei loa ʼosi te ʼaho. Pea ʼe mole ko te temi ʼaeni ke fakatahiʼi ai te faga manu. Kotou fakainu te ʼu ovi pea kotou tuku ke natou kai haʼele.”
8 Neʼe natou tali age: “ ʼE mole feala ke matou fai te meʼa ʼaia, kae heʼeki fakatahiʼi te faga manu fuli pea mo teka te foʼi maka ʼae ʼe pupunu ʼaki te vai keli. Ka ʼosi fai te faʼahi ʼaia, pea hoki matou fakainu te faga ovi.”
9 ʼI tana lolotoga faipalalau ʼaia mo natou, neʼe tau mai ia Lasele mo te ʼu ovi ʼo tana tamai, he neʼe ko he fafine tauhi ovi.
10 ʼI te sio ʼa Sakopo kia Lasele, te ʼofafine ʼo Lapane, te tokolua ʼo tana faʼe pea mo te ʼu ovi ʼa Lapane, neʼe alu atu aipe ia Sakopo ʼo teka te foʼi maka ʼae neʼe pupunu ʼaki te vai keli pea neʼe ina fakainu te ʼu ovi ʼa Lapane.
11 Neʼe ʼuma leva ia Sakopo kia Lasele pea neʼe kamata tagi leʼo lahi.
12 Pea neʼe fakaha age e Sakopo kia Lasele ʼe kaiga mo* tana tamai pea ko ia ʼe ko te tama ʼa Lepeka. Pea neʼe lele leva ia Lasele ʼo fakaha age ki tana tamai.
13 ʼI te maʼu logo ʼa Lapane+ ʼo ʼuhiga mo Sakopo, te tama ʼo tona tokolua, neʼe lele atu aipe ʼo fakafelaveʼi ki ai. Neʼe faʼufua mo ʼuma ki ai pea neʼe ina ʼave leva ki tona ʼapi. Pea neʼe ina fakamatala age kia Lapane te ʼu meʼa fuli ʼae neʼe hoko kia ia.
14 Pea neʼe ui e Lapane: “ ʼE ta kaiga totonu.”* Koia, neʼe nofo ai io ia ʼi he mahina katoa.
15 Neʼe ui leva e Lapane kia Sakopo: “ ʼE tonu koa ke ke gaue noa mai kia au ʼuhi pe ʼe ta kaiga?*+ Fakaha mai pe kotea te totogi ʼae ʼe ke loto ki ai.”+
16 Neʼe ʼi ai te ʼu ʼofafine ʼe lua ʼo Lapane. Neʼe higoa te taʼahine lahi ko Lea pea neʼe higoa te muli ko Lasele.+
17 Neʼe mole matalelei te ʼu kanoʼi mata ʼo Lea kae neʼe hoihoifua pea mo finemui ia Lasele.
18 Neʼe manako ia Sakopo ia Lasele, koia neʼe ina ui ai: “ ʼE au gaue anai kia koe lolotoga taʼu ʼe fitu ke au maʼu tou ʼofafine muli ko Lasele.”+
19 Neʼe ui age e Lapane: “ ʼE lelei age ke au foaki atu ia ia kia koe ʼi haku foaki ki he tahi age tagata. Haga nofo io ʼoku.”
20 Pea neʼe gaue ia Sakopo lolotoga taʼu ʼe fitu ke ina maʼu ia Lasele,+ kae neʼe hage kia ia ko ni kiʼi ʼaho pe ia he neʼe manako ia ia.
21 Neʼe ui leva e Sakopo kia Lapane: “Foaki mai toku ʼohoana he ʼe kua ʼosi toku temi gaue, pea ke au momoe mo ia.”
22 Neʼe fakatahitahiʼi ai e Lapane te hahaʼi fuli ʼo te koga meʼa ʼaia pea neʼe ina fai he kaitahi.
23 Kae ʼi te poʼuli, neʼe ina ʼaumai kia Sakopo tona ʼofafine ko Lea ke momoe mo ia.
24 Neʼe toe foaki foki e Lapane tana fafine faifekau ko Silipa ki tona ʼofafine ko Lea, ke liliu ko hana fafine faifekau.+
25 ʼI te ʼala uhu ake, neʼe sio ia Sakopo neʼe ko Lea! Koia neʼe ina ui ai kia Lapane: “He koʼe neʼe ke fai mai te meʼa ʼaia? Neʼe mole koa la au gaue kia koe ke au maʼu ia Lasele? He koʼe neʼe ke kakaʼi au?”+
26 Neʼe tali age e Lapane ki ai: “ ʼE mole ko he agamahani ʼi te fenua ʼaeni ke ʼuluaki fakaʼohoana te taʼahine muli ʼi te taʼahine lahi.
27 Ke ke fakaʼosi te vahaʼa mo te fafine ʼaia. Hili ʼaia, ʼe au toe foaki atu anai tona kiʼi tehina, kae ʼe tonu ke ke toe gaue kia au lolotoga taʼu ʼe fitu.”+
28 Neʼe mulimuli pe ki ai ia Sakopo pea neʼe ina fakaʼosi te vahaʼa mo te fafine ʼaia. Hili ʼaia, neʼe foaki leva e Lapane kia ia tona ʼofafine ko Lasele ke ʼohoana mo ia.
29 Pea neʼe toe foaki foki e Lapane tana fafine faifekau ko Pila+ ki tona ʼofafine ko Lasele, ke liliu ko hana fafine faifekau.+
30 Neʼe momoe leva ia Sakopo mo Lasele. Neʼe ʼofa ia Sakopo ia Lasele ʼo lahi age ia Lea. Pea neʼe toe gaue kia Lapane lolotoga taʼu ʼe fitu.+
31 ʼI te sio ʼa Sehova neʼe mole ʼofainaʼi* ia Lea, neʼe ina fakafealagia ai ke faitama,+ kae neʼe paʼa ia Lasele.+
32 Koia, neʼe faitama ai ia Lea pea neʼe ina fanauʼi he tamasiʼi tagata ʼo ina fakahigoaʼi ko Lupeni,*+ he neʼe ina ui: “Kua sio ia Sehova ki toku mamahi,+ pea ʼi te lakaga ʼaeni, ʼe ʼofa anai toku ʼohoana ia au.”
33 Pea neʼe toe faitama, ʼo ina fanauʼi he tamasiʼi tagata. Pea neʼe ina ui: “Kua logo ia Sehova ki ʼaku lauga ʼuhi ko toku mole ʼofainaʼi, koia neʼe ina toe foaki mai te tamasiʼi ʼaeni.” Pea neʼe ina fakahigoaʼi ko Simeone.*+
34 Pea neʼe toe faitama ʼo ina fanauʼi he tamasiʼi tagata. Pea neʼe ina ui: “ ʼI te lakaga ʼaeni, ʼe pipiki anai toku ʼohoana kia au, koteʼuhi neʼe au fanauʼi ʼona foha ʼe tolu.” Koia neʼe ina fakahigoaʼi ai ko Levi.*+
35 Pea neʼe toe faitama leva ʼo ina fanauʼi he tamasiʼi tagata. Pea neʼe ina ui: “ ʼI te lakaga ʼaeni, ʼe au vikiʼi anai ia Sehova.” Koia neʼe ina fakahigoaʼi ai ko Suta.*+ Pea neʼe gata ai leva tana fanaunau.
Nota
^ Hep. “ ʼe ko te tehina ʼo.”
^ Hep. “Ko koe ko toku hui pea mo toku kakano.”
^ Hep. “tau tehina.”
^ Hep. “neʼe fehiʼaʼinaʼi.”
^ Ko tona fakaʼuhiga “Kotou Sisio, Ko He Tama!”
^ Ko tona fakaʼuhiga “Logo.”
^ Ko tona fakaʼuhiga “Pipiki,” peʼe “Fakatahi.”
^ Ko tona fakaʼuhiga “Vikiʼi,” peʼe “Ia Ia ʼAe ʼe Vikiʼi.”
